Read Ngowili Yekpei Numu Kpɛlɛɛ Va MATIU 15 Bible Online

MATIU 15 - Ngowili Yekpei Numu Kpɛlɛɛ Va bible

MATIU 15

¹Na wooma Farisiisia lɛɛnga kɛɛ Sawei Yeekaamɔisia ti gbuailɔ Jelusalɛm ti wa Yesu gama ti ngi mɔli tɛɛ,

²“Gbɛe bi gaalopoisia tɛɛ sawei nasia hou mu maadani ti ndani wɔɔ? Ajifa tɛɛ ti yeya wua pɛiŋ a nguayii ji ta yɛ mɛhɛɛ mɛma.”

³Yesu i kpɛmboilɔ yɛ, “Gbɛe wua vulii wa Ngewɔ jawei nyani aako wu jia a wɔwɔmableisia ti gaai?

⁴ Gbamaile Ngewɔ ndeilɔ yɛ, ‘Baa gɔɔ bi kɛkɛ ma kɛɛ bi nje,’ yɛ gbɔma, ‘Numu gbi lekee a njia nyamu le kɔloongɔ ngi kɛkɛ ma ɔɔ ngi nje, mahoungɔ ti ngi waa.’

⁵Kɛɛ wua wuaa nungaa gama wɛɛ, Ina hani lɔ numu yeya a gu a gbɔla la ngi kɛkɛ ma ɔɔ ngi nje, kɛɛ i nde yɛ ‘i yeehani na venga Ngewɔ wɛ,’ kɛ kpa gbi ii yaa ngi ma baa gɔvaa ngi kɛkɛ ma ɔɔ ngi nje.

⁶Hii wu Ngewɔ layie hunyaninga aako wa nungaa gaa a wu maadani ti jawei.

⁷Baayablaa lɔ a wue! Ngewɔ lutui Aisaya i tɔnya yia lɔ leni wɔɔ kɔlooni wu ma, ji i nyɛini yɛ Ngewɔ yɛ,

⁸ ‘Nungei jisia ta baa ve nya wɛ a ti lɛi lɔ kɛɛ ti liisia maguhangɔ poloŋ a nge.

⁹Gbama mia a fɛlii hɛi na ta nya vɛli la ajifa ti nuuvu jawa gbatɛngɔisia lɔ gɛma a nungaa piengɔ bɛɛ nya jaweisia mia.’ ”

¹⁰Kɛ Yesu i fahii lolinga ngi gama i nde ti ma yɛ, “A wolo ji ma ngi ndema, wu yeembui gɔɔ.

¹¹Mɛhɛɛi na numu a mɛ ta ii le aa yɛ ngi manɔhɔma Ngewɔ yaama kɛlee na a gbua ngi laa, tamia a numu manɔhɔ Ngewɔ yaama.”

¹²Kɛ ngi gaalopoisia ti wanga ngi gama ti ngi mɔli tɛɛ, “Bi kɔɔlɔ kɛ na bi ndeni i gbalɛilɔ Farisiisia ma?”

¹³Yesu kpɛmboilɔ yɛ, “Tuhani gbi lekee nya Kɛkɛ na Ngelegoohu ii le aa hii, a pukpualɔ.

¹⁴Ti hinda aa gbewe wu ma! Pumublaa mia a tie ti pelei gɛma a pumublaa wekeisia, tawao pumumɔ i longaa ngi mbaa pumumɔ gulɔ pele gɛva a ngie, ti veenjɔ ta gulalɔ a ndowei.”

¹⁵Pita i yɛpɛilɔ yɛ; “Njɛpɛi na bi ndeni yeembui gɛ a mue.”

¹⁶Yesu i ndeilɔ ti ma yɛ, “Kiahuna bɛɛ wu nɛmahu ii yaa leweni aa lewee nungaa wekeisia ma?

¹⁷Wuii kɔɔ kɛ hani gbi lekee numu a nguaa laa a li ngi goi hu lɔ, i lewe i gbua ngi goohu?

¹⁸Kɛɛ hindei nasia ta gbua numu laa ta hiye numu lii hu lɔ, tawao tia mia ta numu manɔhɔ Ngewɔ yaama.

¹⁹Ajifa kili nyamuisia ta gbua numu lii hu lɔ ta wa a numu waalɛi, pue gbualei, sɔɔ nyamui wielei, humɛi, ndɛ-jeli wuaalei kɛɛ njafɛi.

²⁰Hinda nyamui jisia mia ta numu manɔhɔ Ngewɔ yaama; kɛɛ mɛhɛɛ mɛlaa a tokoi na mawuangɔ ii le ɛɛ numu manɔhɔ Ngewɔ yaama.”

²¹Yesu i gbuailɔ mia i li Taya kɛɛ Saidɔn yeetatei hu.

²²Kenaan nyaapo yila i yɛ heini yeendɔlɛi na hu i wɛilɔ ngi gama yɛ, “Devidi Hindoloi, nya mamamau lɔ, Ndemɔi! Ngafa nyamu lɔ nya nyahaloi hu tawao ngi yɛyii nyamungɔ waa le.”

²³Kɛɛ Yesu ii njia yakpe bɛɛ lɛni ngi gama. Kɛ ngi gaalopoisia ti wanga ngi gama ti ngi manɛnɛ tɛɛ, “Pie i li, ajifa taa toma mu ma a sɔlɛ bondei ji!”

²⁴Kɛ Yesu i potenga yɛ, “Ngewɔ i nya loonga lekee Isrɛlblei nasia lɔ gama ti wiengɔ kia mbalangɛi nasia na ta lohu.”

²⁵Kia nyaapoi i ji mɛnini kɛ i wanga i gula Yesu gɔwɔbu yɛ, “Ndemɔi, gbɔ nya ma!”

²⁶Yesu i poteilɔ yɛ, “Ii nyandeni ndengeisia ti mɛhɛɛ wumbuva bi pu ngilangɛisia wɛ.”

²⁷Nyaapoi i poteilɔ yɛ, “Tɔnya le, Ndemɔi, kɛɛ ngilangɛisia vulii bɛɛ ta mɛhɛɛ gbukpui nasia lɔ mɛ ta gbua ti loblɛisia ti tebii ma ta gula.”

²⁸Kɛ Yesu i potenga i nde ngi ma yɛ, “Nyapoi, bi layii a nge ngɔlɔngɔ waa le! Na bi longɔ la a wielɔ bi wɛ.” Ngi nyahaloi i bawoilɔ ngaamɛi na.

²⁹Yesu i leweilɔ mia ma i li a Galili Wopei gbla wee. I lɛilɔ ngiye yila hu i hei na.

³⁰Faha waa ti wailɔ ngi gama a nasia tɛɛ gu a jialaa kɛɛ maleteblaa kɛɛ pumublaa kɛɛ mumuisia kɛɛ heegbɛ gboto weka ti ti la ngi gɔwɔbu, kɛ i ti bawonga.

³¹Fahii gbi ti wuhu i wuilɔ ji ti tɔni mumuisia ta yɛpɛ, maleteblaa ti bawongɔ, nasia tii yɛ gu a jialaa ta jia, pumublaa ta hinda lɔ; kɛ ti Isrɛlblɛisia ti Yewɔɛi latonga.

³²Yesu i ngi gaalopoisia lolilɔ ti wa ngi gama, kɛ i ndenga yɛ, “Nungei jisia ti mamamau i nya lɔnga ajifa mua tieni mu lewenga na njii sawa va tawao mɛhɛɛ ii yaa ti yeya. Ngii loni ngi ti vaya ina ngii ti gɔni a mɛhɛɛ ajifa ta gelulɔ pelei hu.”

³³Kɛ ngi gaalopoisia ti ngi mɔlinga tɛɛ, “Mi lɔ ma mɛhɛɛ jɔɔ na ndɔgbɔ lambɛi ji ma i gu a faha bondei ji?”

³⁴Yesu i ti mɔlilɔ yɛ, “Bledii gbuha lolɛ mia i wu yeya?” Kɛ ti kpɛmbonga tɛɛ, “Bledii gbuha wɔfla kɛɛ nyɛɛ mumu sɛkɛngɔ.”

³⁵Kɛ Yesu i pieilɔ nungeisia ti hei ndɔmɛi.

³⁶Kɛ i bledii gbuha wɔfla wumbunga kɛɛ nyɛi, i siɛgbua Ngewɔ ma, i ngaingai, i fe ngi gaalopoisia wɛ, ti kɔlɛkɔlɛ nungeisia ma.

³⁷Numui gbi ti mɛilɔ ti goi i ve. Kɛ kaalopoisia ti yeengaingaingɔi yeemɔnii wumbunga kungɔ a samba wɔfla.

³⁸Hingei nasia ti mɛhɛɛ na mɛni ti yɛ tauji naani, nyahangaa kɛɛ ndengaa tii ma.

³⁹Kɛ Yesu i vɛlinga fahii ma, i wili ndɛndɛ yila hu, i li Magadan latei hu.