Read Ngowili Yekpei Numu Kpɛlɛɛ Va MATIU 16 Bible Online

MATIU 16 - Ngowili Yekpei Numu Kpɛlɛɛ Va bible

MATIU 16

¹Farisiisia lɛɛnga kɛɛ Sadusiisia ti wɛilɔ Yesu gama ti longɔ ti ngi gɔlɛ, famia ti ndeilɔ ngi ma tɛɛ i kabande hinda yila wie ti wɛ kɛva kɛ Ngewɔ gbayei lɔ ngi hu.

²Kɛɛ Yesu i kpɛmboilɔ yɛ, “Foloi i yaa gulama, wa ndelɔ wɛɛ, ‘Ndɔma a nyandelɔ sina, ajifa ngelei ma gbɔwungɔ.’

³I yaa a ngenda tɛtei wa ndelɔ wɛɛ, ‘Vivii i gulamaa ajifa ngelei ma gbɔwungɔ tawao magbindingɔ.’ Wa ngeleima gbelɔ wu kɛ gbɔɔ i wama wiema kɛɛ tɔmaseli jisia ti gɛma kiahuna wɛɛ gu a fasaila!

⁴Wu haablei jisia wu nyamuni kpa tawao wu gafiyani kpa a Ngewɔ! Wuaa kabande hinda huvɛlima nya ma, kɛɛ kabande hinda gbi ɛɛ wie wu wɛ kɛlee Jona gabande hindei.” Kɛ i ti longa i li.

⁵Ji kaalopoisia ti Popɛi leweni, ti li yeekaka wekei ma, ti lemailɔ a lila a bledii.

⁶Yesu i ndeilɔ ti ma yɛ, “A wu mahugbe a Farisiisia kɛɛ Sadusiisia ti yisti.”

⁷Kɛ ti tɔtonga a yɛpɛlaa luahu tɛɛ, “I ji lengalɔ jifa muii wani a bledii gbi.”

⁸Yesu i na gɔɛilɔ ti yɛ nde kɛ i ti mɔlinga yɛ, “Gbɛe wu yɛpɛma luahu kɔlooni bledii vɛli ma? Wu layii a nge i guloni kpa!

⁹I yee na wu wuhu baangɔ hii kiahuna bɛɛ? Ii loni wu nɛmahu ji ngi bledii gbuha lɔɔlii yaingaini hindo tauji lɔlisia va samba lolɛ mia yeemɔnii i ndaveni?

¹⁰Ɔɔ gbɔma bledii gbuha wɔflei hindo tauji naanisia va, samba lolɛ mia wu ndaveni a yeemɔnii?

¹¹I yee na wuii kɔɔni kɛ bledii yɛpɛ ii le nga yɛ ndema wu ma ji ngi ndeni ngɛɛ wu wu mahugbe a Farisiisia kɛɛ Sadusiisia ti yisti!”

¹²Kaalopoisia ti kɔɛilɔ na kɛ i ti laahima kɔlongɔ kaa na lɔ ma Farisiisia kɛɛ Sadusiisia ti yɛ nungaa gaa la, yisti na ii le a pie bledii a ve.

¹³Yesu tia ngi gaalopoisia ti liilɔ tatei na hu i Siisaria Filipai gblanga kɛ i ti mɔlinga yɛ, “Nungaa tɛɛ ye lɔ a nya nya Nuuvu Hindoloi?”

¹⁴Ti kpɛmboilɔ tɛɛ, “Nungaa lɛɛnga tɛɛ Jɔn Nguamɔi mia a bie, pekeisia tɛɛ Ilaija, pekeisia gbɔma tɛɛ Jɛrimaya ɔɔ Ngewɔ lutui wekeisia yilayee.”

¹⁵Kɛ i ti mɔlinga yɛ, “Ɔɔ wua? Wua wɛɛ ye lɔ a nge?”

¹⁶Saimɔn Pita i kpɛmboilɔ yɛ, “Bia lɔ Ngewɔ Maha Heingɔi a bie, kunafɔ Yewɔɛi ngi Hindoloi.”

¹⁷Yesu poteilɔ yɛ, “Hooyoo, Saimɔn, Jɔn loi! Ajifa tɔnyɛi ji bi ndenga ii gbuani nuuvu gbi gama; nya Kɛkɛ na i ngelegoohu ta mia i kɛni a bie.

¹⁸Faale, ngi nde bi ma, Pita, fawa gɔtii mia a bie, tawao yeefawei ji ma lɔ nga nya Vahɛi lɛma na tawao hee vulii bɛɛ ɛɛ gu aa temaya jɔɔ yeepɛlei maahu kunafɔ.

¹⁹Nga Ngelegoohu Mahayɛi yeejiiwiisia velɔ bi wɛ, tawao hinda gbi lekee ba mabali dunya, Ngewɔ a maabalilɔ, tawao hinda gbi lekee ba luma ma dunya, Ngewɔ a lumalɔ ma.”

²⁰Kɛ Yesu i ndenga ngi gaalopoisia ma yɛ taa hugɛ a numu gbi kɛ ta lɔ Ngewɔ Maha Heingɔi a ngie.

²¹I hiye watii na ma, Yesu tɔtoilɔ a ndela ngi gaalopoisia ma gbalauŋ yɛ, “Nga lilɔ huɛɛŋ Jelusalɛm, kpakoleisia kɛɛ Saagbuablaa Waawaisia kɛɛ Sawei Yeekaamɔisia ti kpalɛ gboto la nya ma. Ta nya waalɔ kɛɛ lɔwɔi yeesawei ma nga vululɔ ngi hiye hee hu.”

²²Pita i Yesu lokoi houilɔ i gbua a ngie kaalopo wekeisia lia, i tɔtoo a yialaa ngi ma yɛ, “Ndemɔi, gbula ma! Ji ɛɛ bi wie kulo bɛɛ!”

²³Kɛɛ Yesu i woteilɔ i nde Pita ma yɛ, “Hiye mbɛ, Seitana! Gbani yilingɔ mia a bie nya welei ma, ajifa bii gilima kia Ngewɔ a gili la, biaa gilima kia nuuvu na.”

²⁴Kɛ Yesu i ndenga ngi gaalopoisia ma yɛ, “Numu gbi i longalɔ i to nya ma, mahoungɔ i gbele ngi liima hindei gbi ma, i ngi krɔsii la gbakima, i wa mu li.

²⁵Gbamaile numui na ngi longɔ i dunya lɛɛvui ngi ndɛi mabawao, a baalɔ la; kɛɛ numu gbi lekee a baa a dunya lɛɛvui ngi ndɛi nya wooma, a kunafɔ lɛɛvui majɔɔlɔ.

²⁶Gbamaile gbɔɔ sie a numu nafa la ina bɛɛ i dunyei gbi majɔɛilɔ kɛɛ i baa a kunafɔ lɛɛvui? Hani gbii na numu aa gu a felaa kunafɔ lɛɛvui majɔva.

²⁷ Ajifa Nuuvu Hindoloi tia ngi malikeisia lɔ wama hugutungɔ ngi Kɛkɛ gbayei hu, tawao yeewatii na, a numui gbi pawalɔ kia ngi wiehindeisia ti na.

²⁸Ngi hugɛ a wue a tɔnya, nungaa lɔ looni mbei tɛɛ haa i lo hu ti Nuuvu Hindoloi lɔ i wa Mahɛi a ngie.”