Read Ngowili Yekpei Numu Kpɛlɛɛ Va MATIU 17 Bible Online

MATIU 17 - Ngowili Yekpei Numu Kpɛlɛɛ Va bible

MATIU 17

¹Lɔwɔ wɛita lewengɔ wooma Yesu i Pita wumbuilɔ kɛɛ Jemisi kɛɛ ngi ndewei Jɔn tia tieni lekee ti lɛ ngiye guha yila hu.

²Ti loni ngi gbema kɛ i maluvenga ti yeya; ngi yambui i yɛlɔ a voo kia foloi na tawao ngi maguleisia ti goleilɔ fofo.

³Kɛ kaalopo saweisia ti Mojisi lɔnga kɛɛ Ilaija tia Yesu-ni ta yɛpɛ.

⁴Kɛ Pita i yɛpɛnga yɛ, “Ndemɔi, nyandengɔ waa le mu mbei; i nɛngaa bi wɛ nga bafa sawa lolɔ mbei, yeengila i bi va, yeengila i Mojisi va, yeena i Ilaija va.”

⁵ I loni yɛpɛmaa kɛ lugbui na a voo dauŋ i ti magbolinga, kɛ Ngewɔ i yɛpɛnga yeelugbui hu yɛ, “Nya liima Hindoloi lɔ a ji, ngi hinda i nya liilɛlingɔ waa; a wolo ngi ma.”

⁶Ji kaalopoisia ti ngoi na mɛnini ti luwɛilɔ hulewengɔ, ti gula ndɔmɛi ta ti yambui lɔwu.

⁷Yesu i wɛilɔ ti gama i jaa a tie yɛ, “A hiye tawao waa luwa.”

⁸Kɛ ti ti wui wumbunga kɛɛ tii numu weka gbi lɔni kɛlee Yesu yakpe.

⁹Kia ti yɛ ngiyei yeima Yesu i ndeilɔ ti ma kpɔtukpɔtu yɛ, “Ji wu hulɔnga waa hugɛ a numu gbi kɛlee Numu Hindoloi a vulu pɛiŋ i hiye hee hu.”

¹⁰ Kɛ kaalopoisia ti ngi mɔlinga tɛɛ, “Gbɛe Sawei Yeekaamɔisia ta nde tɛɛ Ilaija a wa pɛiŋ Ngewɔ Maha Heingɔi i yaa wa?”

¹¹I kpɛmboilɔ yɛ, “Ilaija a wa vulii pɛiŋ i hindei gbi hugbatɛ.

¹²Kɛɛ ngi hugɛ a wue kɛ Ilaija i wilanga bɛɛ a walaa kɛɛ nungaa tii ngi gɔɔni tawao ti ti liimɛi lɔ wieni a ngie. Hii lɔɔ ta kpalɛ la Numu Hindoloi ma.”

¹³Kɛ kaalopoisia ti kɔɔnga kɛ ngi lii i Jɔn Nguamɔi lɔ ma njɛpɛi na va i ndeni ti ma kɔlooni Ilaija ma.

¹⁴Kia ti yamani fahii gama, taamɔ yila i wɛilɔ Yesu gama, i wombi gbakpa ngi gɔwɔbu,

¹⁵yɛ, “Ndemɔi, manu nya hindoloi ma, ajifa kpɔgbɔnii mia i ngi ma tawao a ngi gulalɔ nyamungɔ waa, a gula ngɔmbui ya pɛɛpɛ kɛɛ njɛi hu.

¹⁶Ngi wɛilɔ a ngie bi gaalopoisia gama kɛɛ tii guni taa ngi bawo.”

¹⁷Yesu i ndeilɔ ngi ma yɛ, “Wu haablei jisia wuii lani kulo bɛɛ va a Ngewɔ tawao wu yakani kpa! Nga yee lɛmbi wu lia? Nga yee lɛmbi nya lii houma wu va? A wa a ndopoi mbei nya gama.”

¹⁸Yesu i gbandɛilɔ ngafa nyamui na laa i yɛ ndopoi hu yɛ i gbua ngi hu. Kɛ i gbuanga ngi hu tawao ndopoi i bawoilɔ ngaamɛi na.

¹⁹Na wooma kaalopoisia lekee ti wɛilɔ Yesu gama ti ngi mɔli tɛɛ, “Gbɛe mua muii guni a ngafa nyamui na gbuala?”

²⁰I kpɛmboilɔ yɛ, “Ajifa wu layii a Ngewɔ hugbɛɛngɔ. Ngi nde wu ma a tɔnya, ina wu langɔe a Ngewɔ kulohii bɛɛ, wa ndelɔ ngiyei ji ma wɛɛ, ‘Gule mbei bi lewe mia,’ i gule; tawao wuii yɛ gbaha hinda gbi ma. [

²¹“Kɛɛ gbɛogbɛ weka ɛɛ gu aa ngafa nyamui yee ji nyɔkɔ gbua numu hu kɛlee Ngewɔ vɛlilaa lekee kɛɛ su houla.”]

²²Kia Yesu gaalopoisia kpɛlɛɛ ti lɛni ma Galili, i ndeilɔ ti ma yɛ, “Tiaa wama nya nya Numu Hindoloi houma ti ngi ve nungaa wɛ,

²³tawao yeenungeisia ta ngi waalɔ; kɛɛ lɔwɔi yeesawei ma a vululɔ i hiye hee hu.” Kaalopoisia ti lii i nyanilɔ hulewengɔ gbo.

²⁴ Kia Yesu tia ngi gaalopoisia ti foni Kapaniɔm nungei nasia ti yɛ Ngewɔ Wɛlei Wai yeepawei wɔyɔ ti wɛilɔ Pita gama ti ngi mɔli tɛɛ, “Bi Kaamɔ ta ɛɛ Ngewɔ Wɛlei Wai yeepawɛi gula?”

²⁵Pita i kpɛmboilɔ yɛ, “A kulalɔ.” Kia Pita i lini pɛlei bu, Yesu yese i yɛpɛni yɛ, “Saimɔn, bia bi nɛmahu yeeni lɔ ta kɔnjɛi gbua ta gbɔma pawɛi gula dunyei ji yeemahangeisia ma? Ti leengeisia ɔɔ numu gbamɛisia?”

²⁶Pita kpɛmboilɔ yɛ, “Numu gbamɛisia.” Yesu i ndeilɔ yɛ, “Na i kɛilɔ kɛ pawa gulala ii mahangeisia ti leengeisia ma.

²⁷Kɛɛ muii loni nungei jisia ti mu gbalɛ hou. Faale li Popɛi laa bi ndoli yei njɛi hu. Nyɛi yeehaalayei na a ndoli hou, kpua bi ngi lɛi lawo; ba navoo gbuha lɔlɔ na a gu a nya pawɛi kɛɛ bi ndɛi Ngewɔ Wɛlei Wai va. Li la bi fe.”