Read Ngowili Yekpei Numu Kpɛlɛɛ Va MATIU 18 Bible Online

MATIU 18 - Ngowili Yekpei Numu Kpɛlɛɛ Va bible

MATIU 18

¹A watii na, Yesu gaalopoisia ti wɛilɔ ngi gama ti ngi mɔli tɛɛ, “Ye lɔ numu wai le ngelegoohu mahayɛi hu?”

²Yesu i ndopo wulo yila lolilɔ i ngi lo ti gulɔ,

³yɛ, “Ngi hugɛ a wue a tɔnya kɛ wuii woteilɔ waa wie kia ndeengɛisia ti na, wuɛɛ wuaa ngelegoohu mahayɛi hu.

⁴Numui na yeembawai le Ngelegoohu Mahayɛi hu tamia a numui na a ta yekpe mayei i wie kia ndopo wuloi ji i na.

⁵Tawao numui na a loko hei ndoi ji bonda yeengila bu nya va, i loko heini nya lɔ bu.

⁶“Kɛɛ numui na a pie jisia mumuisia ti langɔ a nge yeengila i gbe a lala a nge, a fisalɔ yeenumui na va ina ti ngai-gɔtii waa hɛlɛilɔ ngi boloma, ti ngi wili gboyei yeehubɔmɛi, i lo hu.

⁷I nyamuni kpa dunyei va ji hindangaa ti na ta pie nungaa ti gbe a lala a Ngewɔ! Hindei jisia bonda ta wielɔ huɛɛŋ kɛɛ i nyamuni kpa numui na va a pie ti wa!

⁸“Bi lokoi ɔɔ bi gɔwɔi i piengaa bi gbe a lala a Ngewɔ, tewe na bi pili; fisangɔe bi kunafɔ lɛɛvui majɔɔ toko yila ɔɔ kɔwɔ yila i bi ma kia toko fele ɔɔ kɔwɔ fele aa lo bi ma Ngewɔ aa bi wili kunafɔ yɔmbui hu.

⁹Bi yaamɛi i piengaa bi gbe a lala a Ngewɔ, kpua na bi pili; fisangɔe bi kunafɔ lɛɛvui majɔɔ ngaama yila i bi ma kia ngaama fele aa lo bi ma Ngewɔ aa bi wili kunafɔ yɔmbui hu.

¹⁰“A wu mahugbe waa lɛɛ jisia mumuisia yeengila bɛɛ hu; ajifa ti malikei nasia ti ngelegoohu tiaa nya Kɛkɛ yaama lɔma ngelegoohu watii gbi. [

¹¹Gbamaile Numu Hindoloi i wani nungei nasia lɔ bawoma ti longa hu.]

¹²“Gbɔɔ wu langɔ la numu a pie ina mbala hɔndɔɔ yila lɔ ngi yeya yeengila i lohu? Ɛɛ yeepeka numu naani gbɔyɔngɔ maahu puu maahu taalui lo mɛlimɛi ngiyei yakama aa li yeena gɔkɔlima i loni hu?

¹³Ngi hugɛ a wue a tɔnya kɛ i tɔngaa, a kohunɛ waa wielɔ fa i lewe mbala numu naani gbɔyɔngɔ maahu puu maahu taalui nasia ma tii lonihu.

¹⁴Hii lɔɔ wu Kɛkɛ na i ngelegoohu ii loni yeemumuii jisia yilayee bɛɛ i lohu.”

¹⁵“Bi ndewei i hinda nyamu wiengaa a bie, li ngi gama bi nyamui na gɛ a ngie i pieni, kɛɛ wua ta felekpe a yɛla. I wolongaa bi ma kɛ wu woo yɛnga yila.

¹⁶ Kɛɛ ii ngi hinda nyamui guluilɔ, numu weka yila ɔɔ fele wumbu wua tieni wu li na, aako njiɛi na bi pɛlɛnga ngi ma, seli fele ɔɔ sawa ti poma-niikpɔ pɛiŋ.

¹⁷I gangangaa a wololaa ti ma, bi li na a yeenjiɛi Ngewɔ blɛisia gulɔ. Kɛlɛmɛi i gangangaa a ngi nyamui gulula Sɔsiibleisia bɛɛ gama, i wie bi gama kia pawa wɔyɔmɔ ɔɔ numui na ii Ngewɔ gɔɔ”

¹⁸“Faale ngi hugɛ a wue a tɔnya, hinda gbi lekee wa mabali dunya, Ngewɔ a mabalilɔ ngelegoohu, tawao hinda gbi lekee wa luma ma dunya, Ngewɔ a lumalɔ ma.

¹⁹“Gbɛɛ ngi ji bɛɛ hugɛ a wue, watii gbi lekee wu fele wu Ngewɔ vɛlingaa a ngoyila dunya hinda gbi va, nya Kɛkɛ na i ngelegoohu a pielɔ wu wɛ.

²⁰Ajifa mia numu fele ɔɔ sawa ta gomɛ na Ngewɔ vɛliva nya biyei hu, na lɔ nga yɛ na ti lia.”

²¹Na wooma Pita i wɛilɔ i Yesu mɔli yɛ, “Ndemɔi, ina nya ndewei lɔ lekee hinda nyamu wiema a nge, a pie lolɛ nga manu ngi ma? Kɛ a gu pɛiŋ a heima wɔfla?”

²²Yesu kpɛmboilɔ yɛ, “Sawo, ngii yɛma bi manu ngi ma heima wɔfla lekee, ngɛɛ wɔfla wɔfla heima numu sawa gbɔyɔngɔ maahu puu,

²³gbamaile Ngelegoohu mahayɛi gbuangɔ a maha yila lɔ, ngi longɔ i kɔlɛi nasia hulɔ ngi yengebleisia ti yɛ ngi navoo hindei yayenge hu.

²⁴Kia lekee i tɔtoni kɛ ngi yengebleisia ti wanga ngi gama a ti yilayee i kenɛi navoei mɛnga kpotongɔ hulewengɔ numu ɛɛ gu aa kpawa.

²⁵Kɛɛ kia hani ii yɛ ngi yeya navoei na yamava na, mahɛi i ndeilɔ yɛ ti ngi majia kɛɛ ngi nyahɛi kɛɛ ngi leengeisia kɛɛ ngi yeyahani gbi ti kpɛi na gbua a yeenavoei.

²⁶Ngengemɔi na i gulailɔ mahɛi gɔwɔbu i ngi manɛnɛ yɛ ‘Ndemɔi, manu nya ma, bi nya mawulo kulo, nga bi navoei gbi velɔ.’

²⁷Taamɔi mamamau i mahɛi lɔilɔ kɛ i gbenga kpɛi na gbi ma, i gbe yeengengemɔi ma yɛ i li.

²⁸“Kia yeetaamɔi i gbuani kɛ i ngi mbaa ngengemɔ yila lɔnga ngi gbɛi i ngi ma a navoo wulo hii. I gbundɛilɔ yeetaamɔi ma, i hou ngi bola yɛ, ‘Nya gbɛi gbua!’

²⁹Ngi mbaa ngengemɔi ji i gulailɔ ngi gɔwɔbu i ngi manɛnɛ yɛ, ‘Manu nya ma bi nya mawulo kulo, nga bi gbɛi gbi gbualɔ.’

³⁰Kɛɛ ii lumani; i pielɔ ti li a taamɔi kpindiwɛlei bu yɛ ii kpɛi na gbuailɔ ɛɛ gbua.

³¹Kia ngi mbaa ngengeblɛisia ti na hulɔni, ti lii i nyanilɔ waa, ti li mahɛi gama ti kpɛlɛɛ hugɛ a ngie.

³²Kɛ i yeengengemɔi lolia i nde ngi ma yɛ, ‘Bi nduwɔ nyamui ji! Ngi gbeilɔ nya navoo wai na gbi ma i yɛ bi ma jifa lekee bi nya manɛnɛni.

³³Bii yɛ manu bi mbaa ngengemɔi na ma kia ngi manuni bi ma?’

³⁴Mahɛi lii i leweilɔ waa, i yeengengemɔi wu kpindiwɛlei bu yɛ ti lo ngi liima bema haaŋ kɛ i navoei na gbi ve.”

³⁵Yesu i ngi yɛpɛi yakpuɛilɔ yɛ, “Hii nya Kɛkɛ na i ngelegoohu a pie a wu yilayee gbi ina wuii manuni wu ndewei ma a wu lii gbi.”