Read Ngowili Yekpei Numu Kpɛlɛɛ Va MATIU 19 Bible Online

MATIU 19 - Ngowili Yekpei Numu Kpɛlɛɛ Va bible

MATIU 19

¹Kia Yesu i kpɔyɔni a njɛpɛi jisia lela, i gbuailɔ Galili i li Judia lɔlei hu, Jɔdan wooma.

²Faha waa ti toilɔ ngi ma tawao i yeeheegbɛngɔisia bawoilɔ na.

³Farisiisia lɛɛnga ti wɛilɔ ngi gama ta ngi hugɔ aako i kpulanga yɛpɛ le; faale ti ngi mɔlilɔ tɛɛ, “Mu jawei lumangɔe hindo wɛ gbeleva ngi nyahɛi ma sabu gbi va?”

⁴ Yesu i kpɛmboilɔ yɛ, “Wuii yaa Ngewɔ Gɔlɛi na gaani i ndeni yɛ tɔtomɛi wɔɔ, watii na Ngewɔ i hani gbi gbatɛni, i hindoi gbateilɔ kɛɛ nyahɛi,

⁵ Ngewɔ ndeilɔ yɛ, sabui ji va lɔ hindoi a ngi kɛkɛ lo kɛɛ ngi nje, i vɛfɛ ngi nyahɛi ma, kɛ ti veenjɔ ti yɛnga a numu yila?

⁶Faale tɛɛ yaa yɛ a numu fele, ti yakpe. Faale na Ngewɔ i ngilinga, maa ii houni nuuvu i fulo.”

⁷ Farisiisia ti ngi mɔlilɔ tɛɛ, “Gbɛe hɔɔ Mojisi i ndeni sawei hu yɛ hindoi a kpelema-gɔlɔ velɔ ngi nyahɛi wɛ, i gbele yeenyahɛi ma?”

⁸Yesu i kpɛmboilɔ yɛ, “Wu woohugbɔndɛi va mia Mojisi i lumani wu wɛ gbeleva wu nyahangɛisia ma, kɛɛ hii ii le wɔɔ aa yɛ na dunyei gbatɛ gbelei.

⁹Gbɛɛ ngi hugɛ a wue kɛ numu gbi lekee a gbele ngi nyahɛi ma sabu gbi va, kɛlee pue gbuala, i peka jɔɔ, i pue gbuanga.”

¹⁰Ngi gaalopoisia ti ndeilɔ ngi ma tɛɛ, “Ina hii hindoi tia ngi nyahɛi ti luahui i na, kɛ fisangɔ hɔɔ numu aa nyaha gɔi.”

¹¹Kɛɛ Yesu i ndeilɔ ti ma yɛ, “Numui gbi ii le taa yɛ guma kaai ji bu kɛlee nasia Ngewɔ i fenga ti wɛ.

¹²Ajifa sabu gboto lɔ na gbɛva lɔ nungaa tɛ nyaha gɔi. Nungaa lɔ na ti ti leni ti buhaangɔ; pekeisia lɔ na nungaa ta ti buhaa; nungaa lɔ na tɛɛ loko wili nyaha hinda hu Ngelegoohu Mahayɛi majɔva. Numui na a gu a loko heila kaa ji bu, i loko hei mbu.”

¹³Nungaa lɛɛnga ti wɛilɔ a ndeengɛisia Yesu gama aako i ngi lokoisia wɛlɛ ti ma i Ngewɔ vɛli ti va, kɛɛ kaalopoisia ti jɔlɛilɔ yeenungeisia ma.

¹⁴Kɛɛ Yesu i ndeilɔ yɛ, “A pie ndeengɛisia ti wa nya gama, waa ti mabali, gbamaile nungei nasia ti wiengɔ kia jisia nyɔkɔ tia mia ti Ngelegoohu Mahayɛi hu.”

¹⁵I loko wɛleilɔ ti ma, i Ngewɔ vɛli ti lubava, i li.

¹⁶Watii yila ma, ndakpao yila i wɛilɔ Yesu gama i ngi mɔli yɛ, “Kaamɔ, hinda yekpei yeegbɔɔ nga pie aako ngi kunafɔ lɛɛvui majɔɔ?”

¹⁷Yesu i poteilɔ yɛ, “Gbɛe ba nya mɔlikɔlongohinda yekpe ma? Ngewɔ yakpe lɔ ngi yekpengɔ. Ina bi longɔ bi kunafɔ lɛɛvui majɔɔ, saweisia hou.”

¹⁸ Ndakpaoi i mɔlilɔ yɛ, “Sawei yeegbɛngaa?” Yesu i kpɛmboilɔ yɛ, “Baa numu waa, baa pue gbua, baa huma wie, baa ndɛɛ guala numu gbi ma,

¹⁹ bi kɛkɛ bɛlɛ hei tia bi nje, lo a bi heinyɔui kia bi longɔ a bia yekpe.”

²⁰Ndakpaoi i ndeilɔ ngi ma yɛ, “Ngi sawei jisia gbi hounga; gbɔɔ gbɔma i longa mahoungɔ ngi pie?”

²¹Yesu i ndeilɔ ngi ma yɛ, “Ina bi longɔ vulii bi kunafɔ lɛɛvui majɔɔ, li bi bi yeyahani kpɛlɛɛ majia bi yeenavoei ve fɛɛliblɛisia wɛ. Bi na wiengaa, ba kpatɛ waa majɔlɔ ngelegoohu. Na wooma bi wa bi yɛ a nya Woomamɔ.”

²²Ji ndakpaoi i njɛpɛi ji mɛnini, i liilɔ a ndiinyani waa ajifa ngi gbatɛngɔ waa yɛla.

²³Na wooma Yesu i ndeilɔ ngi gaalopoisia ma yɛ, “Ngi hugɛ a wue a tɔnya, a kpaukpaulɔ waa Kpatɛmɔ va i yɛ a ngelegoohu mahayɛi humɔ.

²⁴Gbɛɛ ngi nde gbɔma, nyɔmɛi lewela mijii woohu i bɛwɛbɛwɛni i lewe kpatɛmɔi lila ma Ngewɔ Mahayɛi hu.”

²⁵Ji Yesu gaalopoisia ti ji mɛnini, ti wuhu i wuilɔ hulewengɔ, kɛ ti mɔlinga tɛɛ, “Ye lɔ na hɔɔ a gu a bawola?”

²⁶Yesu i ti gbeilɔ tiŋ i kpɛmbo yɛ, “Nuuvu ɛɛ gu a ta yekpe bawola kɛlee Ngewɔ ajifa Ngewɔ ta ɛɛ gbaha hinda gbi ma.”

²⁷Kɛ Pita i yɛpɛnga yɛ, “Mu hani gbi longa mu tonga bi ma. Gbɔɔ Ngewɔ a fe mu wɛ?”

²⁸Yesu i ndeilɔ ti ma yɛ, “A la la kɛ watii na nya nya Nuuvu Hindoloi a hei ngi maha-heimi dunya ninɛi na hu i wama, wua wu tonga nya ma, wua bɛɛ wa heilɔ maha-heima puu maahu fele, wu mahaya mɛ Isrɛl bonda puu maahu feleisia maahu.

²⁹Tawao numu gbi lekee i pɛlɛngaa longa ɔɔ ndewehinga ɔɔ ndewenyahalengaa ɔɔ kɛkɛ ɔɔ nje ɔɔ ndeengaa ɔɔ kpalangaa nya va, a majɔlɔ heima hɔndɔɔ yila tawao Ngewɔ a ngi gɔlɔ a kunafɔ lɛɛvui.

³⁰Kɛɛ numu gboto ti yɛngɔ a haalablɛisia kiahuna ta yɛlɔ a kɛlɛmablaa, kɛɛ numu gboto kɛlɛmablaa a tie kiahuna ta yɛlɔ a haalablɛisia.