Read Ngowili Yekpei Numu Kpɛlɛɛ Va MATIU 2 Bible Online

MATIU 2 - Ngowili Yekpei Numu Kpɛlɛɛ Va bible

MATIU 2

¹Kia ti Yesu leni Bɛtlihɛm, Judia lɔlei hu, Mahɛi Hɛlɔd watii hu, tumbeka lɔtɔgbɛblaa ti gbuailɔ foloi hiye-welei hu ti wa Jelusalɛm ta mɔli tɛɛ,

²“Mindo lɔ ti ndoi na leenga na Juubleisia ti Mahɛi le? Gbamaile mu ngi lumbekei lɔnga i gɛnga foloi hiye-welei hu, tawao mu wanga bagɔma veva ngi wɛ.”

³Kia Mahɛi Hɛlɔd i ji mɛnini, ngi lii i gbuailɔ ngi goohu tia Jelusalɛmblaa gbi.

⁴I Saagbuablaa Waawaisia kpɛlɛɛ lɛilɔ ma kɛɛ Sawei Yeekaamɔisia i ti mɔli yɛ, “Mindo lɔ ta Ngewɔ Maha Heingɔi le na?”

⁵Ti kpɛmboilɔ tɛɛ, “Bɛtlihɛm, Judia lɔlei hu, gbamaile hii Ngewɔ lutui nyɛini yɛ,

⁶‘Bia Bɛtlihɛm, Judia lɔlei hu, bia ii le kulo bɛɛ baa gulo taa waawai kpɛlɛɛ ma Judia; ajifa maha a gbualɔ bi hu, na a yɛ nya nungaa Isrɛl mahu a ti mahugbe.’ ”

⁷Faale Mahɛi Hɛlɔd i famableisia lolilɔ, tia tieni lekee ti gomɛ, i kɔɔ a tie migbe lɔ tumbekei i gɛni.

⁸Kɛ i ti yoyonga Bɛtlihɛm, i vɛli ti ma yɛ, “A li wu ndoi gɔkɔli vulii a tɔmbɛyama wee; wu ngi lɔnga wu wa wu hugɛ a nge nya bɛɛ ngi li ngi bagɔma ve ngi wɛ.”

⁹Kia ti kpɔyɔni a Mahɛi Hɛlɔd vɛlimawoi mɛnila, ti pele houlɔ kɛ ti tumbeka yakpei na lɔnga ti yɛ tɔni foloi hiye-welei hu a li ti gulɔ ngelei ma. Tawao i loilɔ lima ti gulɔ i foo mia ndoi i yɛ na, i hɛlɛ yeehindei maahu.

¹⁰Ji ti tɔni, ti goohu i nɛɛlɔ hulewengɔ gboŋ.

¹¹Kia ti wuaani yeehindei ti ndolaa lɔilɔ tia ngi nje Meri, kɛ ti mawɛɛnga ndɔmɛi ti bagɔma ve ngi wɛ. Kɛ ti loko wuaanga ti haakeisia hu ti gbua a kanigbɔlui kɛɛ hani ngunɛnɛ felengaa, gbɛsɛi kɛɛ siimijii, ti fe ngi wɛ.

¹²Na wooma ti yamɛilɔ ti yee a pele weka ajifa Ngewɔ i ti laahilɔ henga hu yɛ taa yaama gbɔma Hɛlɔd gama.

¹³Kia tumbeka lɔtɔgbɛbleisia ti lini, Ndemɔi malikei i gɛilɔ a Josɛfi hengei hu yɛ, “Hiye bi ndoi wumbu tia ngi nje, wu wila wu li Ijipt, wu yɛ na haaŋ kɛ ngi nde; ajifa Hɛlɔd longɔ i ndoi gɔwokpua i paa.”

¹⁴Josɛfi i hiyeilɔ, i ndoi wumbu tia ngi nje ti gbua a kpindi na ti li Ijipt,

¹⁵ti lo na haaŋ Hɛlɔd i haa. Ji wielɔ aako Ndemɔi layie la i hou i puni ngi lutui laa yɛ, “Ngi nya hindoloi lolinga gbuava Ijipt.”

¹⁶Kia Hɛlɔd i kɔɔni kɛ famablei nasia ti hiyeni foloi hiye-welei hu ti ngi wɛlɛnga, ngi lii i leweilɔ hulewengɔ, kɛ i ngi sojeisia longa, hiinga leengei nasia gbi lekee ti yɛ Bɛtlihɛm kɛɛ yeetateisia hu gbi, ti lengɔi gungɔ a foo fele ɔɔ jeingɔ bu, ti ti kpɛlɛɛ waa; i lɔwɔi gbawalei gɔni watii na ma lɔ tumbekei i gɛni a tumbeka lɔtɔgbɛbleisia.

¹⁷Hii njɛpɛi na lahouni Ndemɔi i puni ngi lutui Jɛrimaya laa yɛ,

¹⁸“Ngoo lɔ gbuama Rama, ngɔɔwoo yagbalɛngɔ waa, Rechɛl a ngi leengeisia wɔɔwo; ɛɛ luma ngi maa aa nɛnɛ, ajifa ti haanga.”

¹⁹Kia Hɛlɔd i haani, Ndemɔi malikei i gɛilɔ a Josɛfi hengei hu Ijipt lɔlei hu

²⁰yɛ, “Hiye bi ndoi wumbu tia ngi nje, bi yaama Isrɛl lɔlei hu, gbamaile nasia ti yɛ loni ti ndoi waa ti haanga.”

²¹Faale Josɛfi i ndoi wumbuilɔ tia ngi nje ti yaama Isrɛl lɔlei hu.

²²Kɛɛ ji i mɛnini kɛ Akelɔs mia i loni ngi kɛkɛ womɛi a Mahɛi Judia lɔlei maahu, i luwɛilɔ a lila na; i lini Galili lɔlei hu lɔ kia Ngewɔ i ngi laahini la hengei hu,

²³i hei taa yila hu ta toli a Nasalɛti aako na i wie Ngewɔ lutuisia ti ndeni tɛɛ, “Ta ngi lolilɔ a Nasalɛtimɔ.”