Read Ngowili Yekpei Numu Kpɛlɛɛ Va MATIU 21 Bible Online

MATIU 21 - Ngowili Yekpei Numu Kpɛlɛɛ Va bible

MATIU 21

¹Kia Yesu tia ngi gaalopoisia ti laalani Jelusalɛm gblanga, ti foeilɔ Bɛtani, ɔlivi Yiyei gblanga, kɛ i ngi gaalopo fele longa,

²i vɛli ti ma yɛ, “A li fulei na hu i wu gulɔ; wu fongaa lekee wa jakasi lɔlɔ ngilingɔ, ngi loi i ngi gbla. A yeenjei vulo wu wa a tie nya gama.

³Numu gbi i wu mɔlinga, a nde ngi ma wɛɛ, ‘Ndemɔi gbewengɔe ti va,’ a gbelɔ ti ma ngaama wu wa a tie.”

⁴Ji i wieilɔ aako na la i hou Ngewɔ lutui i ndeni yɛ,

⁵ “Nde Jelusalɛmblɛisia ma bɛɛ wu mahɛi lɔ wama wu gama, Ngi hu ii wɔlɔni, i heini jakasi maahu kɛɛ jakasi lɔgbɛi yeendoi.”

⁶Kaalopoisia ti liilɔ, ti pie kia Yesu i vɛlini la ti ma;

⁷ti wɛilɔ a jakasi kɛɛ yeendoi, ti ti bobanisia voombo maahu, Yesu i lɛ maahu.

⁸Faha waa ti ti bobanisia voomboilɔ pelei ma, pekeisia ta ngulu bekeisia yali ta fombo pelei ma.

⁹ Fahii yeenasia ti yɛ li kulɔ kɛɛ nasia ti yɛ wa poma ti tɔtoilɔ a yelei gulala tɛɛ, “Tato i yɛ Devidi Hindoloi ma! Ngewɔ i numui na luba i wama Ndemɔi biyei hu! Tato i yɛ Ngewɔ ma!”

¹⁰Kia Yesu i wuaani Jelusalɛm tei gbi gɔwɔ i gbɛlilɔ, ta mɔli tɛɛ, “Ye lɔ a ji?”

¹¹Fahiisia ti kpɛmboilɔ tɛɛ, “Ngewɔ lutui Yesu mia, na a gbua Nasalɛti, Galili lɔlei hu.”

¹²Yesu i wuailɔ Ngewɔ Wɛlei Wai bu i nasia gbi gbɛ na ti yɛ fele-haniisia majia na kɛɛ nasia ti yɛ ngeya, i navoo maluveblɛisia ti tebiisia yapɛlɛ kɛɛ nasia ti yɛ powoisia majia ti heiwuliisia.

¹³ Kɛ i ndenga ti ma yɛ, “Ngewɔ ndeilɔ ngi Gɔlɛi hu yɛ, ‘Ta nya Wɛlei Wai loli a hɛɛ-wɛlɛ lɔ’; kɛɛ wua wu potenga ‘a humablaa ti lɔwuma.’ ”

¹⁴Pumublɛisia kɛɛ kpɔɔkpɔblɛisia ti wɛilɔ ngi gama Ngewɔ Wɛlei Wai bu, tawao i ti bawoilɔ.

¹⁵Kɛɛ ji Saagbuablaa Waawaisia kɛɛ sawei yeekamɔiɛisia ti kabande hinde nasia lɔni a pie, kpɛingɔ ndeengɛisia ma ta yelei gula tɛɛ, “Tato i yɛ Devidi Hindoloi ma!” ti liileweilɔ.

¹⁶ Faale ti Yesu mɔlilɔ tɛɛ, “Biaa na mɛnima ti ndema?” Yesu i kpɛmbɔilɔ yɛ, “A tɔnya nyaa mɛnima, wuii yaa kaani lɛ wɔɔ Ngewɔ Gɔlɛi na hu i ndeni yɛ, ‘Bia bi Ngewɔ bi ndeengɛisia kɛɛ ndolangeisia makɛnga tatoi yeekpekpei veva bi wɛ?’ ”

¹⁷Yesu i ti lɔilɔ, i gbua taa wai hu, i li Bɛtani, i yii na tia ngi gaalopoisia.

¹⁸A ngenda tɛtei kia ti yɛ yamama Jelusalɛm ndɔlei yɛlɔ Yesu ma.

¹⁹I ngulu yila lɔilɔ kuhama pelei gbla ta toli a figi, kɛ i ya na kɛɛ ii hani lɔni nga kɛlee ndawɛi lekee. Faale i ndeilɔ yeengulii ma yɛ, “Kunafɔ bɛɛ yaa wua gbɔma!” Kɛ ngulii i haanga ngaama.

²⁰Ji ngi gaalopoisia ti ji hulɔni, i gualɛilɔ ti ma hulewengɔ, kɛ ti mɔlinga tɛɛ, “Gbɛe figi wulii i haanga fulo?”

²¹Yesu i kpɛmboilɔ yɛ, “Gbɛɛ ngi nde wu ma a tɔnya kɛ wu langalɔ a Ngewɔ, wuɛɛ sekahu gbi wie, wuɛɛ i ji nyɔkɔ lekee wie ngi pienga a figi wulii, wa gulɔ a ndela ngiyei ji ma wɛɛ, ‘Hiye mbei bi wili gboyei hu,’ i wie.

²²Hinda gbi lekee wu Ngewɔ vɛlingalɔ fa, wu langɔ la vulii kɛ Ngewɔ a pielɔ, wa majɔɔlɔ.”

²³Yesu i yamɛilɔ Ngewɔ Wɛlei Wai bu kɛɛ kia i yɛ nungaa gaama, Saagbuablaa Waawaisia kɛɛ kpakoleisia ti wailɔ ngi gama ti ngi mɔli tɛɛ, “Kpayei yeegbɔɔ i bi wɛ hindei jisia wieva, tawao ye lɔ i yeekpayɛi ji veni bi wɛ?”

²⁴Yesu i kpɛmboilɔ yɛ, “Nya bɛɛ nga wu mɔlilɔ a mɔli yila, wu kpɛɛmbongaa pɔɔnangɔ, nga hugɛlɔ a wue kpayei yeegbɔɔ i nya wɛ hindei jisia wieva ngi pieni.

²⁵Mindo lɔ Jɔn i kpayei na jɔni na Ngewɔ yɛi wuvaa nungaa ma? I gbuani Ngewɔ gama lɔ ɔɔ nuuvu?” Ti tɔtoilɔ a mawali houla a ti nyɔunyɔ tɛɛ, “Gbɔɔ ma nde? Mu ndengaa muɛɛ Jɔn gbayei i gbuani Ngewɔ gama lɔ, Yesu a ndelɔ mu ma yɛ, ‘Gbɛe hɔɔ wuii lani a Jɔn?’

²⁶Tawao mu ndengaa muɛɛ ‘Jɔn gbayei i gbuani nuuvu gama lɔ,’ ma luwalɔ na ma fahii a pie a mue, ajifa numui gbi ti langɔ yɛla la kɛ Ngewɔ lutui lɔ wɔɔ a Jɔn.”

²⁷Faale ti kpɛmbɔilɔ Yesu ma tɛɛ, “Muii Jɔn gbayei gbuamɛi gɔɔ.” Kɛ i ndea ti ma yɛ, “Nya bɛɛ ngɛɛ hugɛ a wue kpayei yeegbɔɔ i nya wɛ hindei jisia wieva.”

²⁸“Gbɔɔ i wu nɛmahu? Kena yila i yɛlɔ wɔɔ na hindolo fele ti ngi yeya. I liilɔ yeesɛmbɛi gama yɛ, ‘Nya loi, li haa bi yenge nya gbalei hu.’

²⁹I kpɛmboilɔ yɛ, ‘Ngɛɛ li’, kɛɛ poma ngi lii i woteilɔ kɛ i ya.

³⁰Kɛ kenɛi i ya ndoi yeekuloi gama i yeenjɛpɛ yakpei le ngi ma. Ndopoi i ndeilɔ yɛ, ‘Nga lilɔ’, kɛɛ ii lini.

³¹Ndo felei jisia yeegbɔɔ i ngi kɛkɛ liimɛi wieni?” Ti kpɛmboilɔ tɛɛ, “Ndoi yeesɛmbɛi.” Kɛ Yesu i ndenga ti ma yɛ, “Gbɛɛ ngi hugɛ a wue: pawa wɔyɔblɛisia kɛɛ hitɛ-nyahangɛisia yese ta wuaa Ngewɔ Mahayɛi hu wu gulɔ.

³²Ajifa Jɔn Nguamɔi i wɛilɔ wu gama i pelei yeepɔnangɔi gɛ a wue jiava la, kɛɛ wuii lani a ngie; kɛɛ pawa wɔyɔblɛisia kɛɛ hitɛ-nyahangɛisia ti lɛilɔ a ngie; tawao kia bɛɛ wu ji hulɔni, wu lii ii woteni waa la a ngie.”

³³ “A wolo dɔmii weka ma. Ndɔlɔmɔ yila i glepii gbaa lɛilɔ, I kata loilɔ yeekpalɛi na ma, i ndowei bɔ mia ta yeenguɛi vɔnya na ndɔi gbatɛ va, kɛ i pɛlɛ guha waa loonga ta yɛ na yeekpalɛi mahugbe va. Na woma i guailɔ nungaa yeya mahugbeva, i li kɛnyɛ weka hu.

³⁴Kia tuhani gbua-gbelei i hitini, i ngi bɔilopoisia loilɔ yeengengebleisia gama tuhani jɔngɔi ngi ndɛi va.

³⁵Ngengeblɛisia ti gbundɛilɔ ngi bɔilopoisia ma, ti yeengila lewe, ti yeepekei waa, ti yeena hɔwɔhɔwɔ.

³⁶Kenɛi i gbɔma bɔilopongaa loilɔ, ti gbotongɔ tewengɔ haalayeisia ma, kɛɛ ngengeblɛisia ti hinda yakpei na lɔ wieni a tie.

³⁷Kɛlɛmɛi kɛ i ngi hindoloi longa ti gama, a nde nɛmahu yɛ, ‘Ta baa gɔɔlɔ nya loi ma.’

³⁸Kɛɛ kia ngengeblɛisia ti kenɛi loi lɔni, ti ndeilɔ ti nyɔunyɔ ma tɛɛ, ‘Kpalamɔi hindoloi lɔ, na i wama loma poohani maahu. A wa mu ngi waa kɛ ngi woohani i yɛnga a mu woo.’

³⁹Ti gbundɛilɔ ngi ma, ti gbua a ngie kpalɛi hu, ti ngi waa.”

⁴⁰Yesu i nungeisia mɔlilɔ yɛ, “Wu langɔ la ji kpalamɔi a wa, gbɔɔ a pie a ngengeblɛi nasia?”

⁴¹Ti kpɛmboilɔ tɛɛ, “A ngengeblaa nyamui nasia waalɔ ngagbalɛngɔ waa, i kpalɛi ve ngengeblaa wekei nasia wɛ ta tuhani ngi ndɛi ve a tuhani gbua-gbelei.”

⁴² Yesu i nungeisia mɔlilɔ yɛ, “Wuii yaa kaani lɛ wɔɔ Ngewɔ Gɔlɛi na hu i ndeni yɛ, ‘Kɔtii na vulii pɛlɛ loblɛisia ti gbeleni ma tɛɛ ii gbekpeni, i wotenga a baama gɔtu kɔtii kpɛlɛɛ ma. Ndemɔi lɔ i ji wieni tawao kabande hinda le mu yaama’?

⁴³“Faale gbɛɛ ngi hugɛ a wue, Ngewɔ a ngi Mahayɛi hu liilɛi gbualɔ wu yeya i fe nungaa wekei nasia wɛ ta gu a ngi liima hindei wiela. [

⁴⁴Numu gbi lekee i gulangaa yeekɔtii ji ma a ngi nɛɛmulɔ waa, kɛɛ i gulangalɔ numu gbi ma a ngi gbukpulɔ.]”

⁴⁵Saagbuablaa Waawaisia kɛɛ Farisiisia ti Yesu jaleisia mɛnilɔ tawao ti kɔɛilɔ kɛ tia mia i ti ma.

⁴⁶Faale ti yɛ loni ti Yesu hou kɛɛ ti luwɛilɔ fahii ma ajifa nungeisia ti Yesu wumbuni a Ngewɔ lutui lɔ.