Read Ngowili Yekpei Numu Kpɛlɛɛ Va MATIU 22 Bible Online

MATIU 22 - Ngowili Yekpei Numu Kpɛlɛɛ Va bible

MATIU 22

¹Yesu i gbɔma nungaa gaailɔ dɔmingaa hu yɛ,

²“Ngelegoohu Mahayɛi gbuangɔ a maha yila lɔ i nyaha gɔlini ngi hindoloi wɛ, i yeekomɛi hugbatɛ.

³I ngi bɔilopoisia loilɔ ndeva nasia ma i ti lolini yɛ ti wa na, kɛɛ tii lumani taa wa.

⁴Faale i bɔilopo wekangaa loilɔ gbɔma ti gama yɛ, ‘Komɛi gbi hugbatɛngɔe na; ngi nya nika-hina wulɔ-wulɔisia waanga mɛva; mu wua lɔ naa mawuloma; faale a wa nyaha gɔli gomɛ ji hu.’

⁵Kɛɛ nasia i ti lolini tii woloni na ma, ti liilɔ ti magbewengaa hu: yeeji i li ngi gbalei hu, yeena i li ngi velegɔmɛi,

⁶yeepekeisia ti gbundɛ mahɛi bɔilopoisia ma, ti ti lewe, ti ti waa.

⁷Mahɛi lii i leweilɔ hulewengɔ; i ngi sojeisia loilɔ ti numu waablei nasia waa, ti ti lɛi mɔ kpae.

⁸Kɛ i ngi bɔilopoi yeepekangaa lolinga i nde ti ma yɛ, ‘Nyaha-gɔli-gomɛi gbi hugbatɛngɔe kɛɛ nasia ngi ti lolini ti maa i houni fa.

⁹A li pele waawaisia ma wu nungei nasia gbi loli wa ti lɔ.’

¹⁰Kɛ bɔilopoisia ti ya pele waawaisia hu ti nasia gbi lɛma ti ti lɔni, yeekpekpengaa kɛɛ yeenyamungaa, kɛ nuuvuisia ti komɛ-wɛlei lavenga.

¹¹“Kia mahɛi i wuaani na vava nasia ma ti ti lolini, i taamɔ yila lɔilɔ na nyaha-gɔli-gomɛi yeemayii ii ngi ma.

¹²Mahɛi i ngi mɔlilɔ yɛ, ‘Ndiamɔ, bi yee pieni bi wuaani mbei nyaha-gɔli-gomɛi yeemayii ii bi ma?’ Kɛɛ njɛpɛ gbi ii gbuani taamɔi laa.

¹³Kɛ mahɛi i ndenga bɔilopoisia ma yɛ, ‘A ngi lokoi huyili kɛɛ ngi gɔwɔi, wu ngi wili ngitii ya, kpindi hu. Na lɔ a yɛ na a wɔɔ, a ngi yɔngɔlii yaamɛ.’ ”

¹⁴Yesu i ngi yɛpɛi yakpuɛilɔ yɛ, “Ngewɔ a numu gboto lɔ loli liva ngi mahayɛi hu kɛɛ numu sɛkɛngɔ mia ta yeetolii woi gulu.”

¹⁵Na wooma Farisiisia lɛɛnga ti liilɔ ti wuhitɛ ta yee pie Yesu i kpulanga yɛpɛ le ti ngi hou.

¹⁶Kɛ ti ti woomableisia longa ngi gama tia Hɛlɔd mableisia lɛɛnga tɛɛ, “Kaamɔ, mu kɔɔlɔ kɛ bi lɔnyangɔe, kɛ tɔnyɛi mia ba nungaa gaa la kɔlooni Ngewɔ welei ma, tawao bi gbewe ii le gbɔɔ i nungaa wekeisia nɛmahu; ajifa bii gbeweni tomɛi yeegbɔɔ numu i looni na.

¹⁷Bi nda nɛmahui gɛ lɛɛ a mue. Mu jawei lumangɔe pawa gulalei ma Roma Maha Wai ma ɔɔ ii lumani?”

¹⁸Yesu i kavɛi na gɔɛilɔ ti hugbatɛni, kɛ i ndenga yɛ, “Wu baayablɛi jisia, gbɛe wa mani yatɛ nya gulɔ?

¹⁹Navoei na wa pawɛi gula la a yeengila gɛ a nge.” Kɛ ti navoo gbala yila venga ngi wɛ.

²⁰Kɛ i ti mɔlinga yɛ, “Yee gbuaye lɔ kɛɛ ngi biyei i navoei ji ma?”

²¹Ti kpɛmboilɔ tɛɛ, “Roma Maha Wai.” Kɛ Yesu i ndenga ti ma yɛ, “Kɛ a hani nasia ve Maha Wai wɛ Maha Wai woo le, wu nasia ve Ngewɔ wɛ Ngewɔ woo le.”

²²Kia ti kpɛmboi ji mɛnini Yesu i nguani, ti wuhu i wuilɔ kɛ ti ngi longa ti li.

²³Folo yakpei na ma Sadusiisia ti wɛilɔ Yesu gama. Tia mia ta nde tɛɛ numu i haangaa ɛɛ yaa hiye hee hu. Ti ngi mɔlilɔ a mɔli yila

²⁴ tɛɛ, “Kaamɔ, Mojisi jawei i ndeilɔ yɛ, ‘Hindo i haangaa tawao ii ndo leni, ngi ndewehindoi a ngi wooma-nyahɛi jɔlɔ, i ndeengaa le ngi ndewei wɛ.’

²⁵Ndeewehingaa wɔfla ti yɛlɔ wɔɔ mbei mu lia. Yeehaalayei i nyaha gɔilɔ, i haa, tii ndo leni, kɛ ngi woomamɔi i yeeponyahɛi jɔnga.

²⁶Ta bɛɛ ii ndo leni a nyapoi na tawao hii i ti gbi wieni i fo fa yeewɔflei ma.

²⁷Ti kpɛlɛɛ ti haangɔi wooma, nyaapoi bɛɛ i haailɔ.

²⁸Watii kɛyila haableisia ta vulu ti hiye hee hu, ye lɔ ngi woo a yɛ a nyahɛi na? Ajifa ti gbi ti ngi gɔɛilɔ a nyaha laa?”

²⁹Yesu i ti mɔli gbɛmboilɔ yɛ, “Wu pɔɔla waa wienga jifa wuii Ngewɔ Gɔlɛisia gɔ ɔɔ ngi gbayei.

³⁰Ajifa haableisia ti hiye-gbelei kuna hee hu, nyaha jɔlaa kɛɛ hini jɔlaa ɛɛ yɛ na, ta wielɔ kia malikeisia ti na ngelegoohu.

³¹Kɔlooni haableisia ti hiyelei ma hee hu, wuii yaa lɛ wɔɔ kaani gbɔɔ Ngewɔ i ndeni wu ma? I ndeilɔ yɛ,

³² ‘Ebraham kɛɛ Aisaki kɛɛ Jekɔpi ti Yewɔɛi lɔ a nge’? Fubleisia ti Yewɔ lɔ a ngie, haableisia ii le.”

³³Ji faha wai ti ji mɛnini, ti wuhu i wuilɔ tɔnyɛi na va i yɛ nungeisia gaa la.

³⁴Kia Farisiisia ti mɛnini kɛ Yesu i kpɔhu wunga Sadusiisia laa, ti lɛɛnga ti lɛilɔ ma ti wa ngi gama,

³⁵kɛ ti yilayee, Sawei Yeekaamɔ a ngie, i ngi mɔlinga a mɔli yila, a ngi tɛgu aako i kpulanga yɛpɛ le ti ngi hou.

³⁶I ngi mɔlilɔ yɛ, “Kaamɔ, sawei yeegbɔɔ tewengɔ sawei kpɛlɛɛ ma?”

³⁷ Yesu i kpɛmboilɔ yɛ, “A lo a Ndemɔi, wu Yewɔɛi, a wu lii gbi kɛɛ wu yafei gbi kɛɛ wu nɛmahui gbi.

³⁸Sawei yeehaalayei kɛɛ yeembawai lɔ.

³⁹ Sawei yeefelei na i na gbla yɛ, ‘A lo a wu heinyɔui kia wu longɔ la a wua yekpe.’

⁴⁰Mojisi Jawei gbi kɛɛ kaai nasia Ngewɔ lutuisia ti kɛni, hɛlɛngɔ a sawa felei jisia lɔ.”

⁴¹Kia lɛ Yesu tia Farisiisia ti gomɛngɔ yɛla, i ti mɔlilɔ yɛ,

⁴²“Gbɔɔ i wu nɛmahu kɔlooni Ngewɔ Maha Heingɔi ma? Ye bɔɔsɔ lɔ a ngie?” Ti kpɛmboilɔ tɛɛ, “Devidi bɔɔsɔ mia a ngie.”

⁴³I gbɔma ti mɔlilɔ yɛ, “Gbɛe hɔɔ Ngewɔ Yafei i puni Devidi lii hu ngi loliva a ‘Ndemɔi’? Yɛ,

⁴⁴ ‘Ndemɔi ndeilɔ nya Lemɔi ma yɛ, Hei mbei nya yejahui haaŋ ngi bi gɔnyɔuisia wuaa bi gɔwɔbu.’

⁴⁵“Ina Devidi a Ngewɔ Maha Heingɔi loli a ‘Ndemɔi’, Ngewɔ Maha Heingɔi a yee gu i yɛ a Devidi bɔɔsɔ?”

⁴⁶Njɛpɛ yakpe bɛɛ ii gbuani numu gbi laa tawao i hiye foloi na ma numu gbi ii liiloni ngi mɔliva a mɔɔli wekangaa gbi.