Read Ngowili Yekpei Numu Kpɛlɛɛ Va MATIU 23 Bible Online

MATIU 23 - Ngowili Yekpei Numu Kpɛlɛɛ Va bible

MATIU 23

¹Na wooma Yesu i yɛpɛilɔ fahii gama kɛɛ ngi gaalopoisia yɛ,

²“Sawei Yeekaamɔisia tia Farisiisia mia ti Mojisi Jawei gɔngɔ tawao kpaya vengɔ ti wɛ ta fasai wu ma.

³Faale, na gbi lekee ta nde wu ma, a pie kɛɛ waa ti wiehindeisia wokɔɔ gbamaile na ta nde tɛɛ pie.

⁴Ta haaka miniminingɔ lɔ la nungaa wumba kɛɛ tia vulii tɛɛ luma taa ti lokoyowo yila bɛɛ wɛlɛ ma gbɔva ti ma liva la.

⁵ Ta ti hindei gbi wielɔ aako nungaa ti ti lɔ; ajifa ta ti lasimɔisia lakpalɔ, ti ti lomɛi gɔwɔyɛi yeefilii guha.

⁶Ti longɔ a baama heimisia mɛhɛɛ-mɛ-gomɛisia hu, kɛɛ heimi nasia hɛɛ wɛleisia bu ti magbingɔ baamableisia va.

⁷Ti longɔ nungaa ti yaa vama ti ma fahii hu ti wombi gbakpa, tawao nungaa ti yɛ a ti loli a kaamɔ.

⁸Kɛɛ numu aa wu loli a kaamɔ, ajifa kaamɔ yakpe mia i wu yeya tawao ndewengaa lɔ a wu gbi.

⁹Waa numu gbi loli a kɛkɛ dunyei hu, ajifa Kɛkɛ yakpe mia i wu yeya, na i ngelegoohu.

¹⁰Tawao numu aa wu loli a kaamɔ, ajifa kaamɔ yakpe mia i wu yeya, tamia a Ngewɔ Maha Heingɔi.

¹¹Numui na i wu lia ngi lewengɔ wu gbi ma, mahoungɔ i yɛ a wu bɔilopoi.

¹²Numui na a ta yekpe lɛ, Ngewɔ a ngi mayeilɔ kɛɛ numui na a ta yekpe maayei, Ngewɔ a ngi lɛlɔ.

¹³“I nyamuni kpa wu va Sawei Yeekaamɔisia kɛɛ Farisiisia! Baayablaa lɔ a wue! Ajifa wa ngelegoohu wɛlei laagbɔwulɔ nungaa gulɔ, wua vulii wɛɛ wuaa na tawao wɛɛ luma nasia ti lapima wuava na taa wuaa na. [

¹⁴I nyamuni kpa wu va Sawei Yeekamɔɛisia kɛɛ Farisiisia! Baayablaa lɔ a wue! Ajifa wa ponyahangɛisia ti yeyahani gbi gbua ti yeya a kava, wa yama wu liiwooma wa hɛɛ huguhangɔisia wie kɛva kɛ wu wɔnangɔe; kpalɛi na Ngewɔ i wama ndama wu ma a nyamu kpɛlɛɛ ma!]

¹⁵“I nyamuni kpa wu va Sawei Yeekaamɔisia kɛɛ Farisiisia! Baayablaa lɔ a wue! Wa gboyangaa lewe, wa ndɔlɔngaa bla ndia aako wu gu numu yila ma woteva i la a wu Yewɔɛi, kɛɛ wu gungaa ngi ma i wote, wa ngi wote a jahamamɔ lɔ tewengɔ wua vulii ma.

¹⁶“I nyamuni kpa wu va, wu pele gɛbla wumungɔi jisia! Wa nungeisia gaa wɛɛ, ‘Numu i jondungaa Ngewɔ Wɛlei ma, hinda gbi ii le; kɛɛ numu gbi i jondungaa kanigbɔlu haakei nasia ma ti Ngewɔ Wɛlei bu, mahoungɔ i na wie i jonduni pieva.’

¹⁷Wu kpowablaa wumungɔi jisia! Yeegbɔɔ tewengɔ ngi mbaa ma, kanigbɔlu haakeisia ɔɔ Ngewɔ Wɛlei Wai na i kanigbɔlu haakeisia magayemani?

¹⁸Wa nungaa gaa gbɔma wɛɛ, ‘Numu i jondungaa saagbuamɛi ma, hinda gbi ii le; kɛɛ numu i jondungaa saahanii na ma a yɛ saagbuamɛi ma, mahoungɔ i na wie i jonduni pieva.’

¹⁹Wu pumublɛi jisia! Yeegbɔɔ tewengɔ ngi mbaa ma, saahanii ɔɔ saagbuamɛi na i saahanii magayemani?

²⁰Faale numui na a jondu saagbuamɛi ma, a jondu ma lɔ kɛɛ saahani na gbi i ma;

²¹tawao numui na a jondu Ngewɔ Wɛlei Wai ma, a jondu ma lɔ kɛɛ Ngewɔ na i heini na;

²² tawao numui na a jondu ngelegoohu ma, i jondunga Ngewɔ maha-heimi lɔ ma kɛɛ Ngewɔ vulii i heini ma.

²³ “I nyamuni kpa wu va Sawei Yeekaamɔisia kɛɛ Farisiisia! Baayablaa lɔ a wue! Hani gbi wa majɔɔ kɛɛ wa kɔlɛlɔ na puu wu kaka yila ve Ngewɔ wɛ mɛlifɛisia hu, kɛɛ wu gbahanga a sawei yeebamayeisia houla kia nyɔkɔ pɔɔna wiela na a nungaa wekeisia kɛɛ kpekpeya kɛɛ tɔnya; jisia lɔ mahoungɔ yɛla wu ti wie kɛɛ ii kɛni kɛ wa yeenasia gulalɔ.

²⁴Wu pele gɛbla wumungɔi jisia! Sawei nasia ti mumungɔ kia pupu, wa maholalɔ wu kpua wu gboli-hani hu, kɛɛ Ngewɔ jawei yeenasia ti wɔngɔngɔ kia nyɔmɛi i na, wa kpɔlelɔ, wɛɛ ti hou.

²⁵“I nyamuni kpa wu va, Sawei Yeekaamɔisia kɛɛ Farisiisia! Baayablaa lɔ a wue! Ajifa wa bolei kɛɛ pletii yeepomɛi golelɔ fo, kɛɛ ti goohui lavengɔ a hani nasia wa sɔɔ a kpaya kɛɛ kava, wua yekpe lekee gohunɛva.

²⁶Bi Farisiimɔ wumungɔi ji! Bolei yeekohui yese gole kɛɛ pletii, na wooma bi yeepomɛi bɛɛ gole.

²⁷“I nyamuni kpa wu va, Sawei Yeekaamɔisia kɛɛ Farisiisia! Baayablaa lɔ a wue! Ajifa wu gbuangɔ a kamba magbatɛngɔesia hojei jiangɔ ma; ti nyandengɔ a yɛla ti luwumɛi kɛɛ ti goohui lavengɔ a poma lulangaa kɛɛ ti galeisia.

²⁸Hii lɔɔ wua bɛɛ wu na, wa kɛlɔ a numui gbi wu luwui ma kɛ wu yekpengɔe kɛɛ wu liisia lavengɔ a baaya kɛɛ jumbu.

²⁹“I nyamuni kpa wu va Sawei Yee kaamɔisia kɛɛ Farisiisia! Baayablaa lɔ a wue! Ajifa wa Ngewɔ lutuisia ti gambɛisia gbatɛ, wu tɔnyablɛisia ti gambɛisia magbatɛ nyandengɔ,

³⁰wa nde wɛɛ, ‘Ina mu yɛlɔ wɔɔ na mu maadani ti watii hu, muii yɛ gbɛɛ ti ma Ngewɔ lutuisia ti waalɛi hu.’

³¹Faale wu kulunga ma vulii kɛ nasia ti Ngewɔ lutuisia waani ti leengeisia mia a wue!

³²Kɛ a na yakpua wu maadani ti tɔtoni wɔɔ.

³³Wu kaalingɛi jisia kɛɛ kaali goohu leengeisia! Wu lii a yee yɛ ma kɛ Ngewɔ ɛɛ wu lɛɛ aa wu yoyo jahama?

³⁴Faale nga Ngewɔ lutuisia yoyolɔ wu gama kɛɛ nɛmahulewebleisia kɛɛ kaamɔisia, kɛɛ wa ti lɛɛnga gbakpalɔ krɔsii ma ti lo na ti haa, wu pekeisia lewe wu hɛɛ wɛleisia bu, wu juuya hitɛ ti woma,

³⁵ aako kpalɛi na i na nasia va ti numu yekpei gbi waani, Ngewɔ i nda wu ma, i hiye pɔɔnamɔi Ebɛl waalɛi ma i to Sakaraya ma, Barakaya loi, na wu paani Ngewɔ Wɛlei bu saagbuamɛi gbla.

³⁶Ngi hugɛ a wue a tɔnya, nungei jisia kpɛlɛɛ ti waalɛi yee kpelɛi a la haablei jisia lɔ ma.”

³⁷Yesu ndeilɔ yɛ, “Oo Jelusalɛm, Jelusalɛm! Bia ba Ngewɔ lutuisia waa, ba tutui nasia hɔwɔhɔwɔ Ngewɔ a ti lo bi gama! Heima lolɛ ngi yɛ loni ngi bi leengeisia gbi lɛma hinda yila, kia tɛhɛi a ngi leengeisia lɛma ngi gbakisia bu, kɛɛ wuii lumani mbɛ!

³⁸ Faale nungeisia ta vayalɔ wu Yewɔ Wɛlei Wai ma i wopo.

³⁹ Gbɛɛ ngi nde wu ma, i hiye kiahuna ma, wɛɛ yaa nya lɔ gbɔma kɛlee foloi na ma wa nde wɛɛ, ‘Ngewɔ i numui na luba i wama Ndemɔi biyei hu.’ ”