Read Ngowili Yekpei Numu Kpɛlɛɛ Va MATIU 24 Bible Online

MATIU 24 - Ngowili Yekpei Numu Kpɛlɛɛ Va bible

MATIU 24

¹Kia Yesu i gbuani Ngewɔ Wɛlei bu i yɛ lima, ngi gaalopoisia ti wailɔ ngi gama, ta pɛlei nasia gɛ a ngie ti looni.

²Yesu i kpɛmboilɔ yɛ, “Tɔnya le, kungɔi wu jisia kpɛlɛɛ gbe; kɛɛ gbɛɛ ngi hugɛ a wue, kɔtu yakpe bɛɛ ɛɛ lo mbei laani ngi mbaa maahu, ta ti kpɛlɛɛ wololɔ ti ti gula.”

³Kia Yesu i yɛ heini ɔlivi Yiyei wumba, ngi gaalopoisia ti wɛilɔ ngi gama, tia lekee, tɛɛ, “Hugɛ a mue migbe lɔ ji a wie tawao gbɔɔ a wie kɛva kɛ bi wa-gbelei i hitinga kɛɛ haa-hindeisia ti gbɔyɔlei.”

⁴Yesu kpɛmboilɔ yɛ, “A wu mahugbe numu gbi aa wu yaka.

⁵Gbamaile numu gboto ta walɔ ta nya biyei wumbu, ta nde tɛɛ, ‘Ngewɔ Maha Heingɔi lɔ a nge!’ tawao ta numu gboto yakalɔ.

⁶Wa kɔisia gɔwoi mɛnilɔ wu gblanga kɛɛ kɔisia ti malɔwɔi kuhama; kɛɛ wu lii aa hɛlɛ; ajifa hindei jisia nyɔkɔ ta wielɔ huɛɛŋ kɛɛ tɛɛ kɛ kɛ kɛlɛmɛi i hitinga ma.

⁷Kɛnyɛisia ta gɔlɔ a ti nyɔunyɔ, ndɔleisia ta lapi a ti nyɔunyɔ. Ndɔleisia ta walɔ tawao ndɔɔlei a gbɛlilɔ hu gbi;

⁸Hindei jisia kpɛlɛɛ ta wielɔ kia ndo-le-goohu-gbalei lɔtomɛi i na.

⁹“Yeewatii na, wu juwuisia ta wu houlɔ ti wu ve mahubleisia wɛ kpalɛ lava wu ma kɛɛ wu waava. Nuuvui gbi ta lololɔ a wue jifa wu langɔ a nge.

¹⁰Nya woomablaa gboto ta gbelɔ a lala a nge; ta ti nyɔunyɔ velɔ, ti lolo a ti nyɔunyɔ.

¹¹Ndɛɛ Yewɔ lutui gboto ta gbɔkulɔ tawao ta numu gboto yakalɔ.

¹²Jifa hinda nyamu wielei a gulɔ hu gbi, ndomɛi na numu gboto ti piengɔ a ti nyɔunyɔ, hu a haalɔ.

¹³Kɛɛ numui na a liilo i to yeekɛlɛmɛi a bawolɔ.

¹⁴Tawao Ngowili Yekpei ji kɔlooni Ngewɔ Mahayɛi ma a lelɔ dunyei hu gbi aako numui gbi ti mɛni; na wooma kɛ haa-hindeisia ti gɛlɛmɛi i hitinga.

¹⁵ “Wu hunyanimɔ maluwangɔi na lɔngalɔ Ngewɔ lutui Daniɛl i ngi yɛpɛ leni, i looni Ngewɔ Wɛlei Wai bu (kɔlɛi ji gaamɔi i ji yeembui gɔɔ),

¹⁶nungei nasia ta yɛ Judia lɔlei hu ti wila ti lɛ ngiyeisia hu.

¹⁷Numui na a yɛ ngi wɛlei wumba, aa hitɛ ngi mahaakeisia wumbuva pɛlei bu.

¹⁸Numui na a yɛ kpalɛi hu aa yaama ngi lomɛi wooma.

¹⁹A yɛ nyamuni kpa foloi nasia ma koonyahangɛisia va kɛɛ koimɛisia!

²⁰A Ngewɔ vɛli wu wilalɛi aa yɛ a haamɛi ɔɔ Ndɛvu Volei.

²¹ Ajifa watii na yeendimɔnɛi nyɔkɔ ii yaa yɛni wɔɔ na, i hiye dunyei lɔto-gbelei ma i to kiahuna ma, tawao ɛɛ yɛ na kunafɔ.

²²Kɛɛ Ngewɔ i yeelɔwɔi maahu gbuanga; ina na ii le numu gbi ii yɛ bawo. Kɛɛ nasia va i loko longa ti ma ti bawova, a yeelɔwɔi maahu gbualɔ.

²³“A watii na, numu gbi i ndengaa wu ma yɛ, ‘A wote, Ngewɔ Maha Heingɔi gbe mbei!’ ɔɔ ‘Ta gbe mia!’ waa la a ngie.

²⁴Gbamaile ndɛɛ Yewɔ Maha Heingɔisia kɛɛ ndɛɛ Yewɔ lutuisia ta gbɔkulɔ tawao ta kabande hinda waawaangaa wielɔ aako nasia vulii bɛɛ Ngewɔ i loko longa ti ma ti bawova ti ti yaka, ina ti guilɔ.

²⁵A wolo! I longa kulɔ ngi ji hugɛnga a wue.

²⁶“Faale, nungaa ti ndengaa tɛɛ, ‘A wote, taa ndɔgbɔ lambɛi ma!’ waa li na; ti ndengaa tɛɛ, ‘Taa pɛlei ji bu!’ waa la la.

²⁷Ajifa nya nya Nuuvu Hindoloi nga walɔ kia ngelei a baahugbua ngelei ma i hiye ngejahu i foo gɔwɔhu.

²⁸“Hinda gbi lekee pomɛi i na, na lɔ yibɛisia ta gbɔtɔ na.

²⁹ “Foloi nasia yeendimɔnɛi i lewengaa lekee, foloi a gbindilɔ, ngalui ɛɛ voo; tumbekeisia ta gbualɔ ngelei ma ti gula tawao kpayei nasia ti ngelei ma ta gbɛlilɔ ti gbua ti jia-weleisia ma.

³⁰ A watii na, Nuuvu Hindoloi walei yeetɔmaseli a gɛlɔ ngelei ma tawao kɛnyɛi gbi dunyei hu ta wɔlɔ ji ta nya nya Numu Hindoloi lɔ nga wa njagbili hu ngelei ma a kpaya waa kɛɛ temaya.

³¹Bulu wai a yialɔ kɛ i ngi malikeisia vayanga hu tawao ta nasia lɛlɔ ma i loko longa ti ma ti bawova ta gbua dunyei luwuma gbi.

³²“A kaa wumbu figi wulii ma; ngi bekeisia ti wundungaa, i tɔtoo a ndawa gbuala kɛ wu kɔɔnga kɛ haamɛi lɔ wama.

³³Hii lɔɔ hindei na wieyii i na, wu hindei jisia kpɛlɛɛ lɔnga ti wiema, wa kɔɔlɔ kɛ ngi fongɔ jɔngɔ le pɛlei laama.

³⁴Gbɛɛ ngi nde wu ma a tɔnya kɛ hindei jisia kpɛlɛɛ ta wie pɛiŋ nuuvui nasia ti na kiahuna ti yaa gbɔyɔ a haala.

³⁵Ngelegoohu tia dunyei ta gbɔyɔlɔ kɛɛ nya layie ɛɛ nyani.

³⁶“Kɛɛ numu gbi ii kɔɔ migbe lɔ lɔwɔi na a hiti ma, malikeisia vulii bɛɛ ti ngelegoohu tii kɔɔ; nya nya Ngewɔ Hindoloi ngii kɔɔ, mu Kɛkɛ Ngewɔ yakpe mia i kɔɔngɔ.

³⁷ Kia i wieni Noa watii hu, hii a wie Nuuvu Hindoloi wa-gbelei ma.

³⁸Ajifa pɛiŋ wɔɔ njavei i yaa waa, nungaa ti yɛlɔ a mɛhɛɛ mɛ, ta ndɔ gboli, ta nyahangaa jɔɔ, ta nyahangaa ve hiingaa wɛ, i to foloi na ma Noa i wuaani ndɛndɛi hu.

³⁹ Tii yɛ magɔni gbɔɔ i wiema i lohu njavei i wa i ti gbi waa. Hii mia a wie a nya nya Nuuvu Hindoloi nya wa-gbelei.

⁴⁰Yeewatii na, numu fele ta yɛlɔ yengema kpalɛi hu; nya Nuuvu Hindoloi nya malikeisia ta yeengila wumbulɔ, yeena i lo.

⁴¹Nyaha fele ta yɛlɔ mbei hiyama; ta yeengila wumbulɔ, yeena i lo.

⁴²Faale, wu valangɔ i yɛla, gbamaile wuii foloi na gɔɔ nya wu Lemɔi a nge nga wa.

⁴³Kɛɛ a ji gɔɔ, ina pɛlɛmɔi i yɛ kɔɛilɔ kpindi yeemigbe lɔ humamɔi i wama, ii yɛ yii tawao ii yɛ luma humamɔi aa wili pɛlei bu.

⁴⁴Faale wu valangɔ i yɛla kpele gbi, ajifa nya nya Nuuvu Hindoloi nga wa a watii na lɔ wu lii gbi ii ma.

⁴⁵“Ye lɔ hɔɔ bɔilopo golongɔ nɛmahulewengɔi le, na ngi lemɔi i ngi loni bɔilopo wekeisia maahu ti mɛhɛɛ veva ti wɛ yeewatii ma.

⁴⁶Bɔilopoi na lubangɔe ngi lemɔi a wa i male i piema hii.

⁴⁷A tɔnya, ngi hugɛ a wue, ndemɔi na a ngi yeyahani gbi loko wuaalɔ bɔilopoi na yeya.

⁴⁸Kɛɛ ina bɔilopo nyamu mia a ngie, a ndelɔ ta yekpe ma yɛ, ‘Nya lemɔi ii humbuma a wa,’

⁴⁹tawao a tɔtolɔ a ngi mbaa bɔilopoisia lewela, a mɛhɛɛ mɛ, a ndɔ gboli tia ndɔhoubleisia.

⁵⁰Kɛɛ yeebɔilopoi ji ngi lemɔi a walɔ folo yila ma ngi lii gbi ɛɛ yɛ ngi walaa ma kɛɛ hawei ma ii kɔɔ.

⁵¹Ngi lemɔi a kpalɛ waa lalɔ ngi ma, i ngi wili baayablɛisia lia. Na lɔ a yɛ na a wɔɔ, a ngi yɔngɔlii yaamɛ.