Read Ngowili Yekpei Numu Kpɛlɛɛ Va MATIU 25 Bible Online

MATIU 25 - Ngowili Yekpei Numu Kpɛlɛɛ Va bible

MATIU 25

¹“Watii na nya nya Nuuvu Hindoloi nga wa, ngelegoohu mahayɛi a wielɔ kia nyahalengaa puungaa, ti ti lamboisia wumbuni ti li nyaha-gɔli-gomɛi hu nyaha jɔmɔi maleva.

²Ti lɔɔlu ti baabangɔ yɛla, yeenasia lɔlisia ti nɛmahu lewengɔ.

³Yeebabangɔisia ti liilɔ a ti lamboisia kɛɛ tii lini a kaosii mɔnu gbi,

⁴kɛɛ yeenɛmahu lewengɔisia ti liilɔ gba a kaosii haaka wekangaa hu.

⁵Kɛɛ nyaha jɔmɔi ii humbuni a wa, kɛ njiimanii i ti lɔnga, njii i lewe a tie.

⁶“A kpindiliɛi yelewoi i wɛilɔ tɛɛ, ‘Nyaha gɔimɔi lɔ wama! A wa wu ngi male!’

⁷Nyahalo puisia ti wuilɔ njii hu, ti ti lamboisia hugbatɛ, ti to nga.

⁸Kɛ yeebabangɔisia ti ndenga yeenɛmahulewengɔisia ma tɛɛ, ‘A mu gɔ kulo wu kaosii hu, jifa mu lamboisia lɔ lufema.’

⁹Kɛɛ yeenɛmahulewengɔisia ti poteilɔ tɛɛ, ‘Sawo, kaosii i na aa gu mua wueni va; a li majiablɛisia gama wu wu nda yeya.’

¹⁰Kia nyahalo baabangɔisia ti lini kaosii yeyamɛi kɛ nyaha jɔmɔi i fonga. Nyahalo lɔɔlii nasia i maleni ti magbatɛngɔ, tia tieni ti wuailɔ nyaha-gɔli-gomɛi hu ti yeepɛlei gbɔwu.

¹¹“Na wooma nyahalo lɔɔlu wekeisia ti wɛilɔ ti pɛlei laalewe tɛɛ, ‘Ndemɔi, ndemɔi, ndawo mu wɛ.’

¹²Kɛɛ nyaha gɔimɔi i poteilɔ yɛ, ‘A tɔnya, ngi nde wu ma, ngii wu gɔɔ.’ ”

¹³Yesu i ngi yɛpɛi yakpuɛilɔ yɛ, “Faale, wu valangɔ i yɛla ajifa wuii foloi gɔɔ ɔɔ hawei na wu Lemɔi a wa.

¹⁴“Yeewatii na ma, Ngelegoohu Mahayɛi a wielɔ kia kena yila na i yɛ lima jia hu, i ngi bɔilopoisia loli, i ngi yeyahani gbi loko wuaa ti yeya.

¹⁵Navoei na a bɛ bɔilopo yilayei gbi ma, tamia i feni ti wɛ. I tauji hɔndɔɔ lɔɔlu veilɔ yeengila wɛ, i tauji hɔndɔɔ fele ve yeepekei wɛ, i tauji hɔndɔɔ yila ve yeena wɛ, kɛ i ya ngi jiei hu.

¹⁶Bɔilopoi na i tauji hɔndɔɔ lɔlii majɔɔni i liilɔ yakpe i tɔtoo a veela la, i gu tauji hɔndɔɔ lɔɔlu weka ma.

¹⁷Hii lɔɔ bɔilopoi na i tauji hɔndɔɔ felei majɔɔni i pieni, i gu tauji hɔndɔɔ fele weka ma.

¹⁸Kɛɛ bɔilopoi na i tauji hɔndɔɔ yilei majɔɔni i liilɔ, i ndowei bɔ, i ngi lemɔi navoei lɔwu na.

¹⁹“Ti lemɔi i lɛmbilɔ hu kaka kɛ i wanga i nde yɛ ti wa ti gona.

²⁰Bɔilopoi na i tauji hɔndɔɔ lɔɔli majɔɔni i wɛilɔ a tauji hɔndɔɔ weka yɛ, ‘Ndemɔi, bi tauji hɔndɔɔ lɔɔlu lɔ wɔɔ veni nya wɛ; tauji hɔndɔɔ lɔɔlu weka gbe i lani ma.’

²¹Kenɛi ndeilɔ ngi ma yɛ, ‘Bi hinda yekpe waa wienga; bɔilopo yekpe lɔ a bie; kia bi lɔnyanga hinda wulo hu, nga bi lolɔ hinda waa maahu; wuaa mu mɛhɛɛ mɛ, mu kohunɛ wie.’

²²Kɛ bɔilopoi na i tauji hɔndɔɔ felei majɔɔni i wanga yɛ, ‘Ndemɔi, bi tauji hɔndɔɔ felelɔ wɔɔ veni nya wɛ; tauji hɔndɔɔ fele weka mia i lani ma.’

²³Ngi Lemɔi ndeilɔ yɛ, ‘Bi hinda yakpe waa wienga; bɔilopo yekpe lɔ a bie; bi lɔnyanga hinda wulo hu, nga bi lolɔ hinda waa maahu; wuaa mu mɛhɛɛ mɛ, mu kohunɛ wie.’

²⁴Na wooma bɔilopoi na i tauji hɔndɔɔ yilei majɔɔni i wɛilɔ yɛ, ‘Ndemɔi, ngi yɛ kɔɔlɔ kɛ bi yagbalɛngɔ waa le, na bii hini tamia ba tewe, tawao na bi woo ii le tamia ba mbumbu;

²⁵famia ngi luwɛilɔ ngi li ngi bi navoei lɔwu ndowei hu. Bi navoei gbe!’

²⁶Ngi lemɔi ndeilɔ yɛ, ‘Bɔilopo nyamu lɔ a bie tawao bi hawangɔ! Bi yɛ kɔɔlɔ kɛ na ngɛɛ hii tamia nga tewe, tawao na nya woo ii le tamia nga mbumbu.

²⁷Maa a houlɔ gɛ bi nya navoei wu bankii ma, na hii nya wangɔi hu nga yeenavoei majɔɔlɔ mato i laani ma.’

²⁸Kɛ i ndenga bɔilopoi wekeisia ma yɛ, ‘A navoei na gbua ngi yeya wu fe bɔilopoi na wɛ tauji puii i ngi yeya.

²⁹Gbamaile numu gbi hani i ngi yeya, mato a velɔ ngi wɛ kɛ i gbotonga ngi yeya; kɛɛ numui na hani gbi ii ngi yeya, na wuloi bɛɛ a yɛ ngi yeya, a gbualɔ ngi yeya.

³⁰A bɔilopo nyamui ji wumbu wu pili ngiti ya kpindi hu; na mia nungeisia ta wɔɔ na ta ti yɔngɔlii yaamɛ.’

³¹“Kpelei Nuuvu Hindoloi a wa ngi mahayɛi hu; Ngewɔ malikeisia gbi ti ngi ma, a heilɔ ngi maha-heimi.

³²Kɛnyɛi gbi yeehubleisia ta yandɔlɔ ngi gulɔ tawao a ti luahu gɔlɛlɔ kia mbala mahugbemɔi a mbalangɛisia kɛɛ njengɛisia luahu gɔlɛ.

³³A mbalangɛisia lewe ngi yejei hu lɔ, tia mia a numu yekpeisia, i njengɛisia lewe ngi gɔwɔi hu, tia mia a numu nyamuisia.

³⁴A ndelɔ na nungei nasia ma ti ngi yejei hu yɛ, ‘A wa, wua nya Kɛkɛ i wu lubanga! A wa wu mahayɛi na mɛ Ngewɔ i hugbatɛnga wɔɔ wu va i hiye dunyei gbatɛ-gbelei ma;

³⁵ajifa ndɔlɛ yɛlɔ wɔɔ nya ma wu nya gɔ a mɛhɛɛ ngi mɛ, nya bolohu bengɔ wu nya gɔ a nja ngi kpɔle, hota a nge, wu nya hota-hinda wie,

³⁶nya magbukangɔ, wu kula ve ngi ngili, nya heegbɛngɔ, wu gbɔ nya ma, ngi kpindiwɛlei bu, wu va nya ma.’

³⁷Numu yekpeisia ta ngi mɔlilɔ tɛɛ, ‘Ndemɔi, migbe lɔ wɔɔ mu bi lɔni ndɔlɛ bi ma mu bi gɔni a mɛhɛɛ bi mɛ, ɔɔ bi bolohu bengɔ mu bi gɔ a nja bi kpɔle?

³⁸Migbe lɔ mu bi lɔni hota a bie mu bi hota-hinda wie, ɔɔ bi magbukangɔ mu kula ve bi ngili?

³⁹Migbe lɔ mu bi lɔni bi heegbɛngɔ ɔɔ bi kpindiwɛlɛ bu mu gbɔ bi ma?’

⁴⁰Mahɛi a kpɛmbolɔ yɛ, ‘Gbɛɛ ngi hugɛ a wue a tɔnya, na lekee wu pienga wɔɔ a nya ndewe mumui jisia yeengila gbi baa ii ti ma wɔɔ, wu pieni a nya lɔ.’

⁴¹“Na wooma a ndelɔ nungei nasia ma ti ngi gɔwɔhui yɛ, ‘A hiye nya yaama, wua Ngewɔ jondii i wu ma. A li ngɔmbu wai na hu Ngewɔ i ndani Seitana va tia ngi malikeisia tawao yeengɔmbui ɛɛ lufe kunafɔ;

⁴²ajifa ndɔlɛ yɛlɔ wɔɔ nya ma, kɛɛ wuii nya gɔni a mɛhɛɛ nga mɛ, nya bolohu bengɔ. Kɛɛ wuii nya gɔni a nja nga kpɔle;

⁴³hota a nge kɛɛ wuii nya hota-hinda wieni, nya magbukangɔ kɛɛ wuii kula veni nga ngili, nya heegbɛngɔ ɔɔ ngi kpindiwɛlei bu kɛɛ wuii gbɔni nya ma.’

⁴⁴Tia bɛɛ ta ngi mɔlilɔ tɛɛ, ‘Ndemɔi, migbe lɔ wɔɔ mu bi lɔni ndɔlɛ i bi ma ɔɔ bi bolohu bengɔ ɔɔ hota a bie ɔɔ bi magbukangɔ ɔɔ bi heegbɛngɔ ɔɔ bi kpindiwɛlei bu muii gbɔni bi ma?’

⁴⁵Mahɛi a kpɛmbolɔ yɛ, ‘Kia wuii kpɔma wieni a jisia mumuisia yeengila bɛɛ, wuii pieni a nge.’ ”

⁴⁶ Yesu i ngi yɛpɛi yakpuɛilɔ yɛ, “Faale jisia ta lilɔ kunafɔ liimavɔɔni hu, kɛɛ numu yekpei jisia ta wililɔ ndɛvui na hu ɛɛ gɛlɛ kunafɔ.”