Read Ngowili Yekpei Numu Kpɛlɛɛ Va MATIU 26 Bible Online

MATIU 26 - Ngowili Yekpei Numu Kpɛlɛɛ Va bible

MATIU 26

¹Kia Yesu i kpɔyoni a kaai jisia kpɛlɛɛ gela a nungeisia, i ndeilɔ ngi gaalopoisia ma yɛ,

² “Wu kɔɔlɔ kɛ njii fele goohu Tewema Gomɛi a hitilɔ ma. Ta nya nya Nuuvu Hindoloi houlɔ ti ngi ve ngi waava.”

³A watii na Saagbuablaa Waawaisia kɛɛ kpakoleisia ti gomɛilɔ Saagbuablɛisia ti gulɔmɔi Kayafasi yeepɛlɛbu,

⁴ti wuhitɛ ta yee pie ti ngi hou ndɔwuma ti ngi waa.

⁵Kɛɛ ti ndeilɔ tɛɛ, “Aa yɛ a komɛi ji hu, ajifa mu piengaa kiahuna ndapi a gulalɔ.”

⁶Yesu i yɛlɔ Bɛtani, Saimɔn na wɔɔ kpɔukpɔu heegbɛi i yɛ ngi ma, ŋgi yeepɛlɛbu.

⁷Kia i yɛ heini a mɛhɛɛ mɛ, nyaapo yila i wɛilɔ ngi gama baabɔɔ-jani i ngi yeya ndavengɔ a ngulɔ baagbangɔ waa, i yeengulɔi ji yei Yesu wui hu.

⁸Kɛɛ ji kaalopoisia ti hulɔni, i gbalɛilɔ ti ma kɛ ti mɔlinga tɛɛ, “Gbɛe i ngulɔi ji hunyaninga?

⁹Aa majialɔ a navoo lakpa waa, i yeenavoei ve fɛɛliblɛisia wɛ.”

¹⁰Yesu i na gɔɛilɔ ti yɛ nde kɛ i ndenga ti ma yɛ, “Gbɛe wu nyaapoi vawɔlima? Hinda yekpe waa mia i pienga a nge.

¹¹ Wua fɛɛlibla lɔ wu heini fɔ, kɛɛ nya mua wueni ɛɛ yɛla watii gbi.

¹²I ngulɔi ji wungalɔ nya ma nya gbuhɛi magbatɛvaa nya gbɔwuva.

¹³Gbɛɛ ngi nde wu ma a tɔnya kɛ hinda gbi lekee ta Ngowili Yekpei ji le na dunyei hu gbi, ji nyaapoi ji i pienga hu a gɛlɔ na ngi hinda hitɛva nungaa nɛmahu.”

¹⁴Folo yakpei na, Yesu gaalopo puu maahu feleisia yeengila ta toli a Judasi Kɛriɔtmɔi i liilɔ Saagbuablaa Waawaisia gama

¹⁵ i mɔli yɛ, “Gbɔɔ wa fe nya wɛ ina ngi gbɔilɔ wu ma wu Yesu hou?” Kɛ ti ngi gɔnga a kanigole gbaa numu gbɔyɔngɔ maahu puu.

¹⁶I hiye watii na ma Judasi yɛlɔ a watii yekpe gɔli Yesu veva.

¹⁷Bledii Gbama Gomɛi yeehaalaa volei ma, kaalopɔisia ti wɛilɔ Yesu gama ti ngi mɔli tɛɛ, “Mindo lɔ bi longɔ mu Tewema Gomɛ mɛhɛɛ hugbatɛ na bi wɛ?”

¹⁸I ndeilɔ ti ma yɛ, “A li taa wai hu taamɔ yila gama wu nde ngi ma wɛɛ, ‘Kaamɔ yɛ, Nya watii i hitinga; mua nya gaalopoisia ma Tewema Gomɛi hou bi yeepɛlɛbu lɔ.’ ”

¹⁹Kaalopoisia ti pieilɔ kia Yesu i ndeni la ti ma, ti Tewema Gomɛ mɛhɛɛ hugbatɛ.

²⁰Kia kpɔkɔ i wɛlɛni, Yesu tia ngi gaalopo puu maahu feleisia ti heilɔ mɛhɛɛ mɛmɛi.

²¹Kia ti yɛ mɛhɛɛ mɛma Yesu i ndeilɔ yɛ, “Gbɛɛ ngi hugɛ a wue a tɔnya, wu yilayee lɔ i nya vema.”

²²Kaalopoisia ti lii i gbavoilɔ, kɛ ti tɔtonga a ngi mɔlila a ngilangila tɛɛ, “Ndemɔi, nya le?”

²³Yesu i kpɛmboilɔ yɛ, “Numui na mua ta mu loko hitɛma mɛhɛɛi hu tamia i nya vema.

²⁴Nya nya Nuuvu Hindoloi nga haalɔ huɛɛŋ kia Ngewɔ Gɔlɛi ndeni la, kɛɛ i nyamuni kpa numui na va a Nuuvu Hindoloi ve! Aa fisalɔ yeenumui na va ina tii yɛ ngi leni gbi.”

²⁵Judasi na i ngi veni i ngi mɔlilɔ yɛ, “Kaamɔ, nya le?” Yesu i kpɛmboilɔ yɛ, “Bia vulii bi ndea.”

²⁶Kia ti yɛ mɛhɛɛ mɛma, Yesu i bledii gbuha yila wumbuilɔ, i siɛgbua Ngewɔ ma, i ngaingai, i fe ngi gaalopoisia wɛ yɛ, “A hou wu mɛ, nya luwui lɔ.”

²⁷Kɛ i bolei wumbunga, ndɔi i hu, i siɛgbua Ngewɔ ma, i fe ti wɛ yɛ, “Wu kpɛlɛɛ a ji gboli;

²⁸nya ŋamɛi lɔ, na i Ngewɔ hinda yangilingɔi gbakpama, nya ŋamɛi na i wama wuma numu gboto va aako Ngewɔ i manu jumbuisia ma.

²⁹Gbɛɛ ngi hugɛ a wue, ngɛɛ yaa ndɔi ji gboli kɛlee foloi na mua wueni ma ndɔ ninɛi gbɔle nya Kɛkɛ mahayɛi hu.”

³⁰Na wooma ti Tewema Gomɛi Yeenguleisia yailɔ kɛ ti ya ɔlivi Yiyei hu.

³¹Kɛ Yesu i ndenga ti ma yɛ, “Kpindi ji, wu kpɛlɛɛ wa lewelɔ a piimɛ wu vaya nya ma; gbamaile Ngewɔ i ndeilɔ ngi Gɔlɛi hu yɛ, ‘Nga mbala mahugbemɔi waalɔ kɛ mbalangɛisia ti hu i vayanga.’

³²Kɛɛ ngi vulungaa ngi hiye hee hu, nga lilɔ wu gulɔ Galili.”

³³Pita i yɛpɛilɔ Yesu gama yɛ, “Numui kpɛlɛɛ bɛɛ ti vaya bi ma, nya ngɛɛ vaya bi ma.”

³⁴Yesu ndeilɔ Pita ma yɛ, “Gbɛɛ ngi hugɛ a bie a tɔnya, kpindi ji, pɛiŋ tɛhinɛi i yaa gokole, ba mawalilɔ nya hinda ma heima sawa.”

³⁵Pita i poteilɔ i nde ngi ma yɛ, “Ti yɛ bɛɛ mua bie waama, ngɛɛ mawali bi hinda ma.” Kaalopoisia gbi ti njia yakpei ji lɔ leni.

³⁶Na wooma Yesu tia ngi gaalopoisia ti liilɔ hinda yila, ta na loli a Gɛtsimani, kia ti foni, Yesu i ndeilɔ ti ma yɛ, “A hei mbei, ngi li mia ngi Ngewɔ vɛli.”

³⁷I Pita wumbuilɔ kɛɛ Sɛbidi leengaa feleisia tia tieni ti li kulo tawao ngi maa i tɔtoilɔ a manulaa a ndiinyani.

³⁸Kɛ i ndenga ti ma yɛ, “Ndiinyani na i nya ma yɛkɛ i nya waa; a lo mbei wu yɛ a pelehu gbee.”

³⁹I liilɔ kulo, i wɛlɛ ndɔmɛi, i Ngewɔ vɛli yɛ, “Nya Kɛkɛ, ina a gulɔ a wiela kɛ pie bolei ji kpalɛi i ndavengɔ i veela nya ma; na hu gbi bi liimɛi i wie, nya ndɛi ii le.”

⁴⁰Kɛ i yamanga ngi gaalopo saweisia gama i male ti njii hu; kɛ i ndea Pita ma yɛ, “Gbɛe, wuii guni a pelehu gbela hawa yakpe bɛɛ va?

⁴¹A yɛ a pelehu gbe, wa Ngewɔ vɛli aako waa wili kɔlɛya hu; wu lii lumangɔe kɛɛ wu luwui gahu gbɔyɔngɔ.”

⁴²Yesu i yamɛilɔ gbɔma yeeheima felei ma, i Ngewɔ vɛli yɛ, “Kɛkɛ, ina kpalɛi na i bolei ji hu ɛɛ lewe nya ma kɛlee ngi kpɔle, kɛ bi liimɛi i wie.”

⁴³I gbɔma liilɔ ti gama i male ti njii hu, gbamaile tii yɛ gu a ti yamɛisia voola.

⁴⁴Yesu i gbɔma ti loilɔ yeeheima sawei ma, i li, i Ngewɔ vɛli, a njia yakpei nasia le.

⁴⁵Kɛ i yamanga ngi gaalopo saweisia gama i nde ti ma yɛ, “Wuaa lɛ njii hu, wa lɛɛvu? A wote mbei, watii i hitinga tawao tiaa Nuuvu Hindoloi vema jumbubleisia ti gbayei wɛ.

⁴⁶A hiye mu li. A tɔ lɛɛ, numui na i nya vema taa mbei gbla.”

⁴⁷Yesu i loni njɛpɛi ji lemaa kɛ Judasi i gbuanga nga, kaalopoisia yilayee, faha waa ti ngi wooma kɔboweisia ti ti yeya kɛɛ kpɔnɛisia, Saagbuablaa Waawaisia kɛɛ kpakoleisia ti ti longa.

⁴⁸Yeebayamɔi ji i wilanga a tɔmaseli gɛla a fahii yɛ, “Numui na lekee wa tɔ ngi ngi laagɔmi, tamia; a ngi hou.”

⁴⁹Judasi i liilɔ yakpe Yesu gama yɛ, “Kaamɔ, ndiilɛli i yɛ bi ma”, i ngi laagɔmi.

⁵⁰Yesu i ndeilɔ ngi ma yɛ, “Ndiamɔ, na bi piema, mavula.” Kɛ nungeisia ti waa, ti Yesu hou, ti ngi makpa.

⁵¹Nasia ti yɛ Yesu wooma yeengila i ngi gɔbowɛi laalɛilɔ nga i Saagbuablɛisia ti gulɔmɔi bɔilopoi i ngi wolii lewe na.

⁵²Yesu ndeilɔ ngi ma yɛ, “Bi gɔbowei yaama yeetei hu; gbamaile nasia ta lapi a kɔbowei, kɔbowei lɔ a ti waa.

⁵³Bii kɔɔ kɛ nga gulɔ a kpɔma vɛlila nya Kɛkɛ ma tawao kɛ a malika tauji gboto waa yoyolɔ mbɛ ngaama nya bawova?

⁵⁴Kɛɛ na i wiengaa, Ngewɔ Gɔlɛi la a yeehou, na i ndeni yɛ ji lɔ a nya wie?”

⁵⁵Kɛ Yesu i yɛpɛnga fahii gama yɛ, “Mahoungɔ yɛla wu wa a kɔbowangaa kɛɛ kpɔnangaa nya houva bi tɔaa bɛɛ humamɔ mia a nge? Folo gbi nyaa wɔɔ heini nga nungaa gaa Ngewɔ Wɛlei Wai bu, kɛɛ wuii nya houni.

⁵⁶Kɛɛ ji i wiengalɔ aako na Ngewɔ lutuisia ti nyɛini Ngewɔ Gɔlɛi hu nda i hou.” Kɛ ngi gaalopoisia gbi ti vayanga ngi ma, ti lewe a piimɛ.

⁵⁷Nasia ti Yesu houni ti liilɔ a ngie Saagbuablɛisia ti gulɔmɔ wai Kayafasi gama, Sawei Yeekaamɔisia tia kpakoleisia ti gomɛngɔ na.

⁵⁸Pita i yɛlɔ a to Yesu ma kuhama, i lo hu ti foo Saagbuablɛisia ti gulɔmɔ wai gatei hu. I wuailɔ i hei sojei nasia lia ti yɛ katei mahugbe, aako i yeehindei ji gɛlɛyii lɔ.

⁵⁹Saagbuablaa Waawaisia kɛɛ Kotii lebleisia gbi ti selingaa gɔlilɔ ndɛɛ gualava Yesu ma aako ti ngi waa.

⁶⁰Kɛɛ tii yeeseli majɔɔni kia bɛɛ seli gboto ti wɛilɔ Kotii gulɔ ti ndɛi guala ngi ma. Kɛlɛmɛi numu fele ti wɛilɔ Kotii gulɔ

⁶¹tɛɛ, “Taamɔi ji i ndeilɔ yɛ, ‘Nga gulɔ ngi Ngewɔ Wɛlei Wai wolo, ngi to njii sawa goohu.’ ”

⁶²Saagbuablɛisia ti gulɔmɔ wai i hiyeilɔ i lo, i nde Yesu ma yɛ, “Njia gbii bi laa hindei ji va seli jisia ti tɛma bi wumba?”

⁶³Kɛɛ Yesu malondongɔ yɛla. Saagbuablɛisia ti gulɔmɔ wai i gbɔma ndeilɔ ngi ma ye, “Ngi bi jondunga Ngewɔ vulungɔi ma, hugɛ a mue ina bia lɔ Ngewɔ Maha Heingɔi a bie, Ngewɔ Hindoloi.”

⁶⁴ Yesu i kpɛmboilɔ yɛ, “Bia vulii bi ndenga. Kɛɛ ngi hugɛ a wu gbi kɛ i hiye watii ji ma wa nya nya Nuuvu Hindoloi lɔlɔ i heini Ngewɔ gbayangɔi yejahui, a gbɔma wa dunyei hu i heini njagbilisia maahu ngelei ma.”

⁶⁵ Kɛ Saagbuablɛisia ti gulɔmɔ wai i ngi bobani blanga a ndiilewe yɛ, “I Ngewɔ bɛlɛ nyaninga. Gbɛ jeli lɔ gbɔma ma gbewe fa? Wu mɛninga na a Ngewɔ bɛlɛ nyani.

⁶⁶A kiti lewe njɛpɛi ma!” Ti kpɛmboilɔ tɛɛ, “Ngi lɛɛ le, mahoungɔ i haa.”

⁶⁷ Kɛ ti ndayɛi valinga ngi yaama, ta ngi lewe, ti lɛɛnga ta ngi bahu gbolɛ,

⁶⁸tɛɛ, “Ngewɔ Maha Heingɔi! Hugɛ lɛɛ a mue ye lɔ i bi leweni.”

⁶⁹Pita i yɛ heinilɔ ngitii ya katei hu kɛ foninge nyaha yila i wanga ngi gama yɛ, “Bia bɛɛ bi yɛlɔ Yesu Galilimɔi wooma.”

⁷⁰Kɛɛ i mawalilɔ ma ti gbi yaama yɛ, “Ngii na gɔɔ bi ndema.”

⁷¹Kia i gbuani i lo katei laa, foninge nyaha weka i ngi lɔilɔ, kɛ i ndenga hingei nasia ma ti yɛ na yɛ, “Taamɔi ji i yɛlɔ Yesu Nasalɛtimɔi wooma.”

⁷²Pita i gbɔma mawalilɔ ma, i jondu yɛ, “Ngii taamɔi na gɔɔ.”

⁷³Kia hu i lɛmbini kulo, nasia ti yɛ looni na ti wɛilɔ Pita gama tɛɛ, “A tɔnya, bia bɛɛ ti yilayee lɔ a bie, ajifa bi yɛpɛyii a bi velɔ.”

⁷⁴Kɛ Pita i tɔtonga a jondulaa yɛ, “Ngii taamɔi na gɔɔ.” Ngaamɛi na kɛ tɛhinɛi i gokolenga.

⁷⁵Kɛ Yesu layie i hitɛnga Pita wɛ ji i ndeni yɛ, “Pɛiŋ tɛhinɛi i yaa gokole ba mawalilɔ nya hinda ma heima sawa.” Kɛ Pita i gbuanga katei hu, i woo gbua ma i wɔɔ kaka.