Read Ngowili Yekpei Numu Kpɛlɛɛ Va MATIU 27 Bible Online

MATIU 27 - Ngowili Yekpei Numu Kpɛlɛɛ Va bible

MATIU 27

¹Kia ngele i woni, Saagbuablaa Waawaisia tia kpakoleisia ti wuhitɛilɔ; ti ngangili Yesu waavaa.

²Ti Yesu yiliilɔ ti li a ngie Gɔvinei Paileti gama.

³Kia baayamɔi Judasi i mɛnini kɛ ti Yesu lɛɛnga tawao tɛɛ ti ngi waamaa ngi lii i woteilɔ, i yama a kanigole gbaa numu gbɔyɔngɔ maahu puii Saagbuabla Waawaisia gama kɛɛ kpakoleisia,

⁴yɛ, “Ngi jumbu wulinga ji ngi pɔɔnamɔɔ venga ti ngi waama.” Ti ndeilɔ ngi ma tɛɛ, “Mu nda ii na ma, bi nda hinda mia.”

⁵Judasi i yeenavoei vayɛilɔ Ngewɔ Wɛlei bu, i gbua, i li, i ta yekpe hɛlɛ.

⁶Saagbuablaa Waawaisia ti yeenavoei wɔyɛilɔ tɛɛ, “Ii wɔnani navoei ji wuva Ngewɔ Wɛlei yeenavoo wumɛi ajifa nuuvu lɛɛvu jɔngɔ lɔ.”

⁷Faale ti wuhitɛilɔ yeenavoei hinda ma, ti ndɔlɔma yeya la fɛɛ-lomɔ yila ma hotangɛisia gbɔwuva na.

⁸Na vamia ta yeendɔlɔmɛi loli a Akɛldama, yeembui a “Ŋama Lɔlɔmɛi” i to foloi ji ma.

⁹ Kɛ njɛpɛi na la i hounga Ngewɔ lutui yia lemɔi Jɛrimaya i ndeni wɔɔ yɛ, “Ti kanigole gbaa numu gbɔyɔngɔ maahu puii wumbuilɔ, navoei na Isrɛlbleisia lɛɛnga ti lumani feva a ngi jɔngɔi,

¹⁰ti fɛɛ-lomɔi lɔlɔmɛi yeya la, kia Ndemɔi i ndeni la nya ma.”

¹¹Yesu i loilɔ Gɔvinei Paileti gulɔ, kɛ Gɔvinei i ngi mɔlinga yɛ, “Bia lɔ Juubleisia ti Mahɛi a bie?” Yesu i kpɛmboilɔ yɛ, “Bia vulii bi ndenga.”

¹²Kɛɛ kia Saagbuablaa Waawaisia kɛɛ kpakoleisia ti yɛ kpuisia hei ngi wumba, ii yeemɔli gbi gbɛmboni.

¹³Famia Paileti i ngi mɔlilɔ yɛ, “Bii kpui jisia mɛnima ti tɛma bi wumba?”

¹⁴Kɛɛ Yesu ii njɛpɛ yakpe bɛɛ leni; kɛ Gɔvinei wuhu i wunga kpu.

¹⁵Tewema Gomɛ gbi hu kungɔ yɛla Gɔvinei hu gbeva kpindiwɛlɛbumɔ yila ma, yeena lekee nungeisia ta lo la.

¹⁶A watii na, kpindiwɛlɛbumɔ lɔwɔngɔ yila yɛlɔ na ngi laa a Barabasi.

¹⁷Famia kia fahii ti gomɛni, Paileti i ti mɔlilɔ yɛ, “Ye lɔ wu longɔ ngi gbe ngi ma? Barabasi ɔɔ Yesu na ta toli a Ngewɔ Maha Heingɔi?”

¹⁸Gbamaile Paileti vuii i yɛ kɔɔlɔ kɛ toloi na ti yɛ kpua Yesu ma fahii na va ti yɛ ngi wooma famia ti ngi veni ngi waava.

¹⁹I baa na ma, Paileti i loni heini yeekootii na hu lɔ ngi nyahɛi i ngoo yoyo ngi gama yɛ, “Loko gbua taamɔ yekpei na mahinda hu ajifa hinda gboto i langa gbue nya ma hengei hu ngi va.”

²⁰Saagbuablaa Waawaisia kɛɛ kpakoleisia ti wuailɔ fahii woohu ndeva Paileti ma i gbe Barabasi ma, i Yesu waa.

²¹Kɛɛ Paileti i gbɔma ti mɔlilɔ yɛ, “Jisia feleisia yeegbɔɔ wu longɔ ngi gbe ma wu wɛ?” Kɛ ti kpɛmbonga tɛɛ, “Barabasi!”

²²Kɛ i ti mɔlinga yɛ, “Gbɔɔ wu longɔ ngi pie a Yesu na ta toli a Ngewɔ Maha Heingɔi?” Ti gbi ti ndeilɔ tɛɛ, “Ngi gbakpa krɔsii ma!”

²³Paileti i mɔlilɔ yɛ, “Gbɛ nyamu lɔ i pienga?” Kɛɛ ti tɔtoilɔ a yele waa gulala tɛɛ, “Ngi gbakpa krɔsii ma!”

²⁴ Kia Paileti tɔni kɛ kɛwɛ-laahu haa mia i piema Yesu mabawova, tawao ndapi yɛkɛ i lewe, i njɛi wumbuilɔ i ngi yeya wua ti gbi yaama yɛ, “Nya nda gbi ii taamɔi ji haala ma; a wu mbe wie.”

²⁵Fahii gbi ti yelei gulailɔ tɛɛ, “Ngi haalei i lɛ mu wumba mua mu leengeisia!”

²⁶Kɛ Paileti i gbenga Barabasi ma ti wɛ, tawao kia i pieni ti Yesu lewe a lo te i haa, i ngi veilɔ ngi sojeisia wɛ ngi gbakpava krɔsii ma.

²⁷Kɛ Paileti sojeisia ti ya a Yesu Paileti gatei hu, ti sojei nasia gbi lɛma ti yɛ na, ti ngi gaala.

²⁸Ti ngi nda guleisia gbuailɔ ngi ma, ti bobani gbɔugbɔi waa wu ngi ma.

²⁹Kɛ ti ngaali lekee huvɛlɛnga a maha-bɔlɛi, ti njei a ngi wui, ti ngulu guhɛi wuaa ngi yeya a maha-likpɔi. Na wooma ti wombi gbakpailɔ ngi gɔwɔbu, ta ngi gbafa tɛɛ, “Hooyoo, Juubleisia ti mahɛi!”

³⁰Ti yɛlɔ a ndayɛi vali ngi ma, ti ngulii gbua ngi yeya ta ngi wumba lewe la.

³¹Kia ti kpɔyɔni a ngi gbafala, ti bobani gbuailɔ ngi ma, ti ngi nda guleisia wu ngi ma, ti gbua a ngie katei hu ti li a ngie ngi gbakpava.

³²Kia ti yɛ gbuama tei hu, ti taamɔ yila maleilɔ, a gbua Sairini, ngi laa a Saimɔn, kɛ sojeisia ti kpɔndanga ngi ma liva a Yesu krɔsii.

³³Kia ti foni hinda yila ta na loli a Gɔlgɔta (yeembui a Ngugoko),

³⁴ ti ndɔ veilɔ ngi wɛ ngahupungɔ a hani ŋɔnaŋɔnangɔ, kɛɛ kia i kɔɔni, ii lumani aa kpɔle.

³⁵ Sojeisia ti ngi gbakpailɔ krɔsii ma, ti kɔhani gɔ ngi maguleisia va, numu gbi i na wumbu i paani.

³⁶Na wooma ti heilɔ ta ngi gaama gbe.

³⁷Njiɛi na ti pɛlɛni ngi ma, ti ngi waama fa, ti nyɛilɔ gbembele-gɛkɛlɛi ma tɛɛ, “Yesu lɔ, Juubleisia Ti Mahɛi,” ti kpakpa ngi wukɔɔ.

³⁸Kɛ ti humablaa fele gbakpanga tia Yesu-ni, yeengila i ngi yejahui, yeepekei i ngi gɔwɔhui.

³⁹ Tewe-a-pelebleisia ti yɛlɔ a ti wui vivii, ta ngi gbafa,

⁴⁰tɛɛ, “Bia gɛ bi Ngewɔ Wɛlei Wai woloma bi to njii sawa goohu, bia yekpe bawo lɛɛ! Ina Ngewɔ Hindoloi lɔ a bie, gbua krɔsii ma bi hitɛ.”

⁴¹Hii Saagbuablaa Waawaisia bɛɛ kɛɛ Sawei Yeekaamɔisia kɛɛ kpakoleisia ti yɛ ngi gbafa tɛɛ,

⁴²“I yɛlɔ a nungaa wekeisia bawo kɛɛ ɛɛ gu a ta yekpe bawola. Isrɛlblɛisia ti Mahɛi mia a ngie; i gbua lɛɛ krɔsii ma i hitɛ, kɛ mu langa a ngie.

⁴³ Ngi langɔe a Ngewɔ tawao yɛ Ngewɔ Hindoloi lɔ a ngie. Mu tɔ lɛɛ na ina Ngewɔ longɔi a ngie i ngi bawo lɛ.”

⁴⁴Humablɛi nasia vulii bɛɛ ti tia tieni gbakpani ti yɛlɔ a ngi gbafa hii.

⁴⁵A fologundiei, kpindi waa i wɛleilɔ ndɔlei na hu gbi i to kpɔkɔvolei ma.

⁴⁶ A kpɔkɔvolei, Yesu ndeilɔ ngeleya yɛ, “Ilai, Ilai, lama sabaktani?” yeembui mia a “Nya Yewɔɛi, nya Yewɔɛi, gbɛe bi gbuanga nya woohu?”

⁴⁷Nungei nasia lɛɛnga ti yɛ looni na ti ndeilɔ tɛɛ, “Taa Ilaija lolima!”

⁴⁸ Kɛ ti yilayee i ya a piimɛ, i njavɔɛfɔɛ-hani wumbu, i ndɔmbu ndɔi hu, i nguaa ngulu-guha ya, i tɛ ngi gama yɛ i kpɔle.

⁴⁹Kɛɛ pekeisia ti ndeilɔ tɛɛ, “A mawulo, mu tɔ lɛɛ ina Ilaija a walɔ i ngi bawo.”

⁵⁰Yesu i gbɔma yɛpɛilɔ ngeleya kɛ ngi lii i wuaanga.

⁵¹ Kɛ kula kpɔtukpɔtu wai na i yɛ hɛlɛni Ngewɔ Wɛlei Wai bu i blanga ndia, i hiye yeemaahui i to yeembui; ndɔlei i gbɛlilɔ, faweisia ta bla ndia,

⁵²kambɛisia ta lawo, Ngewɔblaa gboto wɔɔ ti haanga ta vulu ta hiye.

⁵³Ti gbuailɔ kambɛisia hu; tawao Yesu hiyengɔi wooma hee hu, ti liilɔ Jelusalɛm numu gboto ti ti lɔ na.

⁵⁴Kia Kugbei na tia ngi sojeisia ti yɛ Yesu gama gbe ti ndɔlei lɔni i gbɛlini, kɛɛ na gbi i wieni, nduwɛi i ti huveilɔ, kɛ ti ndenga tɛɛ, “A tɔnya, Ngewɔ Hindoloi vulii lɔ wɔɔ a taamɔi ji!”

⁵⁵Nyaha gboto ti toni Yesu ma ta gbua Galili, tawao ta gbɔ ngi ma ngovama, ti yɛlɔ na ti looni kuhama ta na gbe.

⁵⁶Meri Magdalamɔi i yɛlɔ ti lia, kɛɛ Meri, Jemisi tia Josɛfi ti nje, kɛɛ Sɛbidi leengeisia ti nje.

⁵⁷Kia foloi i yɛ gulama, Kpatɛmɔ yila i hiyeilɔ Arimatia i wa, ngi laa a Josɛfi, tawao ta bɛɛ i yɛni a Yesu woomamɔ lɔ.

⁵⁸I liilɔ Paileti gama, i Yesu womɛi vɛli. Paileti i ndeilɔ yɛ ti fe ngi wɛ.

⁵⁹Kɛ Josɛfi i pomɛi wumbunga, i mbeembee kasange nina sɛwɛsɛwɛ hu,

⁶⁰i nda ta vulii ngi nda gamba ninɛi hu ti mbɔni fawei hu, i kɔtu lakpa waa gilikili i ndagbɔwu la, i li.

⁶¹Meri Magdalamɔi kɛɛ Meri wekei ti yɛ heini na lɔ, ti wotengɔ kambɛi gama.

⁶²Kia ngele i woni, Ndɛvu Volei ma, Saagbuablaa Waawaisia kɛɛ Farisiisia ti lɛilɔ ma Paileti gama

⁶³tɛɛ, “Ndemɔi, i hitɛnga mu wɛ kɛ watii lɛ ndɛvu i yɛ ndɛɛmɔi na hokpala, i yɛlɔ a nde yɛ, ‘Lɔwɔ sawa nya haangɔi wooma, nga vululɔ ngi hiye hee hu.’

⁶⁴Faale, pie sojeisia ti li ti ngi gambɛi mahugbe pandawanda i lohu lɔwɔ sawei i hiti, ina na ii le ngi gaalopoisia ta lilɔ ti ngi womɛi huma, ti nde nungeisia ma tɛɛ, ‘I hiyenga hee hu,’ tawao na wiengalɔ, ndɛi yeekɛlɛmayei a yɛ nyamuni yeehaalayei ma.”

⁶⁵Paileti i ndeilɔ ti ma yɛ, “A sojeisia wumbu, wu li wu kambɛi mahugbe kia wa gu la.”

⁶⁶Ti liilɔ ti kambɛi hinda hugbatɛ, kɔtu wai na i yɛ na ti hei kpauŋ ndama a ti lokowoi, ti sojeisia lo na kambɛi mahugbeva.