Read Ngowili Yekpei Numu Kpɛlɛɛ Va MATIU 28 Bible Online

MATIU 28 - Ngowili Yekpei Numu Kpɛlɛɛ Va bible

MATIU 28

¹Ndɛvu voloi lewengɔ woma, kia ngele i yɛ woma Sɔndei ma, Meri Magdalamɔi kɛɛ Meri wekei ti liilɔ kambɛi gama lɔma.

²Ngaamɛi na ndɔlei i gbɛlilɔ waa; gbamaile Ngewɔ malikei i gbuailɔ ngelegoohu, i hitɛ i kɔtii gilikili i kpua kambɛi laama, i hei ma.

³Ngi gbuhɛi gbi i yɛ voolɔ kia ngelei a baahu gbua, ngi magulɛisia ti golengɔ fo fo.

⁴Sojeisia ti luwɛilɔ hulewengɔ, ti maa a gbɛli, ti wie kia pomangaa.

⁵Malikei i yɛpɛilɔ nyahangɛisia gama yɛ, “Waa luwa; ajifa ngi kɔɔlɔ kɛ Yesu na ti paani tamia wu ngi gɔkɔlima.

⁶Ii mbei; ajifa i vulunga i hiyenga hee hu, kia i ndeni la. A wa wu mia lɔ i yɛ laani na.

⁷A li na kaakaa wu hugɛ a ngi gaalopoisia kɛ i hiyenga hee hu, tawao taa lima Galili wu gulɔ; na lɔ wa ngi lɔ na. Na ngi ndenga i lo wu nɛmahu.”

⁸Kɛ ti gbuanga kambɛi gama a piimɛ, ti luwangɔ kɛɛ ti goohu nɛngɔ waa, ti li a piimɛ hugɛva a ngi gaalopoisia.

⁹Ngaama kɛ Yesu i ti malenga yɛ, “Ndiilɛli i yɛ wu ma.” Kɛ ti wanga ti hou ngi gɔwɔisia ma ti hɛɛ ngi ma.

¹⁰Yesu i ndeilɔ ti ma yɛ, “Waa luwa; a li wu nde nya ndewengeisia ma ti li Galili, na mia ta nya lɔ na.”

¹¹Ti loni limalɔ kɛ sojei nasia ti yɛ kambɛi mahugbe ti lɛɛnga ti yamanga taa wai hu ti gona Saagbuablaa Waawaisia ma a na kpɛlɛɛ i wieni.

¹²Saagbuablaa Waawaisia tia kpakoleisia ti wuhitɛilɔ, ti navoo waa ve sojeisia wɛ

¹³tɛɛ, “A nde nungaa ma wɛɛ, ‘Mu loni njii hu lɔ ngi gaalopoisia ti wa a kpindi ti ngi womɛi huma.’

¹⁴Gɔvinei Paileti i ji humɛningaa, ma ngi liilɛlilɔ na hii wɛɛ njia gbi jɔɔ.”

¹⁵Sojeisia ti yeenavoei houilɔ, ti pie kia ti ndeni la ti ma; tawao yeenjɛpɛi ji lɔ wɔɔ jiama Juubleisia maahu i to foloi ji ma.

¹⁶Kaalopo puu maahu yileisia ti liilɔ Galili yeengiyei na hu Yesu i na gɛni a tie.

¹⁷Kia ti ngi lɔni, ti wɛleilɔ ngi gɔwɔbu ti hɛɛ ngi ma, kɛɛ ti lɛɛnga ti sekangɔ yɛla hu ina ta vulii mia.

¹⁸Yesu i lukpeilɔ ti gbla i nde ti ma yɛ, “Ngewɔ i kpayei gbi venga nya wɛ hani gbi maahu ngelegoohu kɛɛ dunya.

¹⁹Faale, a li nungaa gbi gama dunyei hu, wu ti yɛ a nya woomableisia, wu ti wua Kɛkɛi biyɛi hu kɛɛ Hindoloi kɛɛ Ngewɔ Ngafɛi,

²⁰wu ti gaa ti sawei na gbi hou ngi feni wu wɛ; tawao nyaa wu wooma watii gbi i to haa-hindeisia ti gbɔyɔ-gbelei ma.”