Read Ngowili Yekpei Numu Kpɛlɛɛ Va MATIU 5 Bible Online

MATIU 5 - Ngowili Yekpei Numu Kpɛlɛɛ Va bible

MATIU 5

¹Kia Yesu i faha wai lɔni, i lɛilɔ ngiye yila gakama i hei na, kɛ ngi gaalopoisia ti wanga ngi gama.

²Kɛ i tɔtonga a ti gaala yɛ:

³“Nasia ti kɔɔngɔ kɛ ti lii a Ngewɔ lɔ, kohunɛ lɔ ti ma, ajifa ti woo mia a Ngelegoohu mahayɛi.

⁴ “Nasia ta gbala, kohunɛ lɔ ti ma, ajifa Ngewɔ a ti nɛpɔlɔ.

⁵ “Nasia ti lii gɔlɛngɔ kohunɛ lɔ ti ma, ajifa ta dunya nina majɔlɔ.

⁶ “Nasia ndɔlɛ a ti lɔ, tawao ti bolohu a be Ngewɔ liima hindei wiela, kohunɛ lɔ ti ma, ajifa Ngewɔ a ti lilɛlilɔ.

⁷“Nasia ta nungaa wekeisia mamanu lɔ, kohunɛ lɔ ti ma ajifa Ngewɔ a manulɔ ti ma.

⁸ “Nasia ti lii golengɔ, kohunɛ lɔ ti ma ajifa ta Ngewɔ lɔlɔ.

⁹“Nasia ta nungaa luahu gbatɛ kohunɛ lɔ ti ma ajifa Ngewɔ a ti lolilɔ a ngi leengeisia.

¹⁰“Nasia kpalɛ a la ti ma Ngewɔ liima hindei wieva, kohunɛ lɔ ti ma ajifa ti woo lɔ a Ngelegoohu Mahayɛi.

¹¹“Kohunɛ lɔ wu ma ji nungaa ta wu magu nyani, ta juwuya hitɛ wu woma, ta hinda nyamu lɛ wu wumba jifa nya woomableisia a wue.

¹² A gohunɛ wu kaahugbua wa wie ajifa wu mawaa wɔlɔngɔ wa le Ngelegoohu, gbamaile hii wɔɔ nungaa ti pieni a Ngewɔ lutui nasia ti yɛ wu gulɔ.

¹³“Wu wiengɔe kia kpolei na nuuvu kpɛlɛɛ va dunya. Kɛɛ kpolei i baangaa a ngi nɛi, pele gbii na aa gbɔma nɛɛ. Ɛɛ yaa yɛ gbekpeni gbɛogbɛ va kɛ lekee ti pili nungaa ti nyiminyimi ma.

¹⁴“Wu wiengɔe kia fofoi na numui kpɛlɛɛ va dunya. Tei na i looni ngiyei wumba ɛɛ gu a lɔwulaa.

¹⁵Numu gbi ɛɛ lambo longa aa nguaa busɛ bu, a tɛ haaka yalɛngɔ lɔ ya kɛ i fofo venga nasia gbi wɛ ti pɛlei bu.

¹⁶Hii mahoungɔ wu voofoi i voo nungaa gulɔ aako ti hinda yekpei nasia lɔ wa pie, ti wu Kɛkɛ na lato i ngelegoohu.

¹⁷“Waa gili la kɛ ngi wanga Mojisi Jawei gbuamalɔ hu kɛɛ kaa nasia Ngewɔ lutuisia ti kɛni. Ngii wani ti gbuava hu; ngi wangalɔ aako ti la i hou.

¹⁸I yɛ wu nɛmahu kɛ ina lekee Ngelegoohu tia dunya tii gbɔyɔni, sawei yeekulo hii bɛɛ ɛɛ gbua ma kɛlee kaa kpɛlɛɛ i kɛni nda i hou.

¹⁹Faale numu gbi lekee a sawei jisia yeekulo hii bɛɛ nyani, i nungaa wekangaa gaa yɛ ti nyɔkɔ wie, a yɛ guloni numui gbi ma Ngelegoohu Mahayɛi hu; kɛɛ numui na a yeesawei jisia hou, i nungaa wekeisia gaa ti houva, a yɛlɔ a numu wa Ngelegoohu Mahayɛi hu.

²⁰Gbɛɛ ngi hugɛ a wue hɔɔ kɛ kɛlee wu wɔnayii kɛɛ Ngewɔ liima hindei wielei a lewe Sawei Yekaamɔisia tia Farisiisia ti ndɛi ma, wɛɛ gu kulo bɛɛ a yɛlaa nasia lia ta yɛ Ngelegoohu Mahayɛi hu.

²¹ “Wu kaanga kɛ ti yɛ mu maadani gaalɔ wɔɔ tɛɛ, ‘Baa numu waa; tawao’ kɛ ‘numu gbi bi numu waangaa ta lilɔ a bie Kotii gulɔ.’

²²Kɛɛ kiahuna nya ngɛɛ wu ma, numu gbi lekee a liilewe ngi heinyɔui ma, ta lilɔ a ngie Kotii gulɔ; numui na a ngi heinyɔui yɛli yɛ ‘Bii gbekpeni!’ ta lilɔ a ngie ndɔlɔ Kotii wai gulɔ, tawao numui na a ngi heinyɔui loli a kpowamɔ gbamɛi, Ngewɔ a ngi wililɔ jahama yɔmbui hu.

²³Faale bi yaa saagbuamɛi saa gbuava Ngewɔ gama, i hitɛ na bi wɛ kɛ bi gbalɛ lɔ bi heinyɔui liima,

²⁴bi jɔhani lo saagbuamɛi bi li yakpe bi wua bi heinyɔui na luahu gbatɛ, na wooma bi wa na bi bi jaai gbua Ngewɔ gama.

²⁵“Numu i bi mayia gɛngaa Kotii hu, i lo kohu bi yeenjiɛi gbɔyɔ pɛiŋ Kotii lɔwɔi i ya hiti. Ina na ii le, wu ya Kotii hu, Kotii a bi wulɔ kpindiwɛlei bu.

²⁶Gbɛɛ ngi hugɛ a bie, ba lo na lɔ kɛlee bi kpɔyɔ gbɛlɛɛŋ a navoei gbi vela.

²⁷ “Wu kaanga kɛ ti ndeilɔ wɔɔ tɛɛ, ‘Baa puegbua.’

²⁸Kɛɛ kiahuna nya ngɛ wu ma, numu gbi lekee a nyaha gbe, ngi mani i ngi lɔ, i wilanga a pue gbuala a ngie ngi lii hu.

²⁹Faale bi yejama yaamɛi i piengaa bi jumbu hinda wie, kpua na bi pili; fisangɔ wa le bi va bi baa a bi gbuhɛi yeekaka yila kia Ngewɔ aa bi gbuhɛi kpɛlɛɛ wili jahama.

³⁰Bi yeja-lokoi i piengaa bi jumbu wie, tewe na bi pili; fisangɔ wa le bi va bi baa a bi gbuhɛi yeekaka yila kia Ngewɔ aa bi gbuhɛi kpɛlɛɛ wili jahama.

³¹ “Ti gbɔma ndeilɔ tɛɛ, ‘Numu gbi i ya gbelema ngi nyahɛi ma, i kɔlɔ ve ngi wɛ kɛva kɛ i gbelenga ngi ma.’

³²Kɛɛ kiahuna nya ngɛɛ wu ma, hindo gbi i gbelengaa ngi nyahɛi ma sabu gbi va kɛ lekee pue gbuala, kɛ i ngi longa pue gbuama ina lekee i hini weka jɔngalɔ; tawao hiindoi na a nyahɛi na jɔɔ ti gbelenga ma, ta bɛɛ i pue gbuanga.

³³ “Wu gbɔma kaanga kɛ ti yɛlɔ wɔɔ a nde mu maadani ma tɛɛ, ‘Baa bi Lahei hunyani tawao na wie bi Lahei wumbuni fa Ndemɔi ma.’

³⁴ Kɛɛ kiahuna nya ngɛɛ wu ma, baa jondu kulo bɛɛ ji ba yɛ Lahei wumbuma; baa jondu ngelegoohu ma ajifa Ngewɔ maha-heimi mia;

³⁵ baa jondu dunyei ma ajifa Ngewɔ gɔwɔ lomɛi mia. Baa jondu Jelusalɛm ma ajifa Maha Wai Ngewɔ la wai mia.

³⁶Baa jondu bi wui vulii ma ajifa bɛɛ gu a piela ngundia yakpe bɛɛ i gole ɔɔ i lɛli.

³⁷Bi layie i yɛ lekee a ‘Nga pielɔ’ ɔɔ ‘Ngɛɛ pie’; njɛpɛ weka gbi bi ndengaa, a gbua Seitana gama lɔ.

³⁸ “Wu kaanga kɛ ti ndeilɔ tɛɛ, ‘Bi numu yaamɛi wolongaa hu, ta bi nda yaamɛi wololɔ hu, tawao bi numu yɔngɔlii yalingaa, ta bi nda yɔngɔlii yalilɔ.’

³⁹Kɛɛ kiahuna ngi nde wu ma, numui na a nyamu ga a bie wa hunyɔɔ ngi ma. Numu i bi yejama bawɛi hugbolɛngaa, yeepekei bɛɛ wote ngi gama.

⁴⁰Numu i bi mayia gɛngaa Kotii hu i bi loma-bu-lomɛi gbua bi yeya, bi bobani bɛɛ ve ngi wɛ.

⁴¹Roma sojeisia yeengila i kpɔndangaa bi ma ngi haakei wumbuva aako wua ta wu li maili yila, a maili fele ga.

⁴²Numu gbi i bi vɛlingaa a hani gbi, fe ngi wɛ, tawao numu i longaa i hani gbi jiaŋ bi ma, baa ngi goma la.

⁴³ “Wu kaanga kɛ ti ndeilɔ tɛɛ, ‘Lo a bi ndiamɔisia, bi lolo a bi juwuisia.’ ”

⁴⁴Kɛɛ kiahuna nya ngɛ wu ma, a lo a wu juwuisia, wu Ngewɔ vɛli nasia va ta juuya hitɛ wu woma,

⁴⁵aako wu yɛ a wu Kɛkɛ na i Ngelegoohu ngi leengeisia. Ajifa a pie ngi volei a voo numu nyamuisia ma kɛɛ numu yekpeisia mahɔɔngɔ, a pie njɛi a wua nasia wɛ ta kpekpei wie kɛɛ nasia ta nyamui wie.

⁴⁶Gbɛe wu lii a yɛ Ngewɔ ma wu mawaa va ina wu longɔ a nasia lekee lɔ ti longɔ a wue? Kɔnjɔ wɔyɔblaa vuii tia na wiema.

⁴⁷Ina wa yɛpɛ wu ndiamɔisia lekee lɔ gama, kɛ wu wiehindei i yee yɛni gba numu wekeisia ma? Nasia vulii bɛɛ tii loni a Ngewɔ ti nyɔkɔ lɔ wiema!

⁴⁸ Faale mahoungɔ wu gbekpengɔ waa i yɛla kia wu kɛkɛ na i Ngelegoohu ngi gbekpengɔ waa la.