Read Ngowili Yekpei Numu Kpɛlɛɛ Va MATIU 6 Bible Online

MATIU 6 - Ngowili Yekpei Numu Kpɛlɛɛ Va bible

MATIU 6

¹“A wu mahugbe waa wu hinda yekpeisia wie faha yama aako nungaa ti tɔ gbɔɔ wu piema. Wu hindei jisia wiengaa fahii yama wɛɛ mawaa gbi majɔɔ a wu Kɛkɛ na i Ngelegoohu.

²“Famia bi ya hinda yekpe wiema a fɛɛlimɔ, ba bulu vɛ bi gulɔ kia baayablɛisia ta pie hɛɛ wɛleisia bu kɛɛ pele waawaisia ma aako nungaa ti ti lato. Ngi nde wu ma a tɔnya, ti wilanga a ti mawaa kpɛlɛɛ majɔla.

³Kɛɛ bi yaa hani vema fɛɛlimɔ wɛ, pie ndɔwuma aako bi liimamɔ bɛɛ aa hugɔɔ.

⁴Bi bi hinda wandɛisia wiengaa ndɔwuma, bi Kɛkɛ na a ndɔwuma hindeisia hulɔ a bi mawaalɔ.

⁵“Wu ya hɛɛma, waa wie kia baayablɛisia ti na; ajifa ti longɔ a loola ta hɛɛ hɛɛ wɛleisia bu kɛɛ pele waawaisia ti gomɛmɛi, aako numui kpɛlɛɛ ti ti lɔ. A tɔnya ngi hugɛ a wue, ti wilanga a ti pawɛi kpɛlɛɛ majɔla.

⁶Kɛɛ bi yaa hɛɛma, wuaa bi lomui hu, bi pɛlei gbɔwu, bi hɛɛ bi Kɛkɛ na ma numu ɛɛ ngi lɔ tawao bi Kɛkɛ na a ndɔwuma hindei hulɔ, a bi mawaalɔ.

⁷“Wu ya hɛɛma waa baaba yɛpɛ gboto gbama le, kia nasia ti langɔ a Ngewɔ wekeisia ta pie, ajifa ta gili tɛɛ ti yewɔisia ta ti woo mɛnilɔ ti hɛɛ huguhangɔisia va.

⁸Waa wie kia ti na ajifa wu Kɛkɛ i kɔɔlɔ gbɔɔ wu gbewengɔ fa pɛiŋ wu ya ngi vɛli.

⁹A Ngewɔ vɛli hɔɔ hii: ‘Mu Kɛkɛ bia bi Ngelegoohu bagɔma i yɛ bi biyei ma.

¹⁰Bi mahayɛi i wa, Bi liima hindei i wie dunyei hu, kia i wiema la Ngelegoohu.

¹¹Mɛhɛɛi na ba fe mu wɛ folo gbi yeehaayei ve;

¹²Manu mu ma mu nyamuisia va, Kia mua bɛɛ ma manu nasia ma ta hinda nyamu wie a mue;

¹³Baa li a mue kɔlɛya hu, bi mu mabawo Seitana yeya.’ Ajifa bi woo lɔ a mahayɛi kɛɛ kpayei kɛɛ tɔwɔi, kunafɔ. Amiina.

¹⁴“Wu manungaa nungaa wekeisia ma nyamui nasia va ti pienga a wue, wu Kɛkɛ na i Ngelegoohu ta bɛɛ a manulɔ wu ma.

¹⁵Wuii manuilɔ nungaa wekeisia ti hinda nyamuisia ma, wu Kɛkɛ bɛɛ ɛɛ manu wu hinda nyamuisia ma.

¹⁶“Wu ya sui houma waa wua yekpe mamamau kia bayablɛisia ta pie. Ta tia yekpe gbualɔ ndɔgbɔ aako nungaa gbi ti tɔ kɛ tia sui hu. Ngi hugɛ a wue, a tɔnya, ti wilanga a ti pawɛi kpɛlɛɛ majɔɔlaa.

¹⁷Kɛɛ bia bi ya sui houma, bi yama wua, bi ngulɔi jia wuhu bi bi wui hugbua;

¹⁸aako nungaa wekeisia taa gu a kɔɔla kɛ bia sui hu kɛlee bi Kɛkɛ na ngi lɔwungɔ; tawao bi Kɛkɛ na a ndɔwuma hindeisia hulɔ, a bi mawaalɔ.

¹⁹“Waa kpatɛ lɛma wua yekpe va dunyɛi ji hu, mia gilingaa kɛɛ kaayei ta nyani tawao humablaa ta wili na ti huma.

²⁰Kɛɛ a kpatɛi lɛma Ngelegoohu, mia gilingaa kɛɛ kaaye tɛɛ nyani tawao humablaa tɛɛ wili na ta huma.

²¹Gbamaile mia bi gbatei a yɛ na, na lɔ bi lii bɛɛ a yɛ na.

²²“Numu gbuhɛi lamboi mia a ngi yamɛisia. Ina hinda gbi ii bi yamɛisia ma bi gbuhɛi gbi lavengɔ a yɛla a foofo;

²³kɛɛ ina bi yamɛisia tii gbekpeni, bi gbuhɛi gbi a yɛ kpindi hu lɔ. Faale ina fofoi na i bi hu kpindi le, kɛ yeekpindii i wɔlɔni kpa!

²⁴“Numu gbi ɛɛ gu aa yɛ a nduwɔkɛ fele ti luwɔ; na wiengaa, a lololɔ a yeengila, i lo a yeepekei ɔɔ a gololɔ yeengila wɛ, i lɛɛ yeepekei hu. Wɛɛ gu wa yenge Ngewɔ wɛ kɛɛ kpatɛi a leenga.

²⁵“Faale ngi nde wu ma, wu lii aa hɛlɛ mɛhɛɛ kɛɛ kpɔlehanii na va wu gbengɔ fa aako ndɛvui i lo wu hokpala, ɔɔ kulei wu luwuisia va. Ndɛvui leweni mɛhɛɛ ma, tawao numu gbuhɛi leweni kulei ma!

²⁶Ŋɔningɛisia gbe lɛ ti ngelei ma; tɛɛ tuhani hii ta tewe ta tɛ kpuwungaa laa; na hu gbi wu Kɛkɛ na i Ngelegoohu a ti gɔlɔ! Wuii leweni poloŋ ŋɔningaa ma?

²⁷Ye lɔ wu lia a gu i ngi lɛɛvui mato kulo hii bɛɛ ajifa ngi lɛɛvui hinda i ngi liihɛngɔ?

²⁸“Gbɛe wu lii a hɛlɛ kulei va? A gili lɛɛ a dinɛisia ti ndɔgbɔi hu, tɛɛ yenge tawao tɛɛ kula gbatɛ.

²⁹ Kɛɛ ngi hugɛ a wue kɛ Mahɛi Sɔlɔmɔn vulii bɛɛ, ngi gbatɛngɔ a pele-o-pele, kula ii yɛ ngi ma aa nyande aa hiti jisia yilayee hu.

³⁰Ngewɔ mia a kpitiisia mayili kpitii nasia ta yɛ na haa kɛɛ sina kɛ ti ti mɔnga. Ɛɛ gbewe ngi ma wu mayiliva i lewe kpitii ma? Wu layii a Ngewɔ gulongɔe kpa!

³¹“Faale wu lii aa hɛlɛ wɛɛ ‘Gbɔɔ ma mɛ?’ ɔɔ ‘Gbɔɔ ma kpoli?’ ɔɔ ‘Gbɔɔ ma ngili?’

³²Hani jisia lɔ nasia tii lani a Ngewɔ ti lii hɛlɛngɔ fa watii gbi; kɛɛ wu Kɛkɛ na i Ngelegoohu i kɔɔlɔ kɛ wu haamingɔe hani jisia kpɛlɛɛ va.

³³Kɛɛ Ngewɔ Mahayɛi gɔkɔlila kɛɛ ngi liima hindei wielei i wu liihɛlɛ i lewe hinda gbi ma; na wiengaa Ngewɔ a hani wekei jisia gbi velɔ wu wɛ.

³⁴Faale wu lii aa hɛlɛ sina va; sina a walɔ a ndiihɛlɛ gboto kungɔ ta yekpe va. Sabu gbii na wu sina liihɛlɛisia wu haayeisia maahu.