Read Ngowili Yekpei Numu Kpɛlɛɛ Va MATIU 7 Bible Online

MATIU 7 - Ngowili Yekpei Numu Kpɛlɛɛ Va bible

MATIU 7

¹“Baa nungaa wekeisia lɛɛ, aako Ngewɔ aa bi lɛɛ.

²Gbamaile kitii na lɔɔ ba tewe nungaa wekeisia ma ta lɔ Ngewɔ a jia la a bie, tawao bi dangaa ti ma Ngewɔ bɛɛ a dalɔ bi ma.

³Gbɛe bi kaawolei na gbema i bi ndewehindoi yama kɛɛ bi gbewe gbi ngulu-gɛkɛɛ na va i bi nda yaamɛi?

⁴Ba yee gu bi nde bi ndewei ma bɛɛ, ‘Kɔnɛɛ, gbɛɛ ngi kaawolei na gbua bi yama,’ kɛɛ bɛɛ gu a ngulu-gɛkɛɛ na lɔlaa i bi nda yaamɛi?

⁵Bia baayamɔ lɔ hɔɔ a bie! Ngulu-gɛkɛɛ gbua pɛiŋ bi nda yaamɛi, ta lɔ ba gu a hinda lɔla gbalauŋ kaawolei gbuava bi ndewei yama.

⁶“Hani na ndaheingɔ Ngewɔ ma waa fe ngilangaa wɛ. Wu na wiengaa, ta wotelɔ ti gbundɛ wu ma. Waa wu hani baagbangɔi nasia gula ndondɛngaa gulɔ, wu na wiengaa, ta nyiminyimilɔ lekee ma a gɔwɔ.

⁷“A fɛli, wa majɔlɔ; a kɔkɔli wa tɔlɔ; a pɛlei laalewe, ta ndawolɔ wu wɛ.

⁸Numui na lekee a fɛli, a majɔlɔ, numui na a kɔkɔli, a tɔlɔ, pɛlei a lawolɔ numui na wɛ a ndalewe.

⁹Wua kɛkɛngaa a wue, wu yilayee a kɔtu velɔ ngi loi wɛ ji a ngi vɛli a mɛhɛɛ?

¹⁰Ɔɔ, wa kaali nyamu velɔ ngi wɛ ji a nyɛɛ vɛli?

¹¹Kia bɛɛ wu nyamungɔ wu bɛɛngɔe a hani yekpengaa vela wu leengeisia wɛ. Wu Kɛkɛ na i Ngelegoohu i leweni poloŋ wu ma a hani yekpengaa vela nasia wɛ ta ngi vɛli!

¹²“Faale na gbi bi longɔ nungaa ti pie a bie, tamia ba pie a tie; Mojisi jawei yeembui lɔ kɛɛ kaai na Ngewɔ lutuisia ti kɛni.

¹³“A wuaa a kata laama gbɛɛngɔi wee, gbamaile katei lamɛi na a li a numu jahama ngawɔlɔngɔe tawao pelei a li na ya gbalauŋ, tawao numu gboto mia ta jia la.

¹⁴Kata lamɛi na gbɛɛngɔe a li a numu kunafɔ lɛɛvui hu tawao pelei na a li na ya kpuya tawao nasia ta yeepelei na lɔ tii gbotoni.

¹⁵“Wu valangɔ i yɛla ndɛɛ Yewɔ lutuisia va; ta walɔ wu gama ti mayeingɔ nyɔlɛɛ makɛ yekpe hu kia mbalangaa ti na, kɛɛ sawo, ti liisia hu, ti yɛni a fula vuhaingaa lɔ.

¹⁶Wa ti gɔɔ ti wiehindei ma lɔ. Ngaali yeyakɔ ɛɛ wua a glepii tawao ngaali wulu ɛɛ wua a figi.

¹⁷Ngulu yekpei a wua a nguluwa yekpei lɔ, kɛɛ ngulu heegbɛngɔi a wa a ngulu-wa nyamui lɔ.

¹⁸Ngulii na kpenkpengɔ ɛɛ gu a wua a ngulu-wa nyamu, tawao ngulii na ii gbekpeni ɛɛ gu aa wua a ngulu-wa yekpe.

¹⁹Ngulu gbi lekee ii wɛilɔ a ngulu-wa yekpe ta pɔlɔ ti pili ngɔmbui hu.

²⁰Faale, wa ndɛɛ lutuisia gɔɔ ti wiehindeisia ma lɔ.

²¹“Nasia ta nya loli tɛɛ ‘Ndemɔi, Ndemɔi,’ ti gbi ii le ta yɛ wuaama Ngelegoohu Mahayɛi hu, kɛlee nasia ta nya Kɛkɛ na i Ngelegoohu ngi liima hindei wie.

²²Watii na kpɛmbo-volei a hiti, numu gboto ta ndelɔ nya ma tɛɛ, ‘Ndemɔi, Ndemɔi, muii Ngewɔ yiɛi leni nungaa ma bi biyei hu, tawao bi gbayei hu muii ngafa nyamu gboto gbuani nungaa hu, tawao muii kabande hinda gboto wieni bi biyei hu?’

²³ Faale nga ndelɔ leeŋ ti ma ngɛɛ, ‘Ngii wu gɔɔ; a gbua mbei, wu hinda nyamu wieblɛi jisia.’

²⁴“Faale na, numu gbi lekee a nya layie jisia mɛni, i ti wie, ngi wiengɔe kia taamɔ nɛmahu lewengɔ yila i yɛ na i ngi wɛlei loni fawa gɔtii hu.

²⁵Njɛi i wɛilɔ wa, njɛisia ti ve hulewengɔ, vivii i gula, ti gbi ti hɔwɔ pɛlei na ma kɛɛ ii gulani, ajifa kpujangɔ yɛla fawei hu lɔ.

²⁶“Kɛɛ numu gbi lekee a nya layie jisia mɛni kɛɛ ɛɛ ti wie, ngi wiengɔe kia taamɔ wuhubangɔ yila i yɛ na, i ngi wɛlei lo ŋanyaŋanyɛi hu.

²⁷Njɛi i wɛilɔ wa, njɛisia ti ve hulewengɔ, vivii i gula, ti gbi ti hɔwɔ pɛlei na ma kɛ i gulanga; tawao i nyanilɔ kpɛmgbɛjɛɛ!”

²⁸Kia Yesu i kpɔyɔni a njɛpɛi jisia lela, fahii gbi ti wuhu i wuilɔ pelei na va i yɛ nungaa gaa la.

²⁹Ajifa i ti gaailɔ kia numui na i na kpaya ngi wɛ, ii wieni kia Sawei Yeekamɔɛisia ti yɛ nungaa gaa.