Read Ngowili Yekpei Numu Kpɛlɛɛ Va MATIU 8 Bible Online

MATIU 8 - Ngowili Yekpei Numu Kpɛlɛɛ Va bible

MATIU 8

¹Kia Yesu i ngiyei yeini, faha wa ti toilɔ ngi ma.

²Kɛ kpɔukpɔumɔ yila i wanga ngi gama, i wombi gbakpa ngi gɔɔbu yɛ, “Ndemɔi, i nɛngalɔ bi wɛ, ba gulɔ a nya bawola ngi yɛ sɛwɛ.”

³Yesu i loko lamboilɔ i jaa a ngie yɛ, “Nya lumangɔe, bawo bi yɛ sɛwɛ.” Ngaamɛi na kɛ kpɔukpɔui i bawoa ngi ma.

⁴ Kɛ Yesu i ndea ngi ma yɛ, “Wote mbei! Baa hugɛ a numu gbi, kɛɛ li yakpe Saagbuamɔi gama i bi gbe; bi saa na gbua Mojisi jawei i kɛni wɔɔ kɛva a numui gbi kɛ bi bawonga.”

⁵Kia Yesu i wuani Kapaniɔm goohu, Roma gugba yila i wɛilɔ ngi gama ngi manɛnɛ kpɔma va

⁶yɛ, “Ndemɔi, nya bɔilopoi lɔ laani pɛlei bu ngi gbɔkpɔngɔ tawao kpaalɛ waa i ngi ma.”

⁷Yesu ndeilɔ yɛ, “Nga walɔ ngi ngi bawo.”

⁸Kugbei poteilɔ yɛ, “Sawo, Ndemɔi, nya gbekpengɔ ii le bi wuava nya wɛlei bu. Nde lekee bɛɛ nya bɔilopoi i bawo, kɛ i bawoa.

⁹Nya bɛɛ ngi nuungaa lɔ bu, sojeisia ti nya bu. Nga ndelɔ yeeji ma ngɛɛ ‘Li!’ kɛ i ya; ngi nde pekei ma ngɛɛ ‘Wa!’ kɛ i wanga; ngi nde nya luwei ma ngɛɛ ‘Ji wie!’ kɛ i pienga.”

¹⁰Kia Yesu i ji humɛnini, i gualɛilɔ ngi ma kɛ i ndenga nungei nasia ma ti yɛ to ngi ma yɛ, “Gbɛɛ ngi hugɛ a wue, Isrɛlblɛisia lia vulii bɛɛ ngii yaa numu lɔni na aa la hii a Ngewɔ.

¹¹A tɔnya, numu gboto ta gbualɔ dunyei yeehinda gbi tia Ebraham-ni kɛɛ Aisaki kɛɛ Jekɔpi ti hei mɛhɛɛ-mɛ-gomɛi hu ngelegoohu mahayɛi hu,

¹²Kɛɛ Isrɛlblei nasia lɛɛnga mahoungɔ ti yɛ yeemahayɛi na hu Ngewɔ a pielɔ ngi malikeisia ti ti gbɛ na, ti ti wili jahama yeekpindii hu, na mia ta wɔɔ na, ta ti yɔngɔlii yaamɛ.”

¹³Na wooma Yesu ndeilɔ Kugbei ma yɛ, “Li bi yeekuwuhu, tawao na bi lani la i wie bi wɛ.” Kugbei bɔilopoi i bawoni ngaamɛi na lɔ.

¹⁴Kia Yesu i wuaani Pita yee pɛlɛbu, i maleni Pita yemɔi i laani kɔlɛ vulɛi i ngi ma.

¹⁵I houilɔ ngi lokola kɛ kɔlɛ vulɛi i gbuanga ngi ma, kɛ i hiyenga i mɛhɛɛ vɛ Yesu wɛ.

¹⁶Kia kpɔkɔ i wɛlɛni, nungaa ti wɛilɔ Yesu gama a numu gboto ngafa nyamuisia ti ti hu. Yesu i yeengafa nyamuisia gbuailɔ nungaa hu a ngi layie, i nasia gbi bawo ti heegbɛngɔ yɛla.

¹⁷ I mbawoi jisia wieilɔ aako na la i hou Ngewɔ lutui Aisaya i ndeni wɔɔ yɛ, “I mu bawoilɔ i mu heegbɛisia gbi gbua mu ma.”

¹⁸Kia Yesu i liiheini faha waa ma ti ngi gaalangɔ, i ndeilɔ ngi gaalopoisia ma yɛ, “A mu li njɛi wooma.”

¹⁹Sawei Yeekamɔɔ yila i wailɔ ngi gama i nde yɛ, “Kaamɔ, nga tolɔ bi wooma hinda gbi lekee ba li na.”

²⁰Yesu i poteilɔ i nde ngi ma yɛ, “Ndoweisia lɔ nyamgbeisia yeya tawao teisia lɔ ŋɔningɛisia yeya; kɛɛ numui na Nuuvu Hindoloi a ngie, hinda gbii na ngi lava na.”

²¹Taamɔ wekei, na i tooma Yesu ma ngovama, i ndeilɔ yɛ, “Ndemɔi, gbɛɛ ngi yaama ngi nya kɛkɛ haa-hindei hugbatɛ pɛiŋ.”

²²Yesu i poteilɔ yɛ ngi ma, “To nya ma, bi gbe haableisia ma ti ti da womɛisia gbɔwu.”

²³Yesu i wililɔ njaya-lɛndɛ yila hu kɛ ngi gaalopoisia ti tonga ngi ma.

²⁴Ngaamɛi na vivii waa i gulailɔ Popɛi ya, ndɛndɛi a lo te i lɔmbu; kɛɛ, Yesu i yɛ njii hu lɔ.

²⁵Ngi gaalopoisia ti lilɔ ti ngi wu tɛɛ, “Ndemɔi, mu bawo! Mua jukuma!”

²⁶Kɛ Yesu i potenga ti ma yɛ, “Gbɛe wu luwanga hii? Wu layii a Ngewɔ i guloni kpa!” Kɛ i hiyenga i nde vivii ma kɛɛ njɛi yɛ ti londo, kɛ hu gbi i yɛnga louŋ.

²⁷Numui gbi ti wuhu i wuilɔ tɛɛ, “Gbɛ mɔ lɔ a numu bondei ji, vivii vulii bɛɛ kɛɛ njagateisia ta golo ngi wɛ?”

²⁸Kia Yesu i foni Gadara lɔlei hu, Popɛi wooma, hiinga fele ti ngi maleilɔ, ngafa nyamuisia ti ti hu, ta gbua kambajɛi hu. Ti maaluwangɔ waa yɛla na hii numu gbi ii yɛ gu aa jia a yee pelei na.

²⁹Ngaamɛi na kɛ ti yelei gulanga tɛɛ, “Gbɛe bi loko wilima mu mahinda hu, bia bi Ngewɔ Hindoloi? Bi wangalɔ kpaalɛ lava mu ma pɛiŋ yee watii a hitima?”

³⁰Ndondɛ vaha waa ti yɛlɔ a mɛli, yee hindei na gbla.

³¹Faale ngafa nyamuisia ti Yesu manɛnɛilɔ tɛɛ, “Ina bi mu gbuamaa nungei jisia hu, kɛ pie mu wuaa ndondɛ vahɛi na hu.”

³²Yesu i ndeilɔ ti ma yɛ, “A li.” Faale ti gbuailɔ hingei nasia hu ti wuaa ndondɛngɛisia hu. Ndondɛ vahɛi na gbi ti gindɛilɔ ti ngiyei hɛlɛngɔi yei, ti wili Popɛi hu, ti lo hu.

³³Hingei nasia ti yɛ yee ndondɛngɛisia mahugbe ti leweilɔ a piimɛ ti li tei hu, ti jia hindei gbi ma i wieni hiingaa felei nasia gama ngafa nyamuisia ti yɛ ti hu.

³⁴Numui gbi ti yɛ tei hu ti liilɔ Yesu maleva; kɛɛ, kia ti ngi lɔni, ti ngi manɛnɛilɔ tɛɛ i gbua ti lɔlei hu.