Read Ngowili Yekpei Numu Kpɛlɛɛ Va MATIU 9 Bible Online

MATIU 9 - Ngowili Yekpei Numu Kpɛlɛɛ Va bible

MATIU 9

¹Yesu i wililɔ gbɔma ndɛndɛi hu, i njɛi lewe, i yaama ngi yeetaahu.

²Kɛ ti wanga ngi gama a kpɔɔkpɔmɔ yila, i laani hakei ma. Kia Yesu i ti layii lɔni a ngie, kɛ i ndea kpɔɔkpɔmɔi ma yɛ, “Liilo, nya loi; bi jumbuisia ti kafainga bi ma.”

³Kɛ Sawei Yeekaamɔisia lɛɛnga ti ndea ti nyɔunyɔ ma tɛɛ, “Taamɔi ji lɔ Ngewɔ bɛlɛ nyanima!”

⁴Yesu i kɔɛilɔ gbɔɔ ti gilima la kɛ i ti mɔlinga yɛ, “Gbɛe wu kili nyamu bondei nasia wiema?

⁵Yeegbɛ lɔ bɛɛbɛɛngɔ ndeva, ‘Bi jumbuisia ti kafainga bi ma,’ ɔɔ ‘Hiye bi jia?’

⁶Kɛɛ nya longɔ ngi kɛ a wue kɛ numui na Nuuvu Hindoloi le, kpaya lɔ ngi wɛ dunyei hu manuvaa jumbuisia ma.” Kɛ i ndenga kpɔɔkpɔmɔi ma yɛ, “Hiye bi bi hakei wumbu bi li bi yeekuwuhu.”

⁷Taamɔi i hiyeilɔ i li ngi yeekuwuhu.

⁸Kia fahiisia ti hulɔni, ti luwailɔ, ti Ngewɔ lato kpayei na bonda veva nuuvungaa wɛ.

⁹Yesu i gbuailɔ yeehindei na tawao kia i yɛ lima, i kɔnjɔ wɔyɔmɔ yila lɔilɔ, ngi laa a Matiu, i heini ngi yengemɛi. Kɛ i ndenga ngi ma yɛ, “To nya wooma.” Matiu i hiyeilɔ i to ngi wooma.

¹⁰Kia Yesu i yɛ mɛhɛɛ mɛma Matiu yeepɛlɛbu, pawa wɔyɔblaa gboto kɛɛ jumbubleisia ti wɛilɔ ti hei tia Yesu kɛɛ ngi gaalopoisia.

¹¹Kia Farisiisia lɛɛnga ti ji hulɔni, ti ngi gaalopoisia mɔlilɔ tɛɛ, “Gbɛe wu Kaamɔ tia pawa wɔyɔblɛisia kɛɛ jumbubleisia ta mɛhɛɛ mɛ?”

¹²Yesu i humɛniilɔ kɛ i kpɛmbonga yɛ, “Nasia heegbɛ gbii ti ma tii gbeweni halemɔ va, kɛlee nasia ti heegbɛngɔ.

¹³ A li wu Ngewɔ Gɔlɛi yeembui gaa na i ndeni yɛ, ‘Ngewɔ longɔ a kpekpeya lɔ wa pie a nungaa wekeisia, ii gbeweni tohani jaai nasia va wa kpua.’ Ngii wani pɔɔnablaa manɛnɛma golova Ngewɔ jaweisia bu, kɛlee jumbubleisia.”

¹⁴Na wooma Jɔn Nguamɔi gaalopoisia ti wɛilɔ Yesu gama ti ngi mɔli tɛɛ, “Gbɛe mua kɛɛ Farisiisia ma sui hou pɛɛpɛ kɛɛ bi gaalopoisia tɛɛ su hou kulo bɛɛ?”

¹⁵Yesu kpɛmboilɔ yɛ, “Nasia ta ti loli nyaha-gɔli-gomɛi hu ta gulɔ a wɔɔlaa ji nyaha jɔɔ mɔi a yɛ lɛ ti lia? Na ɛɛ wie! Kɛɛ watii a hitilɔ nyaha jɔmɔi i gbua ti yeya, yeewatii na mia ta sui hou.

¹⁶“Numu gbi ɛɛ ndoma wova lombo a kula hakpa nina, jifa lomboi a lewelɔ na kɛ mblamɛi yaa i wɔlɔnga.

¹⁷Hii lɔɔ na, numu ɛɛ ndɔ nina wu hua-kɔlɔ goko wovangaa hu, jifa kokoisia ta gbutalɔ, ndɔi i vaya, kokoisia ti jukulu. Ndɔ ninɛi a wu koko niinangaa lɔ hu, kɛ ti veenjɔ ti maa i bawonga.”

¹⁸Yesu i loni njɛpɛi jisia lemaa ti ma, kɛ Juu yeetokulɔ yila i wanga ngi gama, i wombi gbakpa ngi gulɔ yɛ, “Nya nyahaloi i haanga saange; kɛɛ wa mu li bi loko wɛlɛ ngi ma, a vululɔ.”

¹⁹Kɛ Yesu i hiyenga i to ngi ma tia ngi gaalopoisia.

²⁰Nyaapo yila, ŋama heegbɛi i ngi ma foo puu maahu fele va, i wailɔ a Yesu wooma wee, i jaa a ngi bobani yeengoliyɛi.

²¹I ndeilɔ ngi nɛmahu yɛ, “Ngi jangaa lekee bɛɛ a ngi bobani, nga bawolɔ.”

²²Yesu i woteilɔ i ngi lɔ, kɛ i ndea yɛ, “Liilo, nyaapoi; bi lalɛi a nge i bi bawonga.” Ngaamɛi na nyaapoi i bawoilɔ.

²³Na wooma, Yesu i liilɔ Juu yeetokulɔi ji yeepɛlɛbu. Kia i nasia lɔni ti yɛ kokoi vɛ ngɔɔblɛisia wooma, kɛɛ numui gbi ta wɔɔ,

²⁴kɛ i ndea yɛ, “Numui gbi a gbua! Nyaha-lo wuloi haangɔ ii le, njii mia lekee i piema.” Kɛ nungaa ti tɔtonga a ngi gbafala.

²⁵Kɛɛ kia lekee nungaa ti gbuani, Yesu i wuailɔ nyahaloi lomui hu, i ngi lokoi hou, kɛ ndopoi i hiyenga.

²⁶Yeehindei ji yee tɔwɔi i vayailɔ taatei na hu gbi.

²⁷Kia Yesu i leweni yeehindei na ma, pumublaa fele ti toilɔ ngi ma ta yelei gula tɛɛ, “Devidi Hindoloi, mu mamamau lɔ.”

²⁸Kia Yesu i wuaani pɛlei bu, yee pumublaa feleisia ti wailɔ ngi gama; kɛ i ti mɔlinga yɛ, “Wu langɔe la kɛ nga gulɔ a wu bawola?” Ti kpɛmboilɔ tɛɛ, “A tɔnya, Ndemɔi.”

²⁹Kɛ Yesu i jaanga a ti yamɛisia yɛ, “I wie wu gama hɔɔ kia wu layii i na a nge.”

³⁰Kɛ ti yamɛisia ti bawonga. Yesu i ti laahilɔ kpɔtukpɔtu yɛ, “Waa hugɛ a numu gbi.”

³¹Kɛɛ, ti liilɔ ti ngi lɔwɔi vaya taatei na hu gbi.

³²Kia nungei nasia ti yɛ gbuama, nungaa lɛɛnga ti wɛilɔ Yesu gama a taamɔ yila ngi mumungɔ ajifa ngafa nyamu i yɛ ngi hu.

³³Kɛɛ kia lekee Yesu i yeengafa nyamui gbuani taamɔi hu kɛ yeetaamɔi i tɔtonga a yɛpɛlaa. Numui gbi ti wuhu i wuilɔ tɛɛ, “Wɔɔ gba muii yaa ji bonda hulɔni Isrɛl.”

³⁴Kɛɛ Farisiisia ti ndeilɔ tɛɛ, “Ngafa nyamuisia ti mahɛi mia a kpayei na ve ngi wɛ ngafa nyamuisia gbuava nungaa hu.”

³⁵Yesu i jɛsiɛlɔ taa waawai kpɛlɛɛ hu kɛɛ fuuleisia. I yɛlɔ a nungaa gaa ti hɛɛ wɛleisia bu, a Ngowili Yekpei hugɛ ndalongɔ Ngewɔ Mahayɛi ma, a heegbɛ laasii gbi bawo nungaa ma.

³⁶ Kia i fahiisia lɔni, ti mamamau i ngi lɔilɔ waa, ajifa ti liihɛlɛngɔ tawao kpaya ii ti wɛ, ti wiengɔ kia mbalangɛi nasia mahugbemɔ ii ti yeya.

³⁷Faale i ndeilɔ ngi gaalopoisia ma yɛ, “Tuhani huwɔlɔngɔ waa, kɛɛ yeteweblɛisia tii gbotoni.

³⁸A numui na vɛli ngi woo mia a kpalɛi aako i ngengeblaa yoyo ti ngi luhani lewe.”