Read Ngowili Yekpei Numu Kpɛlɛɛ Va MAAKI 10 Bible Online

MAAKI 10 - Ngowili Yekpei Numu Kpɛlɛɛ Va bible

MAAKI 10

¹Na wooma Yesu i gbuɛilɔ Kapaniɔm i li Judia lɔlei hu, i Jɔdan yɛi lewe. Faha wa ti gbɔma lɛilɔ ngi ma tawao i ti gaailɔ kia i yɛ pie watii gbi.

²Farisiisia lɛɛngaa ti wailɔ ngi gama, ti longɔ ti ngi hugɔɔ aako i kpulanga yɛpɛ le. Faale ti ngi mɔlilɔ tɛɛ, “Hugɛ lɛɛ a mue, mu jawei lumangɔe hindo wɛ gbeleva ngi nyahɛi ma?”

³Yesu i ti mɔli gbɛmboni a mɔli lɔ yɛ, “Sawei yeegbɔɔ Mojisi i feni wu wɛ?”

⁴ Ti kpɛmboilɔ tɛɛ, “Mojisi jawei ndeilɔ yɛ hindoi a kpelema-gɔlɔ velɔ ngi nyahɛi wɛ i gbele yeenyahɛi ma.”

⁵Yesu i ndeilɔ ti ma yɛ, “Mojisi i sawei ji nyɛini wu va lɔ ajifa wu woohu gbɔndangɔ.

⁶ Kɛɛ tɔto-gbelei wɔɔ, watii na Ngewɔ i hani gbi gbatɛni, i hindoi gbateilɔ kɛɛ nyahɛi.

⁷ Sabui ji va lɔ hindo a ngi kɛkɛ lo kɛɛ ngi nje, i vɛfɛ ngi nyahɛi ma.

⁸Ti veenjɔ ta wotelɔ a numu yila. Tɛɛ yaa yɛ a numu fele, ti yakpe.

⁹Faale maa ii houni nuuvu i hani na vulo Ngewɔ i ngilinga.”

¹⁰Kia ti yamani pɛlei bu, ngi gaalopoisia ti ngi mɔlilɔ kɔlooni njɛpɛi ji ma.

¹¹ Kɛ i ndenga ti ma yɛ, “Hindoi na a gbele ngi nyahɛi ma, i peka jɔɔ, i puegbuanga ngi nyahɛi yeya.

¹²Nyahɛi na bɛɛ a gbele ngi hinii ma, i hini weka jɔɔ, i puegbuanga.”

¹³Nungaa lɛɛngaa ti wailɔ a ndeengaa mumuisia aako i jaa a tie kɛɛ ngi gaalopoisia ti gbandɛilɔ yeenungeisia la.

¹⁴Kia Yesu i liiheini ji ma, ngi lii i leweilɔ, kɛ i ndenga ngi gaalopoisia ma yɛ, “A gbe ndeengɛisia ma ti waa nya gama, waa ti mabali, ajifa nungei nasia ti wiengɔ kia ndeengɛi jisia nyɔkɔ ti na, tia mia ta yɛ Ngewɔ mahayɛi hu.

¹⁵ A tɔnya, ngɛɛ wu ma, numu gbi lekee ɛɛ loko hei Ngewɔ mahayɛi bu kia ndopo wulo, ɛɛ wua na fɔ.”

¹⁶Kɛ i ndeengɛisia gulunga gakahu, i loko wɛlɛ ti ma a ngilangila, i Ngewɔ vɛli ti lubava.

¹⁷Kia gbɔma Yesu i yɛ pelei houma, taamɔ yila i wailɔ a piimɛ, i wombi gbakpa ngi gɔwɔbu, i nde ngi ma yɛ, “Kaamɔ yekpei, gbɔɔ nga pie aako ngi kunafɔ lɛɛvui majɔɔ?”

¹⁸Yesu i ngi mɔlilɔ yɛ, “Gbɛe ba nya loli a kpekpemɔ? Kpekpemɔ gbii na kɛlee Ngewɔ yakpe.

¹⁹ Bi Mojisi jaweisia gɔɔlɔ; ‘Baa numu wa, baa puegbua, baa huma wie, baa ndɛɛ yia wɛlɛ numu gbi ma, baa numu gava, bi kɛkɛ bɛlɛhei kɛɛ bi nje.’ ”

²⁰Kɛ taamɔi i ndenga yɛ, “Kaamɔ, i hiye nya hiilopongɔ ma, ngi sawei ji kpɛlɛɛ hounga.”

²¹Yesu i taamɔi gbeilɔ tiŋ, i lo a ngie, yɛ, “Hinda yakpe mia i longa. Li bi bi yeya-hani kpɛlɛɛ majia, bi yeenavoei ve fɛɛliblɛisia wɛ, bi wa bi yɛ a nya Woomamɔ; ba kpatɛ majɔlɔ ngelegoohu.”

²²Ji taamɔi i ji mɛnini, ngi yaamɛi i gbolilɔ hu, i li ngi lii nyaningɔ, ajifa ngi gbatɛngɔ wa yɛla.

²³Yesu i yaama jiɛilɔ ngi gaalopoisia ma, kɛ i ndenga ti ma yɛ, “A kpaukpau kpa kpatɛbleisia va ti wua Ngewɔ mahayɛi hu!”

²⁴Njɛpɛi ji i gualɛilɔ wa kaalopoisia ma kɛɛ Yesu i liilɔ gulɔma a ngi yɛpɛi yɛ, “Nya leengeisia, kpaukpaungɔe kpa wuava Ngewɔ mahayɛi hu!

²⁵Kpatɛmɔi wuala Ngewɔ mahayɛi hu i kpaukpauni poloŋ nyɔmɛi wuala ma mijii woohu.”

²⁶Njɛpɛi ji i kaalopoisia wuhu wuilɔ kpu, kɛ tia ti nyɔunyɔ mɔlima tɛɛ, “Yee lɔ na hɔɔ a gu a bawola?”

²⁷Yesu i ti gbeilɔ tiŋ i nde ti ma yɛ, “Nuuvu ɛɛ gu a ta yekpe bawola kɛlee Ngewɔ, Ngewɔ ta a gulɔ a hinda gbi wiela.”

²⁸Kɛ Pita i yɛpɛnga yɛ, “Kafai lɛ, mu hani gbi longa mu hitɛnga bi wooma.”

²⁹Yesu i ndeilɔ ti ma yɛ, “A tɔnya, ngi hugɛ a wue kɛ numu gbi lekee a ngi yeekuwuhu lo ɔɔ ngi ndeehinga ɔɔ ngi ndeenyahaleengaa ɔɔ ngi nje ɔɔ ngi kɛkɛ ɔɔ ngi leengaa ɔɔ kpalangaa nya va kɛɛ ngowili yekpei,

³⁰a maleema wa majɔlɔ ndɛvui ji hu. A pɛlɛ wekangaa majɔɔlɔ heima hɔndɔɔ yila kɛɛ ndeehinga kɛɛ ndeenyahaleengaa kɛɛ njengaa kɛɛ ndeengaa kɛɛ kpalangaa kɛɛ juwuyei bɛɛ; tawao hee wooma a kunafɔ lɛɛvui maajɔɔlɔ kɛyia.

³¹Kɛɛ numu gboto ti yɛngɔ a haalablaa kiahuna ta yɛlɔ a kɛlɛmablaa, kɛlɛmablaa ti yɛ a haalablaa.”

³²Yesu tia ngi gaalopoisia ti yɛ pelei hu lɔ ta li Jelusalɛm. Yesu i yɛ kulɔ lɔ, kaalopoisia ta to ngi ma, ti wuhu wungɔ; nungei nasia ti toni ti ma ti yɛ poma lɔ ti luwangɔ. Yesu i gbɔma ngi gaalopo puu mahu feleisia gbuɛilɔ fahii lia i na gbi hugɛ a tie i lima ngi wiema.

³³I ndeilɔ ti ma yɛ, “A wolo, mua lima Jelusalɛm. Ta Nuuvu Hindoloi houlɔ ti ngi ve Saagbuablaa Waawaisia wɛ kɛɛ Sawei Yeekaamɔisia. Ta ngi lɛɛlɔ ngi waava, ti ngi ve mahangei nasia wɛ Juublaa yaa tie;

³⁴ta ngi gbafalɔ, ti ndayɛi vali ngi ma, ti ngi lewe, ti ngi waa. Kɛɛ njii sawa wooma a vululɔ i hiye.”

³⁵Na wooma Jemisi kɛɛ Jɔn, Jɛbidi hingaleengeisia, ti wailɔ Yesu gama tɛɛ, “Kaamɔ, hinda lɔ na mu longɔ bi pie mu wɛ.”

³⁶Yesu i ti mɔlilɔ yɛ, “Gbɛ hinda le?”

³⁷Kɛ ti kpɛmbonga tɛɛ, “Mu longɔ bi mahayɛi mɛngaa dunyei gbi mahu, bi pie mua wueni mu hei bi maha heimi, yeengila i bi yejahu, yeepekei i bi gɔwɔhu.”

³⁸ Yesu i ndeilɔ ti ma yɛ, “Wuii hani na gɔɔ wu fɛɛlima. Wa gulɔ kpalɛi na i wama lama nya ma i la wu ma? Nguɛi ji kpɔndangɔ nya ma majɔva, wa gulɔ wu yeengua bondei na majɔ?”

³⁹Ti kpɛmboilɔ tɛɛ, “Ma gulɔ.” Kɛ Yesu i ndenga ti ma yɛ, “Tɔnya le, kpalɛi na i wama lama nya ma, a lalɔ wu ma, wu nguɛi na bonda majɔɔ ngi wama majɔɔma.

⁴⁰Kɛɛ kpaya ii nya wɛ kɛva ye lɔ a hei nya yejei hu kɛɛ nya gɔwɔ hu! Ngewɔ lɔ a heimi jisia ve nasia wɛ i kpatɛnga ti va.”

⁴¹Ji kaalopo weka puisia ti yeehindei ji hugɔni, ti lii i leweilɔ Jemisi ma tia Jɔn.

⁴² Faale Yesu i ti gbi lolilɔ ti wa ngi gama, i nde ti ma yɛ, “Wu kɔɔlɔ kɛ nasia Juublaa yaa tie ti mahangeisia ta kpaya lɔ yayenge ti mahu kɛɛ temayɛi.

⁴³Kɛɛ wua, hii ii le aa yɛ na wu lia. Numu gbi wu lia ngi longɔ i yɛ a numu wa, mahoungɔ i yɛ a yee mɔnisia ti bɔilopo;

⁴⁴ tawao ina wu yilayee longɔ i yɛ a haalamɔ, mahoungɔ i yɛ a wu gbi wu luwɔ.

⁴⁵Gbamaile Nuuvu Hindoloi vulii bɛɛ ii wani aako nungaa ti yenge ngi wɛ; i wailɔ yengeva ti wɛ, i yama i haa numu gboto wumawova.”

⁴⁶Yesu tia ngi gaalopoisia ti foeilɔ Jɛliko. Kɛɛ kia ti yɛ lewema na ma, tawao faha wa i looni ti wooma, fɛlimɔɔ wumungɔ yila, ngi la a Batimaɔs, ngi kɛkɛ laa a Timius, i yɛ heini pelei gbla lɔ.

⁴⁷Kia i mɛnini kɛ Yesu Nasalɛtimɔi mia, i tɔtoilɔ a yelei gulala yɛ, “Yesu, Devidi Hindoloi, nya mamamau lɔ!”

⁴⁸Numu gboto ti jɔlɛilɔ ngi ma tɛɛ i londo. Kɛɛ i yelei gulailɔ tewengɔ yeengovei ma yɛ, “Devidi Hindoloi, nya mamamau lɔ!”

⁴⁹Kɛ Yesu i longa kpɛ yɛ, “A ngi loli.” Ti pumumɔi lolilɔ tɛɛ, “Bi lii i gba! Hiye, taa bi lolima.”

⁵⁰Batimaɔs i ngi bobani gbuɛilɔ i pili mia, i vali i li Yesu gama.

⁵¹Yesu i ngi mɔlilɔ yɛ, “Gbɔɔ bi longɔ ngi pie bi wɛ?” Kɛ pumumɔi i kpɛmbonga yɛ, “Kaamɔ, nya longɔ ngi hinda lɔ gbɔma.”

⁵²Kɛ Yesu i ndenga ngi ma yɛ, “Li hoe, bi lalɛi a Ngewɔ i bi bawonga.” Batimaɔs i guilɔ a hinda lɔla ngama, i too Yesu ma pelei hu.