Read Ngowili Yekpei Numu Kpɛlɛɛ Va MAAKI 11 Bible Online

MAAKI 11 - Ngowili Yekpei Numu Kpɛlɛɛ Va bible

MAAKI 11

¹Kia Yesu tia ngi gaalopoisia ti laalani Bɛtfaji kɛɛ Bɛtani gbla, Ɔlivi Yiyei yakama, yeefulei jisia ti Jelusalɛm bobu, i ngi gaalopo fele yoyeilɔ kulɔ,

²i vɛli ti ma yɛ, “A li fulei na hu i wu lawaa, wu fonga lekee na, wa jakasi lɔgbɛ lɔlɔ i looni ngeyei ma, numu gbi ii ya heini lɛ wɔɔ mahu aa jia la. A fulo wu wa la mbei.

³Numu gbi i wu mɔlinga gbɛe wu na wiema, a nde ngi ma wuɛɛ Kaamɔi gbewengɔe fa tawao a gbelɔ ma ngama wu yama la.”

⁴Kaalopoisia ti liilɔ ti jakasi lɔgbɛi male ngilingɔ pɛlɛ yila la pelei gbla, tei hu. Kia ti yɛ fuloma,

⁵nungei nasia lɛɛngaa ti yɛ looni na ti ti mɔlilɔ gbɛe ti jakasi vuloma.

⁶Ti kpɛmboilɔ kia Yesu i yɛ puni ti laa kɛ nungaa ti gbenga ti ma ti li la.

⁷Ti wailɔ a jakasi Yesu gama, ti ti bobanisia vombo poma, kɛ Yesu i heinga mahu.

⁸Numu gboto ti ti bobanisia vomboilɔ pelei ma, yeepekeisia ta li ndɔgbɔi hu ta ngulu bekeisia yali ta fombo pelei ma.

⁹ Nungei nasia ti yɛ li kulɔ kɛɛ nasia ti yɛ wa poma ti tɔtoilɔ a yelei gulala tɛɛ, “Hooyoo! Luba i yɛ numui na ma i wama Ndemɔi biyei hu!

¹⁰Ngewɔ i mu maada Devidi mahayɛi na luba i wama! Tato i yɛ Ngewɔ ma!”

¹¹Yesu i wuailɔ Jelusalɛm goohu, i wua Ngewɔ Wɛlei bu, i yaama jia hani gbi ma; kɛɛ jifa foloi yeingɔ wa yɛla na, i liilɔ Bɛtani tia ngi gaalopo puu maahu feleisia.

¹²Folo wekei ma kia ti yɛ yamama Jelusalɛm ta gbua Bɛtani, ndɔlei i yɛlɔ ngi ma.

¹³Mɛ-wulu yila ta toi a figi, Yesu i loilɔ kuhama i tɔ, pɔpɔngɔ wa; faale i liilɔ na tɔva ina nguangɔe. Kɛɛ kia i foni ma, i ndawɛi lekee lɔ maleni nga, ajifa yeengulii na wua-gbelei ii yɛla.

¹⁴Yesu ndeilɔ ngulii na ma yɛ, “Kunafɔ numu gbi ɛɛ yaa bi wuɛi mɛ gbɔma!” Ngi gaalopoisia ti ji mɛnilɔ.

¹⁵Kia ti foni Jelusalɛm, Yesu i liilɔ Ngewɔ Wɛlei bu, i tɔtoo a nasia gbɛlaa ti yɛ felei gɔ na. I navoo maluvebleisia ti tebiisia yapɛɛilɔ kɛɛ poowo majiableisia ti heiwuliisia,

¹⁶tawao ii lumani numu gbi aa lewe a hani gbi a Ngewɔ Wɛlei yeekatei hu wee.

¹⁷ Na wooma i nungaa gailɔ yɛ, “Nyɛingɔe Ngewɔ Gɔlɛi hu kɛ Ngewɔ ndeilɔ yɛ, ‘Nya Wɛlei i yɛni a hɛɛ-wɛlɛ lɔ kɛnyɛi gbi va.’ Kɛɛ wua wu potenga a humablaa ti lɔwuma!”

¹⁸Saagbuablaa Waawaisia kɛɛ Sawei Yeekaamɔisia ti ji humɛniilɔ kɛ ti tɔtonga a pele gɔlila Yesu wava. Ti luwangɔ yɛla ngi ma ajifa fahii gbi ti wuhu wungɔ yɛla kai na va i yɛ kɛ.

¹⁹Kia foloi i yɛ gulama, Yesu tia ngi gaalopoisia ti gbuɛilɔ taa wai hu.

²⁰Ngele wekei wongɔi hu, kia ti yɛ lima a pelei, kɛ ti mɛ-wulii lɔnga mbengɔ i gbua yeendawɛisia ma i foo fa yeehapiisia ma.

²¹Na i wieni gbengi i hitɛilɔ Pita wɛ, kɛ i ndenga Yesu ma yɛ, “Kaamɔ, tɔ lɛɛ, mɛ-wulii bi kpengbeni gbengi i haanga!”

²²Yesu i poteilɔ i nde ti ma yɛ, “A la a Ngewɔ.

²³ Gbɛɛ ngi tɔnyɛi hugɛ a wue kɛ numu gbi lekee a nde ngiyei ji ma yɛ i gule i wili gboyei hu, sekahu gbi ii yeenumui na lii hu tawao ngi langɔ la vulii kɛ na i ndenga a wielɔ, a wielɔ ngi wɛ.

²⁴Sabui ji vamia nga nde wu ma ngɛɛ wu ya hɛɛma wa hani gbi vɛli Ngewɔ ma, a lala kɛ wu wilanga a majɔla, na gbi lekee wa fɛli, Ngewɔ a felɔ wu wɛ.

²⁵ Wu loonga hɛɛva Ngewɔ ma, a manu numu gbi ma nyamui na va i pienga a wue, aako wu Kɛkɛ na i ngelegoohu i manu wu ma nyamui nasia va wu pienga. [

²⁶Wuii manuilɔ nungaa wekeisia ma nyamui nasia va ta pie a wue, wu Kɛkɛ na i ngelegoohu ɛɛ manu wu ma nyamui nasia va wa pie.]”

²⁷Yesu tia ngi gaalopo puu maahu feleisia ti wailɔ gbɔma Jelusalɛm. Kia i yɛ jiama Ngewɔ Wɛlei bu, Saagbuablaa Waawaisia kɛɛ Sawei Yeekaamɔisia kɛɛ kpakoleisia kɛɛ nasia ti yɛ na ti wailɔ ngi gama,

²⁸ti ngi mɔli tɛɛ, “Kpayei yeegbɔɔ i bi wɛ hindei jisia wieva? Ye lɔ i yeekpayei ji veni bi wɛ?”

²⁹Yesu i kpɛmboilɔ ti gama yɛ, “Nga wu mɔlilɔ a mɔli yila; wu kpɛɛmbongaa, nga hugɛlɔ a wue kpayei yeegbɔɔ i nya wɛ hindei nasia wieva ngi pieni.

³⁰A hugɛ a nge, mindo lɔ Jɔn i kpayei na jɔni na nungaa wuava; i gbuani Ngewɔ gama lɔ ɔɔ nuuvu?”

³¹Kɛ ti tɔtonga a mawali houla a ti nyɔunyɔ tɛɛ, “Gbɔɔ ma nde? Mu kpɛmbongaa muɛɛ Jɔn gbayei i gbuani Ngewɔ gama lɔ, Yesu a ndelɔ yɛ gbɛe hɔɔ wuii lani a Jɔn?

³²Tawao gbulama mu nde muɛɛ Jɔn gbayei i gbuani nuuvu gama lɔ.” (Ti luwɛilɔ nungeisia ma ajifa numui gbi ti langɔ yɛla vulii kɛ Jɔn i yɛni wɔɔ a Ngewɔ lutui lɔ.)

³³Faale ti ndeilɔ Yesu ma tɛɛ, “Muii Jɔn gbayei gbuamɛi gɔɔ.” Kɛ Yesu i ndenga ti ma yɛ, “Nya bɛɛ ngɛɛ hugɛ a wue kpayei yeegbɔɔ i nya wɛ hindei jisia wieva.”