Read Ngowili Yekpei Numu Kpɛlɛɛ Va MAAKI 12 Bible Online

MAAKI 12 - Ngowili Yekpei Numu Kpɛlɛɛ Va bible

MAAKI 12

¹ Na wooma, Yesu i nungeisia gailɔ dɔmii hu yɛ, “Taamɔ yila i yɛlɔ wɔɔ na. I glepii gbalei lailɔ, kɛ i katei loonga yeekpalɛi ma, i ndowei bɔ mia ta yeenguɛi vɔnya na ta kpatɛ a ndɔi. I pɛlɛ guha waa looilɔ nungaa ta yɛ na yeekpalɛi mahugbe va. Na wooma i kpalɛi loko wuailɔ nungaa yeya i li poloŋ jia hu.

²Kia watii i hitini kɛ i ngi luwɔi loonga yeengengebleisia gama tuhani jɔngɔi ngi ndɛi va.

³Ngengebleisia ti nduwɔi na houilɔ, ti ndewe, i li a yeya haka.

⁴Kpalamɔi i gbɔma nduwɔ weka loilɔ, kɛɛ ngengebleisia ti ngi leweilɔ ngi wumbei gbi, ti ngi yawufe.

⁵Na hu gbi i gbɔma bɔilopo weka loilɔ kɛɛ ta ti ngi wailɔ tawao hii ti pieni a peka gboto, ta ti lɛɛngaa lewe, ta nasia waa.

⁶Numui na lekee i loni ngi loova tamia a taamɔi liima hindolo yakpei. Kɛlɛmɛi na, i yeendoi ji loilɔ ngengeblɛi jisia gama, a nde yɛ, ‘Nya langɔ la ta ba gɔɔlɔ nya loi ma.’

⁷Kɛɛ ngengeblɛi nasia ti ndeilɔ ti nyɔunyɔ ma tɛɛ, ‘Kpalamɔi hindoloi lɔ. A wa mu paa, kɛ ngi jɔhani i yɛnga a mu woo!’

⁸Ti gbundɛilɔ ngi ma, ti ngi waa, ti ngi womɛi gbua kpalɛi hu, ti pili.

⁹“Wu langɔ la gbɔɔ kpalamɔi na a pie? A walɔ, i ngengeblɛi nasia waa, i kpalɛi ve ngengeblaa wekangaa wɛ.

¹⁰ Nya langɔ la kɛ wu Ngewɔ Gɔlɛi na gaanga i ndeni yɛ, ‘Kɔtii na pɛlɛ loblɛisia ti gbeleni ma, i wotenga a baama gɔtu kɔtii kpɛlɛɛ ma.

¹¹Ndemɔi lɔ i ji wieni tawao kabande hinda le tɔvaa!’ ”

¹²Juubleisia ti mahubleisia ti longɔ yɛla ti Yesu hou ajifa ti kɔɛilɔ kɛ i dɔmii ji gbuani ti va lɔ kɛɛ ti luwailɔ fahii ma, ti ngi lo ti li.

¹³Mahubleisia ti Farisiisia lɛɛngaa loilɔ kɛɛ Hɛlɔd mableisia lɛɛngaa aako ti Yesu hou ngi layie hu.

¹⁴Ti wailɔ ngi gama tɛɛ, “Kaamɔ, mu kɔɔlɔ kɛ ba tɔnyɛi lɔ le, bii gbeweni gbɔɔ numu a nde. Bii gbeweni tomɛi yeegbɔɔ numu i looni na kɛlee na Ngewɔ liima hindei ba kɛ taa yeetɔnyɛi ba nungaa gaala. Hugɛ lɛɛ a mue, mu jawei nyanila le pawa gulava Roma Maha Wai ma? Mahoungɔe mu fe ɔɔ maa fe?”

¹⁵Kɛɛ Yesu i kasoei na gɔɛilɔ ti kulani, kɛ i ndenga yɛ, “Gbɛe wu lapima nya houva nya layie hu? A wa lɛɛ a navoo gbala yila, ngi tɔ.”

¹⁶Ti wailɔ la ngi wɛ kɛ i ti mɔlinga yɛ, “Yee gbuaye lɔ kɛɛ ngi biyei i navoei ji ma?” Ti kpɛmboilɔ tɛɛ, “Roma Maha Wai.”

¹⁷Faale Yesu i ndeilɔ yɛ, “A na ve Roma Maha Wai wɛ Roma Maha Wai woo le, wu na ve Ngewɔ wɛ Ngewɔ woo le.” Kɛ Yesu hinda i ti wuhu baanga.

¹⁸ Sadusiisia, nasia ti yɛ nde tɛɛ numu i haangaa ɛɛ yaa hiye hee hu, ti wailɔ Yesu gama ti ngi mɔli tɛɛ,

¹⁹ “Kaamɔ, Mojisi i sawei ji nyɛilɔ mu Juubleisia va yɛ, ‘Hindo i haangaa i ngi nyahɛi lo tawao tii ndo leni, haamɔi ndewehindoi a ponyahɛi na jɔlɔ huɛɛŋ ti ndeengaa le ngi ndewei wɛ.’

²⁰Ndeehingaa wɔfla ti yɛlɔ wɔɔ na; yeehalayei i nyahɛi jɔɛilɔ, i haa, ii ndo leni ma.

²¹Kɛ yeefelei i nyapoi jɔnga, ta bɛɛ i haa ii ndo leni ma. Hinda yakpei ji lɔ i ndeehindoi yeesawei wieni,

²²tawao hii i ti gbi wieni; ndewehindo wɔflei nasia gbi ti nyapoi jɔɛilɔ a nyaha laa, ti haa, tii ndo leni ma. Kɛlɛmɛi nyapoi bɛɛ i haailɔ.

²³Watii kɛyila haableisia ta hiye hee hu kɛlɛma volei ma, yɛ lɔ ngi woo a yɛ a nyahɛi na, jifa ti gbi ti ngi jɔɛilɔ a nyaha la?”

²⁴Yesu i ti mɔli gbɛmboilɔ yɛ, “Wu kpulanga wienga! Tawao wu kɔɔlɔ gbɛe? Yeesabui a ji lɔ wuii Ngewɔ Gɔlɛi gɔɔ kɛɛ ngi gbayei.

²⁵Ajifa watii na kuna haableisia ta vulu ti hiye, ta wielɔ kia malikeisia ti na ngelegoohu, nyaha jɔla kɛɛ hini jɔla ɛɛ yɛ na.

²⁶ Kɔlooni haableisia ti hiyelei ma hee hu, wuii yaa lɛ wɔɔ Ngewɔ Gɔlɛi na Mojisi nyɛini yeekakɛi na gaani kɔlooni ndɔgbɔi na ma ngɔmbui i houni ma? Nyɛingɔe na kɛ Ngewɔ ndeilɔ Mojisi ma yɛ, ‘Tamia Ebraham Yewɔɛi a ngie kɛɛ Aisaki kɛɛ Jekɔpi.’

²⁷Fuublaa lɔ ti Yewɔ a ngie, haablaa ti Yewɔ ya a ngie. Wu wɔlanga wa!”

²⁸Sawei Yeekaamɔ yila i yɛ na lɔ, tawao i njɛpɛi na kpɛlɛɛ mɛnilɔ. I tɔilɔ kɛ Yesu i Sadusiisia ti mɔli gbɛmbonga pɔɔnangɔ, famia i wɛilɔ Yesu gama i ngi mɔli yɛ, “Sawei yeegbɔɔ tewengɔ sawei kpɛlɛɛ ma?”

²⁹ Yesu i kpɛmboilɔ yɛ, “Sawei yeembawai lɔ a ji: ‘A mɛni, Isrɛl! Ndemɔi mu Yewɔɛi yakpe lɔ Ndemɔi le.

³⁰A lo a Ndemɔi wu Yewɔɛi a wu lii gbi kɛɛ wu yafei gbi kɛɛ wu nɛmahui gbi kɛɛ wu gbayei gbi.’

³¹ Sawei yeefelei lɔ a ji: ‘A lo a wu heinyɔui kia wu longɔ la a wua yekpe.’ Sawa weka gbii na aa lewe jisia feleisia ma.”

³² Sawei Yeekaamɔi i ndeilɔ Yesu ma yɛ, “Kaamɔ, bi kpɛmbonga pɔɔnangɔ! Tɔnya le, kia bi ndenga la, kɛ Ndemɔi yakpe lɔ Ngewɔ le tawao kɛ Ngewɔ weka ii na kɛlee ta.

³³ Tawao mahoungɔ numu i lo a ngie a ngi lii gbi, kɛɛ ngi nɛmahui gbi, kɛɛ ngi gbayei gbi; i yama i lo a ngi heinyɔui kia ngi longɔ a ta yekpe. Sawa felei jisia houla i leweni saa gbuala ma Ngewɔ ma a tohaningaa kɛɛ hani wekanga.”

³⁴Yesu i liiheilɔ ma kɛ nɛmahulewe gbɛmbo mia taamɔi i nguani, faale i ndeilɔ yeetaamɔi ma yɛ, “Bi ma ii guhani a Ngewɔ mahayɛi.” Ji wooma numu ii yaa liiloni ngi mɔliva a mɔɔli gbi.

³⁵Kia Yesu i yɛ nungaa gaama Ngewɔ Wɛlei bu, i mɔli yila wuailɔ yɛ, “Gbɛe Sawei Yeekaamɔisia ta nde tɛɛ Ngewɔ Maha Heingɔi a yɛ a Mahɛi Devidi bɔɔsɔ lɔ?

³⁶ Ngewɔ Yafei i puilɔ Mahɛi Devidi lii hu ndeva yɛ, ‘Ndemɔi ndeilɔ nya Lemɔi ma yɛ, Hei mbei nya yejei hu haaŋ ngi bi gɔnyɔuisia wua pɛiŋ bi gɔwɔbu.’

³⁷Mahɛi Devidi vulii a Ngewɔ Maha Heingɔi loli wɔɔ a Ndemɔi; Ngewɔ Maha Heingɔi a yee na gu i gbua Devidi hu?” Faha wa ti yɛlɔ a wolo Yesu ma a kohunɛ.

³⁸Kia i yɛ ti gaama i ndeilɔ yɛ, “A wu mahugbe a Sawei Yeekaamɔisia, nasia ti longɔ a lewela ndoma waawaisia ti ti ma tawao nungeisia ti yaa vama ti ma fahii hu ta wombi gbakpa,

³⁹tawao ti longɔ a heila baama heimisia hɛɛ wɛleisia bu kɛɛ mɛhɛɛ-mɛ gomɛisia hu.

⁴⁰Ta ponyahangɛisia ti heimisia gbua ti yeya a kava, na wooma ta liiwooma jɛli huguhangɔngaa wie aako ti kɛ kɛ ti wɔnangɔe. Kpalɛi na kuna a la ti ma i nyamuni kpɛlɛɛ ma!”

⁴¹Yesu i heilɔ i wote navoo lamagbatɛmɛi leenga, a fahii gbe ta navoei gula na. Kpatɛblaa gboto ti yɛlɔ a navoo waawaa gula na.

⁴²Kɛ ponyaha yila i wanga i navoo mumu fele gula na kungɔ a sɛnti yila.

⁴³Yesu i ngi gaalopoisia lolilɔ hinda yila i nde ti ma yɛ, “Gbɛɛ ngi tɔnyɛi hugɛ a wue kɛ navoei na ponyaha vɛlingɔi na i kulani navoo wumɛi na, i leweni numu wekeisia gbi ti ndɛi ma.

⁴⁴Ajifa navoei na yeekpewe ii kpatɛbleisia ma ta mia ti feni, kɛɛ ta, kia bɛɛ ngi vɛlingɔ, i na gbi lɔ veni i yɛ ngi yeya mɛva.”