Read Ngowili Yekpei Numu Kpɛlɛɛ Va MAAKI 13 Bible Online

MAAKI 13 - Ngowili Yekpei Numu Kpɛlɛɛ Va bible

MAAKI 13

¹Kia Yesu i yɛ gbuama Ngewɔ Wɛlei bu, ngi gaalopoisia yilayee i ndeilɔ ngi ma yɛ, “Kaamɔ, kɔtii jisia ti wɔwɔyii lɔ lɛɛ ti pɛlɛ gabandengɔ waawai jisia loni la!”

²Yesu i poteilɔ yɛ, “Bia pɛlɛ waawai jisia lɔma? Kɔtu yakpe bɛɛ ɛɛ lo laani ngi mbaa mahu; ta ti gbi wololɔ ti ti gula.”

³Yesu i yɛ heinilɔ Ɔlivi Yiyei wumba ngi wotengɔ Ngewɔ Wɛlei leenga, kɛ Pita kɛɛ Jemisi kɛɛ Jɔn kɛɛ Andru ti wanga ngi gama tia lekee,

⁴ti nde ngi ma tɛɛ, “Nde mu ma migbe lɔ, na bi ndeni, a wie, bi hugɛ a mue kabande hindei yeegbɔɔ i wama wiema kɛva kɛ watii i hitinga hindei jisia kpɛlɛɛ ti wieva.”

⁵Yesu i ndeilɔ ti ma yɛ, “A wu mahugbe, tawao waa luma numu gbi i wu gbowa.

⁶Numu gboto ta walɔ tɛɛ ti yɛpɛma nya gbayei hu lɔ, ta nde tɛɛ, ‘Ta mia a nge’ tawao ta numu gboto wuhu baalɔ.

⁷Wu lii aa hɛlɛ ji wa kɔisia gɔwoi mɛni wu gbla kɛɛ ji wa kɔisia malɔwɔ mɛni kuhama. Hindei jisia nyɔkɔ ta wielɔ huɛɛŋ, kɛɛ tɛɛ kɛ kɛ kɛlɛmɛi i hitinga.

⁸Kɛnyɛisia ta gɔlɔ a ti nyɔunyɔ tawao mahangeisia ta kɔi wɛlɛlɔ ti nyɔunyɔ ma; ndɔleisia ta gbɛlilɔ hinda gboto tawao mɛhɛɛ vɛli a walɔ. Hindei jisia ta wielɔ kia ndo-le-goohugbalei yeetɔtoomɛi na.

⁹ “Wua vulii waa lema. Ta wu houlɔ ti li a wue Kotii hu. Ta wu lewelɔ hɛɛ wɛleisia bu; jifa nya gaalopoisia a wue wa lolɔ maha waawangaa ti Kotii gulɔ. Yeewatii na mia wa gu a Ngowili Yekpei lela ti ma.

¹⁰Kɛɛ pɛiŋ dunyei gɛlɛmɛi i ya hiti, Ngowili Yekpei a le pɛiŋ huɛɛŋ kɛnyɛi gbi hu.

¹¹Ti wu houngaa ti li a wue Kotii gulɔ, wu lii aa hɛlɛ gbɔɔ mahoungɔ wu nde; watii na i hitingaa, a njɛpɛi nasia le ta ve wu wɛ ngamɛi na. Gbamaile njɛpɛi nasia wa nde tɛɛ yɛ a wu nda, ta gbua Kayema Yafei gama lɔ.

¹²Hingeisia lɛɛngaa ta ti gbɔgbɔ ndeehingeisia velɔ ti waa va tawao kɛkɛisia ta na nyɔkɔ wielɔ a ti leengeisia. Ndeengɛisia ta gbundɛlɔ ti lebleisia ma ti pie ti ti waa.

¹³ Numui gbi ta lololɔ a wue nya va, kɛɛ numui na lekee a liilo i to yeekɛlɛmɛi, a bawolɔ.”

¹⁴ “Wa hunyanimɔ maluwangɔi lɔlɔ i looni hindei na ngi yɛma ii le (kɔlɛi ji gaamɔi i ji bugɔɔ.) Na wiengaa, mahoungɔ nasia ti Judia ti lɔwu ti li ngiyeisia hu.

¹⁵Numui na a yɛ pɛlei wumba, ma i houni i tama gula wuavaa pɛiŋ pɛlei bu aako i hani gbi gbua liva la.

¹⁶Numui na a yɛ kpalɛi hu, aa yama gbɔma tei hu ngi bobani wooma.

¹⁷Maluwangɔ a yɛla kpa koonyahangɛisia va kɛɛ koimɛisia!

¹⁸A Ngewɔ vɛli aako hindei jisia taa wie a hamɛi!

¹⁹ Ajifa yeewatii na, yeekpundɛisia ta yɛ nyamuni i lewe na gbi ma dunyei i tɔnga i hiye watii na ma Ngewɔ i dunyei gbatɛni i to foloi ji ma tawao yeenyɔkɔ ɛɛ yaa wie kunafɔ.

²⁰Kɛɛ Ndemɔi i yeelɔwɔi nasia mahu gbuanga; ina na ii le numu gbi ii yɛ bawo. Kɛɛ nasia va i loko longa ti ma ti bawova, i lɔwɔi nasia mahu gbuanga.

²¹Yeewatii na, numu gbi i ndengaa bi ma yɛ, ‘Wote mbei, Ngewɔ Maha Heingɔi gbe mbei!’ ɔɔ ‘Ta gbe mia!’ baa la a ngie.

²²Gbamaile ndɛɛblɛisia ta hiyelɔ tɛɛ Ngewɔ Maha Heingɔi lɔ a tie kɛɛ Ngewɔ lutuisia. Ta kabande hindangaa wielɔ aako ti nasia vulii bɛɛ wɛlɛ Ngewɔ i loko longa ti ma ti bawova, ina ti guilɔ.

²³Waa lema! I longa kulɔ ngi hindei gbi hugɛnga a wue.”

²⁴“Kpundɛ hindei nasia ti gbɔyɔngaa lekee a wiela, foloi a gbindilɔ, ngalui ɛɛ yaa voo,

²⁵tumbekeisia ta gbualɔ ngelei ma ti gula tawao yeekpayɛi nasia ti ngelei ma ta jɛsialɔ.

²⁶Na i wiengaa, nungaa ta Nuuvu Hindoloi lɔlɔ a gbua ngelei ma a kpaya waa kɛɛ ngɔlɔya.

²⁷A malikeisia lolɔ dunyei yeesɔkui gbi hu nasia lɛva ma i loko loni ti ma ti bawova dunyei hu kulupɛ.”

²⁸“A kaa wumbu figi wulii ma. Ngi bekeisia ti wundungaa, i tɔtoo a ndawa gbuala, kɛ wu kɔɔnga kɛ haamɛi lɔ wama.

²⁹Hii lɔɔ hindei na wieyii i na; wu tɔngaa hindei jisia ti wiema, wa kɔɔlɔ kɛ watii ma i gutunga ngi walei va, i longa kulo te.

³⁰A tɔnya, ngɛ wu ma hindei jisia kpɛlɛɛ ta wie pɛiŋ nuuvui nasia ti na kiahuna ti ya gbɔyɔ a haala.

³¹Ngelei taa dunyei ta nyanilɔ kɛɛ nya layie ɛɛ nyani.”

³² “Numu gbi ii kɔɔ migbe lɔ watii na a hiti, malikeisia vulii bɛɛ ti ngelegoohu tii kɔɔ; Ngewɔ Hindoloi ii kɔɔ, Ngewɔ mu Kɛkɛ yakpe mia i kɔɔngɔ.

³³Waa lema, wu valangɔ i yɛla, ajifa wuii hindei jisia ti wie-gbelei gɔɔ.

³⁴ Piengɔe kia numui na i na a gbua ngi yee, i li jia hu. Pɛiŋ i ya li, a ngi heimi loko wualɔ ngi bɔilopoisia yeya, i numui gbi ngi nda yengei ve, i pɛlɛ mahugbemɔi hei pɛlei la.

³⁵Wu valangɔ i yɛla, ajifa wuii watii na gɔɔ pɛlɛmɔi a wa tɛngaa a yɛ a kpɔkɔi lɔ ɔɔ kpindiliɛi ɔɔ ngewohui ɔɔ foloi hiyengɔi hu.

³⁶I gbuangaa nga pu, aa male wu njii hu.

³⁷Na ngi ndema wu ma, ngi ndema numui gbi lɔ va: wu valangɔ i yɛla!”