Read Ngowili Yekpei Numu Kpɛlɛɛ Va MAAKI 14 Bible Online

MAAKI 14 - Ngowili Yekpei Numu Kpɛlɛɛ Va bible

MAAKI 14

¹ I loni na njii fele Tewema Gomɛi va kɛɛ Bledii Gbamɛi, na tɛɛ yisti wu hu. Saagbuablaa Waawaisia kɛɛ Sawei Yeekaamɔisia ti yɛlɔ a pele gɔli Yesu houva ndɔwuma ti ngi waa.

²Ti ndeilɔ tɛɛ, “Maa pie komɛ watii ji hu, ina na ii le, ndapi a gulalɔ.”

³ Yesu i yɛlɔ Bɛtani, Saimɔn wɔɔ kpɔukpɔui i yɛ ngi ma, ngi yeepɛlɛbu. Kia Yesu i yɛ mɛhɛɛ mɛma, nyapo yila i wuailɔ na, baabɔɔ-janii i ngi yeya ndavengɔ a ngulɔ gu nɛnɛɛ bagbangɔ wa. I sanii bolei yaliilɔ nga, i yeengulɔi gbi wu Yesu wui hu.

⁴Nungei nasia lɛɛngaa ti yɛ na ti lii i leweilɔ, ta nde ti nyɔunyɔ ma tɛɛ, “Gbɛva lɔ nyapoi ji i ngulɔi ji hunyaninga?

⁵Aa gulɔ i majia yeesɔngɔi gungɔ a foo yila pawa lebla va, ti yeenavoei ve fɛɛliblɛisia wɛ!” Kɛ ti yianga ngi ma.

⁶Kɛɛ Yesu i ndeilɔ yɛ, “A gbe ngi ma! Gbɛe wu yiama ngi ma? I hinda yekpe wa wienga a nge.

⁷ Wua fɛɛlibla lɔ wu heini fɔ, tawao watii gbi wu longɔ wu gbɔ ti ma, wa pielɔ. Kɛɛ nya, ngɛɛ yɛ wu lia a watii gbi.

⁸Na nyapoi ji a gu a piela tamia i pienga; ngulɔi ji i punga nya ma i nya gbuhɛi lɔ magbatɛnga nya gbɔwuva.

⁹Gbɛɛ ngi tɔnyɛi hugɛ a wue, hindei gbi lekee ti Ngowili Yekpei ji leni na dunyei hu gbi, ji nyapoi ji i pienga, ta hugɛlɔ na ngi hinda hitɛva nungaa nɛmahu.”

¹⁰Na wooma Judasi Kɛriɔtmɔi, kaalopo puu maahu feleisia ti yilayee, i gbuɛilɔ i li Saagbuablaa waawaisia gama aako i Yesu ve ti wɛ.

¹¹Ti goohu i nɛɛlɔ wa na mɛniva i ndeni kɛ ti Lahei wumbunga navoo veva ngi wɛ. Faale Judasi i tɔtoilɔ na a pele yekpe gɔlila Yesu veva ti wɛ.

¹²Bledii Gbama Gomɛi yeehaala volei ma, foloi na ta Tewema Gomɛi yeembalangɛisia waa, Yesu gaalopoisia ti ngi mɔlilɔ tɛɛ, “Mi lɔ bi longɔ mu li mu Tewema mɛhɛɛ hugbatɛ na bi wɛ?”

¹³Kɛ Yesu i ti fele loonga yɛ, “A li taa wai hu; taamɔ yila, i lima a njɛi tei hu, a wu malelɔ. A to ngi ma

¹⁴pɛlei na i wuama mbu, wu nde pɛlɛmɔi ma wuɛɛ, ‘Mu Kaamɔ yɛ bi lomui na gɛ a mue tia ngi gaalopoisia ti wama Tewema mɛhɛɛi mɛma na.’

¹⁵Pɛlɛmɔi a ngeleya-lomu lakpa yila gɛlɔ a wue na gbatɛngɔ fo. A Tewema mɛhɛɛi hugbatɛ na mu va.”

¹⁶Kaalopoisia ti gbuɛilɔ ti li taa wai hu, ti hindei gbi male kia Yesu i ndeni la ti ma; kɛ ti Tewema mɛhɛɛi hugbatɛnga.

¹⁷Kia kpɔkɔ i wɛlɛni, Yesu tia ngi gaalopo puu mahu feleisia ti wailɔ.

¹⁸ Kia ti yɛ mɛhɛɛ mɛma tebii ma, Yesu ndeilɔ yɛ, “Gbɛɛ ngi tɔnyɛi hugɛ a wue kɛ wu yilayee mua ta mu mɛhɛɛ ji mɛma tamia i nya vema.”

¹⁹Kaalopoisia ti lii i nyanilɔ kɛ ti tɔtonga a ngi mɔlila a ngilangila tɛɛ, A tɔnya bi lii ii nya ma?

²⁰Yesu i kpɛmboilɔ yɛ, “Wu puu mahu felei jisia yeengila le, na mua ta mu loko hitɛma kaalo yakpei hu.

²¹Numui na Nuuvu Hindoloi le a haalɔ kia Ngewɔ Gɔlɛi i ndeni la ngi va, kɛɛ i nyamuni kpa numui na va a ngi ve! Aa fesalɔ wɔɔ yeenumui na va ina tii yɛ ngi leni gbi.”

²²Kia ti yɛ mɛhɛɛ mɛma, Yesu i bledii gbuhɛi wumbuilɔ, i siɛgbua Ngewɔ ma, i ngaingai, i fe ngi gaalopoisia wɛ yɛ, “A mɛ, nya luwui lɔ.”

²³Kɛ i bolei wumbunga, i siɛgbua Ngewɔ ma, i fe ti wɛ, kɛ ti gbi ti kpɔlenga.

²⁴ Kɛ Yesu i ndenga yɛ, “Nya Ŋamɛi lɔ, na i wama wuma numu gboto va, nya ŋamɛi na a Ngewɔ hinda yangilingɔi gbakpa.

²⁵Gbɛɛ ngi tɔnyɛi hugɛ a wue, ngɛɛ yaa gbɔma ndɔi ji gboli kɛlee foloi na nga ndɔ ninɛi gboli Ngewɔ mahayɛi hu.”

²⁶Kɛ ti Tewema Gomɛi yeenguleisia yanga, ti gbua ti li Ɔlivi Yiyei hu.

²⁷ Yesu ndeilɔ ti ma yɛ, “Wu gbi wa lewelɔ a piimɛ wu vaya nya ma, ajifa Ngewɔ Gɔlɛi i ndeilɔ yɛ, ‘Ngewɔ a mbala mahugbemɔi waalɔ kɛ mbalangɛisia ti hu i vayanga.’

²⁸ Kɛɛ ngi vulungaa ngi hiye hee hu, nga lilɔ Galili wu gulɔ.”

²⁹Pita i ndeilɔ yɛ, “Jisia kpɛlɛɛ bɛɛ ti lewe a piimɛ nya ngɛɛ lewe a piimɛ fɔ!”

³⁰Kɛ Yesu i ndenga Pita ma yɛ, “Gbɛɛ ngi tɔnyɛi hugɛ a bie, pɛiŋ tɛhinɛi i yaa gokole heima fele a kpindi ji, ba ndelɔ heima sawa bɛɛ bii nya gɔɔ.”

³¹Pita i la liigbɛilɔ ma gbɔma yɛ, “Ngɛɛ na le, ti yɛ bɛɛ mua bia wama!” Kaalopo wekeisia gbi ti yeenjɛpɛ yakpei na lɔ leni.

³²Ti wailɔ hinda yila ta na loli a Gɛtsimani kɛ Yesu i ndenga ngi gaalopoisia ma yɛ, “A hei mbei, ngi li kulo ngi Ngewɔ vɛli.”

³³I Pita wumbuilɔ kɛɛ Jemisi kɛɛ Jɔn tia tieni ti li. Ndiimɔnɛ wa i tɔtoilɔ a ngi houla.

³⁴Kɛ i ndenga ti ma yɛ, “Ndiimɔnɛi na i nya ma ngɔlɔngɔ wa le, yɛkɛ i nya waa. A lo mbei wu yɛ a pelehu gbe.”

³⁵I gbuailɔ ti ma i li kulo, i voombo ndɔmɛi, i Ngewɔ vɛli yɛ ina a gulɔ a wiela, Ngewɔ i pie kpalɛ watii ji aa foo ngi ma.

³⁶I Ngewɔ vɛlilɔ yɛ “Nya Kɛkɛ, ba gulɔ a hinda gbi wiela. Bolei yeeji, kpalɛi i ndavengɔ, aa foo nya ma dae. Na hu gbi bi liimɛi i wie, nya ndɛi ii le.”

³⁷Kɛ i yamanga i male kaalopo saweisia ti njii hu, kɛ i Pita mɔlinga yɛ, “Saimɔn, wu njii hu lɔ? Wuii guni a pelehu gbela hinda hugutungɔ bɛɛ va?”

³⁸Kɛ i ndenga ti ma yɛ, “A pelehu gbe, wu Ngewɔ vɛli aako kɔlɛya aa wu male. Wu yafei lumangɔe kɛɛ wu luwui gahu gbɔyɔngɔe.”

³⁹I liilɔ gbɔma i Ngewɔ vɛli, a njia yakpei na le i ndeni.

⁴⁰Kɛ i wanga gbɔma kaalopoisia gama i ti male njii hu, jifa njii mani ti houngɔ yɛla. Tii yɛ kɔɔ gbɔɔ ta nde ngi ma.

⁴¹Ji Yesu i ngamɛi yeesawei wieni ti gama, i ndeilɔ ti ma yɛ, “Wua lekee yiima wa lɛɛvu? I lo hii! Watii i hitinga! Ti Nuuvu Hindoloi majianga jumbubleisia ma.

⁴²A hiye mu li. A wote mbei, numui na i nya vema taa mbei gbla.”

⁴³Yesu i loni yɛpɛmaa kɛ Judasi, ngi gaalopoisia yilayee, i gbua nga. Faha wa yɛlɔ ngi wooma, kɔboweisia ti ti yeya kɛɛ kpɔnɛisia, tawao Saagbuablaa Waawaisia kɛɛ Sawei Yeekaamɔisia kɛɛ kpakoleisia mia ti ti loni.

⁴⁴Baayamɔi na i hugɛilɔ pɛiŋ a fahii ta yee Yesu gɔɔ, yɛ, “Numui na nga va ngi ma a ndagɔmi, ta le. A ngi hou wu li a ngie.”

⁴⁵Kia lekee Judasi i foni, i liilɔ yakpe Yesu gama yɛ, “Kaamɔ!” kɛ i ngi lagɔminga.

⁴⁶Ti Yesu houilɔ kpaŋ.

⁴⁷Ngi gaalopoi nasia ti yɛ looni na, yeengila i kɔbowei laalɛilɔ nga i Saagbuablɛisia ti gulɔmɔ wai luwei ŋɔna, i ngi wolii lewe na.

⁴⁸Kɛ Yesu i yɛpɛnga ti gama yɛ, “Gbɛe wu wani a kɔbowangaa kɛɛ kpɔnangaa nya houva bi tɔngaa bɛɛ sukusɛkɛmɔ mia a nge?

⁴⁹ Mua wueni lɔ wɔɔ na folo gbi, nga nungaa gaa Ngewɔ Wɛlei bu, wuii nya houni. Kɛɛ na ndengɔ Ngewɔ Gɔlɛi hu a wielɔ huɛɛŋ.”

⁵⁰Kɛ ngi gaalopoisia gbi ti lewenga a piimɛ, ti vaya ngi ma.

⁵¹Foninge lakpao yila, i yɛlɔ a too Yesu wooma, i wɛilɔ na kulei lekee i ngi gbakihu. Ti lapilɔ ngi houva,

⁵²kɛɛ i kulei loilɔ ti yeya, i li a piimɛi a ngi magbukei.

⁵³Ti liilɔ a Yesu Saagbuablɛisia ti gulɔmɔ wai yeepɛlɛbu. Ti maleni Saagbuablaa Waawaisia kɛɛ kpakoleisia kɛɛ Sawei Yeekaamɔisia ti gomɛngɔ na.

⁵⁴Pita i yɛlɔ a too Yesu ma kuhama tawao i liilɔ i wuaa Saagbuablɛisia ti gulɔmɔ wai wɛlei yeekatei hu. Kɛ i heinga kolei kpla, a gɛwo, tia Ngewɔ Wɛlei mahugbeblɛisia.

⁵⁵Saagbuablaa Waawaisia tia njia leblaa wekeisia ti lapilɔ seli majɔva aako ti Yesu lɛɛ ti ngi waa kɛɛ tii yeeseli majɔni.

⁵⁶Selibla gboto ti ndɛɛ gualɛilɔ Yesu ma, kɛɛ ti jeli wuangɔi velangɔ yɛla ma.

⁵⁷Kɛ hiingaa lɛɛngaa ti hiyenga ti ndɛɛ guala Yesu ma tɛɛ,

⁵⁸ “Mu mɛnilɔ taamɔi ji i nde yɛ, ‘Ngewɔ Wɛlei ji nuuvungaa ti tonga, nga ngololɔ, tawao njii sawa wooma nga peka lolɔ na nuuvu ɛɛ gu a tola.’ ”

⁵⁹Jisia vulii bɛɛ ti jeli wuangɔi ii guni aa la hinda yila.

⁶⁰Saagbuablɛisia ti gulɔmɔ wai i hiyeilɔ i lo ti gbi gulɔ i Yesu mɔli yɛ, “Njɛpɛ gbii bi la seli ji va jisia ti nguanga bi va?”

⁶¹Kɛɛ Yesu malondongɔ yɛla, ii lumani aa njia yakpe bɛɛ le. Kɛ Saagbuablɛisia ti gulɔmɔ wai i gbɔma ngi mɔlinga yɛ, “Bia lɔ Ngewɔ Maha Heingɔi a bie, Ngewɔ Lubangɔi ngi Hindoloi?”

⁶² Yesu i kpɛmboilɔ yɛ, “Tamia a nge, tawao numui na Nuuvu Hindoloi a ngie, wu gbi wa ngi lɔlɔ i heini kpaya Yewɔɛi yejei hu, na wooma a walɔ gbɔma dunyei hu i heini njagbili mahu!”

⁶³Saagbuablɛisia ti gulɔmɔ wai i ngi magulɛi blɛilɔ kɛva kɛ ngi lii lewengɔe, i nde yɛ, “Muii yaa gbeweni seli gbi va!

⁶⁴ Wu mɛninga a Ngewɔ bɛlɛ nyani. A kiti lewe njiɛi ma.” Ti gbi ti Yesu lɛɛlɔ tɛɛ mahoungɔ ti ngi waa.

⁶⁵Ti lɛɛngaa ti tɔtoilɔ a ndayɛi wula Yesu ma, ti yama ti ngi yaama yili, ta ngi hiya a bɔɔtani, ta nde ngi ma tɛɛ, “Numui na gɛ lɛ i bi leweni!” Ngi magatablɛisia ti ngi houilɔ ta ngi gbolɛ.

⁶⁶Pita i loni mbui lɔ katei na hu Saagbuablɛisia ti gulɔmɔ wai yengebleisia yeenyahayee yila i wani na.

⁶⁷Kia i Pita lɔni a gɛwo, kɛ i ngi gbenga tiŋ yɛ, “Bia bɛɛ bi yɛlɔ Yesu Nasalɛtimɔi wooma.”

⁶⁸Kɛɛ Pita i mawalilɔ ma yɛ, “Ngii na gɔɔ bi ndema.” Kɛ i pele hounga gbuava katei hu, kɛɛ ngamɛi na kɛ tɛhinɛi i gokolenga.

⁶⁹Nyahaloi ji i Pita lɔilɔ pelei hu, kɛ i ndenga gbɔma nasia ma ti yɛ looni na yɛ, “Yesu gaalopoisia yilayee lɔ!”

⁷⁰Kɛɛ Pita i mawalilɔ ma gbɔma. Hu ii guhani kɛ nasia ti yɛ looni na ti ndenga Pita ma tɛɛ, “Bɛɛ gu baa maawali yɛlaa ma a Yesu gaalopo, ajifa Galilimɔ lɔ a bie.”

⁷¹Kɛ Pita i ndenga yɛ, “Ngi jondunga kɛ tɔnyɛi mia ngi ndema! Ngi gaalopo yaa a nge! Ngii numui na gɔɔ wu ngi yɛpɛ lema!”

⁷²Ngamɛi na kɛ tɛhinɛi i kokolei yeefelei wienga, kɛ Yesu layie i hitɛnga Pita wɛ, ji i ndeni ngi ma yɛ, “Pɛiŋ tɛhinɛi i yaa gokole heima fele, ba ndelɔ heima sawa bɛɛ bii nya gɔɔ.” Kɛ Pita i woo gbuanga ma, i wɔɔ.