Read Ngowili Yekpei Numu Kpɛlɛɛ Va MAAKI 15 Bible Online

MAAKI 15 - Ngowili Yekpei Numu Kpɛlɛɛ Va bible

MAAKI 15

¹A ngenda tɛtei Saagbuablaa Waawaisia kɛɛ kpakoleisia kɛɛ Sawei Yeekaamɔisia kɛɛ njia leblaa wekeisia ti gomɛilɔ fulofulo ti ti hugbatɛisia wie. Ti jɔwɔi gulailɔ Yesu ma, ti li a ngie, ti ngi ve Paileti wɛ.

²Paileti i Yesu mɔlilɔ yɛ, “Juubleisia ti mahɛi lɔ a bie?” Yesu i kpɛmboilɔ yɛ, “Bia mia bi ndenga.”

³Njia gboto mia Saagbuablaa Waawaisia ti pɛlɛni Yesu ma, kɛɛ ii yɛpɛni.

⁴Faale Paileti i ngi mɔlilɔ gbɔma yɛ, “Bii yɛpɛma? Bii hinda gboto bondei ji lɔma ti tɛnga bi wumba?”

⁵Na hu gbi Yesu ii gbɔma njia yakpe bɛɛ leni, kɛ Paileti wuhu i wunga.

⁶Tewema Gomɛ gbi hu, kungɔ yɛla Paileti hu gbeva kpindiwɛlɛbumɔi yeena gbi na nungeisia ta lo la.

⁷Watii na ma ndakpao yila i yɛlɔ kpindiwɛlei bu, tia ngi mbangɛi yeenasia ti yɛ gangani a gɔmɛtii, ti ndapi lewe ni, ti numu yila waa yeendapii na hu ta ngi loli a Barabasi.

⁸Kia fahii lɛni ma Paileti wɛlei la, ti tɔtoilɔ a ndela Paileti ma tɛɛ i ngama ngova hu,

⁹i ti mɔlilɔ yɛ, “Wu longɔe ngi gbe Juubleisia ti mahɛi ma?”

¹⁰Paileti i yɛ kɔɔlɔ pandawanda kɛ Saagbuablaa Waawaisia ti Yesu veilɔ ngi wɛ jifa ti lolongɔ yɛla a ngie.

¹¹Kɛɛ Saagbuablaa Waawaisia ti nungaa ti lii gbaboilɔ aako ti pie Paileti i gbe Barabasi ta ngi ma ti wɛ.

¹²Kɛ Paileti i fahii mɔlinga yɛ, “Gbɔɔ hɔɔ wu longɔ ngi pie a taamɔi ji wa toli a Juubleisia ti Mahɛi?”

¹³Kɛ ti yelei gulanga tɛɛ, “Ngi gbakpa krɔsii ma!”

¹⁴Paileti i ti mɔlilɔ gbɔma yɛ, “Gbɛe, gbɔɔ nyamu le i pienga?” Kɛɛ ti yelei mato gulailɔ tɛɛ, “Ngi gbakpa krɔsii ma!”

¹⁵Paileti longɔ yɛla i fahii na liilɛli, faale i gbeilɔ Barabasi ma ti wɛ, i pie ti Yesu lewe nyamungɔ waa, i ngi ve yɛ ti li ti ngi gbakpa krɔsii ma.

¹⁶Sojeisia ti wuailɔ a Yesu gɔmɛtii wɛlei (yee katei hu); ti ti mbaangɛisia kpɛlɛɛ loli.

¹⁷Ti bobani gbɔugbɔu wa wuilɔ ngi ma, ti ngaali huvɛlɛ a bɔlei, ti njei a ngi wui kititi tɛɛ Maha-bɔlɛi mia.

¹⁸Kɛ ti tɔtoonga a ngi gbafala tɛɛ, “Hooyoo, Juubleisia ti Mahɛi!”

¹⁹Ti yɛlɔ a ngi wumba lewe a ngulii, ta ndayɛi wu ngi ma, ta wombi gbakpa ngi gɔwɔbu.

²⁰Kia ti kpɔyɔni a ngi gbafala, ti bobani gbɔugbɔi gbuailɔ ngi ma, ti ngi nda lomɛi wu ngi ma. Kɛ ti gbuanga a ngie kɔɔ ti li ti ngi gbakpa krɔsii ma.

²¹ Ti taamɔ yila maleilɔ pelei hu ngi laa a Saimɔn, Alɛksanda kɛɛ Rufɔsi ti kɛkɛ, a gbua Sairini. Sojeisia ti kpɔndailɔ ngi ma liva a Yesu krɔsii.

²²Ti liilɔ a Yesu hinda yila ta na loli a Gɔlgɔta, yee mbui mia a “Ngugoko.”

²³Na lɔ ti ndoe veni na ngi wɛ ngahupungɔ a hale kpalɛi yahaava kɛɛ ii lumani aa kpɔle.

²⁴ Na wooma sojeisia ti Yesu gbakpailɔ krɔsii ma, ti kpɔyɔ gɔ ngi magulɛisia va, numu gbi i na wumbu i paani.

²⁵Ngenda volei lɛngɔ yɛla ti Yesu gbakpani.

²⁶Nyamui na ti ngi gbakpani fa, ti nyɛilɔ gbembele-gɛkɛlɛi ma ti kpakpa ngi wukɔɔ tɛɛ, “Juubleisia ti Mahɛi.”

²⁷Ti humablaa fele bɛɛ gbakpailɔ tia Yesu-ni, yeengila i ngi yejahu, yeena i ngi gɔwɔhu. [

²⁸ Hii i wieni kɛ Ngewɔ layie na nyɛingɔ ngi Gɔlɛi hu yɛ, “Ti ngi gbawailɔ taa jumbubleisia” i longa ma.]

²⁹ Nungei nasia ti yɛ lewe ti yɛlɔ a yɛlɛ ta ti wui vivii, ta Yesu yɛli tɛɛ, “Ɛ-hɛɛ! Bɛɛ gɛ ba Ngewɔ Wɛlei wololɔ, bi too njii sawa goohu!

³⁰Bia yekpe bawo na bi gbua krɔsii ma.”

³¹Hii lɔɔ Saagbuablaa Waawaisia tia Sawei Yeekaamɔisia ti yɛ nde ti nyɔunyɔ ma tɛɛ, “I nungaa wekeisia bawoilɔ kɛɛ ɛɛ gu aa ta yekpe bawo.

³²Mu Ngewɔ Maha Heingɔi lɔ lɛɛ, Isrɛl Mahɛi, i gbua na krɔsii ma i hitɛ, kɛ mu langa a ngie!” Nasia feleisia bɛɛ ti taa teini gbakpani ti tɔtoilɔ a ngi yɛlila.

³³A fologundiei kpindi i wɛleilɔ ndɔlei na hu gbi hawa sawa va.

³⁴ Yeehawa sawei gbɔyɔmɛi, Yesu i yele gulailɔ a ngoo waa yɛ, “Ilɔi, Ilɔi, Lama Sabaktani?” yeembui lɔ a “Nya Yewɔɛi, nya Yewɔɛi, gbɛe bi gbuanga nya woohu?”

³⁵Nungei nasia lɛɛngaa ti yɛ na ti mɛnilɔ, kɛ ti ndenga tɛɛ, “A wolo lɛɛ, taa Ilaija lolima!”

³⁶Ti yilayee i liilɔ i njavɔɛfɔɛ-hani lɔmbu ndɔ lagbangɔi hu, i ngua ngulu guhɛi ya, i tɛ Yesu lɛi gama yɛ, “A mawulo! Mu tɔ lɛɛ ina Ilaija lɔ wama i ngi gbua krɔsii ma!”

³⁷Yesu i yele wa gulailɔ, kɛ i haanga.

³⁸Kɛ kula kpɔtukpɔtu wai na i yɛ hɛlɛni Ngewɔ Wɛlei bu i blanga ndia, a gbua yeemahui i too yeembui.

³⁹Sojei na i yɛ looni krɔsii gulɔ, kia i Yesu haayii lɔni, i ndeilɔ yɛ, “Ngewɔ Hindoloi vulii lɔ wɔɔ a taamɔi ji!”

⁴⁰Nyahangaa lɛɛngaa ti yɛlɔ na, ti looni kuhama ta na gbe. Meri Magdalamɔi i yɛlɔ ti lia kɛɛ Meri, Jemisi yeekuloi ta Josɛfi ti nje, kɛɛ Salomi.

⁴¹Ti yɛlɔ a too Yesu wooma watii lɛ i yɛ Galili, ta gbɔ ngi ma. Nyaha gboto wekangaa tia Yesu-ni ti wani Jelusalɛm ti yɛlɔ na tia bɛɛ.

⁴²Foloi i yɛ gulamaa Josɛfi Arimatiamɔi i foni. Kotii lebleisia yeebamayee yila mia wɔɔ a ngie, tawao i yɛlɔ a Ngewɔ mahayɛi walei mawulo; (Foloi na ma lɔ wɔɔ nungaa ta ti magbatɛ Ndɛvu Volei houva), faale Josɛfi i liilɔ a ndiilo Paileti gama i Yesu womɛi huvɛli ngi ma.

⁴³

⁴⁴I gualɛilɔ Paileti ma mɛniva kɛ Yesu i haanga bɛɛ. I sojeisia ti gulɔmɔi lolilɔ i ngi mɔli ina Yesu i haanga hugutungɔ.

⁴⁵Kia sojeisia ti gulɔmɔi i gonani, kɛ Paileti i ndenga yɛ Josɛfi i li i pomɛi wumbu.

⁴⁶Josɛfi i liilɔ i kasangei yeya, i pomɛi gbua krɔsii ma, i mbeembee yeekasangei hu, i nda kambɛi na hu ti mblani fawei yakama. Na wooma i kɔtu lakpa wa gilikililɔ i kambɛi laagbɔwu la.

⁴⁷Meri Magdalamɔi kɛɛ Meri, Josɛfi ngi nje ti yɛlɔ a na bɛɛ tawao ti miando lɔilɔ ti Yesu lani na.