Read Ngowili Yekpei Numu Kpɛlɛɛ Va MAAKI 2 Bible Online

MAAKI 2 - Ngowili Yekpei Numu Kpɛlɛɛ Va bible

MAAKI 2

¹Folo lɛɛngaa wooma kia Yesu i yamani Kapaniɔm, yeetɔwɔi i vayɛilɔ hu tɛɛ taa pɛlei bu.

²Kɛ numu gboto wa ti yandɔnga, na hii numu loma gbi ii yɛ ya na pɛlei la vulii bɛɛ, tawao Yesu i yɛlɔ a Ngewɔ yiɛi le ti ma.

³Kɛ ti waa ngi gama a kpɔɔkpɔmɔ yila, numu naani ti looni ngi bu.

⁴Kɛɛ kia tii guni a fola Yesu gbla fahii gbotoyii va, kɛ ti pɛlei wumba gbuanga Yesu mahui, ti kpɔɔkpɔmɔi yei mboomɛi hu a yeendowei na hu wee.

⁵Kia Yesu i nungei nasia ti layii lɔni a ngie, kɛ i ndenga kpɔɔkpɔmɔi ma yɛ, “Nya loi, bi jumbuisia ti kafainga bi ma.”

⁶Sawei Yeekamɔɛisia lɛɛnga ti yɛ heini na ti tia yekpe mɔlilɔ nɛmahu,

⁷tɛɛ, “Gbɛe taamɔi ji i yɛpɛma hii? Ngewɔ yɛlila lɔ a ji! Ye lɔ a gu a manula jumbubleisia ma kɛlee Ngewɔ yakpe?”

⁸Yesu i kilii nasia gɔɛilɔ ngama ti yɛ pie nɛmahu, kɛ i ti mɔlinga yɛ, “Gbɛe wu kili bondɛi nasia wiema?

⁹Yeegbɔɔ bɛwɛbɛwɛngɔ ndeva kpɔɔkpɔmɔi ji ma, ‘Bi jumbuisia ti kafainga,’ ɔɔ ‘Hiye bi bi bomɛi wumbu bi jia’?

¹⁰Kɛɛ ngi kɛmaa a wue kɛ kpaya lɔ numui na wɛ Nuuvu Hindoloi le dunyei hu manuva jumbuisia ma.” Kɛ i ndenga kpɔɔkpɔmɔi ma yɛ,

¹¹“Ngɛɛ bi ma, hiye, bi bi bomɛi wumbu, bi li bi yeekuwuhu.”

¹²Kɛ kpɔɔkpɔmɔi i hiyenga, i ngi bomɛi wumbu yakpe ti gbi yama, i gbua fulo. Numui gbi ti wuhu i wuilɔ hulewengɔ, ti Ngewɔ lato tɛɛ, “Wɔɔ gba muii ya ji nyɔkɔ hulɔni.”

¹³Yesu i yamɛilɔ gbɔma Galili Wopei gblanga, kɛ numu vaha wa ti wanga ngi gama, kɛ i tɔtonga a ti gaala.

¹⁴Na wooma kia i yɛ lewema kɛ i Livai lɔnga, Afiɔs hindoloi, i heini kɔnjɔ wɔyɔmɛi. Kɛ Yesu i ndenga ngi ma yɛ, “To nya wooma.” Kɛ Livai i hiyenga i to ngi ma.

¹⁵Na wooma Yesu yɛlɔ mɛhɛɛ mɛma Livai yeepɛlɛbu. Pawa wɔyɔblaa gboto kɛɛ jumbubleisia ti yɛlɔ a to ngi wooma, tawao ti gbotoma ti heilɔ mɛhɛɛ mɛmɛi tia Yesu-ni kɛɛ ngi gaalopoisia.

¹⁶Sawei Yeekaamɔi nasia Farisiisia a tie, kia ti tɔni Yesu tia jumbublaa kɛɛ pawa wɔyɔblaa ta mɛhɛɛ mɛ, kɛ ti ngi gaalopoisia mɔlinga tɛɛ, “Gbɛe Yesu tia numu bondɛi nasia ta mɛhɛɛ mɛ?”

¹⁷Kia Yesu i humɛnini, kɛ i ndenga ti ma yɛ, “Nasia heegbɛ gbi ii ti ma tii gbeweni halemɔ va, kɛlee nasia ti heegbɛngɔ; ngii wani pɔɔnableisia loliva, kɛlee jumbubleisia.”

¹⁸Jɔn, Nguamɔi, kɛɛ Farisiisia ti woomableisia ti yɛlɔ a sui hou; faale nungaa ti wailɔ ti Yesu mɔli tɛɛ, “Gbɛe Jɔn kɛɛ Farisiisia ti woomableisia ta sui hou kɛɛ bia bi ndɛisia tɛɛ su hou?”

¹⁹Kɛ i ti mɔlinga yɛ, “Wu lii a yɛlɔ nasia ma nyaha jɔmɔi a ti loli nyaha gɔli gɔmɛi hu guva a su houla ji lɛ ta yɛ ngi gɔwɔma? Ina lekee nyaha jɔɔmɔi lɔ ti lia, tɛɛ su hou.

²⁰Kɛɛ watii a hitilɔ nyaha gɔlimɔi a gbua ti yeya; yeewatii na mia ta sui hou.

²¹Numu gbi ɛɛ ndoma wova lombo a kula nina; i piengaa, kula ninɛi a ndoma wovei lewelɔ ma i gbua la na kɛ mblamɛi i wɔlɔnga.

²²Numu gbi ɛɛ ndɔ nina wu hua-kɔlɔ goko wova hu; i piengaa, ndɔi a kokoi blalɔ, kɛ ndɔi tia kokoi ti jukulunga. Sao! Ndɔ ninɛi a wu koko niinangaa lɔ hu.”

²³ Ndɛvu Volo yila ma Yesu taa ngi gaalopoisia ti yɛlɔ jiama a pelei nyɔi na ta fuka ta mɔ a bledii yeekpalɛi hu; kɛ ngi gaalopoisia ti tɔtonga a nyɔi yalela ta mɛ.

²⁴Kɛ Farisiisia ti ngi mɔlinga tɛɛ, “Gbɛe bi gaalopoisia ti mu jawei nyanima kɔlooni Ndɛvu Voloi ma?”

²⁵ Kɛ Yesu bɛɛ i ti mɔlinga yɛ, “Wuii ya kaani wɔɔ gbɔɔ Mahɛi Devidi pieni ji hani gbi ii yɛ taa ngi woomableisia yeya tawao ndɔlɛ wa i ti ma,

²⁶ ji i wuani Ngewɔ vɛli wɛlɛi bu watii na Abieta i yɛni a Saagbuablɛisia ti gulɔmɔ wai, i bledii na mɛ fengɔ Ngewɔ wɛ, na numu gbi ɛɛ mɛ kɛlee Saa Gbuablɛisia lekee, i yama i fe ngi woomableisia wɛ ti mɛ?”

²⁷Kɛ i ndenga na ti ma yɛ, “Ndɛvu Volei i gbatɛni nuuvu gbekpeya va lɔ, nuuvu ii le aa gbatɛ Ndɛvu Volei va.

²⁸Faale, numui na Nuuvu Hindoloi a ngie, ta lɔ Ndemɔ a ngie Ndɛvu Volei vulii bɛɛ mahu.”