Read Ngowili Yekpei Numu Kpɛlɛɛ Va MAAKI 3 Bible Online

MAAKI 3 - Ngowili Yekpei Numu Kpɛlɛɛ Va bible

MAAKI 3

¹Yesu i wuailɔ gbɔma Juubleisia ti hɛɛ wɛlei bu, kɛɛ taamɔ yila i yɛlɔ na ngi lokoi bengɔ.

²Nungaa lɛɛnga ti yɛlɔ na ta Yesu yabɛɛ tɔva ina a yeetaamɔi bawolɔ Ndɛvu Volei ma, aako ti nyamu lo ngi ma.

³Yesu i yeetaamɔi lolilɔ yɛ, “Gbua mbei kulɔ.”

⁴Kɛ i nungeisia mɔlinga na yɛ, “Gbɔɔ mu jawei i lumani mu wɛ pieva Ndɛvu Volei ma? Kpɔma wieva ɔɔ numu gbalɛva? Numu lɛɛvui bawova ɔɔ nyaniva?” Njɛpɛ gbi ii gbuani ti la.

⁵Kɛ Yesu i yama jianga ti gbi ma a ndiilewe, ngi lii nyaningɔ ti woohugbɔndɛi va; kɛ i ndenga taamɔi ma yɛ, “Bi lokoi lambo.” Kɛ i taambonga, mbawongɔ.

⁶Kɛ Farisiisia ti gbuanga ti hɛɛ wɛlei bu, ti wuhitɛ ngama tia Hɛlɔd mableisia, ti hinda hula ngi waava.

⁷Yesu tia ngi gaalopoisia ti gbuɛilɔ ti li Galili Wopei la, kɛ faha lakpa wa ti tonga ngi ma ta gbua Galili lɔlei goohu kɛɛ Judia,

⁸kɛɛ Jelusalɛm kɛɛ Idumia lɔlei kɛɛ Jɔdan yɛi wooma, kɛɛ Taya tia Saidɔn yeetateisia hu. Yeefaha lakpa wai ji ti wailɔ ajifa ti hindei nasia mɛnini i yɛ pie.

⁹Jifa fahii hulewengɔ yɛla, Yesu i ndeilɔ ngi gaalopoisia ma yɛ ti njaya-lɛndɛ yila mahou i ngi mawulo kɔɔ fahii aa ngi gbɔnda.

¹⁰Jifa i numu gboto bawoni, nasia gbi heegbɛ yɛ ti ma ti yɛlɔ a nungaa lukpe-lukpe aako ti foo ngi ma, ti jaa a ngie.

¹¹Kɛɛ watii gbi lekee nasia ngafa nyamuisia ti yɛ ti hu ti Yesu lɔnga, ti yɛ gulalɔ ngi gɔwɔbu, ta yelei gula tɛɛ, “Ngewɔ Hindoloi lɔ a bie!”

¹²Kɛɛ i yɛ ndalɔ yeengafa nyamuisia yeya a kpaya yɛ ta ngi hinda hugɛ a numu gbi.

¹³Na wooma Yesu i lɛilɔ ngiyei hu, i nasia loli ngi longɔ yɛla a tie, kɛ ti wanga ngi gama.

¹⁴Kɛ i ti puu mahu fele wɔyɔnga kɔɔ ti yɛ ngi ma fɔ, a ti lo tateisia hu ngi wowili yekpei leva nungaa ma,

¹⁵tawao yɛ ta kpaya majɔlɔ ngafa nyamuisia gbuava nungaa hu.

¹⁶Nasia i ti wɔyɔni tia lɔ: Saimɔn (na Yesu i ngi laaheini gbɔma a Pita);

¹⁷kɛɛ Jemisi kɛɛ ngi ndewei Jɔn, Jɛbidi leengeisia; (Yesu i ti laheilɔ a Boanajis, yeembui a “Ngeleyiawoi Ngɔngɛisia”;)

¹⁸kɛɛ Andru kɛɛ Filipi kɛɛ Batɔlɔmiu kɛɛ Matiu kɛɛ Tɔmɔsi kɛɛ Jemisi, Afiɔs loi, kɛɛ Tadiu kɛɛ Saimɔn ndɔlɔ hinda madi houmɔi,

¹⁹kɛɛ Judasi Kɛriɔtmɔi, na kɛlɛmɛi i Yesu veni.

²⁰Kɛ Yesu i ya ngi yeekuwuhu. Kɛ faha wa i gbɔma yandɔnga na hii Yesu tia ngi gaalopoisia tii guni a mɛhɛɛ vulii mɛla.

²¹Kia ngi bondeisia ti humɛnini, ti liilɔ ngi makpava ajifa nungaa ti yɛlɔ a nde tɛɛ, “Ngi wui gbuanga ngi wumba.”

²² Sawei Yeekaamɔi nasia lɛɛngaa ti gbuani Jelusalɛm ti yɛlɔ a nde tɛɛ, “Biɛlsibu mia i ngi hu! Ngafa nyamuisia ti mahɛi na mia a kpayei na ve ngi wɛ ngafa nyamuisia gbuava nungaa hu.”

²³Kɛ Yesu i ti lolinga pɛlei bu i nde ti ma salengaa hu yɛ, “Seitana a yee gu i ta yekpe gbua nungaa hu?

²⁴Ndɔlɔ yakpei hubleisia ti blangaa ti gɔ a ti nyɔunyɔ, yeendɔɔlɛi na a gulalɔ.

²⁵Mbonda yakpei hubleisia ti blangaa ti gɔ luahu, yeembondei na ɛɛ gbekpe.

²⁶Faale, Seitana luahu i gɔlɛngaa, i gɔ a ta yekpe, ɛɛ gu aa gbekpe, a gbɔyɔlɔ.

²⁷Numu gbi ɛɛ gu aa wua kpayamɔ yeepɛlɛbu aa na gapu, kɛlee a kpayamɔi na yili pɛiŋ; na lekee lɔ a wie i gu i yeepɛlei na bu gapu.”

²⁸“A tɔnya, ngɛɛ wu ma, Ngewɔ a manulɔ jumbu gbi ma nuuvungaa ta pie kɛɛ njia nyamu gbi ta nde Ngewɔ ma.

²⁹ Kɛɛ numu gbi lekee a Ngewɔ Yafei bɛlɛ nyani, Ngewɔ ɛɛ manu ngi ma fɔ, tawao yeejumbui a lo ngi ma lɔ kunafɔ.”

³⁰Yesu i ji leilɔ ajifa nungaa lɛɛngaa ti yɛlɔ a nde tɛɛ, “Ngafa nyamui lɔ ngi hu.”

³¹Na wooma Yesu ngi nje kɛɛ ngi ndewehingeisia ti wɛilɔ ti lo ngitii ya, ti numu lo ngi gama ngi loliva.

³²Kɛɛ faha yɛlɔ heini ti ngi galangɔ; kɛ ti ndenga ngi ma tɛɛ, “Kafai lɛ, bi nje tia bi ndewehingeisia lɔ bi lolima ngitii ya.”

³³Kɛ i potenga yɛ, “Ye lɔ nya nje le kɛɛ nya ndewehingeisia?”

³⁴Kia i yama jiani nasia gbi ma ti yɛ heini ti ngi galangɔ, kɛ i ndenga yɛ, “Nya nje tia nya ndewehingeisia gbe!

³⁵Numu gbi lekee a Ngewɔ liima hindei wie ta lɔ nya ndewehindoi le kɛɛ nya ndewenyahaloi kɛɛ nya nje.”