Read Ngowili Yekpei Numu Kpɛlɛɛ Va MAAKI 4 Bible Online

MAAKI 4 - Ngowili Yekpei Numu Kpɛlɛɛ Va bible

MAAKI 4

¹ Yesu tɔtoilɔ gbɔma a nungaa gaala Galili Wopei gbla. Faha lakpa wa ti ngi magbindilɔ, kɛ i wilinga ndɛndɛ yila hu i hei njɛi ya, fahii gbi ti ngiyei ma njɛi gbla.

²Kɛ i ti gaanga a hinda gboto dɔmii hu yɛ,

³“A wolo nya ma! Kpala yengemɔ yila i liilɔ wɔɔ tuhani galei valima ngi gbalei hu.

⁴Kia i yɛ falima kɛ tɛngaa i gulanga pele galei ma, kɛ ŋɔningɛisia ti ngɔyɔnga ngama.

⁵Yeepekeisia ti gulailɔ fawa lɔlɔmɛi mia pɔlɛi yɛngɔ yɛla fɛlɛfɛlɛ fawei ya, kɛ ti valenga hugutungɔ.

⁶Kɛɛ kia foloi i lɛni, i gbandi, kɛ ti logbonga, ti ha, ajifa pɔlɔ yekpe ii yɛ na hapiisia ta yei hu.

⁷Tuhani galei lɛɛngaa i gulani ngaali lɔlɔmɛi lɔ, kɛ ngaali i wɔpɔnga, i tuhani magboli na hii yeetuhanii ii gbekpeni.

⁸Tuhani galei yeemɔnii i gulani ndɔlɔma yekpei lɔ ma, i wɔpɔ, i wua kpoto, tɛngaa numu gbɔyɔngɔ mahu puu, tɛngaa numu sawa gbɔyɔngɔ, tɛngaa hɔndɔɔ yila.”

⁹Kɛ i ndenga ti ma yɛ, “Numui na ngoli i ngi ma njia mɛniva; i wolo ji ma.”

¹⁰Kia fahii i vayani, nasia lɛɛngaa ti yɛ ngi woma tia ngi gaalopo puu mahu feleisia ti ngi mɔlilɔ kɔlooni dɔmiisia ma.

¹¹Kɛ i ndenga ti ma yɛ, “Ngewɔ mahayɛi yɛyii na hulɔwungɔ wɔɔ, Ngewɔ i huvulonga wu gama. Kɛɛ yeenasia wua tieni ii le, ta hindei gbi mɛni dɔmii hu lɔ;

¹² aako ‘Ti kpee kaka kɛɛ tɛɛ tɔ, tawao ti wolo kaka kɛɛ tɛɛ mbugɔɔ, aako tɛɛ wounve ti jumbuisia ma Ngewɔ aa manu ti ma.’ ”

¹³Kɛ i ti mɔlinga yɛ, “Wuii dɔmii ji yeembui gɔɔ? Wa yee na hɔɔ gu wu dɔmii gbi bugɔɔ?

¹⁴Tuhani galɛ valimɔi mia a numui na a Ngewɔ wowili yekpei le.

¹⁵Tuhani galei nasia ta gula pele galei ma tia mia a nungei nasia ta Ngewɔ yiɛi mɛni, kɛ Seitana i wanga yakpe i kpua ti lii hu.

¹⁶Kaalɛi nasia ti gulani fawa lɔlɔmɛi tia mia a nungei nasia ta Ngewɔ yiɛi mɛni, ti mbumbu a kohunɛ;

¹⁷kɛɛ ɛɛ yei panda ti lii hu, tawao ta houlɔ mba watii wulo va. Kɛɛ ji lekee kpundɛ ɔɔ juwuya a hiye kɔlooni yeengoowili ma, kɛ ti gbenga ma ngama.

¹⁸Tuhani galei nasia ti gulani ngaali hu tia mia a nungei nasia ta Ngewɔ yiɛi mɛni,

¹⁹kɛɛ dunyei yeendiihɛlɛma hindeisia kɛɛ kpatɛi yeenɛnɛi kɛɛ hani wekeisia yeemanii i ti liisia laavenga, i Ngewɔ wowili gboli, kpekpeya gbi ɛɛ gbua hu.

²⁰Kɛɛ tuhani galei yeenasia ti gulani ndɔlɔma yekpei ma, tia mia a nungei nasia ta Ngewɔ yiɛi mɛni, i wua ti lii hu, ti wua kpotongɔ, tɛngaa numu gbɔyɔngɔ mahu puu, tɛngaa numu sawa gbɔyɔngɔ, tɛngaa hɔndɔɔ yila.”

²¹ Kɛ i ti mɔlinga yɛ, “Numu gbi a lambo lolɔnga pɛlei bu i ngua busɛ bu ɔɔ kpukɔ? Ɛɛ tɛ haaka yalɛngɔ ya?

²² Hinda gbi lekee ndɔwungɔ ma a gɛlɔ, tawao na gbi lekee mawɛɛngɔ a gbualɔ foofo ya.

²³Ina ngoli lɔ numu gbi ma njia mɛniva, i wolo ji ma!”

²⁴ Kɛ i ndenga gbɔma ti ma yɛ, “A wolo na ma wu mɛnima! Kitii na wa tewe nungaa wekeisia ma, yeekitii na lɔ Ngewɔ a tewe wu ma, tawao a matolɔ.

²⁵ Numui na hani i ngi yeya, mato a velɔ ngi wɛ; kɛɛ numui na hani ii ngi yeya, na wuloi bɛɛ a yɛ ngi yeya ta kpualɔ ngi yeya.”

²⁶Kɛ i ndenga ti ma yɛ, “Ngewɔ mahayɛi yɛyii gbuangɔe a numui na a tuhani galei wu ngi gbalei hu.

²⁷Yeenumui na a yii lɔ a kpindi, a wu a folo, na hu gbi tuhani na a vale, a ndawa gbua, yeenumui ii maluvei na wayii gɔɔ kulo bɛɛ.

²⁸Tuhani a gbua pɔlɛi hu lɔ, haala yeefalei, na wooma yeengulii, kɛlɛmɛi yeenguɛi.

²⁹ Kɛɛ tuhani gbɔu-gbelei i hitingaa kɛ tuuhanimɔi i ngi magbatɛnga teweva ajifa tuhani lewe-gbelei i hitinga.”

³⁰Kɛ Yesu i mɔlinga yɛ, “Ma Ngewɔ mahayɛi yɛyii huma gbɔɔ ma, ɔɔ dɔmii yeegbɔɔ ma kpua fasaiva?

³¹Kpuangɔe a tuhani galɛ mumu na ta loli a mɔstadi, mumungɔ tewengɔ tuhani galɛ gbi ma dunya,

³²kɛɛ ti hiingaa i lakpa, a lewelɔ tuhani gbi ma, i mbeke waawaa gbua na hii ŋɔningɛisia ta tei lo hu.”

³³I Ngewɔ yiɛi leilɔ nungaa ma a dɔmii jisia nyɔkɔ kpoto kia ti yɛ gu a yeembui gɔla.

³⁴Ii yɛpɛni ti gama dɔmii wooma, kɛɛ tia ngi gaalopoisia lekee ti ma i gelengaa wɔɔ, a yeedɔmiisia fasailɔ ti ma.

³⁵A kpɔkɔi na, ji foloi i gulani, i ndeilɔ ngi gaalopoisia ma yɛ, “A wa mu li Popɛi wooma.”

³⁶Kɛ ti fahii longa, ti wili ndɛndɛi na hu i yɛ heini hu, tawao yeendɛndɛi tia pekangaa yɛla.

³⁷Kɛ vivii wa i gulanga ti ma, nja gateisia ta wili ndɛndɛi hu, kɛ njɛi lɔ ndɛndɛi lavema.

³⁸Yesu i yɛ laanilɔ ngi wui piloi ma i njii hu ndɛndɛi yeengotomɛi. Kɛ ngi gaalopoisia ti ngi wunga tɛɛ ngi ma, “Kaamɔ, mu jukulula ii gbeweni bi ma?”

³⁹Yesu i wuilɔ, i hiye, i lo, i gbandɛ vivii la, i nde Popɛi ma yɛ, “Bi maa i yɛ louŋ!” Kɛ vivii hu i lewenga ngama, hu gbi i yɛ louŋ.

⁴⁰I ti mɔlilɔ na yɛ, “Gbɛe wa luwa? Wuii lani a Ngewɔ?”

⁴¹Kɛ nduwa wa i ti huvenga, ti tɔtoo a ti nyɔunyɔ mɔlila tɛɛ, “Ye lɔ hɔɔ a taamɔi ji, vivii vulii bɛɛ kɛɛ gboyei ta golo ngi wɛ?”