Read Ngowili Yekpei Numu Kpɛlɛɛ Va MAAKI 5 Bible Online

MAAKI 5 - Ngowili Yekpei Numu Kpɛlɛɛ Va bible

MAAKI 5

¹Yesu tia ngi gaalopoisia ti Galili Wopei leweilɔ ti foo Gɛlasa lɔlei hu.

²Kia i gbuani ndɛndɛi hu, taamɔ yila, ngafa nyamu i ngi hu, i gbuailɔ kambajɛi hu i wa ngi gama.

³Yeetaamɔi i yɛ fɔ kambajɛi hu lɔ tawao numu gbi ii yɛ ya gu aa jɔwɔ gula ngi ma;

⁴ajifa ti lɛmbilɔ kpotoma ngi lokoisia kɛɛ ngi gɔwɔisia huyilima kɛɛ i yɛlɔ yeejɔwɔisia hugbɛnyɛ. Ngi gbayangɔ wa yɛla na hii numu gbi ii yɛ gu ngi ma.

⁵Watii gbi lekee, a folo kɛɛ kpindi, i yɛlɔ a lewetewe kambajɛi hu kɛɛ ngiyeisia wumba, a yelei gula, a ta yekpe ŋɔnaŋɔna a kɔtiisia.

⁶Kia i Yesu lɔni kuhama kɛ i ya a piimɛ i wombi gbakpa ngi gɔwɔbu,

⁷i nde yele wa hu yɛ, “Gbɛe bi loko wilima nya mahinda hu, Yesu, bia Ngewɔ Lɛngɔ Wai Hindoloi? Pie Ngewɔ va baa tɔɔya la nya ma!”

⁸I ji leilɔ ajifa Yesu i yɛ ndeni yɛ, “Bia ngafa nyamui, gbua taamɔi ji hu!”

⁹Faale, Yesu i ngi mɔlilɔ yɛ, “Bi lɛi?” Kɛ taamɔi i kpɛmbonga yɛ, “Nya la a Fahawa ajifa mu vahangɔ wa le!”

¹⁰I yɛlɔ a Yesu manɛnɛ yɛ aa yeengafa nyamuisia gbɛ tatei na hu.

¹¹A yeekpemɛi na ndondɛ vaha wa ti yɛlɔ na gbla, ta mɛli ngiyei yakama.

¹²Faale yeengafa nyamuisia ti Yesu manɛnɛilɔ tɛɛ, “Mu yoyo ndondɛngɛi nasia gama mu wua ti hu.”

¹³Yesu i lumɛilɔ ti wɛ, kɛ ti gbuanga taamɔi hu ti wua ndondɛngɛisia hu. Kɛ yeendondɛngɛisia gbi, ti gungɔ a tauji fele, ti ngiyei yeinga a piimɛ waa, ti wili popɛi hu, ti lo hu.

¹⁴Yeendondɛngɛisia ti mahugbeblɛisia ti wimɛilɔ ti li, ti yeevei ji gɛ tei hu kɛɛ tatei na hu gbi, kɛ nungeisia ti wanga tɔva gbɔɔ i wienga.

¹⁵Tawao ji ti foni Yesu ma, ti taamɔi na lɔilɔ ngafa nyamu gboto wai i ngi hu wɔɔ. I yɛ heilɔ na, ngi mayilingɔ, ngi bawongɔ; kɛ ti gbi ti luwanga.

¹⁶Kɛ nasia ti hulɔni ti hugɛnga a nungaa gbɔɔ i wienga taamɔi gama kɛɛ ndondɛngɛisia.

¹⁷Faale, ti Yesu manɛnɛilɔ tɛɛ i gbua ti nda latei na hu.

¹⁸Kia Yesu i yɛ wilima ndɛndɛi hu kɛ taamɔi na ngafeisia ti yɛ ngi hu i ngi manɛnɛnga yɛ, “Kɔnɛɛ le, mua bie mu li.”

¹⁹Kɛɛ Yesu i mawalilɔ, i nde ngi ma yɛ, “Yama bi yekuwuhu bi bondeisia gama bi hugɛ a tie gbɔɔ Ndemɔi i pienga bi gama kɛɛ kpekpeyei na i pienga a bie.”

²⁰Faale, taamɔi i lilɔ, i jia taa puii nasia kpɛlɛɛ hu, a hugɛ a nungaa gbɔɔ Yesu i pienga ngi wɛ tawao nasia gbi ti humɛnini ti wuhu i wuilɔ.

²¹Kia Yesu taa ngi gaalopoisia ti gbɔma Popɛi leweni ndɛndɛi hu, faha wa ti ngi magbindilɔ njɛi laa.

²²Kɛ hɛɛ wɛlɛ yila yeemahumɔi, ngi la a Jailɔs, i wa i gula Yesu gɔɔbu,

²³i ngi manɛnɛ gbouŋ yɛ, “Nya nyahalo wuloi lɔ haama. Wa hee, bi loko wɛlɛ ngi ma i bawo, aa ha.”

²⁴Kɛ Yesu tia Jailɔs ti tɔtonga a lila, faha wa ti Yesu magbindingɔ.

²⁵Nyapo yila i yɛlɔ na nyaha-heegbɛi i ngi ma foo puu mahu fele va;

²⁶kia bɛɛ i mɔnɛ gboto hulɔngɔ a jiala haleblaa gboto mahu ngi haleva tawao i ngi yeya-hani gbi majianga, ɛɛ bawo tawao heegbɛi a nyamu lekee ngi ma.

²⁷Yeenyapoi ji i wilanga a Yesu wiehindeisia humɛnila, faale, i wɛilɔ fahii hu a Yesu wooma wee,

²⁸a nde nɛmahu yɛ, “Ngi jangaa lekee bɛɛ a ngi malomɛi, nga bawolɔ.”

²⁹I jaalɔ a Yesu malomɛi kɛ ŋamɛi hu i lewenga ngama, ta vulii i kɔɔ gahu kɛ heegbɛi na i bawonga ngi ma.

³⁰Yesu i kɔɛilɔ ngama kɛ kpaya i gbuanga ngi hu, faale, i woteilɔ fahii gama i mɔli yɛ, “Ye lɔ jaani a nya malomɛi?”

³¹Ngi gaalopoisia ti kpɛmboilɔ tɛɛ, “Bia vulii bia fahii lɔma ti gijɛma bi ma; gbɛe ba mɔli ye lɔ jaani a bie?”

³²Kɛɛ Yesu i yɛlɔ a yama jia fahii ma aako i numui na lɔ i jaani a ngie.

³³Nyapoi i yɛ kɔɔlɔ gbɔɔ i wienga ngi gama, faale i wɛilɔ, ngi ma a gbɛli a nduwɛi, i wombi gbakpa Yesu gɔwɔbu, i tɔnyɛi hugɛ.

³⁴Yesu i ndeilɔ ngi ma yɛ, “Nya loi, bi lalɛi a Ngewɔ i bi bawonga; li ndiilɛli hu hoe, bi bawonga fɔ.”

³⁵Yesu i loni yɛpɛmaa nyapoi gama kɛ tutuisia ti gbuanga Jailɔs yeepɛlɛbu ti nde ngi ma tɛɛ, “Bi nyahaloi i hanga; baa gbɔma Kaamɔi liihɛlɛ.”

³⁶Yesu ii gbeweni na va ti ndeni, faale i ndeilɔ hɛɛ wɛlei mahumɔi ma yɛ, “Baa luwa, la lekee a Ngewɔ.”

³⁷Ii lumani numu gbi aa to ngi ma kɛlee Pita Kɛɛ Jemisi kɛɛ ngi ndewei Jɔn.

³⁸Kia ti foni Jailɔs yeepɛlɛbu, Yesu tɔilɔ na yawotengɔ, faha wa ta wɔɔ.

³⁹Kɛ i wuanga i nde ti ma yɛ, “Gbɛe mbei yawotengɔ hii? Gbɛe wu wɔɔma? Ndoi ji hangɔ ii le njii mia i piema!”

⁴⁰Ti tɔtoilɔ a ngi gbafala, faale i ti gbi gbɛlɔ yɛ ti gbua, i ndoi ngi kɛkɛ wumbu kɛɛ ngi nje kɛɛ ngi gaalopo saweisia ti wua lomui na hu ndopoi i yɛ laani na.

⁴¹Kɛ Yesu i hounga ndopoi lokoi ma i nde ngi ma yɛ, “Talita Kumi,” yeembui lɔ a “Nyahalo wuloi, ngɛɛ bi ma, hiye!”

⁴²Kɛ ndopoi i hiyenga ngama i tɔtoo a jiala pɛlei bu. (Ngi voi i yɛ puu mahu fele.) Kia ji wieni, nungaa gbi ti wuhu i wuilɔ kpu.

⁴³Kɛɛ Yesu i ti laahilɔ kpaukpaungɔ yɛ taa hugɛ a numu gbi, i yama i nde ti ma yɛ, “A ngi gɔ a mɛhɛɛ.”