Read Ngowili Yekpei Numu Kpɛlɛɛ Va MAAKI 6 Bible Online

MAAKI 6 - Ngowili Yekpei Numu Kpɛlɛɛ Va bible

MAAKI 6

¹Yesu i gbuailɔ mia i li ngi yeetaahu, Nasalɛti, tia ngi gaalopoisia.

²Ndɛvu Volei ma i tɔtoilɔ a nungaa gaala ti hɛɛ wɛlei bu. Numu gboto ti yɛlɔ na, tawao kia ti njɛpɛi kpɛlɛɛ mɛnini i ndeni, ti wuhu i wuilɔ gbouŋ tɛɛ, “Mi lɔ taamɔi ji i nɛmahulewe bondei ji jɔni na kɛɛ kpayei kabande hindeisia wieva?

³Kapindɛi ya ji, Meri loi, Jemisi kɛɛ Josɛfi kɛɛ Judasi kɛɛ Saimɔn ti ndewei, tawao mua ngi ndewe-nyahaleengeisia ii le mua yɛ mbei?” Kɛ ti gbelenga ngi ma.

⁴ Yesu ndeilɔ ti ma yɛ, “Bagɔma lɔ Ngewɔ lutui ma hinda gbi kɛlee ngi lemɛi kɛɛ ngi bondeisia lia.”

⁵Yesu ii guni aa kabande hinda gboto wie na, kɛlee lekee i loko wɛlɛni heegbɛbla sɛkɛngɔ ma, i ti bawo.

⁶I gualɛilɔ wa Yesu ma ji nungei jisia tii lani a ngie. Kɛ i ya fulei nasia hu ti na galangɔ, a nungeisia gaa.

⁷Yesu i ngi gaalopo puu mahu feleisia lolilɔ na i ti lo a felefele. I kpaya veilɔ ti wɛ ngafa nyamuisia gbuava nungaa hu,

⁸ i nda ti yeya a kpaya yɛ, “Waa li a mɛhɛɛ gbi ɔɔ kpafa ɔɔ navoo yeejiɛi ji hu kɛlee tikpɔi lekee.

⁹A sipasii wua gɔwɔhu kɛɛ waa li a ndoma fele.”

¹⁰Kɛ i gbɔma ndenga ti ma yɛ, “Hinda gbi ta loko hei wu bu na, a lo yeepɛlei na bu haaŋ wu gbua yeetei na hu.

¹¹ Hinda gbi wu li na tii loko heilɔ wu bu ɔɔ tɛɛ wolo wu ma, a fufulei gbukpulɛ wu gɔwɔi ma, wu gbua na. Na a yɛlɔ a ndahii ti gama!”

¹²Na wooma ti liilɔ ti ngowili yekpei le tɛɛ nungaa ti wounve ti jumbuisia ma.

¹³ Ti ngafa nyamu gboto gbuailɔ nungaa hu, ta ngulɔi jia heegbɛbla gboto ma ta ti bawo.

¹⁴ Mahɛi Hɛlɔd i ji kpɛlɛɛ mɛnilɔ ajifa Yesu malɔwɔi vayangɔ yɛla hu gbi. Nungaa lɛɛngaa ti yɛlɔ a nde tɛɛ, “Jɔn Nguamɔi mia i vulunga gbɔma! Famia kabande hindei jisia ti wiema.”

¹⁵Yeepekeisia tɛɛ, “Ilaija mia.” Pekeisia tɛɛ, “Tutui mia kia Ngewɔ lutui yeengilaye yɛ wɔɔ na.”

¹⁶Kia Hɛlɔd i Yesu hinda humɛnini, i ndeilɔ yɛ, “Jɔn, Nguamɔi, mia; ngi pieilɔ ti ngi wui lewe nga, kɛɛ i vulunga gbɔma.”

¹⁷ Gbɛva Hɛlɔd vulii lɔ i yɛ ndeni ti Jɔn hou, ti jɔwɔi gula ngi ma, ti ngi wu kpindiwɛlei bu. Hɛlɔd i ji wieni Hɛlɔdias va lɔ, ngi ndewei Filipi nyahɛi na i kpuani ngi yeya, tia ta ti hei.

¹⁸Jɔn Nguamɔi, i yɛlɔ a nde Hɛlɔd ma yɛ, “Ii wɔnani bi va bi ndewei nyahɛi yɛva a bi nyaha!”

¹⁹Faale kia Hɛlɔdias i mɛnini, i loloilɔ wa a Jɔn, ngi longɔ i ngi waa, kɛɛ ii guni Hɛlɔd va.

²⁰Hɛlɔd luwangɔ yɛla Jɔn ma ajifa i yɛ kɔɔlɔ kɛ Jɔn yɛni a numu wɔnangɔ lɔ tawao ngi vengɔ Ngewɔ wɛ, faale i yɛlɔ a ngi mahugbe aako hinda nyamu aa ngi wie. Ngi longɔ yɛla a wolola Jɔn ma kia bɛɛ ngi lii i yɛ jɛɛjialɔ wa watii gbi wɔɔ Jɔn i yɛpɛngaa.

²¹Kɛlɛmɛi Hɛlɔdias liimɛi i wieilɔ. Hɛlɔd le-volei lɔ i hitini kɛ i komɛ wa gulanga gɔvimɛntiblɛisia va kɛɛ sojei yeetokulɔisia kɛɛ Galili yeenumu waawaisia.

²²Kɛ Hɛlɔdias nyahaloi i wuanga komɛ-wɛlei bu, i looli i nɛɛ Hɛlɔd wɛ kɛɛ ngi hoteisia gbi. Kɛ Hɛlɔd i ndenga yeendopoi ma yɛ, “Gbɔɔ bi longɔ ngi bi mawaa la? Hani gbi lekee bi longɔ la nga felɔ bi wɛ.”

²³Hɛlɔd i jondiilɔ kpoto yɛ, “Nya vootɛ, hani gbi lekee bi nya mɔlinga fa, nga felɔ, i yɛ bɛɛ a nya lɔlei yeemblangɔ ndia!”

²⁴Kɛ ndopoi i gbuanga i li i ngi nje mɔli yɛ, “Gbɔɔ bi longɔ ngi nde Hɛlɔd i fe nya wɛ?” Kɛ ngi nje i kpɛmbonga yɛ, “Li bi nde bɛɛ bi longɔ a Jɔn, Nguamɔi, wui.”

²⁵Ndopoi i yamɛilɔ kaakaa Mahɛi Hɛlɔd gama yɛ, “Nya longɔ bi nya gɔ yakpe a Jɔn, Nguamɔi, ngi wui i laani pletii hu!”

²⁶Ji i Mahɛi lii nyanilɔ hulewengɔ gbo kɛɛ ii guni aa ganga lahei na va i mbumbuni ngi hotangɛisia kpɛlɛɛ yaama.

²⁷Faale i soja yila loilɔ ngama yɛ i li i wa a Jɔn wui. Sojei i gbuɛilɔ, i li kpindiwɛlei bu, i Jɔn wui lewe nga;

²⁸kɛ i wanga la pletii hu i fe ndopoi wɛ, ndopoi bɛɛ i fe ngi nje wɛ.

²⁹Kia Jɔn gaalopoisia ti ji humɛnini, ti wailɔ ti ngi womɛi wumbu, ti kpɔwu.

³⁰Tobleisia ti yamailɔ Yesu gama, ti gona a na gbi ti pieni kɛɛ kai na ti kɛni.

³¹Nungaa ti gbotongɔ wa yɛla, ta wa, ta li, na hii Yesu taa ngi gaalopoisia tii watii jɔni mɛhɛɛ vulii mɛva. Faale Yesu i ndeilɔ ti ma yɛ, “A mu li mia mua lekee mu ma a gele na, mu lɛɛvu kulo.”

³²Kɛ ti wilinga ndɛndɛi hu ti Galili Wopei lewe, ti li mia na ya louŋ.

³³Na hu gbi numu gboto ti ti lɔilɔ ti pelei hou tawao ti ti gɔɛilɔ ngama, faale nungaa ti gbuɛilɔ tei kpɛlɛɛ hu, ti li a piimɛ a ngiyei ma wee ti hulewe Yesu tia ngi gaalopoisia gulɔ.

³⁴ Kia Yesu i gbuani ndɛndɛi hu, i yeefaha wai ji lɔilɔ, kɛ ti mamamau i ngi lɔnga, ajifa ti wiengɔ yɛla kia mbalangɛi nasia ti na ti mahugbemɔ ii na. Faale i tɔtoilɔ a ti gaala a hinda gboto.

³⁵Kia foloi i yɛ gulama, ngi gaalopoisia ti wailɔ ngi gama tɛɛ, “Foloi yeingɔ wa le na tawao ndɔgbɔ lamba ma lɔ a mbei.

³⁶Nde nungei jisia ma ti li mbei gbla vulɛisia hu ti mɛhɛɛ yeya ti mɛ.”

³⁷Yesu i poteilɔ yɛ, “Wua vulii a ti gɔ a mɛhɛɛ.” Kɛ ti ngi mɔlinga tɛɛ, “Bi longɔ hɔɔ mu li mu ngengemɔ pawɛi ngalu wayakpa va yeya a mɛhɛɛ aako mu ti gɔ?”

³⁸Kɛ Yesu i ti mɔlinga yɛ, “Bledii gbuha lolɛ mia i wu yeya? A li wu na gbe.” Kia ti na gbeeni kɛ ti ndenga ngi ma tɛɛ, “Bledii gbuha lɔɔlu kɛɛ nyɛɛ fele.”

³⁹Kɛ Yesu i ndenga ti ma yɛ ti pie nungaa gbi ti hei tiwa ma kpiti wundii hu.

⁴⁰Nungaa bɛɛ ti heilɔ tiwa ma, tɛngaa numu hɔndɔɔ yila, tɛngaa numu nuu fele gbɔyɔngɔ mahu puu.

⁴¹Kɛ Yesu i bledii gbuha lɔɔlui wumbunga kɛɛ nyɛɛ felei, i ngelema gbe, i siɛgbua Ngewɔ ma. I bledii yaingailɔ, i fe ngi gaalopoisia wɛ yɛ ti kɔlɛkɔlɛ. Hii i pieni a nyɛi felei na bɛɛ, ti kɔlɛkɔlɛ nungaa ma.

⁴²Numui na gbi ti mɛhɛɛi na mɛilɔ ti goo i ve.

⁴³Kɛ ngi gaalopoisia ti bledii kɛɛ nyɛi yeengaingaingɔi yeemɔnii wumbunga, i samba puu mahu fele laavengɔ.

⁴⁴Hingeisia lekee ti mɛhɛɛi na mɛni ti yɛ tauji lɔɔlu.

⁴⁵Na wooma Yesu i pieilɔ ngi gaalopoisia ti wili ndɛndɛi hu yakpe, ti li ngi gulɔ tei na hu ti yɛ toli a Bɛtsaida, Galili Wopei wooma, ta i lo kpɔkɔ veva fahii wɛ.

⁴⁶Kia i kpɔkɔ veni nungaa wɛ, i lɛilɔ ngiyei hu Ngewɔ vɛliva.

⁴⁷Kia kpindi i wɛlɛni, ndɛndɛi maguhangɔ yɛla Popɛi lia, tawao ta yakpe lɔ i yɛ ngiyei ma.

⁴⁸I tɔilɔ kɛ njɛi wulilaa gbɔungɔ wa le ngi gaalopoisia la ajifa fɛfɛi wotengɔ yɛla ti mahu. Yeengewohui na, Yesu i wailɔ ti gama a jia njɛi ya. Ngi lii yɛlɔ ma leweva ti ma.

⁴⁹Kɛɛ kia ti ngi lɔni a jia Popɛi ya, ti giliilɔ tɛɛ ndɔumɔi mia, kɛ ti yelei gulanga;

⁵⁰ajifa ti gbi ti luwɛilɔ ji ti ngi lɔni. Kɛɛ Yesu i yɛpɛilɔ ngama ti gama yɛ, “Nya mia! A wu lii gba. Waa luwa.”

⁵¹I wililɔ ndɛndɛi hu ti gama kɛ fɛfɛi hu i lewenga. Ngi gaalopoisia ti wuhu i wuilɔ hulewengɔ,

⁵²ajifa tii Yesu yɛyii gɔni i numu tauji lɔɔlu gɔni a mɛhɛɛ wulo bondei na, ajifa ti woohu gbɔndangɔ yɛla.

⁵³Ti Galili Wopei leweilɔ a Gɛnisalɛt gakei ma wee, ti ndɛndɛi yili na.

⁵⁴Kia ti yɛ gbuama ndɛndɛi hu, nungeisia ti Yesu gɔɛilɔ ngama.

⁵⁵Faale ti liilɔ a piimɛ tatei na hu gbi, ta wa ngi gama a heegbɛbleisia ngalɛisia ma, mia lekee ti mɛningaa kɛ ta na.

⁵⁶Hinda gbi Yesu i lini na, taa wa hu ɔɔ fuula wulo ɔɔ tateisia hu nungaa ti yɛ lilɔ a ti heegbɛbleisia njɔpɔwahuisia, ta ngi manɛnɛ tɛɛ i luma yeeheegbɛbleisia ti ja a ngi malomɛi yeengoliyɛi lekee bɛɛ. Tawao nasia gbi ti jaani la ti bawoilɔ.