Read Ngowili Yekpei Numu Kpɛlɛɛ Va MAAKI 8 Bible Online

MAAKI 8 - Ngowili Yekpei Numu Kpɛlɛɛ Va bible

MAAKI 8

¹Hu ii guhani na wooma, faha wa weka ti yandɔɛilɔ ngi gama. Kia mɛhɛɛ gbi ii yaa yɛ ti yeya, Yesu i ngi gaalopoisia lolilɔ i nde ti ma yɛ,

²“Nungei jisia ti mamamau i nya lɔnga ajifa mua tieni lɔ na lɔwɔ sawa va tawao mɛhɛɛ ii yaa ti yeya.

³Ngii ti gɔilɔ a mɛhɛɛ ngi ti vayangaa liva ti yeekuwuhuisia ta gelulɔ pelei hu ajifa ti lɛɛnga ti hiyemɛi guhangɔ.”

⁴Ngi gaalopoisia ti ngi mɔlilɔ tɛɛ, “Ndɔgbɔ lambɛi ji ma mindo lɔ numu a mɛhɛɛ jɔɔ na i gu a numui ji gbi?”

⁵Yesu i ti mɔlilɔ yɛ, “Bledii gbuha lolɛ lɔ i wu yeya?” Kɛ ti kpɛmbonga tɛɛ, “Bledii gbuha wɔfla.”

⁶Kɛ i ndenga yɛ fahii ti hei kpitii ya. I bledii gbuha wɔflei wumbuilɔ, i siɛgbua Ngewɔ ma, i ngaingai, i fe ngi gaalopoisia wɛ kɔlɛkɔlɛva fahii ma, kɛ ti kɔlɛkɔlɛnga.

⁷Nyɛɛ mumu sɛkɛngɔ bɛɛ i yɛlɔ ti yeya. Yesu i siɛgbuɛilɔ Ngewɔ ma yeenyɛi ji bɛɛ va, i pie ngi gaalopoisia ti kɔlɛkɔlɛ.

⁸Numui gbi ti mɛhɛɛi na mɛilɔ ti goo i ve. Ti gungɔ yɛla a numu tauji nani. Kɛ ngi gaalopoisia ti bledii kɛɛ nyɛi yeengaingaingɔi yeemɔnii wumbunga, i samba wɔfla laave. Na wooma Yesu i pieilɔ fahii ti vaya.

¹⁰Yesu taa ngi gaalopoisia ti wililɔ ndɛndɛ yila hu ngama, ti njɛi lewe ti li Dalmanuta lɔlei hu.

¹¹ Farisiisia ti wailɔ Yesu gama ti tɔtoo a ngi houla a mawali. Ti longɔ yɛla ti ngi hugɔɔ, faale ti ndeilɔ ngi ma tɛɛ i kabande hinda wie kɛva kɛ Ngewɔ gbayei lɔ ngi hu.

¹² Kɛɛ Yesu gbailɔ, i nde ti ma yɛ, “Gbɛe wua wu foloi ji ma nungeisia wa mani kabande hinda ma? Sawo, gbɛɛ ngi hugɛ a wue, tɔmaseli bondei na ɛɛ ve wu wɛ!”

¹³I ti loilɔ, i yama ndɛndɛi hu, tia ngi gaalopoisia ti tɔtoo a njɛi lewela.

¹⁴Yesu gaalopoisia ti lemailɔ a wala a bledii; bledii gbuha yakpe mia i yɛ ti yeya ndɛndɛi hu.

¹⁵ Yesu i ngi gaalopoisia laahilɔ kpaukpaungɔ yɛ, “A wu mahugbe a Farisiisia ti yisti kɛɛ Hɛlɔd yisti.”

¹⁶Kaalopoisia ti tɔtoilɔ a yɛpɛla luahu tɛɛ, “I ji lemaa ajifa bledii ii mu yeya.”

¹⁷Yesu kɔɛilɔ gbɔɔ ti ndema, famia i ti mɔlini yɛ, “Gbɛe wu yɛpɛma kɔloongɔ bledii vɛli ma? Wuii ya njɛpɛi ji yeembui gɔni? Hii wu woohu gbɔndangɔ?

¹⁸ Gbɛe ngaamɛi i wu ma kɛɛ wuɛɛ hinda lɔ? Gbɛe ngolii i wu ma kɛɛ wuɛɛ njia mɛni?

¹⁹Ii loni wu nɛmahu, ji ngi bledii gbuha lɔɔli yaingaini numu tauji lɔɔlii va? Yee ngaingaingɔi i mɔnuni samba lolɛ wu mbumbuni?” Kɛ ti kpɛmbonga tɛɛ, “Puu mahu fele.”

²⁰Kɛ i gbɔma ti mɔlinga yɛ, “Ji gbɔma ngi bledii gbuha wɔflei yaingaini numu tauji nani va, samba lolɛ mia wu mbumbuni ndavengɔ a yeengaingaingɔi yeemɔnii?” Kɛ ti kpɛmbonga tɛɛ, “Wɔfla.”

²¹Kɛ i ti mɔlinga na yɛ, “Na hu gbi, wuii yaa njɛpɛi na yeembui gɔni?”

²²Yesu taa ngi gaalopoisia ti wailɔ Bɛtsaida, kɛ nungaa lɛɛngaa ti wanga a pumumɔ yila Yesu gama ti ngi manɛnɛ jaava a ngie.

²³Yesu i pumumɔi lokoi houilɔ, i gbua a ngie tei hu, i ndayɛi vali ngi yamɛisia ma, i jaa a yeengamɛisia, i ngi mɔli yɛ, “Biaa hani gbi lɔma?”

²⁴Kɛ taamɔi i ngi wui wumbua i tɛ yɛ, “Mmm, nyaa nungaa lɔma kia ngulungaa, ta jia.”

²⁵Yesu i gbɔma loko wɛleilɔ taamɔi yamɛisia ma. Kia i ngi lokoi wumbuni, taamɔi i fofoi hugbeilɔ tiŋ, ngi yamɛi bawongɔ, a hani gbi lɔ gbalauŋ.

²⁶Yesu i ndeilɔ ngi ma yɛ i li ngi yee kɛɛ i ngi lahiilɔ pɛiŋ kpaukpaungɔ yɛ, “Ba yama gbɔma fulei ji hu.”

²⁷Na wooma Yesu taa ngi gaalopoisia ti liilɔ fulei nasia hu ti yɛ Siisaria Filipai gbla. Ji ti yɛ pelei hu, i ti mɔlilɔ yɛ, “A hugɛ lɛɛ a nge, nungaa tɛɛ ye lɔ a nge?”

²⁸ Ti kpɛmboilɔ tɛɛ, “Nungaa lɛɛngaa tɛɛ Jɔn, Nguamɔi, mia a bie, yeepekeisia tɛɛ Ilaija, pekeisia gbɔma tɛɛ Ngewɔ lutuisia yilayee.”

²⁹ Yesu i ti mɔlilɔ yɛ, “Ɔɔ wua, wɛɛ ye lɔ a nge?” Pita i kpɛmboilɔ yɛ, “Ngewɔ Maha Heingɔi lɔ a bie.”

³⁰Kɛ Yesu i ti lahinga kpaukpaungɔ yɛ, “Waa nya hinda hugɛ a numu gbi.”

³¹Na wooma Yesu i tɔtoilɔ a ngi gaalopoisia gaala yɛ, “Numui na Nuuvu Hindoloi le, kpalɛ gboto a lalɔ ngi ma tawao kpakoleisia kɛɛ Saagbuablaa Waawaisia kɛɛ Sawei Yeekaamɔisia ta gbelelɔ ngi ma. Nungaa ta ngi waalɔ kɛɛ lɔwɔ sawa wooma a vululɔ i hiye.”

³²I ji hugɛilɔ a tie gbalauŋ. Famia Pita i gbuailɔ a ngie nasia lia i tɔtoo a lumbela ngi la.

³³Kɛɛ Yesu i woteilɔ i ngi gaalopoisia gbe, i gbandɛ Pita la yɛ “Hiye mbɛ! Seitana. Ajifa kilii na bi piema ii gbuani Ngewɔ gama kɛlee nuuvu!”

³⁴Kɛ Yesu i fahii lolinga kɛɛ ngi gaalopoisia i nde ti ma yɛ, “Numui na ngi longɔ i to nya wooma, i gbele ngi liima hindeisia ma, tawao i Krɔsii wumbu, i wa mu li.

³⁵ Ajifa numui gbi lekee ngi longɔ i ngi lɛɛvui mabawo, a baalɔ la, kɛɛ numui gbi lekee a baa a ngi lɛɛvui nya va kɛɛ Ngowili Yekpei, a ngi lɛɛvui mabawolɔ.

³⁶Gbɛ nafa lɔ numu a majɔɔ kia bɛɛ a dunyei gbi lɔ majɔɔ kɛɛ i ba a ngi lɛɛvui?

³⁷Hani gbii na yeenumui aa gu a felaa ngi lɛɛvui va.

³⁸Numui na a wufe a nya hindei kɛɛ kaa na ngi kɛma, jumbu volei ji ma tawao Ngewɔ gɔla ii na, numui na Nuuvu Hindoloi le a wufelɔ ngi hinda ma watii na a wa a Kɛkɛi gbaya wai tia ngi gayema malikeisia.”