Read Ngowili Yekpei Numu Kpɛlɛɛ Va MAAKI 9 Bible Online

MAAKI 9 - Ngowili Yekpei Numu Kpɛlɛɛ Va bible

MAAKI 9

¹Yesu i liilɔ gulɔma a ngi yɛpɛi yɛ, “Gbɛɛ ngi hugɛ a wue, nungaa lɛɛngaa lɔ mbei tɛɛ haa i lo hu ti Ngewɔ mahayɛi lɔ i wa a kpaya wa.”

² Lɔwɔ weita wooma Yesu i Pita wumbuilɔ, kɛɛ Jemisi kɛɛ Jɔn tia tieni ti lɛ ngiye guha yila hu, tia lekee ti ma i gele na. Ti loilɔ Yesu gbema kɛ i maluvenga ti yaama.

³Ngi magulɛi i goleilɔ fofo, a voo dauŋ, kolengɔ i lewe nuuvu gula wuangɔ gbi ma.

⁴Kɛ kaalopo saweisia ti Ilaija lɔnga kɛɛ Mojisi tia Yesu-ni ta yɛpɛ.

⁵Pita i yɛpɛilɔ Yesu gama yɛ, “Kaamɔ, nyandengɔ wa le mu mbei; gbɛɛ mu bafa sawa lo, yeengila bi va, yeena i Mojisi va, yeepekei i Ilaija va.”

⁶Pita tia ngi mbaangɛisia ti luwɛilɔ wa, na hii ii yɛ vuii kɔɔ gbɔɔ a nde.

⁷Kɛ lugbu wa i yeinga, i ti magboli, kɛ ngoo i gbuanga yeelugbui na hu yɛ, “Nya liima Hindoloi lɔ, a wolo na ma a nde.”

⁸Ngaama kaalopoisia ti yaama jiɛilɔ hu gbi kɛɛ tii yaa numu weka lɔni kɛlee Yesu yakpe i yɛ ti gbla.

⁹Kia ti yɛ ngiyei yeima Yesu i ti laahilɔ kpɔtukpɔtu yɛ, “Na wu hulɔnga waa hugɛ a numu gbi kɛlee watii na Nuuvu Hindoloi a hiye pɛiŋ hee hu.”

¹⁰Ti goleilɔ ngi lahii na bu, kɛɛ tia lekee ti ma i gelengaa wɔɔ, ti yɛ lalilɔ yeenjɛpɛi na ma tɛɛ, “Gbɔɔ hiyelei ji le hee hu?”

¹¹ Kɛ ti Yesu mɔlinga tɛɛ, “Gbɛe Sawei Yeekaamɔisia tɛɛ Ilaija a wa pɛiŋ?”

¹²Kɛ i kpɛmbonga yɛ, “Ilaija yese vulii i wama aako i hindei gbi hugbatɛ. Na hu gbi gbɛe Ngewɔ Gɔlɛi ndeni yɛ kpalɛ gboto a lalɔ Nuuvu Hindoloi ma tawao ta gbelelɔ ngi ma?

¹³Gbɛɛ ngi hugɛ a wue kɛ Ilaija i wilanga a walaa tawao nungaa ti ti liimɛi lɔ wieni a ngie kia Ngewɔ Gɔlɛi i ndeni la kɔloongɔ ngi ma.”

¹⁴Kia Yesu taa ngi gaalopo saweisia ti wani yeepekeisia gama, ti faha wa maleilɔ ti galangɔ. Sawei Yeekaamɔisia lɛɛngaa ta ti hou a mawali.

¹⁵Ji nungeisia ti Yesu lɔni, i gualɛilɔ wa ti ma, ti li a piimɛ ti va ngi ma.

¹⁶Yesu i ngi gaalopoisia mɔlilɔ yɛ, “Gbɔɔ wua tieni wu yeemawalii houma fa?”

¹⁷Taamɔ yila i yeefahii na hu i kpɛmboilɔ yɛ, “Kaamɔ, Nya hindoloi mia ngi wanga a ngie bi gama ajifa ngafa nyamu lɔ ngi hu, ngi mumungɔ.

¹⁸Kpema gboto i ngi gulangaa, a ngi gulalɔ ndɔmɛi, kɔkɔɛi a gbua ngi la, a ngi yɔngɔlii yaamɛ, a lata. Ngi ndeilɔ bi gaalopoisia ma ngɛɛ ti yeengafei gbua ngi hu kɛɛ tii guni.”

¹⁹Yesu i ndeilɔ ti ma yɛ, “Wua wu nungei jisia, wuii lani kpa a Ngewɔ! Nga yee lɛmbi wu lia? Nga yee lɛmbi nya lii houma wu va? A wa a ndopoi nya gama.”

²⁰Ti wɛilɔ a ndopoi ngi gama. Kia lekee ngafei i Yesu lɔni kɛ i ndopoi gulanga, ndopoi i gula ndɔmɛi, a gendebele, kɔkɔɛi a gbua ngi la.

²¹Kɛ Yesu i ngi kɛkɛ mɔlinga yɛ, “Ji i yee lɛmbinga ngi ma?” Taamɔi i kpɛmboilɔ yɛ, “I hiye wɔɔ ngi lopongɔihu ma.

²²Watii gbotoma yeengafa nyamui a yɛ lolɔ i ngi waa ajifa a ngi wililɔ ngɔmbui ya kɛɛ njɛi hu. Ina ba gulɔ kɛ manu mu ma bi gbɔ mu ma.”

²³Kɛ Yesu i ndenga yɛ, “Gbɔɔ bi lii i ma ina nga gulɔ? Numui na ngi langɔ a Ngewɔ a gulɔ a hinda gbi wiela.”

²⁴Ngama kɛ ndopoi ngi kɛkɛ i wɔlɔnga yɛ, “Nya langɔe a Ngewɔ kɛɛ kulo hii. Gbɔ nya ma ngi la panda a ngie!”

²⁵Yesu i lii heilɔ ma kɛ fahii lɔ lɛma ti ma, faale i gbandɛilɔ ngafa nyamui laa yɛ, “Bia bi mumu yafa woohu lutungɔi ji, gbua hiilopoi ji hu tawao kunafɔ baa gbɔma wua ngi hu!”

²⁶Ngafei i yelei gulailɔ, i ndopoi gula nyamungɔ wa, i gbua ngi hu. Ndopoi wiengɔ yɛla kia pomɛi na tawao numu gboto ti ndeilɔ tɛɛ i haanga.

²⁷Kɛɛ Yesu i ngi lokoi houilɔ i ndala kulo kɛ ndopoi i hiyenga, i lo.

²⁸Kia Yesu i lini pɛlei bu taa ngi gaalopoisia lekee, ti ngi mɔlilɔ tɛɛ, “Gbɛe mua muii guni a ngafa nyamui na gbuala ndopoi hu?”

²⁹Yesu i kpɛmboilɔ yɛ, “Ngewɔ vɛlila lekee lɔ a gu a ngafa nyamui yeeji gbuala numu hu; gbɛogbɛ weka ɛɛ gu.”

³⁰Yesu tia ngi gaalopoisia ti gbuɛilɔ mia ti Galili lɔlei voo. Ii yɛ loni numu gbi i ngi yɛma gɔɔ,

³¹ajifa i yɛ ngi gaalopoisia lɔ gaama; i hugɛilɔ a tie yɛ, “Ta Nuuvu Hindoloi houlɔ ti ngi ve nungaa wɛ, yeenungei nasia ti ngi wa. Na hu gbi, lɔwɔ sawa wooma, a vululɔ i hiye.”

³²Kɛɛ tii kai ji yeembui gɔni tawao ti luwɛilɔ a ngi mɔlila.

³³Ti foilɔ Kapaniɔm tawao kia ti wuani pɛlei bu Yesu i ngi gaalopoisia mɔlilɔ yɛ, “Gbɔɔ wu yɛ yeendablei wie pelei hu?”

³⁴ Kɛɛ tii lumani taa ngi mɔli gbɛmbo ajifa ti yɛlɔ a mawali hou kɔloongɔ numui na ma numu wai le ti lia.

³⁵ Yesu i heilɔ, i kaalopo puu maahu feleisia loli i nde ti ma yɛ, “Numu gbi lekee ngi longɔ i yɛ a haalamɔ, i ta yekpe wu pɛiŋ kɛlɛmɛi, i wote a numui gbi ti boilopo.”

³⁶Kɛ i ndopo wulo yila wumbunga i ngi lo ti gulɔ. I yeendopoi guluilɔ yakahu i nde ti ma yɛ,

³⁷ “Numu gbi lekee a loko hei ndeengɛi jisia nyɔkɔ yeengila bu nya va, i loko heini nya lɔ bu; tawao numu gbi lekee a loko hei nya bu, ii loko heini nya yaangɔ bu, i loko heini nya lomɔi bɛɛ lɔ bu.”

³⁸Kɛ Jɔn i ndenga ngi ma yɛ, “Kaamɔ, mu numu yila lɔilɔ a ngafa nyamuisia gbua nungaa hu bi biyei hu kɛɛ mu ndeilɔ ngi ma muɛɛ i gbe ajifa mua tieni ii le.”

³⁹Yesu ndeilɔ ti ma yɛ, “Waa ngi mabali, ajifa numu gbi lekee a kabande hinda wie a nya gbayei ɛɛ gu i wote fulo i njia nyamu le nya va.

⁴⁰ Ajifa numu gbi lekee ii gɔma a mue i mu va lɔ.

⁴¹ A la a tɔnyɛi ji ngi ndema, numu gbi a wu gɔ a nja kpɔleva ajifa Kristi woo a wue, a ngi pawɛi majɔlɔ huɛɛŋ.”

⁴²“Numui na a pie jisia mumuisia yeengila bɛɛ i gbe a lala a nge, fesangɔ ti ngai-gɔtii wa hɛlɛ yeenumui na boloma ti ngi wili gboyei hu.

⁴³ Faale bi lokoi piengaa bi gbe a lala a Ngewɔ, tewe bi kpua na! Fesangɔ bi li ngelegoohu a toko yila kia toko fele aa lo bi ma bi li jahama, ngɔmbui na hu ɛɛ lufe. [

⁴⁴Mia ‘kpolii nasia ta ti mɛ tɛɛ haa tawao ngɔmbui na a ti mɔ ɛɛ lufe kunafɔ.’]

⁴⁵Bi gɔwɔi i piengaa bi gbe a lala a Ngewɔ, tewe bi kpua na! Fesangɔ bi li ngelegoohu a kɔwɔ yila kia kɔwɔ fele aa lo bi ma bi li jahama. [

⁴⁶Mia ‘kpolii nasia ta ti mɛ tɛɛ haa tawao ngɔmbui na a ti mɔ ɛɛ lufe kunafɔ.’]

⁴⁷ Bi yaamɛi piengaa bi gbe a lala a Ngewɔ, kpua na! Fesangɔ bi wua Ngewɔ mahayɛi hu a ngaama yila kia ngaama fele aa lo bi ma bi wili jahama,

⁴⁸ mia ‘kpolii nasia ta ti mɛ tɛɛ haa tawao ngɔmbui na a ti mɔ ɛɛ lufe kunafɔ.’

⁴⁹“Ajifa ta numui gbi golelɔ a kpolei na i yɛni a ngɔmbui.

⁵⁰ “Kpolei yekpengɔe; kɛɛ kpolei i bangaa a ngi nɛi, ba yee pie i nɛɛ gbɔma? Ndiamɔyɛi yeekpolei i yɛ wu hu, wu yɛ heini ndiilɛli hu.”