Read Ngowili Yekpei Numu Kpɛlɛɛ Va LUKI 11 Bible Online

LUKI 11 - Ngowili Yekpei Numu Kpɛlɛɛ Va bible

LUKI 11

¹Folo yila ma, Yesu yɛlɔ a hɛɛ hinda yila. Kia i kpɔyɔni, kɛ ngi gaalopoisia yeengila ndia ngi ma yɛ, “Ndemɔi, mu gaa kɔ mu kɔɔ gbɔ ma nde ji ma yɛ hɛma, kia Jɔn i yɛ a ngi nda gaalopoisia ti gaa.”

²Kɛ Yesu ndia ti ma yɛ, “Wu ya hɛma, wa jilɔ le: ‘Mu Kɛkɛ: Bagɔɔma i yɛ bi biyei ma; Bi mahayɛi i wa.

³Mu gɔ a folo gbi a mu wuma mɛhɛɛ.

⁴Bi manu mu ma mu jumbuisia va, kia ma manu nasia ma ta hinda nyamuisia wie a mue. Kɛɛ baa pie ta li a mue mia ta mu gɔlɛ na.’ ”

⁵Kɛ Yesu ndia ngi gaalopoisia ma yɛ, “Yelɔ i wu lia a li ngi ma ndiamɔ gama a kpindi liɛi kɔ i nde ngi ma yɛ, ‘Ndiamɔ, nya ja a bledii gbuha sawa.

⁶Gbamaile, nya ndiamɔ yila a hiye jiahu i waa sange nya yepɛla, kɛɛ mɛhɛɛ gbi na ngi va!’

⁷Kɛ ina na bi ndiamɔi i poteilɔ kohu yɛ, ‘Ba nya vawɔi! Pɛɛ gbɔwungɔi naa, tawao nya lenga lɔ lani njiihu. Ngɛ ya gu a hiyela kɔ ngi haka gbi ve bi wɛ.’

⁸Gbɔɔ bi gilingɔ la a pie? Ngi nde bi ma kɛ ina bɛɛ ii guni aa hiye kɔ i bledii ve bi wɛ ajifa bi ndiamɔ mia a ngie, kɛɛ a hiyelɔ kɔɔ hakei na gbi bi longɔ la i fe bi wɛ ajifa bi nɔɔnga ngi ma, bɛɛ wufe a ngi mɔli la.”

⁹“Faale, ngi nde wu ma, A fɛli wie, wa majɔlɔ; a kɔkɔli, wa tɔlɔ; a pɛlei laalewe, a lawolɔ wu wɛ.

¹⁰Gbamaile numu gbi lekee a fɛli wie, a majɔlɔ; numui na a kɔkɔli, a tɔlɔ; pɛlei a lawolɔ numui na wɛ a ndalewe.

¹¹Kɛkɛi yeegbɛ lɔ i wu lia a kali ve ngi loi wɛ ji a nyɛɛ vɛli ngi ma?

¹²Ɔɔ a kekema ve ngi wɛ ji a tɛɛyalu vɛli?

¹³Ina kia bɛɛ wu hinda nyamungɔ wu hani yekpengaa gɔɔlɔ feva wu leengeisia wɛ, wu Kɛkɛ na i aijɛnɛ ngi bɛɛngɔ wa le tewengɔ wu ma a Ngewɔ Yafei vela nasia wɛ ta ngi vɛli!”

¹⁴Na wooma Yesu i yɛlɔ ngafa nyamu mumungɔ gbuama taamɔ yila hu; tawao kia ngafa nyamui i gbuani, taamɔi i tɔtoilɔ a yɛpɛla kɛ fahii gbi ti wuhu i wunga.

¹⁵ Kɛɛ ti lɛɛnga ti ndeilɔ tɛɛ, “Ngafa nyamuisia ti mahɛi, Biɛlsibu, tamia a kpayei na ve ngi wɛ ngafa nyamuisia gbuava nungaa hu.”

¹⁶Pekeisia ti longɔ yɛla ti Yesu gaande, faale ti ndeilɔ ngi ma tɛɛ i kabande hinda wie kɛva kɛ Ngewɔ lɔ ngi wooma.

¹⁷Kɛɛ Yesu i kilii na gɔɛilɔ ti ye pie, faale i ndeilɔ ti ma yɛ, “Ndɔlɔ gbi i blani, yeehubleisia ta gɔ a ti nyɔunyɔ, yeendɔlɛi a lombolɔ, tawao mbonda yila hubleisia ti gɔ a ti nyɔunyɔ, ta gulalɔ.

¹⁸Faale Seitana mahayɛi luahu i gɔlɛngaa, yeehubleisia ta gɔ a ti nyɔunyɔ, a yee gu a gbekpela? Wua ndema wɛɛ nga ngafa nyamuisia gbualɔ ajifa Biɛlsibu a kpaya ve nya wɛ pieva.

¹⁹Ina hii nga ti gbua nungaa hu, wu nungeisia ta yee ti gbua? Wu gbɔugbɔu nungeisia ta selilɔ kɛ wu wɔlanga!

²⁰Sawo, Ngewɔ gbayei lɔ nga ngafa nyamuisia gbua la nungaa hu, tawao ji kɛilɔ kɛ Ngewɔ Mahayɛi i wilanga a walaa wu gama.

²¹“Watii na kpayamɔi a yɛ ngi wɛlei mahugbema, ndapi-hani gbi i ngi yeya, ngi jɔhanisia ti mabawongɔ a yɛla.

²²Kɛɛ ngi maleema i gbundɛnga ngi ma, i ngi yili, a ndapi hani nasia houlɔ kpayamɔi lii i yɛ looni ma, i pɛlei bu gapu.

²³ “Numui na gbi ii nya va, i gɔmalɔ a nge; numu gbi ii gbɔma nya ma tɛvaa ma, i fayama.

²⁴“Ngafa nyamui i gbuanga numui hu, a jɛsialɔ ndɔlɔ hubengɔi hu, a hinda gɔkɔli heiva na. Ii na lɔilɔ, a ndelɔ ta yekpe ma yɛ, ‘Nga yamalɔ nya wɛlei bu.’

²⁵Faale a yamalɔ, i yeepɛlei male na yilangɔ fo, na gbatɛngɔ panda.

²⁶A gbualɔ i li i wa a ngafa wɔfla wekanga, ti nyamungɔ tewengɔ ta vulii ma, tia tieni ti hei na. Na wiengaa, yeenumui na yɛyii a yɛ nyamuni i lewe tɔtomɛi ma.”

²⁷Kia Yesu i kpɔyɔni a ji lela, nyapo yila i yɛpɛilɔ ngeleya fahii lia i nde ngi ma yɛ, “Nyahɛi na i bi leni, i bi nyini, ngi lubangɔe!”

²⁸Kɛɛ Yesu ndeilɔ yɛ, “Tɔnya le, kɛɛ nasia ta Ngewɔ yiɛi mɛni, ti golo mbu, ti lubɛi i leweni na ma.”

²⁹Kia fahii i yɛ gbotoma, i tɔtoilɔ a ndela yɛ, “Hablɛi jisia ti nyamungɔ wa le; ti wɔɔma kabande hinda lɔ va kɛɛ tɛɛ majɔɔ kɛlee kabande hindei na i Jona wieni.

³⁰Kia lɔɔ wɔɔ Ngewɔ lutui Jona i yɛni a tɔmaseli Ninivɛblɛisia gama, hii lɔɔ Nuuvu Hindoloi a yɛ a tɔmaseli hablɛisia gama.

³¹Kpɛmbo-volei ma kuna, Siiba yeenyaha-mahɛi a hiyelɔ i hablɛisia lɛɛ ajifa i gbuɛilɔ ngi lɔlei hu i jia huguhangɔ wolova nɛmahulewe gaai na ma Mahɛi Sɔlɔmɔn i yɛ kɛ; gbɛɛ ngi hugɛ a wue, numu lɔ mbei tewengɔ Sɔlɔmɔn ma.

³²Kpɛmbo-volei ma kuna, Ninivɛblɛisia ta hiyelɔ ti wu lɛɛ ajifa ti wounveilɔ ti jumbuisia ma ji Jona i Ngewɔ yiɛi leni ti ma, tawao gbɛɛ ngi hugɛ a wue, numu lɔ mbei tewengɔ Jona ma!

³³ “Numu gbi ɛɛ lambo lo nga aa ndɔwu ɔɔ i ngua kaloi bu; a tɛ haaka yalɛngɔ lɔ ya aako nungaa ti ya wuama pɛlei bu ti tɔ.

³⁴Wu yamɛisia ti wiengɔe kia lamboi na wu gbuhɛi va. Hinda ii yɛlɔ bi yamɛi ma bi gbuhɛi gbi lavengɔ a yɛla a foofo; kɛɛ bi yamɛi ii yɛlɔ gbekpeni, bi gbuhɛi gbi a yɛ kpindi hu lɔ.

³⁵Faale a wu mahugbe aako fofoi na i wu hu aa yɛ a kpindi.

³⁶Ina fofoi gungɔe bi gbuhɛi hu gbi, yeehinda gbi ii kpindi hu, hu gbi a voolɔ kia lambo-voi yeejɛŋɛɛ-jɛŋɛɛi a foofo ve bi wɛ.”

³⁷Kia Yesu i kpɔyɔni a yɛpɛla, Farisiimɔ yila i ngi lolilɔ mɛhɛɛ ma, kɛ i ya yeepɛlei bu i hei mɛhɛɛ gɔɔbu.

³⁸I gualɛilɔ Farisiimɔi ma tɔva kɛ Yesu ii muani pɛiŋ aa ya mɛhɛɛ mɛ.

³⁹Faale Ndemɔi i ndeilɔ ngi ma yɛ, “A tɔnya wu Farisiisia wa wu bolei womɛi lɔ wua kɛɛ pletii kɛɛ wu goohui lavengɔ a kava-navoo gbuala nungaa yeya kɛɛ hinda nyamu.

⁴⁰Wu kpowablei jisia! Ngewɔ na i pomɛi gbatɛni ii kohui bɛɛ gbatɛni?

⁴¹Kɛɛ na i wu boleisia hu kɛɛ pletiisia, a fe fɛɛliblɛisia wɛ, kɛ hani kpɛlɛɛ i yɛnga sɛwɛsɛwɛ wu va kia sawei longɔ la.

⁴² “I nyamuni kpa wu Farisiisia va! Ajifa wa hakpa galɛ yakpe gbualɔ hakpa gaa lia wu fe Ngewɔ wɛ kɛɛ wuii gbeweni pɔɔna hinda wiela va kɛɛ lola a Ngewɔ. Mahoungɔ yɛla wu jisia wie kɛɛ wa gbe yeepekeisia ma.

⁴³“I nyamuni kpa wu Farisiisia va! Ajifa wu longɔ a heimi yeekpekpeisia hɛɛ wɛleisia bu, kɛɛ ji nungaa ta wombi gbakpa vava wu ma fahii hu.

⁴⁴I nyamuni kpa wu va! Ajifa wu gbuangɔ a kamba lɔwungɔngaa lɔ, nungaa ta jia ma tɛɛ kɔɔ.”

⁴⁵Sawei Yeekaamɔisia yilayee i ndeilɔ ngi ma yɛ, “Kaamɔ, bi na lengaa kɛ bia mu bɛlɛ nyanima!”

⁴⁶Yesu i kpɛmboilɔ yɛ, “I nyamuni kpa wu Sawei Yeekaamɔisia bɛɛ va! Ajifa hakei nasia numu ɛɛ gu mbu, tamia wa tɛ nungaa wumba, kɛɛ wua vulii wɛɛ wu lokoyowo yila bɛɛ wɛlɛ ma gbɔva ti ma liva la.

⁴⁷I nyamuni kpa wu va! Ajifa wa kamba nyandenyandeisia gbatɛ Ngewɔ lutuisia va; Ngewɔ lutui nasia vulii wu maadani ti ti wani.

⁴⁸Wua vulii wu lumanga ma kɛ na wu maadani ti pieni wua tieni le; ajifa tia lɔ ti Ngewɔ lutuisia waani, wua wu ti gambɛisia gbatɛ.

⁴⁹Sabui ji va lɔ Ngewɔ nɛmahulewei i ndeni yɛ, ‘Nga nya lutuisia yoyolɔ ti gama kɛɛ toblaa; kɛɛ ta ti lɛɛnga waalɔ, ti pekeisia yakpɛ a nyamu.’

⁵⁰Faale kpalɛ a lalɔ hablɛisia ma Ngewɔ lutuisia va ti ti wanga i hiye dunyei gbatɛ-gbelei ma,

⁵¹i hiye Ebɛl walei ma i to Sakaraya ma, na ti paani saagbuamɛi luahu a Ngewɔ Wɛlei yeekayemamɛi. A tɔnya ngi nde wu ma, kpalɛ a lalɔ hablɛisia ma Ngewɔ lutuisia gbi va.

⁵²“I nyamuni kpa Sawei Yeekaamɔisia va! Ajifa wu gbanga nɛmahulewe wɛlei yeejiiwii mahu; wua vulii wɛɛ wua na tawao wɛɛ luma nasia ti lapima wuavaa na taa wua na!”

⁵³Kia Yesu i gbuani yeehindei na, Sawei Yeekaamɔisia tia Farisiisia ti tɔtoilɔ a ngi magbuala wa, ta ngi mɔlimɔli a hinda gboto,

⁵⁴ti longɔ ti ngi huyili aako i njia yakangɔ le ti ngi hou fa.