Read Ngowili Yekpei Numu Kpɛlɛɛ Va LUKI 12 Bible Online

LUKI 12 - Ngowili Yekpei Numu Kpɛlɛɛ Va bible

LUKI 12

¹ Kia numu tauji gboto ti yandɔni, ta nyiminyimi ti nyɔunyɔ ma, Yesu i tɔtoilɔ a ndela ngi gaalopoisia ma yɛ, “A wu mahugbe Farisiisia ti yiisti yeya, na yɛni a baaya hindei.

²Hinda gbi lekee mawɛɛngɔ, mahu a wumbulɔ, tawao ndɔwuma-hinda gbi a gbualɔ foofo ya.

³Faale hɔɔ, na gbi lekee bi ndenga kpindi hu, ta mɛnilɔ a folo leeŋ, tawao na bi ndenga ndondo hu pɛlɛ gbɔwungɔi bu, ta ndalɔ a hee kpawama.

⁴“Ngi hugɛ a wue, nya ndiamɔisia, waa luwa nasia ma ta nduwui waa kɛɛ na wooma tɛɛ gu a hinda nyamu weka gbi wiela a wue.

⁵Nga kɛlɔ a wue ye lɔ nduwamamɔle; a luwa Ngewɔ ma, na i numu wangaa, kpaya i ngi wɛ piliva jahama; a tɔnya, ngi nde wu ma, ta lɔ kungɔ wu luwa ngi ma!

⁶“Tɛɛ sokele lɔɔlu yeya a sɛnti fele. Na hu gbi Ngewɔ ɛɛ lema yeengila bɛɛ ma.

⁷Wu wundiei vulii gbi gbawangɔe. Faale waa luwa; wu jɔngɔi i leweni poloŋ sokele gboto ma.

⁸“Tawao ngi nde wu ma, numu gbi lekee a luma nya hinda ma nuuvungaa yama, ta lɔ numui na bɛɛ Nuuvu Hindoloi le a luma ngi hinda ma Ngewɔ Malikeisia yama;

⁹kɛɛ numui na a mawali nya hinda ma nuuvungaa yama, Nuuvu Hindoloi a mawalilɔ ngi hinda ma Ngewɔ malikeisia yama.

¹⁰ “Numu gbi lekee a njia nyamu le Nuuvu Hindoloi ma, a manuma jɔlɔ; kɛɛ numui na a njia nyamu le Ngewɔ Yafei ma, ɛɛ manuma jɔɔ.

¹¹“Ti wangaa a wue hɛɛ wɛleisia yeekulɔblɛisia gulɔ kɛɛ mahangaa kɛɛ mahubleisia, wu lii aa hɛlɛ wa yee wu magao ɔɔ gbɔɔ wa nde;

¹²ajifa Ngewɔ Yafei a wu gaalɔ ngamɛi na a na mahoungɔ wu nde.”

¹³Taamɔ yila i yɛ fahii na hu i ndeilɔ Yesu ma yɛ, “Kaamɔ, nde nya ndewei ma, poohani wɔɔ mu kɛkɛ i ndoni a mue, i nya ndɛi ve.”

¹⁴Yesu i ngi mɔlilɔ yɛ, “Ndakpei, ye lɔ i kpaya venga nya wɛ kiti leweva wu veenjɔ luahu?”

¹⁵Yesu i liilɔ gulɔma a ngi yɛpɛi i nde ti gbi ma yɛ, “Wu valangɔ i yɛla tawao a wu mahugbe hani-mani yeelasii gbi yeya; ajifa numu jɔhani ii le aa yɛ ngi lɛɛvui yeetɔnyangɔi gbatɛma, numu i gbatɛ bɛɛ a pele-o-pele.”

¹⁶Kɛ i dɔmii yila gbuanga ti wɛ yɛ, “Tuhani i wuɛilɔ hulewengɔ wa taamɔ yila yeya;

¹⁷Kɛ i ndenga nɛmahu yɛ, ‘Nga gbɔɔ wie, jifa tuhani wuma gbii na?’

¹⁸Kɛ i ndenga yɛ, ‘Ngi ji lɔ wiema: ngi nya gbuwuisia wolomaa ngi yeembambangaa lo; ngi nya luhani gbi lamagbatɛ na kɛɛ nya gbatei gbi.

¹⁹Nga ndelɔ na nya yekpe ma ngɛɛ, nafamui! Kpatɛ gboto lamagbatɛngɔe nya va foo gboto va; lɛɛvu na, bi mɛhɛɛ mɛ, bi kpɔle wie, bi goohu i nɛɛ.’

²⁰Kɛɛ Ngewɔ ndeilɔ ngi ma yɛ, ‘Kpowamɔi! Kpindi ji ba baalɔ a bi lɛɛvui: tawao hani ji gbi bi ndama gbatɛnga bia yekpe va, ye lɔ na ngi woo i yɛma la?’

²¹“Hii a wie a nasia ta kpatɛi lɛma tia yekpe va kɛɛ ti gbatɛngɔ ii le Ngewɔ yama.”

²²Na wooma Yesu ndeilɔ ngi gaalopoisia ma yɛ, “Faale ngi nde wu ma, wu lii aa hɛlɛ mɛhɛɛ na va wa gbewe fa wu lɛɛvui yɛva na ɔɔ kulei na wa gbewe fa wu gbuhɛi va.

²³Ba i ndɛvui ma i lewe mɛhɛɛ ma tawao ba i numu gbuhɛi ma i lewe kulei ma.

²⁴A gili lɛɛ a gɔmɛisia; tɛɛ tuhani hii, tɛɛ tewe, tawao kpuwungaa tii ti yeya; na hu gbi Ngewɔ a ti gɔ! Ba i wu ma i lewe poloŋ ŋɔingɛisia ma!

²⁵Numu lɔ wu lia a gu i ngi lɛɛvui mato kulo bɛɛ jifa ngi lɛɛvui hinda a ngi liihɛlɛ?

²⁶Ina wɛɛ gu a hinda wulo bondei na wiela, gbɛe hinda wekeisia ta wu liihɛlɛ?

²⁷ A gili lɛɛ kia dinɛisia ta loola; tɛɛ yenge tawao tɛɛ fande liimba. Kɛɛ ngi hugɛ a wue, Mahɛi Sɔlɔmɔn vulii bɛ, ngi gbatɛngɔ a pele-o-pele, kula ii yɛ ngi ma aa nyande aa hiti flawai jisia yeengila hu.

²⁸Ngewɔ lɔ a kpitiisia mayili kpitii nasia ta yɛ na ha, sina kɛ ti ti mɔnga. Ɛɛ gbewe ngi ma wu mayiliva i lewe ti ma? Wu layii a Ngewɔ hugbɛɛni kpa!

²⁹“Faale wu lii aa hɛlɛ watii gbi kɔlooni na ma wa mɛ kɛɛ na wa kpɔle, (

³⁰ajifa dunyablei nasia tii Ngewɔ gɔɔ, ti lii hɛlɛngɔe watii gbi hani jisia kpɛlɛɛ va.) Wu Kɛkɛ i kɔɔlɔ kɛ wu gbewengɔe hanii jisia va.

³¹Fisangɔ wu gbewe ngi mahayɛi va, a hani jisia bɛɛ velɔ wu wɛ. Kɛlee kɛlee i wie pɛiŋ!

³²“Waa luwa, nya mbala sɛkɛngɔisia, ajifa wu kɛkɛ goohunɛngɔ wu gɔ va a mahayɛi.

³³A wu yeya hanisia kpɛlɛɛ majia wu yeekani ve nyanibleisia wɛ. A kani bɛkisia gbatɛ wua yekpe va na ɛɛ nyani, wu kpateisia lamagbatɛ ngelegoohu, mia humamɔ ɛɛ lukpe na gblanga tawao gilinga tɛɛ wuaa na ta nyani.

³⁴Gbamaile mia bi gbatei a yɛ na, na lɔ bi lii bɛɛ a yɛ na.

³⁵ “Wu magbatɛngɔ i yɛla na gbi lekee va i wama, wu wu magulɛisia yili kpauŋ hama kɛɛ wu lamboisia toongɔnga a voo.

³⁶ A wie kia bɔilopoisia na ti ti lemɔi gulɔ gbema na gbuama nyaha gɔli gomɛi hu, aako i wangaa i pɛleila lewengaa, ta hiyelɔ kaakaa hu ti ndawo ngi gulɔ.

³⁷Kohunɛ a yɛ kpa bɔilopoi nasia ma ti lemɔi a ti male tii njii hu tawao ti magbatɛngɔ ngi yamangɔihu! Ngi nde wu ma kɛ a ta yekpe mayililɔ, i ti hei tebii ma, aako i ti magbee gbua.

³⁸Kohunɛ a yɛ kpa nasia ma a ti male ti magbatɛngɔ, i yɛ bɛɛ a kpindiliɛ lɔ i wani ɔɔ yeetewengɔ woma.

³⁹Tawao a ji la nɛmahu: Ina pɛlɛmɔi i watii gɔɔlɔ humamɔi a wua ma, ɛɛ lo heini humamɔi a wili ngi yeepɛlɛbu.

⁴⁰Tawao wua bɛɛ, wu magbatɛngɔ i yɛla, gbamaile Nuu Hindoloi a walɔ hawei na ma wu lii gbii ma.”

⁴¹Pita ndeilɔ yɛ, “Ndemɔi, bi ndɔmii jisia gbuama mu valɔ ɔɔ numui kpɛlɛɛ va?”

⁴²Ndemɔi kpɛmboilɔ yɛ, “Yelɔ hɔɔ bɔilopo golongɔ nɛmahulewengɔi le, na ngi lemɔi i ngi loni bɔilopo wekeisia maahu ti mɛhɛɛ veva ti wɛ yeewatii ma.

⁴³“Bɔilopoi na lubangɔe ngi lemɔi a wa i male i piema hii!

⁴⁴A tɔnya, ngi hugɛ a wue, ndemɔi na a ngi yeyahani gbi loko wuaalɔ bɔilopoi na yeya.

⁴⁵“Kɛɛ ina bɔilopoi na ndeilɔ ta yekpe ma yɛ, ‘Nya lemɔi ii humbuma a wa’, i tɔtoo a ngi mbaa bɔilopoisia lewela, hinga kpɛlingɔ nyahangaa ma, a mɛhɛɛ mɛ, a ndɔ gboli ngi houva,

⁴⁶yeebɔilopoi ji ngi lemɔi a walɔ folo yila ma ngi lii gbi ii ngi wala ma kɛɛ hawa ma ii kɔɔ. Ngi lemɔi a ngi huletelɔ wɛwɛ i heima ve ngi wɛ tia wasubleisia.

⁴⁷“Bɔilopoi na kɔɔngɔ gbɔɔ ngi lemɔi liimɛi le, i gbahangaa a ta yekpe vuii magbatɛla na wieva ngi lemɔi longɔ la, tɔɔya waa a lalɔ ngi ma a ndewe gboto hulɔla;

⁴⁸kɛɛ bɔilopoi na ii na hugɔɔ ngi lemɔi liimɛi le i wilangaa a hinda wiela kungɔ tɔɔya i la ngi ma fa a ndewe wulo lɔ majɔɔ. Numu gbi lekee Ngewɔ a hani gboto ve ngi wɛ, a ngi mɔlilɔ yeemalema va.”

⁴⁹“Ngi wanga ngɔmbu lɔ yatɛma dunyei ma; kiaa vuii aa yɛ mɔmalɔ kiahuna!

⁵⁰ Ngua lɔ wama nya maahu a tɔɔya hu we, tawao ndiinyani nya houngɔi kɛlee i gbɔyɔ ma.

⁵¹Taa wu nɛmahu kɛ ngi wani a ndiilɛli lɔ dunyei hu? Sawo, ngii wani a ndiilɛli, ngi wani a nduahugɔlɛ lɔ.

⁵²I hiye kiahuna ma numu lɔɔlu ta yɛlɔ ndei hu, ti luahu i gɔlɛ, sawa ta gɔ a fele, fele ta gɔ a sawa.

⁵³Kɛkɛisia ta gɔlɔ a ti hingaleengeisia, hingaleengeisia ta gɔ a ti kɛkɛ-ni, njeisia ta gɔlɔ a ti nyahalengeisia, nyahalengeisia ta gɔ a ti njeni; njemɔisia ta gɔlɔ a ti loo-nyahangɛisia, ndo-nyahangɛisia ta gɔ a ti yemɔisia.”

⁵⁴Yesu i ndeilɔ nungeisia ma yɛ, “Wu njagbili lɔnga a lɛ ngelei ma foloi gula-welei hu, wa ndelɔ ngama wɛɛ ‘Njɛi i wuamaa’; tawao hii a wie.

⁵⁵Wu fɛfɛi yati gɔnga a gbua kpundɔhu, wa ndelɔ wɛɛ ‘Nduenduei i wamaa na’; tawao hii a wie.

⁵⁶Wu bayablɛisia! Wa ngelei ma gbelɔ kɛɛ dunyei, wu kɛ gbɔɔ i wama wiema, kɛɛ gbɛɛ hɔɔ wuii watii ji yeembui gɔɔ?

⁵⁷“Gbɛe wɛɛ luma wua na lɔ pɔɔnangɔ pieva?

⁵⁸Numu i bi mayia gɛngaa Kotii hu, lapi bi yeenjiɛi gbɔyɔ pɛiŋ wu ya foo Kotii hu. Bii na wieilɔ, a lilɔ a bie Jɔjii i bi ve polisisia wɛ ti bi wu kpindiwɛlei bu.

⁵⁹Ba lo na lɔ bi navoei na kpɛlɛɛ ve ta bi yangɔli la, yeesɛnti yila bɛɛ ɛɛ lo.”