Read Ngowili Yekpei Numu Kpɛlɛɛ Va LUKI 13 Bible Online

LUKI 13 - Ngowili Yekpei Numu Kpɛlɛɛ Va bible

LUKI 13

¹A watii na nungaa lɛɛnga ti wailɔ Yesu gama ti Galiliblɛi nasia hinda hugɛ Paileti i yɛ ti waani.

²Yesu i ndeilɔ ti ma yɛ, “Ji ti Galiliblɛi jisia wani hii ti yɛ saai gbuama Ngewɔ ma, wu gilingɔe la kɛ jumbubla nyamu mia a tie i lewe Galilibla wekeisia gbi ma?

³Sawo, ii hii kulo bɛɛ! Ngi hugɛ a wue kɛ wuii wounveilɔ wu jumbuisia ma, wu gbi wa haalɔ kia ti pieni.

⁴Ɔɔ numu puu mahu wayakpei nasia ti haani Sailoam ji ngeleya wɛlei i gulani ti ma? Wu gilingɔe la ji a kɛlɔ kɛ ti yɛ nyamuni nungaa wekei nasia gbi ma ti yɛ Jelusalɛm?

⁵Sawo, ii hii kulo bɛɛ! Gbɛɛ ngi hugɛ a wue kɛ wuii wounveilɔ wu hinda nyamuisia ma, wu gbi wa haalɔ kia ti pieni.”

⁶Kɛ Yesu i dɔmii ji gbuanga ti wɛ yɛ, “Ngulii na ta toli a figi i yɛlɔ taamɔ yila gbalei hu. I liilɔ yee ngulii ji bu aako i yeenguɛisia gbenda kɛɛ ii hani gbi maleni nga.

⁷Faale i ndeilɔ ngi gbala yengemɔi ma yɛ, ‘Wote mbei, foo sawa lɔ na nga wa mbei aako ngi ngulii ji yeenguɛi majɔɔ kɛɛ ngɛɛ hani gbi male nga. Pɔ i gula! Gbɛva lɔ a ndɔlɔmei mabali?’

⁸Kɛɛ, kpala yengemɔi ndeilɔ ngi ma yɛ, ‘Ndemɔi, gbe lɛɛ ma foo yila va gbɔma; nga mabɔlɔ, ngi tuhani mɛhɛɛ wu ma.

⁹I wuangaa voonu, a nyandelɔ; kɛɛ, ii wailɔ, kɛ ba pielɔ ti pɔ.’ ”

¹⁰Juubleisia ti lɛɛvu volo yila ma Yesu i yɛlɔ a nungaa gaa hɛɛ wɛlɛ yila bu.

¹¹Nyapo yila yɛlɔ na ngafa nyamu i ngi hu; tawao i ngi heegbɛngɔ foo puu mahu wayakpa va; ngi gotongɔ yɛla kolikoli, ɛɛ gu aa malambo kulobɛɛ.

¹²Kia Yesu i ngi lɔni, i ngi lolilɔ yɛ, “Nyapoi, bi bawonga bi heegbɛi hu!”

¹³I ngi lokoisia wɛleilɔ ngi ma kɛ i bawonga ngama, i Ngewɔ lato.

¹⁴ Hɛɛ wɛlei mahumɔi i liileweilɔ jifa Yesu i numui bawonga Ndɛvu Volei ma, faale i ndeilɔ nungaa ma yɛ “Folo wɛita lɔ na mahoungɔ mu yenge ma; faale a wa yee foloi nasia ma ti wu bawo, kɛɛ Ndɛvu Volei ma ii le!”

¹⁵Ndemɔi i poteilɔ i nde ngi ma yɛ, “Wu bayablɛsia! Numu gbi lekee wu lia a ngi nikɛi ɔɔ ngi jakasi gbualɔ wɔlɛi hu i li la njɛi la, i njɛi ve ngi wɛ Ndɛvu Volei ma.

¹⁶Kiahuna nyapoi ji gbe, Ebraham bɔɔsɔɛi a ngie, ji gbe, Seitana i ngi yilinga wɔɔ foo puu mahu wayakpa va; ma ii houni ngi vulova Ndɛvu Volei ma?”

¹⁷Ngi gbɛmboi ji pieilɔ ngi juwuisia ti wufe, kɛɛ nungeisia gbi ti goohu i nɛɛlɔ kabande hindei nasia va i pieni.

¹⁸Yesu i mɔlilɔ yɛ, “Ngewɔ Mahayɛi gbuangɔ a gbɔɔ? Nga huma gbɔɔ ma?

¹⁹Ngi gbuayei gbe: piengɔe kia taamɔ yila i yɛ na, tuhani na yee kalɛi mumungɔ wa, i mbumbuni i hii ngi gbalei hu. Tuhani na valeilɔ, i lakpa, ŋɔningɛisia ta teisia lo ngi bekeisia ya.”

²⁰Yesu i gbɔma mɔlilɔ yɛ, “Nga Ngewɔ Mahayɛi huma gbɔɔ ma?

²¹Ngi gbuayei gbe: piengɔe kia nyaha yila na, i yisti na a pie bledii a ve, i mbumbuni i pu flawaa busɛ yila hu, i lo hutima haaŋ yee flawai gbi i ve.”

²²Yesu jiɛilɔ fuleisia hu kɛɛ teisia hu a nungeisia gaa, a li a Jelusalɛm wee.

²³Numu yila i ngi mɔlilɔ yɛ, “Kaamɔ, kɛ nungaa sɛkɛngɔ mia ta bawo?” Yesu i kpɛmboilɔ yɛ,

²⁴“A lapi a wu sɛmbɛi gbi wuavaa a pɛlɛ lama gbɛɛngɔi wee; ajifa numu gboto ta lapilɔ vulii wuavaa kɛɛ tɛɛ gu.

²⁵Pɛlɛmɔi a hiyelɔ i pɛlei gbɔwu, tawao wu ya na looni ngitiya wu tɔtoo a pɛlei lalewela wɛ, ‘Ndemɔi, ndawo mu gulɔ,’ a ndelɔ wu ma yɛ, ‘Ngii mia gɔɔ wu hiyenga na!’

²⁶Kɛ wua bɛɛ wu kpɛmbonga wɛɛ, ‘Mua wueni mu yɛlɔ a mɛhɛɛ mɛ, ma kpɔle wie; bi nungaa gailɔ mu yee taahu!’

²⁷ Kɛɛ a ndelɔ gbɔma yɛ, ‘Ngii wu hiyema gɔɔ. A hiye mbɛ, wu hinda nyamublɛisia gbi!’

²⁸ Wa wɔlɔ kpa, wa wu yɔngɔliisia yamɛ ji wa Ebraham lɔ kɛɛ Aisaki kɛɛ Jekɔpi kɛɛ Ngewɔ lutuisia gbi ti Ngewɔ Mahayɛi hu; wua wu gbɛngɔ na!

²⁹Nungaa ta hiyelɔ foloi hiye welei hu kɛɛ foloi gula-welei hu kɛɛ maahu kɛɛ kpundɔhu, ti hei mɛhɛɛ-mɛ-gomɛi hu Ngewɔ mahayɛi hu.

³⁰ A watii na, nasia kɛlɛmableisia a tie kiahuna ta yɛlɔ a haalableisia, tawao nasia haalableisia a tie kiahuna ta yɛlɔ a kɛlɛmableisia.”

³¹A watii yakpei na, Farisiisia lɛɛnga ti wailɔ Yesu gama ti nde ngi ma tɛɛ, “Gbua mbei bi li hinda weka ajifa Hɛlɔd longɔ i bi waa.”

³²Yesu i poteilɔ i nde ti ma yɛ, “A li wu nde kavamɔ babaamɔ gbami na ma wɛɛ, ‘Nya ngafa nyamuisia gbuama nungaa hu, nga nungaa bawo, ha kɛɛ sina, tawao lɔwɔi yeesawei ma nga nya yengei gbɔyɔlɔ.’

³³Na hu gbi mahoungɔ ngi yɛ pelei hu haa, sina kɛɛ folo wekei ma; ajifa Ngewɔ lutui ɛɛ jukulu hinda weka gbi, kɛlee Jelusalɛm.

³⁴“Aa Jelusalɛm, Jelusalɛm! Bia ba Ngewɔ lutuisia waa, ba nasia hɔwɔhɔwɔ Ngewɔ a ti lo bi gama! Heima lolɛ ngi yɛ loni ngi bi nungeisia gbi gulu yakahu kia tɛhɛi a ngi leengeisia wua ngi gbakisia bu, kɛɛ bii lumani mbɛ!

³⁵Faale Ngewɔ i gbelenga wu Yewɔ Wɛlei ma. A la a ji ngi ndema, kɛ wuɛ ya nya lɔ; kɛlee watii na a hitima wa nde wɛɛ, ‘Ngewɔ i numui na luba i wama Ndemɔi biyei hu.’ ”