Read Ngowili Yekpei Numu Kpɛlɛɛ Va LUKI 15 Bible Online

LUKI 15 - Ngowili Yekpei Numu Kpɛlɛɛ Va bible

LUKI 15

¹ Folo yila, kia pawa wɔyɔblaa gboto kɛɛ jumbubleisia ti wani Yesu gama wolova ngi ma,

²Farisiisia kɛɛ Sawei Yeekaamɔisia ti tɔtoilɔ a gbonyɛlaa tɛɛ, “Taamɔi ji a loko heilɔ jumbubleisia bu tia tieni ta mɛhɛɛ mɛ!”

³Faale Yesu i salei ji lɔ heini ti ma yɛ,

⁴“Ina mbala hɔndɔɔ yila lɔ wu yilayee yeya, yeengila i lohu, gbɔɔ a pie? A mbala numu naani gbɔyɔngɔ mahu puu mahu taalu wekei nasia lolɔ mɛlimɛi, i hitɛ yeena gɔkɔlima i lonihu haaŋ kɛlee i tɔ.

⁵I tɔngaa, ngi goohu a nɛɛlɔ wa tawao a ndalɔ gbakima,

⁶i yama la ngie kuwuhu. Na wooma a ngi ndiamɔisia lɛlɔma kɛɛ ngi heinyɔuisia i nde ti ma yɛ, ‘A mu kohunɛ wie ajifa nya balɛi na i lonihu, ngi tɔnga.’

⁷Ngi hugɛ a wue kɛ hii lɔɔ kohunɛ wa a yɛ aijɛnɛ jumbumɔ yakpe va a wounve ngi jumbuisia ma i lewe pɔɔnablaa numu naani gbɔyɔngɔ mahu puu mahu taalu ma potema ii ti ma.

⁸“Ɔɔ ina navoo gbuha puu lɔ nyapo yila yeya, yeengila i lohu, gbɔɔ a pie? A lamboi lolɔ nga, i ngi wɛlei bu yila, i navoei na gɔkɔli vulii a tɔmbɛyama wee haaŋ i tɔ.

⁹I tɔngaa, a ngi ndiamɔisia lolilɔ kɛɛ ngi heinyɔuisia, i nde ti ma yɛ, ‘A mu goohunɛɛ wa ajifa ngi nya navoei na lɔnga i yɛ lonihu!’

¹⁰Gbɛɛ ngi hugɛ a wue, hii lɔɔ Ngewɔ malikeisia ta kohunɛ wa wie jumbumɔ yakpe va a wounve ngi jumbuisia ma.”

¹¹Yesu i liilɔ gulɔma a ngi yɛpɛi yɛ, “Taamɔ yila yɛlɔ wɔɔ na hindolo fele ngi yeya.

¹²Ndoi yeekuloi i ndeilɔ ngi kɛkɛ ma yɛ, ‘Kɛkɛ, bi yeyahani gbi gɔlɛ bi nya ndɛi ve kiahuna.’ Faale kenɛi i ngi yeyahanii gbi gɔlɛilɔ ngi leengaa feleisia ma.

¹³Njii-lɔwɔ sɛkɛngɔ wooma, ndoi yeekuloi i hani na gbi majiɛilɔ i majɔni, i gbua ngi yeitahu a yeenavoei. I lini kɛnyɛ huguhangɔ wa hu lɔ, i ngi navoei gbi hunyani na a pele nyamu.

¹⁴Hani gbi i yɛ ngi yeya i majiɛilɔ. Na wooma ndɔlɛ wa i gulailɔ yeendɔlei na hu gbi, tawao gbɛogbɛ ii yɛ ngi yeya.

¹⁵Faale i liilɔ ngenge gɔkɔlima ndɔlɔ-lii yeengila gama, kɛ yeekenɛi i ngi yoyonga ngi gbalei hu ngi londɛngɛisia makɛva.

¹⁶Ngi goohu aa nɛɛlɔ ta yekpe gooveva a mɛhɛɛ na ndondɛngɛisia ti yɛ mɛ, kɛɛ numu gbi ii ngi gɔni a hani mɛva.

¹⁷Kɛlɛmɛi, kia i liiheini ta yekpe ma, i ndeilɔ yɛ, ‘Bɔilopo pawangɔisia ti gbotoni kpa nya kɛkɛ yeya, ta mɛhɛɛ mɛ ta gbaha ma, nya hama mbei a ndɔlɛ!

¹⁸Nga hiyelɔ ngi li nya kɛkɛ gama ngi nde ngi ma ngɛɛ, “Kɛkɛ, ngi jumbu wienga a Ngewɔ kɛɛ bia;

¹⁹ngii ya gbekpeni nya loliva a bi lo; nya hou kia bi bɔilopo pawangɔisia yeengila i na.” ’

²⁰Kɛ i hiyenga i wa ngi kɛkɛ gama. “Kɛɛ i loni kuhama lɔ kɛ ngi kɛkɛ i ngi lɔnga, i ngi mamamau lɔ, i li a piimɛ, i ngi gulu gakahu, i ngi laagɔmi.

²¹Kɛ ndoi i ndenga ngi kɛkɛ ma yɛ, ‘Kɛkɛ, ngi jumbu wienga a Ngewɔ kɛɛ bia; ngii ya gbekpeni ti nya loli a bi lo.’

²²Kɛɛ ngi kɛkɛ i ndeilɔ bɔilopoisia ma yɛ, ‘A wa kaakaa a ndomɛi yeena kpekpengɔ kpɛlɛɛ ma wu pu ngi ma, wu liŋ wua ngi lokohu, wu kɔɔwɛi wua ngi gɔwɔhu;

²³wu wa a nika lɔgbɛi yeekpekpe, wu paa, mu mɛ mu kohunɛ wie;

²⁴ajifa nya loi ji i hanga wɔɔ, i vulunga gbɔma, i longahu wɔɔ, mu ngi lɔnga gbɔma.’ Kɛ ti tɔtonga a kohunɛ wiela.

²⁵“Kenɛi hindoloi yeesɛmbɛi i yɛ kpalei hu lɔ; kia i wani i lala ti wɛlei gbla, kɛ i ngaihanisia woo mɛninga kɛɛ ndoliwoi.

²⁶Kɛ i bɔilopoi yeengila lolinga i ngi mɔli a ndoli yeembui.

²⁷Kɛ bɔilopoi i ndenga ngi ma yɛ, ‘Bi ndewei mia i wanga, famia bi kɛkɛ i nika lɔgbɛi yeesɛmbɛ wulɔwulɔ wanga, jifa i fonga ngi ma hinda gbii ngi ma.’

²⁸Kɛɛ i liileweilɔ, i ganga a wualaa pɛlei bu. Ngi kɛkɛ i gbuɛilɔ i ngi manɛnɛ,

²⁹kɛɛ i ndeilɔ ngi kɛkɛ ma yɛ, ‘Tɔ lɛɛ, foo gbotoi ji kpɛlɛɛ ngi mɔnɛma bi wɛ, ngii ya bi layie yakpe bɛɛ gbuani hu; na hu gbi bii yaa nje-loo bɛɛ veni nya wɛ kɔɔ mua nya ndiamɔisia mu kohunɛ wie.

³⁰Kɛɛ ji lekee bi loi ji i wanga, na i bi yeyahani gbi nyaninga hitɛ-nyahangɛisia ma, bi nika lɔgbɛ yekpe wanga ngi va!’

³¹Kɛ ngi kɛkɛ i ndenga ngi ma yɛ, ‘Nya loi, mua bie le fɔ, tawao na gbi nya woo le, bi woo mia.

³²Mahoungɔ yɛla mu kahugbua wie, mu goohu i nɛɛ, ajifa bi ndewei ji i hanga wɔɔ, i vulunga, i longahu wɔɔ, mu ngi lɔnga.’ ”