Read Ngowili Yekpei Numu Kpɛlɛɛ Va LUKI 17 Bible Online

LUKI 17 - Ngowili Yekpei Numu Kpɛlɛɛ Va bible

LUKI 17

¹Yesu ndeilɔ ngi gaalopoisia ma yɛ, “Hindei nasia ta pie nungaa ta jumbui wie, ta walɔ huɛɛŋ, kɛɛ i nyamuni kpa numui na va a pie ti wa!

²Aa nyandelɔ ngi va ina ti yɛ ngai-gɔtu wa hɛlɛilɔ ngi boloma ti ngi wili gboyei hu kia aa pie jisia mumuisia yeengila bɛɛ aa jumbu wie.

³ Faale a wu wiehindei mahugbe! “Bi ndewehindoi i jumbu wiengaa, gbandɛ ngi la, tawao i wounvengaa yeejumbui ma, manu ngi ma.

⁴I jumbu hinda wiengaa a bie heima wɔfla a folo yakpei, i wa bi gama heima wɔfla a nde yɛ, ‘Bi lemu le, ngɛɛ ya pie,’ ba manulɔ huɛɛŋ ngi ma.”

⁵Ndemɔi gaalopoisia ti ndeilɔ ngi ma tɛɛ, “pie mu layii a Ngewɔ i lewe ji ma.”

⁶Ndemɔi i poteilɔ yɛ, “Ina wu layii a Ngewɔ hitingɔe mɔstadi galɛi hu, wu yɛ ndelɔ ngulu wai ji ma wɛɛ, ‘Gule mbei bi bia yekpe hii gboyei hu!’ i golo wu wɛ.

⁷“Kia nduwɔ lɔ wu yilayee yeya, a mbei wu ngi gbalei hu ɔɔ a ngi mbalangɛisia mahugbe, i hiyenga ngengemɛi i wa, yeendemɔi ba ndelɔ ngi ma bɛ ‘Wa kaakaa bi bi mɛhɛɛ mɛ?’

⁸Sawo, bɛɛ pie! A ndelɔ hɔɔ ngi ma yɛ, ‘Kpɔkɔ-mɛhɛɛ hugbatɛ bi wa la mbɛ, bi bia yekpe mayili, bi lo nya gbla ngi mɛhɛɛ mɛ, ngi kpɔle wie; na wooma bia bɛɛ bi mɛhɛɛ mɛ.’

⁹Ma ii houni siɛgbuava bɔilopoi ma ngi yengei wieva.

¹⁰Hii lɔɔ wu na, wu na kpɛlɛɛ wiengaa ti ndeni wu ma pieva, a nde wɛɛ, ‘Bɔilopo gbama lɔ a mue; na mu yenge le pieva lekee mia mu pienga.’ ”

¹¹Ji yesu i yɛ lima Jelusalɛm, i leweni a Samelia tia Galili ti luahui wee lɔ.

¹²Kia i yɛ wuama fuula yila hu kɛ kpɔukpɔublaa puu ti wanga ngi gama. Ti loni kuhama lɔ

¹³ti yelei gula tɛɛ, “Yesu, Kaamɔ, mu mamamau lɔ.”

¹⁴ Kia i ti lɔni i ndeilɔ ti ma yɛ, “A li wu wua yekpe gɛ a saagbuablaa.” Ti loni lima kɛ ti bawonga, ti luwui i yɛ sɛwɛ.

¹⁵Kia ti yilayee i tɔni kɛ i bawonga, i yamɛilɔ, a Ngewɔ lato ngeleya;

¹⁶kɛ i gulanga ndɔmɛi fugbu Yesu gɔwɔbu, i siɛgbua ngi ma. Sameliamɔ yɛla a yeetaamɔi.

¹⁷Yesu ndeilɔ yɛ, “Numu puu ii le ta bawo? Ɔɔ peka taluisia?

¹⁸Gbɛe kɛnyɛmɔi ji yakpe i yamani siɛgbuava Ngewɔ ma?”

¹⁹Kɛ Yesu i ndenga ngi ma yɛ, “Hiye bi li; bi lalei a Ngewɔ i bi bawonga.”

²⁰Farisiisia lɛɛnga ti Yesu mɔlilɔ migbe lɔ Ngewɔ Mahayɛi a wa. I kpɛmboilɔ yɛ, “Tɔmaseli ii gɛma numu aa kɔɔ ma kɛ Ngewɔ Mahayɛi lɔ wama;

²¹tawao numu gbi ɛɛ nde aa yɛma ‘Ta gbe mbei’ ɔɔ ‘Ta gbe mia!’ ajifa Ngewɔ Mahayɛi lɔ wu lia.”

²²Kɛ i ndenga ngi gaalopoisia ma yɛ, “Watii a hitilɔ wu wɔlɔ Nuuvu Hindoloi voleisia yeengila lekee bɛɛ hulɔvaa, kɛɛ wɛɛ tɔ.

²³Tawao nungaa ta yɛlɔ na ta nde wu ma tɛɛ, ‘A mia gbe!’ ɔɔ ‘A mbei gbee!’ Waa hitɛ ti wooma kɔkɔliva.

²⁴Gbamaile kia ngelei a bahu gbua, i ngelei mawo a gbua kaka yila ma i to yeepekei ma, hii Nuuvu Hindoloi a yɛ na ngi wa-volei ma.

²⁵Kɛɛ kpalɛ gboto a lalɔ ngi ma pɛiŋ foloi ji yeenungeisia ti gbele ngi ma.

²⁶ Kia i yɛ na wɔɔ Noa voleisia ma, hii a yɛ na Nuuvu Hindoloi wa-gbelei ma.

²⁷Numui gbi ti yɛlɔ a mɛhɛɛ mɛ, ta ndɔ gboli, ta nyaha gɔli, ta nyahangaa ve hini wɛ, i hiti sɔ foloi ma Noa i wuani ndɛndɛi hu, njavei i wa i ti gbi jukulu.

²⁸ Hii lɔɔ wɔɔ i wieni Lɔt watii ma nungaa gbi ti yɛlɔ a mɛhɛɛ mɛ, ta ndɔ gboli, ta fele gɔ, ta kpalangaa la, ta pɛlɛngaa lo,

²⁹kɛɛ foloi na ma Lɔt i gbuani Sɔdɔm, ngɔmbu wa i yeilɔ a gbua aijɛnɛ i ti gbi jukulu.

³⁰Hii a wie foloi na ma Nuuvu Hindoloi a gbua nga.

³¹“Yeefoloi na ma, numui na i pɛlei wumba, ngi jɔhanisia ti pɛlei bu, aa hitɛ ti wumbuva liva la; hii numui na bɛɛ i na a yɛ kpalɛi hu, aa yama tei hu.

³²A gili a Lɔt nyahɛi.

³³Numu gbi lekee a lapi ngi lɛɛvui mabawova, a baalɔ la, kɛɛ numu gbi a ngi lɛɛvui lohu, a mabawolɔ.

³⁴Ngi hugɛ a wue, yeekpindii na ma, numu fele ta yɛlɔ laani kpukɔ yakpei ma; ta yeegila wumbulɔ na, ti yeena lo.

³⁵Nyaha fele ta yɛlɔ mɛhɛɛ hiyama hinda yakpei; ta lilɔ a yeengila, ti yeena lo. [

³⁶Hindo fele ta yɛlɔ kpalɛi hu; malikeisia ta lilɔ a yeengila, ti na lo.]”

³⁷Ngi gaalopoisia ti ngi mɔlilɔ tɛɛ, “Mindo, Ndemɔi?” Kɛ i ndenga ti ma yɛ, “Miando pomɛi i na, na mia yibɛisia ta gbɔtɔ na.”