Read Ngowili Yekpei Numu Kpɛlɛɛ Va LUKI 18 Bible Online

LUKI 18 - Ngowili Yekpei Numu Kpɛlɛɛ Va bible

LUKI 18

¹Yesu i dɔmii gbuailɔ ngi gaalopoisia wɛ ti gaava kɛ mahoungɔ ti yɛ a Ngewɔ vɛli watii gbi, ti gahu aa gbɔyɔ.

²I ndeilɔ yɛ, “Kiti lemɔ yila i yɛlɔ wɔɔ taa yila hu, ɛɛ luwa Ngewɔ ma tawao ii ba gɔɔ numu gbi ma.

³Ponyaha yila yɛlɔ yeetei na hu, a wa Tuuŋ yeekootii lemɔi ji gama a ngi manɛnɛ ngi lɔnyɛi veva ngi wɛ, yɛ, ‘Gbɔ nya ma nya yiamui yeya!’

⁴Njia lemɔi i gangɛilɔ huguhangɔ a lalila ma kɛɛ poma i ndeilɔ nɛmahu yɛ, ‘Kia bɛɛ ngɛɛ luwa Ngewɔ ma tawao ngii ba gɔɔ numu gbi ma,

⁵na hu gbi ndiihɛlɛ va ponyahɛi i fe ma nya wɛ, ngi temu vemaa ngi wɛ, ina na ii le a nya yɛlɔ kpɛngɛ ajifa ɛɛ gbe a walaa.’ ”

⁶Ndemɔi liilɔ gulɔma a ngi yɛpɛi yɛ, “A wolo na ma Kotii lemɔ gavangɔi i ndeni.

⁷Ngewɔ ɛɛ tɔnyɛi ve ngi numu wɔyɔngɔi nasia wɛ ta wɔɔ ngi ma a folo kɛɛ kpindi? A gbɛndɛlɔ a ti hɛɛwoi mɛnila?

⁸Gbɛɛ ngi hugɛ a wue, a tɔnyɛi velɔ ti wɛ ngaama. Na hu gbi, watii na Nuuvu Hindoloi a wa, a nungaa maleilɔ dunya ti langɔ a Ngewɔ?”

⁹Yesu i gbɔma dɔmii ji gbuɛilɔ nungei nasia va ti langɔ a tia yekpe ti wɔnalaa, ti lɛɛngɔ nungaa wekeisia hu.

¹⁰I ndeilɔ yɛ, “Hindo fele ti liilɔ wɔɔ hɛɛma Ngewɔ Wɛlei bu, yeengila Farisiimɔ, yeepekei pawa wɔyɔmɔ.

¹¹Farisiimɔi i loilɔ gba i hɛɛ yɛ, ‘Ngewɔ, ngi siɛgbua bi ma ajifa ngɛɛ hani gbua numu yeya a kpaya, ngii gavani, ngɛɛ pue gbua kia nungaa wekeisia ta pie kakayee pawa wɔyɔmɔi na i looni mia.

¹²Nga sui houlɔ heima fele hokii hu tawao na gbi nga majɔɔ nga kɔlɛlɔ na puu ngi kaka yila ve bi wɛ.’

¹³Kɛɛ pawa wɔyɔmɔi, i looni kuhama pɔɔ, ii guni aa ngi wui vulii wumbu aa ngelema gbe; i ta yekpe guluilɔ yɛ, ‘Ngewɔ, manu nya ma, jumbumɔ lɔ a nge!’

¹⁴ Ngi hugɛ a wue, taamɔi ji i yamɛilɔ ngi yeepɛlɛbu ngi hinda nɛngɔ Ngewɔ wɛ, i lewe Farisiimɔi ma. Ajifa numui gbi lekee a ta yekpe lɛ ngi ma a yeilɔ kɛɛ numui na a ta yekpe mayei, ngi ma a lɛlɔ.”

¹⁵Nungaa lɛɛnga ti wailɔ a ti loolangɛisia vulii bɛɛ ngi gama aako i ja a tie. Kia ngi gaalopoisia ti ji hulɔni, ti jɔlɛilɔ ti ma wava a ndolangeisia.

¹⁶Kɛɛ Yesu i ndeengɛisia lolilɔ ngi gama i nde yɛ, “A pie ndeengɛisia ti wa nya gama, wa ti huhou ajifa jisia nyɔkɔ lɔ ti woo a Ngewɔ Mahayɛi.

¹⁷Ji i lo wu nɛmahu! Numu gbi lekee ɛɛ Ngewɔ Mahayɛi gulu kia ndopo wulo na, ɛɛ wua na.”

¹⁸Juubleisia ti gulɔmɔ yila i Yesu mɔlilɔ yɛ, “Kaamɔ Yekpei, gbɔɔ nga pie kɔɔ ngi kunafɔ lɛɛvui majɔɔ?”

¹⁹Yesu ngi mɔlilɔ yɛ, “Gbɛe ba nya loli a kpekpemɔ? Numu gbi ii na aa gbekpe kɛlee Ngewɔ yakpe.

²⁰ Bi saweisia gɔɔlɔ: ‘Baa pue gbua, baa numu waa, baa huma wie, baa baama wie numu gbi ma, bi kɛkɛ bɛlɛ hei kɛɛ bi nje.’ ”

²¹Taamɔi i poteilɔ yɛ, “Ngi sawei ji kpɛlɛɛ hounga i hiye wɔɔ nya hiilopongɔi ma.”

²²Kia Yesu i ji mɛnini, i ndeilɔ taamɔi ma yɛ, “Hinda yila mia i longa bi ma pieva. Bi yeyahani kpɛlɛɛ majia, bi yeenavoei ve fɛɛliblɛisia wɛ, ba kpatɛ majɔlɔ aijɛnɛ; na wooma bi wa bi to nya wooma.”

²³Ji taamɔi i ji mɛnini, ngi lii i nyanilɔ hulewengɔ, ajifa ngi gbatɛngɔ wa yela.

²⁴Yesu i tɔilɔ kɛ taamɔi lii nyaningɔi, kɛ i ndenga yɛ, “I kpaukpauni kpa kpatɛbleisia va liva Ngewɔ Mahayɛi hu!

²⁵Kpatɛmɔi wualaa Ngewɔ Mahayɛi hu i kpaukpauni poloŋ nyɔmɛi wualaa ma mijii woohu.”

²⁶Nungei nasia ti mɛnini i ji leni ti mɔlilɔ tɛɛ, “Ye lɔ na hɔɔ a bawo?”

²⁷Yesu kpɛmboilɔ yɛ, “Na nuuvu ɛɛ gu aa pie, Ngewɔ a gulɔ ma.”

²⁸Kɛ Pita i ndenga yɛ, “Tɔ lɛɛ! Mu gbuanga mu yeekuwuhuisia tovaa bi ma.”

²⁹Yesu ndeilɔ ti ma yɛ, “Ngi hugɛ a wue a tɔnya kɛ numui na a ngi yeekuwuhu lo ɔɔ ngi nyahɛi ɔɔ ngi ndewehingeisia ɔɔ ngi lebleisia ɔɔ ngi leengeisia Ngewɔ Mahayɛi va

³⁰a yeemalema majɔlɔ dunyei ji hu, kulɔmɛi i kunafɔ lɛɛvui majɔɔ.”

³¹Yesu i ngi gaalopo puu mahu feleisia lekee lolilɔ i nde ti ma yɛ, “A wolo! Mua lima Jelusalɛm, tawao hindei kpɛlɛɛ Ngewɔ lutuisia ti nyɛini kɔloongɔ Nuuvu Hindoloi ma nda a houlɔ.

³²Ta ngi velɔ nasia wɛ Juublaa yaa tie, yeenungei nasia ta ngi gbafalɔ, ti ngi yɛli, ti ndayɛi wu ngi ma.

³³Ta ngi lewelɔ, ti ngi waa kɛɛ lɔwɔi yeesawei ma a vululɔ i hiye.”

³⁴Kɛɛ ngi gaalopoisia tii hindei ji kpɛlɛɛ bugɔni kulo bɛɛ. Njɛpɛi jisia yeembui lɔwungɔ yɛla ti ma; tawao tii kɔɔni gbɔɔ Yesu i yɛpɛma kɔlooni ma.

³⁵Kia Yesu i yɛ lukpema Jɛliko gblanga, pumumɔ yila i yɛlɔ heini pelei gblanga, a fɛlii wie.

³⁶Kia i mɛnini fahii ta lewe kɛ i mɔlinga yɛ, “Gbɔɔ a ji wiema?”

³⁷Ti hugɛilɔ a ngie tɛɛ, “Yesu Nasalɛtimɔi mia i lewema.”

³⁸I yelei gulailɔ yɛ, “Yesu, Devidi Hindoloi! Nya mamamau lɔ!”

³⁹Nungei nasia ti yɛ kulɔ ti jɔlɛilɔ ngi ma tɛɛ i londo. Kɛɛ i yelei gulailɔ tewengɔ na ma yɛ, “Devidi Hindoloi! Nya mamamau lɔ!”

⁴⁰Yesu i loilɔ i nde yɛ ti wa a pumumɔi ngi gama. Kia i laalani Yesu gblanga, Yesu i ngi mɔlilɔ yɛ,

⁴¹“Gbɔɔ bi longɔ ngi pie bi wɛ?” I kpɛmboilɔ yɛ, “Kaamɔ, nya longɔ ngi hinda lɔ gbɔma!”

⁴²Kɛ yesu i ndenga ngi ma yɛ, “Kulɔ lɔ! Bi lalei a Ngewɔ i bi bawonga.”

⁴³Ngamɛi na kɛ i gunga a hinda lɔla, i to Yesu wooma, a siɛgbua Ngewɔ ma. Kia fahii ti hulɔni, ti gbi ti Ngewɔ latoilɔ.