Read Ngowili Yekpei Numu Kpɛlɛɛ Va LUKI 19 Bible Online

LUKI 19 - Ngowili Yekpei Numu Kpɛlɛɛ Va bible

LUKI 19

¹Yesu i wuailɔ Jɛliko tawao i yɛ lewemaa.

²Taamɔ yilaa i yɛlɔ na, pawa wɔyɔblɛisia yeenumu wa a ngie, ngi la a Sakiɔs, ngi gbatɛngɔ.

³I yɛ lapilɔ tɔvaa numui yeegbɛ nyɔkɔ mia a Yesu kɛɛ ii yɛ gu aa yama wɛlɛ ngi ma fahii va tawao ngi gutungɔ.

⁴Faale i liilɔ kulɔ a piimɛ, i lɛ ngulu jɛmbɛ yila hu Yesu li-welei hu aako i ngi lɔ.

⁵Kia Yesu i foni yeehindei na, i ngulii hu gbeilɔ kɛ i ndenga Sakiɔs ma yɛ, “Sakiɔs, hitɛ kaakaa ajifa bi hota lɔ haa a nge.”

⁶Sakiɔs i hitɛilɔ kaakaa, i gahu gbua wa Yesu ma.

⁷Numui kpɛlɛɛ ti hulɔni ti tɔtoilɔ a gbonyɛlaa tɛɛ, “Taamɔi ji lɔ lima yɛva a jumbumɔ hota.”

⁸Sakiɔs i hiyeilɔ i lo, i nde Ndemɔi ma yɛ, “Ndemɔi, nga nya yeyahani gbi blalɔ ndia ngi kaka yila ve fɛɛliblɛisia wɛ tawao ina ngi hani gbi gbuanga wɔɔ numu gbi yeya a kava, nga nyɔkɔ yamalɔ ngi ma heima naani.”

⁹Kɛ Yesu i ndenga ngi ma yɛ, “Foloi ji lɔ mbawoyei i wuanga pɛlei ji bu ajifa taamɔi ji bɛɛ i yɛni a Ebraham bɔɔsɔ lɔ.

¹⁰ Nuuvu Hindoloi i wani ndohubleisia lɔ gɔkɔliva i ti bawo.”

¹¹Kia lɛ nungeisia ti yɛ woloma ji ma, Yesu liilɔ gulɔma a ngi yɛpɛi i dɔmii yila gbua ti wɛ, jifa ngi fongɔ jɔngɔ yɛla Jelusalɛm, tawao nungaa ti giliilɔ la tɛɛ Ngewɔ Mahayɛi i gbuama nga na.

¹²Faale i ndeilɔ yɛ, “Kena yila, tomamɔ wa a ngie, i yɛlɔ lima kɛnyɛ huguhangɔ hu aako i mahayɛi mɛ pɛiŋ i ya yama.

¹³Pɛiŋ i ya pele hou, i ngi bɔilopo puisia lolilɔ i kanigbɔlui ve ti wɛ a ngilangila i nde ti ma yɛ, ‘A yɛ a ji wote nya wooma.’

¹⁴Ngi lɔlɔhubleisia ti lolongɔ yɛla a ngie, faale ti tutungaa loilɔ, ti to ngi ma ndeva kɛnyɛi na hubleisia ma tɛɛ, ‘Muii loni a kenɛi ji yɛva a maha mu mahu.’

¹⁵“Kenɛi i mahayɛi mɛilɔ kɛ i wanga. Ngama kɛ i ngi bɔilopoisia lolinga ngi gɔwɔbu aako i kɔɔ gbɔɔ ti sɔɔni.

¹⁶Haalamɔi i wɛilɔ i nde yɛ, ‘Ndemɔi, ngi kanigbɔlu puu lɔ majɔnga na yilei hu bi feni mbɛ.’

¹⁷Kenɛi ndeilɔ yɛ, ‘Bi hinda yekpe wa wienga; bɔilopo yekpe lɔ a bie! Kia bi lɔnyanga hinda wulo hu, nga bi lolɔ taa waawaa puu mahu.’

¹⁸Bɔilopoi yeefelei i wɛilɔ i nde yɛ, ‘Ndemɔi, ngi kanigbɔlu lɔɔlu lɔ majɔnga na yilei hu bi feni mbɛ.’

¹⁹I ndeilɔ yeebɔilopoi ji ma yɛ, ‘Ba yɛlɔ taa waawaa lɔɔlu mahu.’

²⁰Bɔilopo wekei i wɛilɔ yɛ, ‘Ndemɔi, bi ganigbɔlu yilei gbe; ngi ngiliilɔ kpaŋ yangisɛi ya ngi ndɔwu.

²¹Ngi luwɛilɔ bi ma ajifa bi yagbalɛngɔ wa. Na bi woo ii le tamia ba mbumbu tawao na bii hini ta mia ba tewe.’

²²Kenɛi i ndeilɔ ngi ma yɛ, ‘Bia bi bɔilopo nyamui ji! Bi layiesia vulii lɔ ngi bi lɛɛma la! Bi yɛ kɔɔlɔ kɛ nya yagbalɛngɔ wa le, nga na wumbu nya woo ii le tawao nga na lewe ngii hini.

²³Gbɛe hɔɔ bii nya navoei wuni bankii ma? Ba na wie, nga majɔlɔ ndo laani ma nya yamangɔi ji hu.’

²⁴Kɛ i ndenga nasia ma ti yɛ looni na yɛ, ‘A kanigbɔlui gbua ngi yeya wu fe bɔilopoi na wɛ kani-gbɔlu puii i ngi yeya.’

²⁵Kɛɛ ti ndeilɔ ngi ma tɛɛ, ‘Ndemɔi, kanigbɔlu puu lɔ ngi yeya!’

²⁶ I poteilɔ yɛ, ‘Ngi hugɛ a wue kɛ numu gbi hani i ngi yeya, mato a velɔ ngi wɛ; kɛɛ numui na hani gbi ii ngi yeya, na wuloi bɛɛ a yɛ ngi yeya ta kpualɔ ngi yeya.

²⁷Faale na, a wa a nya juwui nasia tia tii yɛ loni ngi yɛ a ti mahɛi wu ti waa nya yaama!’ ”

²⁸Yesu i ji lɔ leni kɛ i ya Jelusalɛm ti gulɔ.

²⁹Kia i lukpeni Bɛtfaji gblanga kɛɛ Bɛtani, Ɔlivi Yiyei gakahu, i ngi gaalopo fele loilɔ,

³⁰i vɛli ti ma yɛ, “A li fulei na hu i wu gulɔ; wu fonga na, wa jakasi lɔgbɛ lɔlɔ ngilingɔ tawao numu gbi ii ya heini wɔɔ mahu aa jia la. A fulo wu wa la mbei.

³¹Numu gbi i wu mɔlinga gbɛe wu fuloma, a nde ngi ma wɛɛ, ‘Ndemɔi gbewengɔe fa.’ ”

³²Ti liilɔ tawao ti hindei gbi maleilɔ kia Yesu i ndeni la ti ma.

³³Kia ti yɛ jakasi lɔgbɛi vuloma, nasia ti woo yɛla ti ti mɔlilɔ tɛɛ, “Gbɛe wu fuloma?”

³⁴Ti kpɛmboilɔ tɛɛ, “Ndemɔi gbewengɔe fa.”

³⁵Ti liilɔ a jakasi lɔgbɛi Yesu gama. Kɛ ti ti bobanisia voombonga mahu, ti gbɔ Yesu ma i lɛ mahu.

³⁶Kia i yɛ jiama la, nungaa ti yɛlɔ a ti bobanisia voombo pelei ma.

³⁷Kia i laalani Jelusalɛm gblanga, Ɔlivi Yiyei yeimɛi, faha wai na gbi ti yɛ ngi wooma ti tɔtoilɔ a goohunɛɛlaa, ta Ngewɔ lato ngeleya kpaya yengei nasia va ti tɔnga,

³⁸tɛɛ, “Ngewɔ i Mahɛi na luba i wama Ndemɔi biyei hu! Ndiilɛli i yɛ aijɛnɛ, tato i yɛ Ngewɔ ma!”

³⁹Farisii nasia lɛɛnga ti yɛ fahii hu ti ndeilɔ Yesu ma tɛɛ, “Kaamɔ, nde bi woomableisia ma ti londo!”

⁴⁰Yesu poteilɔ yɛ, “Ngi hugɛ a wue kɛ jisia ti londo bɛɛ, kɔtiisia vulii ta tɔtolɔ a yelei gulala.”

⁴¹Kia i laalani Jelusalɛm gbla fɔɔ, a tei hu lɔ, kɛ i wɔlɔnga Jelusalɛm ma,

⁴²yɛ, “Kiaa foloi ji bɛɛ bi yɛ hani nasia gɔɔlɔ ta wa a ndiilɛli! Kɛɛ kiahuna ti lɔwungɔe bi ma.

⁴³Watii a hitilɔ bi gɔnyɔuisia ti gɔlɔ lo ti bi gala la ti komɛ, ti bi makpa yeegɔlɔi na goohu, ti yei bi ma ta gbua hu gbi.

⁴⁴Ta bi nyanilɔ kpɛmgbɛjɛɛ wua bi leengeisia, tɛɛ kɔtu yakpe bɛɛ lo ngi yɛmɛi pɛleisia hu, ajifa bii watii na gɔni Ngewɔ i wani bi bawova!”

⁴⁵Na wooma Yesu i wuailɔ Ngewɔ Wɛlei bu, i tɔtoo a felegɔblɛisia gbɛlaa na,

⁴⁶ yɛ ti ma, “Nyɛingɔe Ngewɔ Gɔlɛi hu kɛ Ngewɔ ndeilɔ yɛ, ‘Ta nya Wɛlei loli a hɛɛ-wɛlɛ lɔ;’ kɛɛ wu potenga a humablaa ti lɔwuma!”

⁴⁷ Folo gbi Yesu i yɛlɔ a nungaa gaa Ngewɔ Wɛlei bu. Saagbuablaa Waawaisia kɛɛ Sawei Yeekamɔɛisia kɛɛ nungeisia ti mahubleisia ti longɔ yɛla ti ngi waa,

⁴⁸kɛɛ tii pele majɔni pieva ajifa numui gbi ti yɛlɔ a wolo ngi ma, tii loni ngi layie yeengila bɛɛ i hitɛ ti wooma.