Read Ngowili Yekpei Numu Kpɛlɛɛ Va LUKI 2 Bible Online

LUKI 2 - Ngowili Yekpei Numu Kpɛlɛɛ Va bible

LUKI 2

¹Watii nasia ma, Roma Maha Wai Ɔgɔstɔs i sawa lailɔ yɛ ti numui gbi gbawa ti ngi bu, ti ti lɛisia wu kɔlɔ ma.

²Numu gbawalei ji mia yeehaalaye le i wieni ji Kuiriniɔs i yɛ Gɔvinayei ma Siria.

³Numui gbi ti liilɔ ti lemɛisia ti lɛisia wuvaa kɔlɔ ma.

⁴Josɛf i gbuɛilɔ Nasalɛti, Galili lɔlei hu, i li Bɛtlihɛm, Judia lɔɔlɛi hu, Devidi lemɛi. Josɛfi i liilɔ na ajifa Devidi bɔɔsɔ mia wɔɔ a ngie.

⁵Tia Meri lɔ ti lini, nyahɛi na i yɛ faale gbuama. Meri i yɛ koi hu lɔ,

⁶tawao ti loni Bɛtlihɛm lɔ ngi lole-gbelei i hitini.

⁷Kɛ i ngi gblaloi lenga a hindo, i mbeembee kulei hu, i nda tohanisia ti mɛhɛɛ-mɛ-kɔwui hu ajifa ndama gbi ii yɛ ti yeya hota-wɛlei bu.

⁸Mbala mahugbeblaa lɛɛnga ti yɛlɔ ndɔlei yeekakɛi na ma ta yii fonii hu, ta ti mbalangɛisia mahugbe.

⁹Ndemɔi malikei i gɛilɔ a tie, Ndemɔi nɔlɔi i ti gaala, kɛ ti luwanga hulewengɔ.

¹⁰Kɛɛ malikei i ndeilɔ ti ma yɛ, “Wa luwa! Ngi wanga a ngowili yekpe wu wɛ, na a wa a kohunɛ wua nungaa kpɛlɛɛ ma.

¹¹A foloi ji haa, Devidi yeetaahu, ti wu Bawomɔi lenga na Ndemɔi Ngewɔ Maha Heingɔi le!

¹²Ji mia a yee hindei lɔnyala gɛ a wue: wa ndolaa maleilɔ mbeembeengɔ kulehu, i laani tohanisia ti mɛhɛɛ-mɛ-kɔwui hu.”

¹³Ngamɛi na kɛ malika vaha waa ti gbɛɛnga malikei na ma, ta Ngewɔ lato ngule hu tɛɛ,

¹⁴“Tato waa i ye Ngewɔ ma aijɛnɛ tawao ndiilɛli i yɛ dunya nungei nasia ma Ngewɔ liilɛlingɔ a tie!”

¹⁵Kia malikeisia ti yamani aijɛnɛ, mbala mahugbebleisia ti ndeilɔ ti nyɔunyɔ ma tɛɛ, “A mu li Bɛtlihɛm mu hindei ji lɔ i wienga, na Ndemɔi i hugɛnga a mue.”

¹⁶Ti liilɔ a piimɛ, ti Meri lɔ kɛɛ Josɛf kɛɛ ndolaa i laani tohanisia ti mɛhɛɛ mɛ kɔwui hu.

¹⁷Kia mbala mahugbebleisia ti ndolaa lɔni, ti na gbi hugɛilɔ malikei ndeni ti ma kɔlooni ngi ma.

¹⁸Njɛpɛi na mbala mahugbebleisia ti ndeni, i nasia gbi wuhu wuilɔ ti mɛnini.

¹⁹Hindei jisia gbi ti loilɔ Meri nɛmahu tawao i yɛlɔ a gili kaka a tie.

²⁰Mbala mahugbebleisia ti yamailɔ, ta Ngewɔ lato ngule hu na kpɛlɛɛ va ti mɛnini kɛɛ na ti tɔni; kpɛlɛɛ i wieilɔ kia lɔɔ malikei i yɛ ndeni la ti ma.

²¹ Njii wayakpa wooma, ji watii i hitini ndolaa heiva biliya, ti ngi laa heilɔ a Yesu, ndɛi na wɔɔ malikei feni ngi wɛ pɛiŋ ti ya ngi goo wumbu.

²² Josɛf tia Meri ti wua-gbelei i hitilɔ ma, kia Mojisi jawei i ndenila. Faale ti liilɔ a ndoi Jelusalɛm ngi gɛva a Ndemɔi,

²³ kia nyɛingɔ la Ndemɔi jawei hu yɛ, “Hindolo gbi kplalo a ngie a yɛ a Ndemɔi woo lɔ.”

²⁴Ti liilɔ gbɔma saa gbuava a bomukulo fele ɔɔ poowo lɔgbɛ fele, kia Ndemɔi jawei i ndenila.

²⁵Yee watii na kena yila yɛlɔ na, ngi la a Simiɔn, i heini Jelusalɛm. Numu yekpe mia wɔɔ a ngie a luwa Ngewɔ ma, tawao i yɛ Isrɛl Bawolei lɔ mawuloma. Ngewɔ Yafei i yɛ ngi wooma lɔ;

²⁶tawao i ndenga ngovama Simiɔn ma yɛ, ɛɛ haa kɛlee i Mahɛi na lɔ pɛiŋ Ndemɔi i lahei wumbuni wɔɔ njooyova.

²⁷Ngewɔ Yafei i pieilɔ Simiɔn i wua Ngewɔ Wɛlei bu. Kia Yesu lebleisia ti wani a ngie Ngewɔ Wɛlei bu na wieva ngi wɛ sawei i ndeni,

²⁸Simiɔn i ndolaa houilɔ, i nda yakahu, i siɛgbua Ngewɔ ma yɛ,

²⁹“Ndemɔi, bi lahei la i houga kiahuna, pie na nya bi bɔilopoi a nge ngi haa ndiilɛli hu.

³⁰Ajifa nya yamɛisia ti bi bawoyɛi lɔnga

³¹na bi hugbatɛni nungeisia kpɛlɛɛ yama.

³² Yeembawoyei i yɛma a fofo lɔ gɛva a nasia Juublaa yaa tie kɛɛ tato bi nungaa Isrɛl va.”

³³Ndoi ngi nje tia ngi kɛkɛ ti yɛ lonilɔ ti lawongɔ na va Simiɔn ndeni ngi va;

³⁴kɛ Simiɔn i hɛɛnga ti wɛ, i nde ndoi ngi nje Meri ma yɛ, “Wote mbei, Ngewɔ i ndoi ji yoyonga numu gboto nyaniva kɛɛ numu gboto bawova Isrɛl. A yɛlɔ a tɔmaseli a gbua Ngewɔ gama, kɛɛ numu gboto ta njia nyamu lelɔ ngi ma

³⁵aako ti ti gili malondongɔisia gbua foofo ya. Tawao ndiimavɔɔni a bi nda lii nyanilɔ kia kɔbowa houhou i na.”

³⁶Ngewɔ lutui wovangɔ waa i yɛlɔ na, ponyaha a ngie, ngi laa a Ana, ngi kɛkɛ la a Fanuɛl, Asa bondei humɔ a ngie. I hini jɔɛilɔ ngi voningengɔi hu foo wɔfla lekee

³⁷tawao kia ngi wovayii gungɔ yɛla na a foo numu naani gbɔyɔngɔ mahu naani, Ii yɛ a gbua Ngewɔ Wɛlei bu; a folo kɛɛ kpindi, i yɛlɔ a Ngewɔ batu, a sui hou, a Ngewɔ vɛli.

³⁸Yeewatii yakpei na ma, i foeilɔ na, i siɛgbua Ngewɔ ma, i yɛpɛ kɔloongɔ ndoi ma nasia gama ti yɛ Ngewɔ mawulo Jelusalɛm gbuava nduwɔyɛi hu.

³⁹ Kia Josɛf ta Meri ti kpɔyɔni a na kpɛlɛɛ wiela Ndemɔi jawei longɔ la, ti yamailɔ ti yeetaahu, Nasalɛti, Galili lɔlei hu.

⁴⁰Ndoi loolailɔ, i gbaya; ngi nɛmahu lewengɔ waa yɛla, tawao Ngewɔ lubɛi i yɛlɔ ngi ma.

⁴¹ Foo gbi wɔɔ Yesu lebleisia ti yɛlɔ a li Jelusalɛm Tewemahu Gomɛi va.

⁴²Kia Yesu i guni a foo puu mahu fele, ti liilɔ yee komɛi hu kia wɔɔ ti yɛ piela.

⁴³Kia komɛi i gbɔyɔni, ti tɔtoilɔ a yama la ti yeetaahu, kɛɛ ndopoi Yesu i loilɔ wooma Jelusalɛm. Ngi lebleisia tii yɛ ji hugɔɔ;

⁴⁴ti giliilɔ tɛɛ ta fahii lia kulɔ, faale ti jiɛilɔ folo yila kpɛiŋ ti ya tɔtoo a ngi gɔkɔlila ti leinyɔuisia lia kɛɛ ti ndiamɔisia.

⁴⁵Tii ngi lɔni, faale ti yamailɔ gbɔma Jelusalɛm ta ngi gɔkɔli.

⁴⁶Lɔwɔi yeesawei ma ti ngi maleilɔ Ngewɔ Wɛlei bu, i heini tia Juuwu kaamɔisia, a wolo ti ma a ti mɔli a mɔɔlingaa.

⁴⁷Nasia gbi ti ngi woo mɛnini ti wuhu i wuilɔ nɛmahulewe gbɛmboi nasia va i yɛ nguaa.

⁴⁸Ngi lebleisia ti wuhu i wuilɔ ji ti ngi lɔni, kɛ ngi nje i ndenga ngi ma yɛ, “Ndoi ji, gbɛe bi ji wieni a mue? Mua bi kɛkɛ mu lii nyaningɔ wa le gɛ, ma bi gɔkɔli.”

⁴⁹I poteilɔ ti ma yɛ, “Gbɛe wu yɛ nya gɔkɔli? Wuii kɔɔ kɛ mahoungɔ ngi yɛ nya Kɛkɛ wɛlei bu?”

⁵⁰Kɛɛ, tii ngi gbɛmboi yeembui gɔni.

⁵¹Tia Yesu-ni ti yamailɔ Nasalɛti, tawao i gooloilɔ ti wɛ na. Ngi nje i hindei jisia gbi lamagbatɛilɔ ngi lii hu.

⁵² Yesu gbuhɛi i loolailɔ kɛɛ ngi nɛmahui, tawao ngi hinda nɛngɔ yɛla Ngewɔ wɛ kɛɛ nuuvungaa.