Read Ngowili Yekpei Numu Kpɛlɛɛ Va LUKI 20 Bible Online

LUKI 20 - Ngowili Yekpei Numu Kpɛlɛɛ Va bible

LUKI 20

¹Folo yila ma, ji Yesu i yɛ nungaa gaama Ngewɔ Wɛlei bu, a Ngowili Yekpei hugɛ a tie, Saagbuablaa Waawaisia kɛɛ Sawei Yeekamɔɛisia kɛɛ kpakoleisia ti wuailɔ,

²ti ngi mɔli tɛɛ, “Hugɛ lɛɛ a mue, kpayɛi yeegbɔɔ i bi wɛ hindei jisia wieva, tawao ye lɔ i yeekpayei ji veni bi wɛ?”

³I ti mɔli gbɛmboilɔ yɛ, “Nya bɛɛ nga wu mɔlilɔ a mɔli yila; a hugɛ lɛɛ a nge,

⁴Nguɛi na Jɔn i yɛ nungaa wua la yeekpayei i gbuani Ngewɔ gama lɔ ɔɔ nuuvu?”

⁵Ti tɔtoilɔ a mawali houla luahu tɛɛ, “Mu ndengaa muɛɛ ‘I gbuani Ngewɔ gama lɔ,’ a ndelɔ yɛ, ‘Gbɛe hɔɔ wuii lani a Jɔn?’

⁶Tawao mu ndengaa muɛɛ ‘I gbuani nuuvu gama lɔ,’ fahii ji kpɛlɛɛ mbei ta mu hɔwɔhɔwɔlɔ a kɔtii; ajifa ti langɔ yɛla la vulii kɛ Ngewɔ lutui lɔ wɔɔ a Jɔn.”

⁷Faale ti ndeilɔ Yesu ma tɛɛ, “Muii Jɔn gbayei gbuamɛi gɔɔ.”

⁸Kɛ Yesu i ndenga ti ma yɛ, “Nya bɛɛ ngɛɛ hugɛ hɔɔ a wue kpayei yeegbɔɔ nga hindei jisia wie la.”

⁹ Na wooma Yesu i dɔmii ji gbuɛilɔ nungeisia wɛ yɛ, “Taamɔ yila i tuhani gbala lɛilɔ, i ndo ngengeblaa yeya, i li ndɔlɔ weka hu hinda huguhangɔ va.

¹⁰Kia watii i hitini, i bɔilopo loilɔ ngengeblɛisia gama yɛ ti ngi gɔ tuhani hu; kɛɛ ngengeblɛisia ti yeebɔilopoi leweilɔ, ti pie i yama a yeya haaka.

¹¹Kɛ i bɔilopo weka longa; kɛɛ ngengeblɛisia ti ta bɛɛ leweilɔ, ti ngi yawufe, ti pie i yama a yeya haaka.

¹²Kɛ i bɔilopoi yeesawei longa; kɛɛ ngengeblɛisia ti ta bɛɛ nɛmuilɔ, ti ngi gbua kpalɛi hu.

¹³Kɛ kpalamɔi i ndenga yɛ, ‘Gbɔɔ na nga pie? Nga nya liima hindoloi lolɔ; tɛngaa ta ba gɔlɔ ngi ma.’

¹⁴Kɛɛ kia ngengeblɛisia ti ngi lɔni, ti ndeilɔ ti nyɔunyɔu ma tɛɛ, ‘Kpalamɔi hindoloi lɔ. A mu ngi waa kɛ ngi jɔhani i yɛnga a mu woo!’

¹⁵Faale ti ngi gbuɛilɔ kpalɛi hu, ti ngi waa. “Gbɔɔ na kpalamɔi a pie a tie?

¹⁶A walɔ i ngengeblɛi nasia waa, i kpalɛi ve ngengeblaa weka wɛ.” Kia nungeisia ti ji mɛnini, ti ndeilɔ tɛɛ “Gbula ma!”

¹⁷ Yesu i ti gbeilɔ, i mɔli yɛ, “Gbɔɔ hɔɔ Ngewɔ Gɔlɔ nyɛingɔi ji yeembui le: ‘Kɔtii na pɛlɛ loblɛisia ti gbeeleni ma tɛɛ ii yekpeni, i wotenga a baama gɔtii kɔtii kpɛlɛɛ ma?’

¹⁸Numu gbi i gulangaa yeekɔtii na ma, a ngi ŋɔnaŋɔnalɔ hulewengɔ, tawao yeekɔtii na i gulangaa numu gbi ma, a ngi gbuukpulɔ.”

¹⁹Sawei Yeekaamɔisia kɛɛ Saagbuablaa Waawaisia ti kɔɛilɔ kɛ Yesu i dɔmii ji gbuani ti va lɔ, faale ti longɔ yɛla ti ngi hou ngamɛi na kɛɛ ti luwɛilɔ nungeisia ma.

²⁰Famia ti yɛlɔ a ngi yabɛɛ, ta nungaa pawa ngi yabɛva, yeenungeisia ta kɛ kɛ tɔnyablaa lɔ a tie, aako ti njia nyamu hou ngi la, ti ngi hou ti ngi ve Gɔvinei wɛ.

²¹Yeenungeisia ti Yesu mɔlilɔ tɛɛ, “Kaamɔ, mu kɔɔlɔ kɛ pɔɔnɛi mia ba nde tawao ba nungaa gaa la; bii gbeweni tomɛi yeegbɔɔ numu i looni na, tawao ba nungaa gaa vulii a tɔnyɛi lɔ kɔlooni Ngewɔ welei ma.

²²Sawei lumangɔe mu wɛ pawɛi gulava Roma Maha Wai ma ɔɔ ii lumani?”

²³Kɛɛ Yesu i kasoei na lɔilɔ ti kulani, kɛ i ndenga ti ma yɛ,

²⁴“A navoo gbala yila gɛ lɛɛ a nge. Yee gbuaye lɔ kɛɛ ngi biyei ji i navoei ji ma?” Ti kpɛmboilɔ tɛɛ “Roma Maha Wai mia.”

²⁵Kɛ i ndenga ti ma yɛ, “A na ve Roma Maha Wai wɛ Roma Maha Wai woo le, wu na ve Ngewɔ wɛ Ngewɔ woo le.”

²⁶Kia tii guni a ngi houla ngi layie hu numui na kpɛlɛɛ yaama, ti ma i yɛilɔ louŋ, ti wuhu wungɔ kpɛmboi na va i nguani.

²⁷ Sadusiisia mia wɔɔ ta nde tɛɛ numu ɛɛ vulu aa hiye hee hu. Ti lɛɛnga ti wailɔ ngi gama, ti ngi mɔli tɛɛ,

²⁸“Kaamɔ, Mojisi i sawei nyɛilɔ mu va yɛ ‘numu ndewehindoi i hangaa, i ngi nyahɛi lo kɛɛ tii ndo leni, mahoungɔ yeenumui i nyahɛi na wumbu i ndeengaa le ngi ndewei wɛ.’

²⁹Ndewehingaa wɔfla ti yɛlɔ wɔɔ na; yeehaalayei i nyaha gɔli, i haa ii ndeengaa leni.

³⁰Kɛ ndeehindoi yeefelei i nyapoi gɔlinga, i haa ii ndo leni ma.

³¹Yeesawei bɛɛ i nyapoi gɔlilɔ. Ti wɔflangɔ kpɛlɛɛ ti ngi gɔlilɔ kɛɛ ti hailɔ tii ndo leni ma.

³²Na wooma, nyapoi bɛɛ i hailɔ.

³³Foloi kɛyila haablaa ta vulu ti hiye hee hu, ye lɔ ngi nyaha a yɛ a nyapoi ji? Ajifa ti wɔflangɔ ti ngi gɔlilɔ a nyaha la.”

³⁴Yesu i ti mɔli gbɛmboilɔ yɛ, “Nungei nasia ti dunyei hu kiahuna tia mia ta nyaha gɔli ɔɔ ta nyaha ve hini wɛ.

³⁵Kɛɛ nasia ti mahoungɔ a yɛla hiyeva hee hu foloi nasia ma kɛyila, tɛɛ nyahagɔli ɔɔ hinijɔɔ hinda wie.

³⁶Ta wielɔ kia malikeisia ti na tawao tɛɛ ya gu a haala. Tia mia Ngewɔ leengeisia a tie, ajifa ti hiyenga hee hu.

³⁷Mojisi i kɛnga leeŋ kɛ haablaa ta vululɔ ti hiye hee hu. Ngewɔ Gɔlɛi yeemia i ndɔgbɔi na hinda hugɛni ngɔmbui i yɛ vo ma kɛɛ ɛɛ mɔ, Mojisi i Ndemɔi lolilɔ na a ‘Ebraham kɛɛ Aisaki kɛɛ Jekɔpi ti Yewɔɛi.’

³⁸Kiahuna haablaa ti Yewɔ ya a ngie kɛlee fuublaa gbamaile ti gbi ti vulungɔe ngi wɛ.”

³⁹Sawei Yeekaamɔisia lɛɛnga ti yɛpɛilɔ tɛɛ, “Kaamɔ, kpɛmboi na bi nguanga kpekpengɔ wa le!”

⁴⁰Ajifa tii ya gbɔma liiloni ngi mɔliva a mɔli gbi.

⁴¹Kɛɛ Yesu i ti mɔlilɔ yɛ, “Ta yee gu a ndela tɛɛ Mahɛi Devidi hindolo lɔ a Ngewɔ Maha Heingɔi?

⁴²Ajifa Devidi vulii i ndeilɔ Saam Gɔlɛi hu yɛ, ‘Ndemɔi ndeilɔ nya Lemɔi ma yɛ Hei mbei nya yejei hu,

⁴³Haaŋ ngi bi gɔnyɔuisia wua bi gɔwɔbu.’

⁴⁴Devidi i yɛ Ngewɔ Maha Heingɔi loli a Ndemɔi; Ngewɔ Maha Heingɔi a yee na yɛ a Devidi lo?”

⁴⁵Yesu i ndeilɔ ngi gaalopoisia ma, numui kpɛlɛɛ ti humɛni, yɛ,

⁴⁶“A wu mahugbe a Sawei Yeekaamɔisia, nasia ti longɔ a lewetewelaa bobani guhakuhɛisia hu, ti longɔ nungaa ti yɛ a va ti ma a bagɔɔma njɔpɔwahuisia, ti longɔ a heimi yeekpekpeisia hɛɛ wɛleisia bu kɛɛ bama heimɛisia mɛhɛɛ-mɛ-gomɛisia hu,

⁴⁷ta ponyahangɛisia ti wɛleisia gbua ti yeya a kava, na wooma ta hɛɛ huguhangɔisia wie aako ti kɛ kɛ ti lɔnyangɔe. Kpalɛi na kuna Ngewɔ a nda ti ma i leweni kpɛlɛɛ ma.”