Read Ngowili Yekpei Numu Kpɛlɛɛ Va LUKI 21 Bible Online

LUKI 21 - Ngowili Yekpei Numu Kpɛlɛɛ Va bible

LUKI 21

¹Yesu i yaama jiɛilɔ fahii ma, i kpatɛblaa gboto lɔ ta navoei wu kaŋaai na hu i yɛ Ngewɔ Wɛlei bu.

²I ponyaha vɛlingɔ yila bɛɛ lɔilɔ i sɛnti fele gula hu.

³Kɛ i ndenga yɛ, “Gbɛɛ ngi hugɛ a wue, navoei na ponyaha vɛlingɔi i feni i leweni numui gbi ti ndɛi ma.

⁴Gbamaile na kpatɛbleisia tii yɛ gbeweni fa tamia ti kpuani ti gbatei ma ti fe; kɛɛ ta, kia bɛɛ ngi vɛlingɔ i na kpɛlɛɛ lɔ veni i yɛ ngi yeya mɛva.”

⁵Yesu gaalopoisia lɛɛnga ti yɛlɔ a yɛpɛ kɔloongɔ Ngewɔ Wɛlei ma, ta ngi nyandelaa batu kɛɛ kɔtu nyandenyandei nasia ti toni la kɛɛ hani nasia nungaa ti yɛ fe Ngewɔ va.

⁶I ndeilɔ yɛ, “Hani jisia wu tɔma, watii a hitilɔ kɔtu yakpe bɛɛ ɛɛ lo laani mbei ngi mbaa mahu; ta ti kpɛlɛɛ wololɔ ti ti gula.”

⁷Ti ngi mɔlilɔ tɛɛ, “Kaamɔ, migbe lɔ ji a wie tawao gbɔɔ a yɛ a tɔmaseli kɛva kɛ ngi wielei i hitinga ma?”

⁸Kɛ Yesu i ndenga yɛ, “A wu mahugbe ta wu yaka; ajifa numu gboto ta walɔ nya biyei i ti ma, ta nde tɛɛ ‘Tamia a nge! Watii i lukpenga kpla!’ Waa hitɛ ti wooma.

⁹Tawao wu kɔisia malɔwɔ mɛningaa kɛɛ ji nungaa ta ganga a ti gɔmɛtisia, waa luwa; ajifa hindei jisia ta wielɔ pɛiŋ, kɛɛ tii kɛni kɛ kɛlɛmɛi lɔ na kpla.”

¹⁰I liilɔ gulɔma a ngi yɛpɛi yɛ, “Kɛnyɛisia ta gɔlɔ a ti nyɔunyɔ, mahawuisia ta gɔ luahu;

¹¹ndɔlei a gbɛlilɔ hulewengɔ hinda gboto, tawao ndɔlei a walɔ kɛɛ pilipili-heegbɛisia hinda gboto; tawao hinda maluwangɔngaa kɛɛ tɔmaseli wawangaa ta yɛlɔ na ta gbua ngelei ma.

¹²Kɛɛ pɛiŋ hindei jisia kpɛlɛɛ ti ya wie, ta loko lalɔ wu ma, ti wu yakpɛ a nyamu, ti wu ve hɛɛ wɛleisia yeekulɔblɛisia wɛ kɛɛ kpindiwɛleisia, tawao ta walɔ a wue maha wawangaa gulɔ kɛɛ tokuloisia nya biyei va.

¹³Ji a yɛ a watii lɔ wa gu a Ngowili Yekpei lela.

¹⁴ Faale i lo kulɔma wu hugbatɛ nɛmahu aako wu lii aa hɛlɛ wa yee wua yekpe magao Kotii hu.

¹⁵Ajifa nga nɛmahulewe yɛpɛngaa wulɔ wu la wu juwuisia tɛɛ gu a lola kulɔ ɔɔ ti hou a mawali.

¹⁶Wu lebleisia kɛɛ wu ndewehingeisia kɛɛ wu lenyamusia kɛɛ wu ndiamɔisia ta wu velɔ, tawao ta wu lɛɛnga waalɔ;

¹⁷Numui gbi ta lololɔ a wue nya va.

¹⁸Kɛɛ wu wundiei yeengila bɛɛ ɛɛ jukulu.

¹⁹A lo kpaŋ, ajifa ndiiloi na wa pie ta lɔ a pie wu kunafɔ lɛɛvui majɔɔ.

²⁰“Kɛɛ wu tɔngaa kɔi i Jelusalɛm galanga, a kɔɔ na kɛ ngi wololei i lalanga kpla.

²¹Na wiengaa, nungei nasia ti Judia ti wila ti lɛ ngiyeisia hu, nasia ti Jelusalɛm goohu ti gbua na, tawao nasia ti tateisia hu taa wa yeetei ji hu;

²² ajifa watii na mia Ngewɔ a kpalɛ la Isrɛlbleisia ma ti jumbuisia va aako na Ngewɔ Gɔlɛi i ndeni i wie.

²³A yɛ nyamuni kpa a watii na koonyahangɛisia va kɛɛ koimɛisia! Ajifa ndiimɔnɛ wa a yɛlɔ dunyei hu tawao Ngewɔ liilewengɔ a yɛla nungei jisia ma;

²⁴ta ti lɛɛnga waalɔ a kɔbowei, ti yeepekeisia hou a kɔhoungaa, ti ti vayafaya kɛnyɛisia kpɛlɛɛ hu; kɛnyɛblaa wekangaa tii Ngewɔ gɔɔ ta Jelusalɛm niwaniwalɔ ti gɔwɔbu haaŋ i to yeekɛnyɛisia ti watii gbɔyɔ-gbelei ma.

²⁵ “Tɔmaselingaa ta gɛlɔ foloi ma kɛɛ ngalui kɛɛ tumbekeisia, tawao kɛnyɛisia ti dunyei hu ti lii a nyanilɔ, ti wuhu bangɔ gboyei goondowoi va kɛɛ njagateisia,

²⁶nungaa ta wulɔ ma a nduwɛi a ji ta yɛ na mawulo ma i wama dunyei gbi mahu, ajifa kpayei nasia ti ngelei ma ta gbualɔ ti jia-weleisia ma.

²⁷ Na wiengaa, kɛ ti Nuuvu Hindoloi lɔnga a wa ngelei ma a kpaya wa kɛɛ temaya.

²⁸Hindei jisia ti tɔtongaa a wiela, a hiye wu lo, wu wu wuisia wumbu wu ngeleya gbe, ajifa wu Bawolei mia i lukpema kpla.”

²⁹Kɛ i sale yila heinga ti ma yɛ, “A gili lɛɛ a figi wulii kɛɛ ngulu wekeisia gbi;

³⁰wu tɔngaa lekee ta ndawa gbua, wa kɔɔlɔ kɛ hamɛi ma i gutunga.

³¹Hii lɔɔ i na, wu hindei jisia lɔnga ta wie, wa kɔɔlɔ kɛ Ngewɔ Mahayɛi ma i gutunga.

³²“I yɛ wu nɛmahu kɛ hindei jisia ta wie pɛiŋ nungei nasia ti vulungɔ kiahuna ti ya gbɔyɔ a haala.

³³Aijɛnɛ tia dunyei ta gbɔyɔlɔ kɛɛ nya layiesia ti hu ɛɛ nyani kunafɔ.

³⁴“Kɛɛ a wu mahugbe waa wua yekpe ve mɛhɛɛ-mɛ-gomɛnga wɛ kɛɛ ndɔ gbolila hulewengɔ kɛɛ ndɛvui ji yeendiihɛlɛ mahindeisia aako watii na aa wa wu lii gbi ii ma kia numu a gɔwɔ a mani.

³⁵Gbamaile foloi na a gbualɔ numui gbi ma ti heini dunyei yeehinda gbi.

³⁶Faale wu valangɔ i yɛla kpelema gbi, wa hɛɛ Ngewɔ ma aako wu kaahu majɔɔ hindei jisia gbi huvova kɛɛ lova Nuuvu Hindoloi gulɔ ji a wa.”

³⁷Hokii na hu Yesu i yɛ luva nungaa gaama Ngewɔ Wɛlei bu, kɛɛ kpɔkɔ i wɛlɛngaa wɔɔ, i yɛ li Ɔlivi Yiyei hu lɔ a yii na.

³⁸Ngele i wongaa wɔɔ, numui gbi ti yɛ humbulɔ Ngewɔ Wɛlei bu wolova ngi ma.