Read Ngowili Yekpei Numu Kpɛlɛɛ Va LUKI 22 Bible Online

LUKI 22 - Ngowili Yekpei Numu Kpɛlɛɛ Va bible

LUKI 22

¹Bledii gbamɛi na yisti gbii hu yeekomɛi i lukpeilɔ kpla. Ta yeekomɛi loli a Tewema Gomɛi.

²Saagbuablaa Waawaisia kɛɛ Sawei Yeekaamɔisia ti yɛlɔ a pele gɔli Yesu waavaa ndɔwuma ajifa ti luwangɔ yɛla nungeisia ma.

³Kɛ Seitana i wuanga Judas Kɛriɔtmɔi lii hu, kaalopo puu mahu feleisia yeengila.

⁴I gbuɛilɔ i li tia Saagbuablaa Waawaisia kɛɛ Ngewɔ Wɛlei mahugbe polisisia ti yɛpɛ kɔlooni pelei na ma a Yesu vela ti wɛ.

⁵Ti goohu i nɛɛlɔ wa kɛ ti ndenga tɛɛ ta ngi gɔlɔ a navoo.

⁶Judas i lumɛilɔ ji ma, tawao i tɔtoilɔ na a pele yekpe gɔlila Yesu majiava ti ma na fahii ɛɛ magɔɔ.

⁷Bledii Gbama Gomɛi yeefoloi i hitiilɔ ma tawao yeefoloi na ma lɔ ta Tewema Gomɛi yeembalangɛisia waa.

⁸Yesu i Pita kɛɛ Jɔn loilɔ, i vɛli ti ma yɛ, “A li wu Tewema Gomɛi yeemɛhɛɛ hugbatɛ aako mu mɛ.”

⁹Ti ngi mɔlilɔ tɛɛ, “Mindo lɔ bi longɔ mu hugbatɛ na?”

¹⁰I ndeilɔ ti ma yɛ, “Wu wuangaa ta wai hu, wa ndakpao yila maleilɔ a lia njahakɛi. A to ngi ma wu li pɛlei na bu i lima na,

¹¹wu nde pɛlɛmɔi ma wɛɛ, ‘Kaamɔ yɛ, ɔɔ hota lomui na mua nya gaalopoisia ma Tewema Gomɛ mɛhɛɛ mɛ na?’

¹²A ngeleya lomu lakpa yila gɛlɔ a wue na gbatɛngɔ; a mɛhɛɛ hugbatɛ na.”

¹³Ti liilɔ ti hindei kpɛlɛɛ male kia Yesu i ndeni la, kɛ ti Tewema Gomɛ mɛhɛɛ hugbatɛnga.

¹⁴Ji yeemɛhɛɛ mɛ-gbelei i hitini, Yesu i heilɔ ngi nda heimi tebii ma tia ngi gaalopoisia.

¹⁵I ndeilɔ ti ma yɛ, “Nya longɔ wa le mua wueni mu Tewema Gomɛ mɛhɛɛ ji mɛ pɛiŋ ngi ya haa;

¹⁶gbamaile, ngi hugɛ a wue kɛ ngɛɛ ya gbɔma mɛ kɛlee yeemɛhɛɛ ji yeembui i gɛ gbalauŋ a Ngewɔ Mahayɛi wa-gbelei.”

¹⁷Kɛ i bolei wumbunga, i siɛgbua Ngewɔ ma, i nde ti ma yɛ, “A ji hou wu kɔlɛkɔlɛ wu ma;

¹⁸gbamaile, ngi hugɛ a wue kɛ ji wooma, ngɛɛ ya ngulu-wua lɔi ji gboli haaŋ Ngewɔ Mahayɛi i wa.”

¹⁹Kɛ i bledii gbuha yila wumbunga, i siɛgbua Ngewɔ ma, i ngalingali, i fe ti wɛ a ngilangila yɛ, “Nya luwui lɔ, na fɛngɔ wu va. A ya a ji wie wa ngili a nge.”

²⁰ Hi gbɔma i pieni, i bolei veilɔ ti wɛ ji ti na gbɔyɔni, yɛ “Bolei ji lɔ a hindei yangilingɔ ninɛi nya ŋamɛihu, na ngi puni wu va.”

²¹ “Kɛɛ, a wote mbei! Numui na i nya vema mua ta lɔ mɛhɛɛ mɛma tebii ji ma.

²²Nuuvu Hindoloi a haalɔ huɛɛŋ kia Ngewɔ i hugbatɛni la wɔɔ kɛɛ i nyamuni kpa numui na va a ngi ve!”

²³Kɛ ti tɔtonga a ti nyɔunyɔu mɔlila ye lɔ ti lia i wama ji wiema.

²⁴ Yesu gaalopoisia ti ndabla wa wieilɔ kɔloongɔ numui na ma mahoungɔ ti ngi wumbu a numu wa ti lia.

²⁵Kɛ i ndenga ti ma yɛ, “Nasia mahangaa a tie kɛnyɛisia mahu ta temaya lɔ yayenge ti mahu; tawao nasia kpaya i ti wɛ ti mahu ti longɔ nungaa ti yɛ a ti loli a hindawandabla,

²⁶kɛɛ ma ii houni i yɛ hii wu lia; numui na numu wa le wu lia i wote a wu lopo wulo, tawao tokulɔi i wote a bɔilopo.

²⁷Gbamaile, numui yeegbɔɔ tewengɔ ngi mbaa ma, numui na a hei tebii ma mɛhɛɛ mɛva ɔɔ numui na a mɛhɛɛ ve ngi wɛ kɛɛ njɛi? Numui na a hei tebii ma ta ii le? Kɛɛ nya wu lia kia bɔilopo.

²⁸“Wua mia wu nya wooma wɔɔ gba nya hinda gbɔugbɔisia hu;

²⁹kia nya Kɛkɛ i nya yɛnga a maha, hii nga yeekpaya yakpei ve wu wɛ,

³⁰ aako mua wueni mu mɛhɛɛ mɛ, mu kpɔle wie nya tebii ma nya mahayɛi hu tawao wu hei maha-heimangaa wa kiti lewe Isrɛl leenga puu mahu feleisia ti bɔɔsɔisia ti luahu.

³¹“Saimɔn, Saimɔn, wolo! Seitana i kpaya huvɛlinga aako i wu gbi gɔlɛ, yeekpekpeisia gbuava yeenyamuisia lia kia kpalamɔi a mbei mayafɛla,

³²kɛɛ ngi Ngewɔ vɛlinga bi va, Saimɔn, kɔɔ baa gbaha a lala a nge; tawao bi yamangaa nya ma, bi pie bi mbaangɛisia ti lii i gbaya.”

³³Pita i poteilɔ yɛ, “Ndemɔi, nya magbatɛngɔe mua bie mu li kpindiwɛlei bu ɔɔ ti mu waa.”

³⁴Kɛ Yesu i ndenga ngi ma yɛ, “Gbɛɛ ngi hugɛ a bie, Pita, pɛiŋ tɛhinɛi i ya gokole a ngewohui ji, ba mawalilɔ heima sawa bɛɛ bii nya gɔɔ.”

³⁵Kɛ i ngi gaalopoisia mɔlinga yɛ, “Kpelei wɔɔ ngi wu loni wuii lini a navoo ɔɔ kpafa ɔɔ kɔɔwa, wu baalɔ a hani gbi?” Ti kpɛmboilɔ tɛɛ, “Sawo.”

³⁶Kɛ i ndenga yɛ, “Kɛɛ kiahuna na, numui na navoo i ngi yeya ɔɔ kpafa, i li la; tawao numui na kɔbowa ii ngi yeya, i ngi bobani majia i ngeya.

³⁷Gbamaile gbɛɛ ngi hugɛ a wue kɛ Ngewɔ Gɔlɛi na i ndeni kɔloongɔ nya ma yɛ, ‘Ti ngi gbɛɛnga sawa nyanibleisia ma’ nda a houlɔ ajifa na gbi lekee nyɛingɔ nya ma, i wiema nya gama huɛɛŋ.”

³⁸Ngi gaalopoisia ti ndeilɔ ngi ma tɛɛ, “Ndemɔi, kɔbowa fele gbe!” Kɛ i potenga i nde ti ma yɛ, “Na a gulɔ!”

³⁹Yesu i gbuɛilɔ ta wai hu i lɛ Ɔlivi Yiyei hu kia i yɛ pie la watii gbi, kɛ ngi gaalopoisia ti tonga ngi ma.

⁴⁰Kia i foni hindei na i yɛ ngi nɛmahu liva na, i ndeilɔ ti ma yɛ, “A Ngewɔ vɛli kɔlɛya aa wu male.”

⁴¹Kɛ i gbuanga ti ma, i li kulo, i wombi gbakpa, i Ngewɔ vɛli yɛ,

⁴²“Kɛkɛ, i nɛngaa bi wɛ, pie bolei ji, kpalɛi i ndavengɔ, aa foo nya ma; na hu gbi bi liimɛi i wie, nya ndɛi ii le.”

⁴³Malika yila i gbuɛilɔ aijɛnɛ i gɛ a ngie, i ngi lii gba.

⁴⁴Ndiimɔɔnɛ wa i yɛlɔ ngi ma faale i Ngewɔ vɛlilɔ ngagbalɛngɔ i lewe haalayei ma; tawao fɔndɛi na i yɛ gbua ngi ma i wieilɔ kia ŋama gate wawangaa, a hitɛ ndɔmɛi.

⁴⁵Kia i hiyeni Ngewɔ vɛlimɛi i yamɛilɔ ngi gaalopoisia gama kɛɛ i maleni ndiinyani i pienga ti yiinga.

⁴⁶I ndeilɔ ti ma yɛ, “Gbɛe wu yiima? A hiye wu Ngewɔ vɛli aako kɔlɛya aa wu male.”

⁴⁷Yesu i loni yɛpɛmaa, faha waa ti gbua nga, ngi gaalopoisia yilayee, Judas, i looni ti gulɔ. I wɛilɔ Yesu gama ngi lagɔmiva.

⁴⁸Kɛɛ Yesu ndeilɔ yɛ, “Judas, ndagɔmi lɔ bi longɔ bi Nuuvu Hindoloi majia la?”

⁴⁹Kia kaalopoi nasia ti yɛ Yesu gbla ti tɔni gbɔɔ i wama wiema, ti mɔlilɔ tɛɛ, “Ndemɔi, mu mu gɔbowɛisia laala nga?”

⁵⁰Kɛ yeengila i Saagbuablɛisia ti gulɔmɔ wai luwei ŋɔnanga i ngi yejama wolii lewe na.

⁵¹Kɛɛ Yesu i ndeilɔ yɛ, “I gɛlɛ na ma!” I jailɔ a taamɔi wolii kɛ yeengolii i bawonga.

⁵²Kɛ Yesu i ndenga Saagbuablaa Waawaisia ma kɛɛ Ngewɔ Wɛlei mahugbe gugbɛisia kɛɛ kpakoleisia, nasia ti wani ngi houma yɛ, “Wu wanga a kɔbowangaa kɛɛ kpɔnangaa nya houva bi tɔaa bɛɛ kpundɛ gulamɔ mia a nge?

⁵³Mua wueni mu yɛlɔ Ngewɔ Wɛlei bu folo gbi kɛɛ wuii lapini nya houva. Kɛɛ wu nda watii mia i hitinga wua Seitana-ni, kpindi yeemahɛi.”

⁵⁴Ti Yesu houilɔ ti li a ngie Saagbuablɛisia ti gulɔmɔ wai yeepɛlɛbu, Pita a to ti ma kuhama.

⁵⁵Kia ti ngɔmbui lani katei lia ti hei kpla, Pita bɛɛ i liilɔ i hei ti lia.

⁵⁶Nyaha-bɔilopo yila i ngi lɔilɔ i heini ngɔmbuvoi ma; kɛ i ngi gbenga tiŋ yɛ, “Taamɔi ji bɛɛ i yɛlɔ Yesu wooma!”

⁵⁷Kɛɛ Pita i mawalilɔ ma yɛ, “Nyapoi, ngii ngi gɔɔ lɛ pɛiŋ.”

⁵⁸Kia hu i lɛmbini kulo kɛ numu weka i ngi lɔnga yɛ, “Bia bɛɛ ngi gaalopoi lɔ a bie.” Kɛɛ Pita ndeilɔ yɛ, “Ndakpei, ta ya a nge.”

⁵⁹Kia gbɔma hu i lɛmbini i gu a hawa yila, numu weka i laliigbɛilɔ ma yɛ, “Tɔnya le, taamɔi ji bɛɛ i yɛlɔ ngi wooma ajifa Galilimɔ mia a ta bɛɛ.”

⁶⁰Kɛɛ Pita i ndeilɔ yɛ, “Ndakpei, ngii kɔɔ gbɔɔ bi ndema.” Kɛɛ ngamɛi na, Pita i loni yɛpɛmaa kɛ tɛhinɛi i gokolenga.

⁶¹Kɛ Ndemɔi i wotenga i Pita gbe. Kɛ i hitɛnga Pita wɛ ji Ndemɔi i ndeni ngi ma yɛ, “Pɛiŋ tɛhinɛi i ya gokole haa, ba mawalilɔ nya hindama heima sawa.”

⁶²Kɛ Pita i gbuanga i wɔɔ ndalewengɔ ma.

⁶³Nasia Yesu makpangɔ yɛla ti yɛlɔ a hɛlɛ ngi ma, ta ngi lewe.

⁶⁴Ti ngi yaama yiliilɔ ta nde ngi ma tɛɛ, “Numui na i bi leweni ngi gɛ lɛɛ!”

⁶⁵Ti mbɛlɛnyani yɛpɛ weka gboto leilɔ ngi ma.

⁶⁶Kia ngele i woni, kpakoleisia kɛɛ Saagbuablaa Waawaisia kɛɛ Sawei Yeekaamɔisia ti gomɛilɔ kɛ ti wanga a Yesu yeekootii na gulɔ.

⁶⁷Kɛ ti ndenga tɛɛ, “Hugɛ a mue ina bia lɔ Ngewɔ Maha Heingɔi a bie.” Kɛɛ i ndeilɔ yɛ, “Ngi hugɛ bɛɛ a wue, wɛɛ la la;

⁶⁸tawao ngi wu mɔlinga a mɔli, wɛɛ kpɛmbo.

⁶⁹Kɛɛ i hiye watii ji ma, Nuuvu Hindoloi a yɛlɔ heini Ngewɔ na kpayei gbi i ngi wɛ ngi yeja hu.”

⁷⁰Kɛ ti gbi ti ngi mɔlinga tɛɛ, “Kɛ bia lɔ hɔɔ Ngewɔ Hindoloi a bie?” Kɛ i kpɛmbonga yɛ, “Wua vulii wu ndenga kɛ tamia a nge.”

⁷¹Kɛ ti ndenga tɛɛ, “Muii ya gbeweni selingaa va! Mua vulii mu na mɛninga i ndenga!”