Read Ngowili Yekpei Numu Kpɛlɛɛ Va LUKI 23 Bible Online

LUKI 23 - Ngowili Yekpei Numu Kpɛlɛɛ Va bible

LUKI 23

¹Njialebleisia gbi ti hiyeilɔ ti li a Yesu Paileti gama.

²Kɛ ti tɔtonga a ngi nyamui gɛla tɛɛ, “Mu taamɔi ji houilɔ a wuaa mu bondeisia gbi woohu yɛ ti ganga a pawɛi gulala Roma Maha Wai ma, tawao yɛ ta vulii lɔ Ngewɔ Maha Heingɔi a ngie tawao na kɛilɔ kɛ maha mia a ngie.”

³Kɛ Paileti i ngi mɔlinga yɛ, “Juubleisia ti mahɛi a bia lɔ?” Kɛ i kpɛmbonga yɛ, “Bia vulii bi ndenga.”

⁴Kɛ Paileti i ndenga Saagbuablaa Waawaisia ma kɛɛ fahii gbi yɛ, “Ngii sabu gbi lɔni taamɔi ji lɛɛva.”

⁵Kɛɛ ti nɔɛilɔ huɛɛŋ ndɛisia wɛlɛvaa Yesu ma tɛɛ, “Taamɔi ji lɔ nungaa ti lii gbemgbama a kaai na i ti gaama la Judia lɔlei hu gbi, i lɔto Galili i foo fa mbei.”

⁶Kia Paileti i ji mɛnini, i mɔlilɔ ina Galilimɔ mia a Yesu.

⁷Kia i kɔɔni kɛ Yesu i gbuani Hɛlɔd nda lɔlei hu lɔ, i ngi yoyeilɔ Hɛlɔd gama, tawao Hɛlɔd vulii i yɛ Jelusalɛm lɔ a watii na.

⁸Ji Hɛlɔd Yesu lɔni ngi goohu i nɛɛlɔ wa ajifa ngi lɔ-mani i yɛlɔ ngi ma huguhangɔ gbamaile i wilanga a ngi malɔwɔ gboto mɛnila tawao ngi lii yɛlɔ ma tɔvaa Yesu i kabande hinda wie.

⁹Faale i ngi mɔlimɔlilɔ kpoto, kɛɛ Yesu ii yeengila bɛɛ gbɛmboni.

¹⁰Saagbuablaa Waawaisia kɛɛ Sawei Yeekaamɔisia ti gbuɛilɔ Kotii gulɔ ti liigba njiɛi na hu ti pɛlɛni Yesu ma.

¹¹Hɛlɔd tia ngi sojeisia ti Yesu yawufeilɔ, ta ngi yɛlɛ; kɛ ti bobani nyande wa wunga ngi ma, ti ngi yama Paileti gama.

¹²Hɛlɔd tia Paileti ti juwuyangɔ yɛla a ti nyɔunyɔ kɛɛ foloi na ma ti woteilɔ a ndiamɔngaa.

¹³Paileti i Saagbuablaa Waawaisia lolilɔ kɛɛ tokulɔisia kɛɛ nungeisia,

¹⁴i nde ti ma yɛ, “Wu wɛilɔ a taamɔi ji nya gama wɛɛ ta nungaa ti lii gbemgbama. Kiahuna, ngi yeenjɛpɛi ji hugbɛkpɛnga mbei wu yaama kɛɛ ngii tɔni kɛ ngi lɛɛ lɔ a njiɛi gbi wu pɛlɛnga ngi ma.

¹⁵Hɛlɔd vulii bɛɛ ii ngi lɛɛma lɔni, gbamaile i ngi yamanga mu gama. Taamɔi ji ii ya hinda gbi wieni kungɔ a ngi waala.

¹⁶Faale nga pielɔ ti ngi lewe ngi gbe ngi ma.” [

¹⁷Tewemahu Gomɛ gbi yaa wɔɔ hitima Paileti yɛlɔ huɛɛŋ a gbe kpindiwɛlɛbumɔ yila ma ti va gbama.]

¹⁸Kɛɛ fahii gbi ti yele gulailɔ tɛɛ, “Taamɔi ji waa, bi gbe Barabasi ma mu wɛ!”

¹⁹(Ti Barabasi ji wuilɔ kpindiwɛlei bu ajifa i loilɔ nungaa gulɔ kɔɔ ti ganga a gɔmɛtii, ti ndapi lalewe taa wai hu, Barabasi i numu yila waa yeendapii na hu.)

²⁰Paileti longɔ yɛla i gbe Yesu ma, faale i yɛpɛilɔ gbɔma ngeleya fahii gama;

²¹kɛɛ ti yelei gulailɔ tɛɛ, “Ngi gbakpa krɔsii ma! Ngi gbakpa krɔsii ma!”

²²Paileti i ndeilɔ ti ma heima yeesawei yɛ, “Gbɛe, hinda nyamui yeegbɔɔ i pienga? Ngii ya hinda nyamu gbi lɔni ngi hu kungɔ a numu walaa fa; faale nga pielɔ ti ngi lewe ngi gbe ngi ma.”

²³Kɛɛ ti nɔɛilɔ hu, ta yele wa gula tɛɛ i Yesu gbakpa krɔsii ma tawao kɛlɛmɛi yeeyelei na i pieilɔ Paileti i luma ti wɛ.

²⁴Faale Paileti i kiti lɛilɔ yɛ ti liimɛi i wie.

²⁵I gbeilɔ taamɔi na ma i yɛ kpindiwɛlei bu ndapi Gulava kɛɛ numu walaa kia nungaa ti ndeni la ngi ma, i Yesu ta ngi ve ngi sojeisia wɛ yɛ ti pie a ngie kia a nɛɛla ti wɛ.

²⁶Sojeisia ti gbuɛilɔ a Yesu Paileti wɛlei bu tawao kia ti yɛ lima a ngie ngi gbakpamɛi, ti taamɔ yila houilɔ a kpaya, ngi laa a Saimɔn, Sairinimɔi, a gbua ndɔgbɔi ma a wa taawai hu, ti Yesu krɔsii la ngi gbakima tovaa la ngi ma.

²⁷Faha lakpa wa ti toilɔ ngi ma kɛɛ nyahangɛisia, ti lokoi laani ti wumba ta ngi wɔɔwo.

²⁸Kɛɛ Yesu i woteilɔ ti gama yɛ, “Jelusalɛm nyahangɛisia! Wa nya wɔɔwo, a wua yekpe wɔɔwo kɛɛ wu leengeisia.

²⁹Ajifa watii lɔ wama hitima ta ndelɔ tɛɛ, ‘Kpemableisia ti goohu nɛngɔ kpa kɛɛ koi nasia tii ndo leni kɛɛ nasia tii ndoo nyinini!’

³⁰ Yeewatii na ma ta tɔtolɔ a ndela ngiye waawaisia ma tɛɛ, ‘A gula mu ma;’ ti nde ngiye wɛɛwɛɛisia ma tɛɛ, ‘A mu gbɔwu!’

³¹Gbamaile ina ta hinda bondei ji wielɔ a ngulii na ngundungɔ, gbɔɔ a wie a yeembei?”

³²Ti liilɔ a hinda nyamublaa fele bɛɛ ti waava tia Yesu-ni.

³³Kia ti foni yeehindei, ta na loli a “Ngugoko”, na lɔ ti Yesu gbakpani na krɔsii ma kɛɛ hinda nyamublaa feleisia, yeengila i ngi yejei hu, yeepekei i ngi gɔwɔi hu.

³⁴Kɛ Yesu i ndenga yɛ, “Kɛkɛ, manu ti ma; ajifa tii na gɔɔ ti piema.” Kɛ sojeisia ti kɔhani gɔnga ngi magulɛisia va, numu gbi i na wumbu i paani.

³⁵ Nungeisia ti yɛ loonilɔ na ta na gbe, kɛɛ Juubleisia ti mahubleisia ti jɔndɛilɔ a ngie tɛɛ, “I nungaa wekeisia bawoilɔ; i ta yekpe bawo lɛɛ, ina ta lɔ Ngewɔ liima maha Heingɔi a ngie!”

³⁶Sojeisia bɛɛ ti yɛlɔ a ngi gbafa, ta wa ngi gama, ta ndɔ lagbangɔ gɛ a ngie,

³⁷tɛɛ, “Ina Juubleisia ti mahɛi lɔ a bie kɛ bia yekpe bawo!”

³⁸Gbembele-gɛkɛlɛi gbakpangɔ yɛla ngi wukɔɔ, nyɛingɔ ma tɛɛ, “Juubleisia ti Mahɛi”

³⁹Hinda nyamublɛi nasia ti tia tieni gbakpani yeengila i jɔlɛilɔ Yesu ma yɛ, “Ngewɔ Maha Heingɔi ya a bie? Bia yekpe bawo lɛɛ kɛɛ mua!”

⁴⁰Kɛɛ hinda nyamumɔi yeepekei i gbandɛilɔ ngi la yɛ, “Bɛɛ luwa Ngewɔ vulii ma, bi tɔma mua tieni mu ndɛɛ yakpei majɔnga?

⁴¹Mu ndɛi ta pɔɔnangɔe ajifa nyamui na mu pieni yeepawei mia mu majɔma; kɛɛ ta ii hinda nyamu gbi wieni.”

⁴²Kɛ i ndenga Yesu ma yɛ, “Yesu, nya hinda i lo bi nɛmahu kpemɛi ba wua bi Maha gbayei hu.”

⁴³Yesu i ndeilɔ ngi ma yɛ, “Ngi nde bi ma a tɔnya kɛ foloi ji mua bie ma yɛlɔ kohunɛ heimi mia aijɛnɛ.”

⁴⁴Fologundiei i hitiilɔ kɛ kpindi i wɛlɛnga ndɔlei na hu gbi i to kpɔkɔvolei ma; foloi i lɔwuilɔ,

⁴⁵kɛ kula hawei yeesawei wai na i yɛ hɛlɛni Ngewɔ Wɛlei bui i blanga ndia fa.

⁴⁶Ngamɛi na, Yesu i toli wieilɔ a ngoo wa yɛ, “Kɛkɛ, ngi nya yafei loko wuaanga bi yeya!” Kia i ji leni kɛ ngi lii i wuanga.

⁴⁷Kia Kugbei na i yɛ looni na i tɔni gbɔɔ wienga, i Ngewɔ latoilɔ yɛ, “Tɔnya vulii le, numu yekpe lɔ wɔɔ a taamɔi ji!”

⁴⁸Fahii na gbi ti gomɛni yeehindei ji hubɛɛva, kia ti tɔni gbɔɔ i wieni, ti yamɛilɔ tei hu ti lokoi laani ti wumba a ndiinyani.

⁴⁹ Kɛɛ nasia kpɛlɛɛ ti yɛ Yesu gɔngɔ pandawanda kɛɛ nyahangɛi nasia ti yɛ to ngi wooma ta gbua Galili ti yɛ looni kuhama lɔ ta hubɛɛ.

⁵⁰Taamɔ yila yɛlɔ na, ngi la a Josɛf, a gbua Judia yeetaa yila hu ta toli a Arimatia. Kiti-lewemɔ lɔ wɔɔ a ngie Ndɔlɔ Kotii hu tawao ngi yekpengɔ yela, ngi langɔ a Ngewɔ. Ii lumani kitii na ma ti teweni Yesu ma kɛɛ na ti pieni a ngie.

⁵¹

⁵²Taamɔi ji i liilɔ Paileti gama i Yesu womɛi huvɛli.

⁵³Na wooma i ngi gbuɛilɔ krɔsii ma, i ngi beembee kasange bagbangɔ hu, i ngi la kambɛi hu ti mblani fawei yakama, mia tii yɛ numu gbi gbɔwuni na ngovama.

⁵⁴Ndɛvu Volei yeemagbatɛ volei yɛla tawao Ndɛvu Volei lɔtongɔ jɔngɔ yɛla.

⁵⁵Nyahangɛi nasia ti gbuani Galili ti toni Yesu wooma ti toilɔ Josɛf ma ti kambɛi lɔ kɛɛ Yesu womɛi layii hu.

⁵⁶ Kɛ ti yamanga ti yee kuwuhu, ti gbɛsɛisia hugbatɛ kɛɛ ngulɔ gunɛnɛngaa siava ngi womɛi ma. Ti lɛɛvuilɔ Ndɛvu Volei ma kia Ngewɔ jawei ndeni la.