Read Ngowili Yekpei Numu Kpɛlɛɛ Va LUKI 24 Bible Online

LUKI 24 - Ngowili Yekpei Numu Kpɛlɛɛ Va bible

LUKI 24

¹Kɛɛ Sɔndei ma a ngenda tɛtei, nyahangɛisia ti liilɔ kambɛi gama a ngulɔ gunɛnɛi nasia ti yɛ hugbatɛni.

²Ti maleni kɔtii gilikilingɔ kpuangɔ kambɛi lama,

³kɛɛ kia ti wuani kohu tii Ndemɔi Yesu womɛi lɔni.

⁴Ti yɛ loonilɔ na, ti wuhu wungɔ, kɛ ti hindo fele lɔnga ti looni ti gbla, ti magulɛi a voo numu yama ɛɛ lo ma.

⁵Nyahangɛisia ti luwɛilɔ wa, ti ti wuisia hitɛ ndɔma, kɛ hingɛisia ti ndenga ti ma tɛɛ, “Gbɛe wu fulumɔi gɔkɔlima hablɛisia lia?

⁶ II mbeindo; i hiyenga. I hitɛ wu wɛ ji i ndeni wu ma watii lɛ i yɛ Galili,

⁷yɛ, ‘Ta Nuuvu Hindoloi velɔ huɛɛŋ numu nyamuisia wɛ, ti ngi gbakpa krɔsii ma, kɛɛ lɔwɔi yeesawei ma a vululɔ i hiye.’ ”

⁸Yesu layiesia ti hitɛilɔ ti wɛ,

⁹kɛ ti gbuanga kambɛi gama ti li ti yeehindei ji gbi hugɛ a ngi gaalopo puu mahu yileisia kɛɛ yeemɔniisia gbi.

¹⁰Nyahangɛi jisia mia wɔɔ a Meri Magdalamɔi, Joana kɛɛ Meri, Jemisi ngi nje; tia kɛɛ nyaha wekei nasia tia tieni ti lini, ti hindei jisia hugɛilɔ a Yesu gaalopoisia.

¹¹Kɛɛ kaalopoisia ti giliilɔ tɛɛ baaba yɛpɛ gbama mia nyahangɛi jisia ti ndema ti ma, fa mia tii lani a tie.

¹²Kɛɛ Pita i hiyeilɔ i li a piimɛ kambɛi gama, i wupɛlɛ, i hugbee kɛɛ ii hani gbi lɔni kɛ lekee kasangei na i yɛ laani na. I yamɛilɔ pɛleila, ngi wuhu wungɔ na va i wienga.

¹³Folo yakpei na ma Yesu woomablaa fele ti yɛlɔ lima fuula yila hu ta toli a Ɛmeɔs, kungɔ a mɛli wɔfla a gbua Jelusalɛm,

¹⁴tawao ti yɛlɔ a yɛpɛ luahu kɔlooni hindei gbi ma i yɛ wieni.

¹⁵Kia ti yɛ yeenjɛpɛi jisia le, Yesu vulii i ti maleilɔ, tia tieni ta li.

¹⁶Ti ngi lɔilɔ kɛɛ ti yamɛisia houngɔ yɛla na hii tii ngi gɔni.

¹⁷Yesu i ti mɔlilɔ yɛ, “Gbɔɔ wu yɛpɛma luahu kɔlooni ma pelei ji hu?” Ti loilɔ kpɛ, ti mamanungɔ.

¹⁸Yeena ta toli a Kliopas i ngi mɔlilɔ yɛ, “Hota lɔ a bie Jelusalɛm na hii bii hindei jisia hugɔɔ ti wiema na lɔwɔi jisia hu?”

¹⁹Yesu i ti mɔlilɔ yɛ, “Gbɛ hindangaa?” Kɛ ti kpɛmbonga tɛɛ, “Hindei nasia ti Yesu Nasalɛtimɔi wieni. Taamɔi na i yɛni a Ngewɔ lutui lɔ tawao Ngewɔ vulii kɛɛ nungeisia gbi ti yɛ kɔɔlɔ kɛ kpaya waa lɔ hinda gbi hu a nde ɔɔ a pie.

²⁰Mu Saagbuablaa Waawaisia kɛɛ mu mahubleisia ti ngi veilɔ Gɔmɛtii wɛ aako ti ngi lɛɛ ngi wava, ti ngi gbakpa krɔsii ma.

²¹Mu lii i yɛlɔ ma kɛ ta mia numui na le a Isrɛl wumawo. I ba na kpɛlɛɛ ma, lɔwɔi yeesawei lɔ na ji i wienga.

²²Tawao nyaha lɛɛnga mua tieni mu ngi woma wɔɔ, ti mu wuhu wunga. Ti liilɔ kambɛi gama a ngenda tɛtei ji

²³tii ngi womɛi lɔni; kɛ ti yamanga mu gama tɛɛ malikeisia mia ti gɛnga a tie ti ndenga ti ma tɛɛ Yesu i vulunga.

²⁴Nasia lɛɛnga mua tieni mu yɛ na ti liilɔ kambɛi gama, ti male lɔɔ kia nyahangɛisia ti ndeni la; kɛɛ tii ta vulii lɔni.”

²⁵Kɛ Yesu i ndenga ti ma yɛ, “Wu gbowani kpa tawao wu hulɛlini kpa lava a na kpɛlɛɛ Ngewɔ lutuisia ti ndenga!

²⁶Ma ii yɛ houni Ngewɔ Maha Heingɔi i kpalɛi ji kpɛlɛɛ majɔɔ aako i wua ngi mahayɛi hu?”

²⁷Ngewɔ Gɔlɛi yeemia gbi lekee kpitingɔ ngi ma, i fasailɔ ti ma, i lɔto Mojisi gɔlɔ nyɛingɔisia ma kɛɛ Ngewɔ lutuisia gbi ti ndɛisia.

²⁸Ti lukpeilɔ fulei na gbla ti yɛ lima hu kɛ Yesu i pienga bi tɔngaa bɛɛ i lewemaa;

²⁹kɛɛ ti ngi huhouilɔ tɛɛ, “Mu yii mbei ajifa foloi yeingɔ wa le tawao kpindi magutungɔ.” Kɛ tia tieni ti wuanga pɛlei bu.

³⁰Kia tia tieni ti heini mɛhɛɛ mɛmɛi, i bledii wumbuilɔ, i siɛgbua Ngewɔ ma, i ngali, i fe ti wɛ.

³¹Kɛ ti yamɛisia ti lawonga, kɛ ti ngi gɔnga, kɛ i longa hu ti yeya.

³²Ti ndeilɔ ti nyɔunyɔ ma tɛɛ, “Mu liisia tii huvengɔ yɛla a kohunɛ ji i yɛ yɛpɛ mu gama pelei hu kɛɛ ji i yɛ Ngewɔ Gɔlɛi fasaima mu ma?”

³³Ngamɛi na ti hiyeilɔ ti yama Jelusalɛm. Ti kaalopo puu mahu yileisia maleni hinda yila lɔ tia nasia ti gbɛɛngɔ yɛla ti ma,

³⁴kɛ ti hugɛnga a ti veenjɔ tɛɛ, “Ndemɔi i hiyenga fɔ, tawao i gɛnga a Saimɔn!”

³⁵Kɛ tia bɛɛ ti hugɛnga gbɔɔ i wieni pelei hu kɛɛ ji ti ngi gɔni bledii yaliyii ma.

³⁶Ti loni njɛpɛi ji lemaa kɛ Yesu vulii i longa ti lia, i nde yɛ, “Ndiilɛli i yɛ wu ma!”

³⁷Kɛɛ ti magbɛlingɔ yɛla, ti luwangɔ, ta gili tɛɛ ndɔumɔi mia ti tɔnga.

³⁸Kɛɛ i ndeilɔ ti ma yɛ, “Gbɛe sekahu i wu liisia hu tawao gbɛe wu liisia yablangɔ?

³⁹A nya lokoisia lɔ lɛɛ kɛɛ nya gɔwɔisia, aako wu kɔɔ kɛ nya vulii lɔ; a ja a nge, wu tɔ; ajifa nduwu kɛɛ kaalɛ tii ndɔumɔ ma kia wu tɔma la nya ma.”

⁴⁰Kia i ji leni kɛ i ngi lokoisia gɛnga a tie kɛɛ ngi gɔwɔisia.

⁴¹Kɛɛ kia Kohunɛ kɛɛ kualamɛi i pieni tii lani la, i ti mɔlilɔ yɛ, “Mɛhɛɛ gbi lɔ mbei wu yeya mɛva?”

⁴²Ti nyɛɛ yeelengɔ veilɔ ngi wɛ,

⁴³kɛ i hounga i mɛ ti yama.

⁴⁴Kɛ i ndenga ti ma yɛ, “Hindei jisia vulii lɔ ngi yɛ hugɛ a wue ji lɛ ngi yɛ wu lia ngɛɛ hindei gbi lekee nyɛingɔ kɔloongɔ nya ma Mojisi jawei hu kɛɛ Ngewɔ lutuisia ti gɔlɛisia kɛɛ Saam Gɔlɛi, nda a houlɔ huɛɛŋ.”

⁴⁵Kɛ i ti nɛmahuisia lawonga aako ti Ngewɔ Gɔlɛi yeembui gɔɔ,

⁴⁶i nde ti ma yɛ, “Nyɛingɔe kɛ kpalɛ a lalɔ huɛɛŋ Nuuvu Hindoloi ma, i hiye hee hu lɔwɔi yeesawei ma,

⁴⁷tawao kɛ Ngowili Yekpei a lelɔ ngi biyei hu kɛnyɛi kpɛlɛɛ ma i lɔto Jelusalɛm aako ti wounve ti jumbuisia ma Ngewɔ i manu ti ma.

⁴⁸Wua lɔ selisia a wue yeehindei jisia va.

⁴⁹ Na nya Kɛkɛ i lahei wumbunga feva wu wɛ, nya vulii mia nga pie i yei wu ma; kɛɛ a mawulo Jelusalɛm haaŋ kpayei i gbua aijɛnɛ i yei wu ma pɛiŋ.”

⁵⁰ Kɛ i gbuanga a tie ta wai hu ti li Bɛtani. Na lɔ i ngi lokoisia lɛni na ngeleya i ti luba.

⁵¹Kia i yɛ ti lubama, i wumbuilɔ ti lia, i lɛ aijɛnɛ.

⁵²Ti hɛɛilɔ ngi ma, ti yama Jelusalɛm ti goohu nɛngɔ wa.

⁵³Watii gbi ti yɛ Ngewɔ Wɛlei bu lɔ ta siɛgbua Ngewɔ ma.