Read Ngowili Yekpei Numu Kpɛlɛɛ Va LUKI 5 Bible Online

LUKI 5 - Ngowili Yekpei Numu Kpɛlɛɛ Va bible

LUKI 5

¹ Folo yila, Yesu i yɛ loonilɔ Gɛnisalɛt Wopei yeekakpoi ya, nungaa ta wa a ti nyɔunyɔ lukpe aako ti foo ngi ma, ti wolo Ngewɔ yiɛi na ma i yɛ nde.

²I ndɛndɛ fele lɔilɔ ti yilingɔ yeekakpoi ma; yeenyɛgbɛblɛisia ti gbuangɔ yɛla ti hu, ta ti boomɛisia wua.

³Yesu i wiliilɔ ndɛndɛi yeengila hu Saimɔn ngi woo yɛla i nde ngi ma yɛ i yeendɛndɛi lukpe kulo i gbua kakpoi gbla. Yesu i heilɔ yeendɛndɛi hu a fahii gaa.

⁴Kia i kpɔyɔni a yɛpɛla, i ndeilɔ Saimɔn ma yɛ, “Ndɛndɛi lukpe njɛi lia, wua bi mbaangɛisia wu wu boomɛisia yei njɛi hu, wu nyɛi hou.”

⁵ Kɛ Saimɔn i ndenga yɛ, “Kaamɔ mu yiinga mɔnɛmaa gbuu kɛɛ muii gbɛogbɛ houni. Kɛɛ kia bi ndenga, nga mboomɛi yeilɔ.”

⁶ Ti mbomɛisia yeilɔ tawao nyɛngɛisia ti ti laveilɔ a lo te ti bla.

⁷Kɛ ti loko gɛnga a ti mbangɛi nasia ti yɛ ndɛndɛ wekei hu tɛɛ ti wa ti gbɔ ti ma. Ti wɛilɔ tia tieni ti nyɛi wote ndɛndɛi veenjɔ kpɛlɛɛ hu, ti la i ve a lo te ti lɔmbu.

⁸Kia Saimɔn Pita i na lɔni i wieni, i wombi gbakpailɔ Yesu gɔwɔbu yɛ, “Gbua nya gbla, Ndemɔi, ajifa jumbumɔ lɔ a nge!”

⁹Nasia tia Saimɔn-ni yɛla ti wuhu i wuilɔ nyɛɛ gboto bondei na va ti houni.

¹⁰Hii lɔɔ i wieni a Saimɔn ngi mbaangɛisia, Jemisi kɛɛ Jɔn, Jɛbidi leengeisia. Yesu i ndeilɔ Saimɔn ma yɛ, “Baa luwa; i hiye kiahuna ma, ba nungaa lɔ na hou.”

¹¹Ti ndɛndɛisia lalailɔ ti tɛ ŋanyakpai ma, ti kpɛlɛɛ lo ti too Yesu ma.

¹²Lɔwɔ yila Yesu i yɛlɔ taa yila hu, taamɔ yila i yeetei na hu kpɔukpɔui yelɔ ngi ma. Kia i Yesu lɔni, i gulailɔ ngi gɔwɔbu i ngi manɛnɛ yɛ, “Kaamɔ, i nɛngaa bi wɛ, ba gulɔ bi nya bawo ngi yɛ sɛwɛ!”

¹³Yesu i ngi lokoi lamboilɔ i ja a ngie yɛ, “Nɛngɔe nya wɛ, bawo bi yɛ sɛwɛ!” Ngamɛi na heegbɛi na i gbuailɔ taamɔi ma.

¹⁴ Yesu i ngi lahiilɔ kpaukpaungɔ yɛ, “Baa hugɛ a numu gbi, kɛɛ li saa gbuamɔi gama i bi gbe; bi saa na gbua Mojisi i kɛni wɔɔ aako numui gbi ti kɔɔ kɛ bi bawonga bi yɛnga sɛwɛsɛwɛ.”

¹⁵Kɛɛ Yesu malɔwɔi i liilɔ poloŋ tawao faha gboto ti wailɔ ngi layie mɛniva kɛɛ mbawo jɔva ti heegbɛisia hu.

¹⁶Kɛɛ Yesu i liilɔ mia na ya louŋ i Ngewɔ vɛli na.

¹⁷Folo yila ma, kia Yesu i yɛ nungaa gaama, Farisiisia lɛɛnga kɛɛ Sawei Yeekaamɔisia ti yɛlɔ heini na, ta gbua Jelusalɛm kɛɛ tei gbi hu Judia kɛɛ Galili lateisia hu; tawao Ndemɔi gbayei i ye ngi hu lɔ heegbɛbla bawova.

¹⁸Hinga lɛɛnga ti wɛilɔ a taamɔ gbɔkpɔngɔ yila mboomɛi hu, tawao ti lapilɔ wuavaa a ngie pɛlei bu aako ti ngi la Yesu gɔwɔbu.

¹⁹Kɛɛ fahii va, tii pele gbi jɔni wuavaa a ngie. Faale ti lɛilɔ a ngie pɛlei wumba, ti pɛlei wumba kulo vaya, ti ngi yei ngi boomɛi hu a yeendowei hu wee ti ngi la Yesu gɔwɔbu fahii lia.

²⁰Kia Yesu i ti layii lɔni a ngie, i ndeilɔ taamɔi ma yɛ, “Ndiamɔ, bi jumbuisia ti kafaingɔe.”

²¹Sawei Yeekamɔɛisia kɛɛ Farisiisia ti tɔtoilɔ a yɛpɛla luahu tɛɛ, “Ye lɔ a taamɔi ji i Ngewɔ bɛlɛ nyani yɛpɛi jisia lema? Ngewɔ yakpe mia a gu a manula jumbuisia ma!”

²²Yesu i kilii nasia gɔɛilɔ ti yɛ pie kɛ i ndenga ti ma yɛ, “Gbɛe wu kili bondei nasia wiema?

²³Bɛwɛbɛwɛngɔe ndeva bɛɛ ‘Bi jumbuisia ti kafaingɔe’ ɔɔ ndeva bɛɛ ‘Hiye bi jia’?

²⁴Nya kɛma a wue hɔɔ kɛ numui na Nuuvu Hindoloi le, kpaya lɔ ngi wɛ dunyei hu manuva jumbuisia ma.” I ndeilɔ kpɔɔkpɔmɔi ma yɛ, “Ngɛɛ bi ma, hiye bi bi boomɛi wumbu bi li bi yeekuwuhu!”

²⁵Ngamɛi na taamɔi i hiyeilɔ i lo ti gbi yama, i mboomɛi na wumbu i yɛ laani hu, i li ngi yeekuwuhu, a Ngewɔ lato.

²⁶Ti gbi ti wuhu i wuilɔ kpu! Nduwɛi i ti huveilɔ, ta Ngewɔ lato tɛɛ, “Mu kabande hindangaa hulɔnga ha kpa!”

²⁷Na wooma Yesu i gbuɛilɔ tei hu, i kɔnjɔ wɔyɔmɔ yila lɔ, ngi la a Livai, i heini ngi yengemɛi. Yesu ndeilɔ ngi ma yɛ, “To nya ma.”

²⁸Livai i hiyeilɔ, i hani gbi lo, i to Yesu ma.

²⁹Na wooma Livai i komɛ wa hugbatɛilɔ ngi yeepɛlɛbu Yesu va, tawao nasia i ti lolini pawa wɔyɔblaa gboto ti yɛlɔ ti lia kɛɛ nungaa wekeisia.

³⁰ Farisiisia lɛɛnga kɛɛ Sawei Yeekaamɔi nasia ti yɛ yeekomɛi hu ti gbonyɛilɔ Yesu gaalopoisia gama tɛɛ, “Gbɛe wa mɛhɛɛ mɛ wa ndɔ gboli wua kɔnjɔ wɔyɔblɛisia kɛɛ jumbubla wekeisia?”

³¹Yesu i kpɛmboilɔ ti wɛ yɛ, “Nungei nasia ti heegbɛngɔ ii le tii gbeweni halemɔ va kɛlee lekee nasia ti heegbɛngɔ.

³²Ngii wani pɔɔnableisia lolima kɔɔ ti wounve ti jumbuisia ma, kɛlee jumbubleisia.”

³³Nungaa lɛɛnga ti ndeilɔ Yesu ma tɛɛ, “Jɔn gaalopoisia ta sui houlɔ pɛɛpɛ ta Ngewɔ vɛli, tawao hii Farisiisia ti gaalopoisia ta pie; kɛɛ bi nda gaalopoisia ta mɛhɛɛ mɛlɔ ta ndɔ gboli.”

³⁴Yesu i kpɛmboilɔ yɛ, “Wu langɔe la wa gulɔ a piela nasia ti sui hou ta ti loli nyaha-gɔli-gomɛi hu ina lekee nyaha-gɔlimɔi lɔ ti lia? Wɛɛ ngu!

³⁵Kɛɛ foloi a gbualɔ nyaha gɔlimɔi i gbua ti yeya; yeewatii mia ta sui hou.”

³⁶Yesu i gbɔma salei ji heilɔ ti ma yɛ, “Numu gbi ɛɛ ndoma nina lewe ma pɛlɛva a lombo ndoma wova ma. I piengaa, kɛ i wilanga a ndoma ninɛi blala, tawao yeelombo ninɛi tia kula wovei tɛɛ bɛ ma.

³⁷Tawao numu ɛɛ ndɔ nina wu huakɔlɔ-goko wovangaa hu, ajifa ndɔ ninɛi a huakɔlɔ-goko woveisia blalɔ, i vaya, kokoisia ti jukulu.

³⁸Ndɔ ninɛi a wu huakɔlɔ-goko ninanga lɔ hu!

³⁹Tawao numu gbi i ndɔ wovei gbolinga, ɛɛ lo a yeeninɛi. A ndelɔ yɛ, ‘Yeengovei i gbekpeni yeeninɛi ma.’ ”