Read Ngowili Yekpei Numu Kpɛlɛɛ Va LUKI 6 Bible Online

LUKI 6 - Ngowili Yekpei Numu Kpɛlɛɛ Va bible

LUKI 6

¹ Juubleisia ti Lɛɛvu Volo yila ma Yesu i yɛlɔ jiama a pelei nyɔi na yeekpalɛisia hu. Ngi gaalopoisia ti yeenyɔi lɛɛnga yaliilɔ, ta mayowɛlɛ, ta mɛ.

²Farisiisia lɛɛnga ti mɔlilɔ tɛɛ, “Gbɛe wu na wiema mu Jawei yɛ wa pie Ndɛvu Volei ma?”

³ Yesu i kpɛmboilɔ yɛ, “Wuii ya kaani gbɔɔ Devidi pieni ji ndɔlei i yɛ tia ngi woomableisia ma?

⁴Ji i lini Ngewɔ wɛlei bu, i bledii na wumbu fengɔ Ngewɔ wɛ, i mɛ, i fe ngi woomableisia bɛɛ wɛ. Na hu gbi i yɛni a mu jawei lɔ kɛ saagbuableisia lekee mia ta mɛ.”

⁵Yesu i ngi yɛpɛi yakpuɛilɔ yɛ, “Numu na Nuuvu Hindoloi le, Ndemɔi lɔ a ngie Ndɛvu Volei mahu.”

⁶Juubleisia ti Lɛɛvu Volo weka yila ma Yesu i wuailɔ hɛɛ wɛlɛ yila bu i nungaa gaa. Taamɔ yila i yɛlɔ na ngi yeja lokoi hangɔ.

⁷Sawei Yeekamɔɛisia lɛɛnga kɛɛ Farisiisia ti longɔ yɛla ti sabu jɔɔ nyamu lova Yesu ma. Faale ti yɛlɔ a ngi yabɛɛ tɔvaa ina a numu bawolɔ Ndɛvu Volei ma.

⁸Kɛɛ Yesu i kilii nasia gɔɛilɔ ti yɛ pie, kɛ i ndenga taamɔi ma yɛ, “Hiye bi gbua mbei kulɔ.” Taamɔi i hiyeilɔ i gbua kulɔ.

⁹Kɛ Yesu i ndenga ti ma yɛ, “Nya wu mɔlima: Gbɔɔ mu jawei i lumani mu wɛ pieva Ndɛvu Volei ma? Gbɔva numu ma ɔɔ numu gbalɛva? Numu lɛɛvui bawova ɔɔ nyaniva?”

¹⁰I yama jiɛilɔ ti gbi ma; kɛ i ndenga taamɔi ma yɛ, “Bi lokoi lambo.” Taamɔi i ngi lokoi lamboilɔ, mbawongɔ.

¹¹Ti gbi ti lii i leweilɔ wa, ti tɔtoo a hugbatɛla gbɔɔ ta pie a Yesu.

¹²Folo yila ma Yesu i lɛilɔ ngiye yila hu Ngewɔ vɛliva tawao i yiini na lɔ gbuu a Ngewɔ vɛli.

¹³Kia ngele i woni, i ngi woomableisia lolilɔ ti wa ngi gama, i ti wɔyɔ hu puu mahu fele, i ti loli a tobleisia.

¹⁴Saimɔn (na i ngi laheini a Pita) kɛɛ ngi ndewei Andru kɛɛ Jemisi kɛɛ Jɔn kɛɛ Filipi kɛɛ Batɔlɔmiu

¹⁵kɛɛ Matiu kɛɛ Tɔmɔsi kɛɛ Jemisi, Afiɔs loi, kɛɛ Saimɔn na ti yɛ toli a ndɔlɔ hinda madi houmɔi

¹⁶kɛɛ Judas, Jemisi loi, kɛɛ Judas Kɛriɔtmɔi na i woteni a bayamɔ.

¹⁷Kia Yesu tia tobleisia ti ngiyei yeini, i loilɔ hinda kpawangɔ tia ngi woomabla gboto wa kɛɛ faha wa ta gbua Judia lɔlei hu gbi kɛɛ Jelusalɛm kɛɛ Taya tia Saidɔn ti heini gboyeima;

¹⁸ti wailɔ wolova ngi ma kɛɛ aako i ti heegbɛisia bawo. Nasia ngafa nyamuisia ti yɛ ti hu, tia bɛɛ ti wailɔ tawao ti bawoilɔ.

¹⁹Numui gbi ti yɛlɔ a lapi jaava a ngie, ajifa kpaya i yɛlɔ a gbua ngi hu a ti gbi bawo.

²⁰Yesu i ngi gaalopoisia gbeilɔ tiŋ yɛ, “Wu lubangɔe fɛɛlibla a wue; ajifa wu woo mia a Ngewɔ mahayɛi!

²¹Wu lubangɔe ndɔlɛ i wu ma kiahuna; ajifa wu goo a velɔ! Wu lubangɔe wa wɔɔ kiahuna; ajifa wa yɛlɛlɔ!

²² “Wu lubangɔ a yɛla ji nungaa ta lolo a wue, ti gbua wu woohu, ta wuyɛli, ta wu loli a numu nyamu Nuuvu Hindoloi va.

²³ A gohunɛ ji na a wie, wu looli a kohunɛ ajifa mawaa lakpa wa lamagbatɛngɔe wu va aijɛnɛ. Ajifa ti maadani ti hindei jisia nyɔkɔ lɔ wieni wɔɔ a Ngewɔ lutuisia.

²⁴Kɛɛ i nyamuni kpa wu va, wua wu gbatɛngɔ kiahuna; ajifa wu wilanga a wu nda liilɛli majɔla!

²⁵I nyamuni kpa wu va, wua wu goovengɔ kiahuna; ajifa ndɔleiɛi a wu lɔlɔ! I nyamuni kpa nasia va ti yɛlɛma kiahuna; ajifa ta wɔlɔ a ndiimɔnɛ!

²⁶“I nyamuni kpa wu va ji numui gbi ta wu lato; ti maadani ti yɛ yeenjɛpɛ yakpei jisia lɔ le ndɛɛ Yewɔ lutuisia va.

²⁷“Wua wu nya woi mɛnima, gbɛɛ ngi nde wu ma: A lo a wu juwuisia, wu kpekpe wie a nasia ti lolongɔ a wue,

²⁸wu nasia luba ta wu jondu, wu Ngewɔ vɛli nasia va ta wu bɛlɛ nyani.

²⁹Numu gbi i bi bawɛi yeengila hugbolɛnga, luma i yeepekei bɛɛ hugbolɛ; numu i bi bobani houngaa, ba ngi goma a bi loma bu lomɛi bɛɛ.

³⁰Numu gbi i hani vɛlinga bi ma, fe ngi wɛ; tawao numui na a li a bi hakeisia, ba gbɔma ngi mɔli fa.

³¹ Pie a nungaa kia bi longɔ ti pie a bie.

³²“Wu longaa a nungei nasia lekee ti longɔ a wue, gbɛ luba lɔ wa majɔɔ? Jumbubleisia vulii bɛɛ ti longɔ a nasia lɔ ti longɔ a tie!

³³Ina wa hinda yekpe wie a nasia lekee lɔ ta hinda yekpe wie a wue, gbɛ luba lɔ wa majɔɔ? Jumbubleisia vulii ta na lɔ wie!

³⁴Tawao ina wa kpɛi wili nasia lekee lɔ ma wu lii i ma sɔɔvaa gbɔma a tie, gbɛ luba lɔ wa majɔɔ? Jumbubleisia vulii ta kpɛi wili jumbubleisia lɔ ma, aako ti ti navoei majɔɔ ngakpuangɔ!

³⁵Sawo! A lo a wu juwuisia, wu hinda yekpe wie a tie; a kpɛi wili, wu lii aa yɛ kpuala ma. Na wiengaa, wa yɛlɔ a Ngewɔ Lɛngɔ Wai hingaleengeisia. Ajifa ngi gbekpengɔi a fisiwɔliblɛisia kɛɛ hinda nyamu wieblɛisia.

³⁶A manuma wie kia lɔɔ wu Kɛɛ manumangɔ.

³⁷“Waa kiti lewe nungaa wekeisia ma, na lɔ a wie Ngewɔ bɛɛ ɛɛ kiti lewe wu ma; wa nungaa wekeisia lɛɛ, na lɔ a wie Ngewɔ ɛɛ wua bɛɛ lɛɛ; a manu nungaa wekeisia ma, na lɔ a wie Ngewɔ i maanu wu ma.

³⁸A nungaa wekeisia gɔ, na lɔ a wie Ngewɔ i wu gɔ. A tɔnya, humangɔ a yɛla wu wɛ pandawanda, sɔsɔngɔ, a wu ma, ti pote wu kpafɛi hu i ndave. Ajifa humayii na wa huma la nungaa wekeisia wɛ, tamia Ngewɔ a huma la wu wɛ.”

³⁹ Yesu i salei ji heilɔ ti ma yɛ, “Pumumɔ ɛɛ hou ngi mba pumumɔ lokola pele gɛva a ngie; i na wiengaa, ti veenjɔ ta gulalɔ ndowei hu.

⁴⁰ Kaalopo gbi ii leweni ngi Kaamɔ ma; kɛɛ kaalopo gbi i kaai gbɔyɔnga, a wielɔ kia ngi Kaamɔ na.

⁴¹“Gbɛe bi kawolei na gbema i bi ndewei yama kɛɛ bi gbewe gbi ii ngulu-gutii na ma i bi nda yamɛi?

⁴²Baa yee gu bi nde bi ndewei ma bɛɛ ‘Kɔnɛɛ, gbɛɛ ngi kawolei na gbua bi yama,’ kɛɛ bɛɛ gu a ngulu-gutii na lɔla i bi nda yamɛi? Bia bi bayangɔ! Ngulu-gutii gbua pɛiŋ bi nda yamɛi, ta lɔ ba gu a hinda lɔla gbalauŋ kawolei gbuava bi ndewei yama.

⁴³“Ngulu yekpe ɛɛ wua a nguluwa nyamu, tawao ngulu nyamu ɛɛ wua a nguluwa yekpe.

⁴⁴ Ta ngulii gbi gɔɔ ngi wɛi ma lɔ; wɛɛ figi gbenda ngali gbɔvoi ya tawao wɛɛ lumbe gbenda ngali gbɔvoi ya.

⁴⁵ Numu yekpei a gbua a hani yekpe lɔ kpekpei yeekpatɛi na hu a yɛ wuni ngi lii hu; numu nyamui a gbua a hani nyamui lɔ nyamui yeekpatɛi na hu a yɛ wuni ngi lii hu. Ajifa na a yɛ numu lii lavengɔ, ta mia ngi lɛi a yɛpɛla.

⁴⁶“Gbɛe wa nya loli wɛɛ ‘Ndemɔi, Ndemɔi,’ kɛɛ wɛɛ na wie nga nde wu ma?

⁴⁷Numu gbi lekee a wa nya gama, i nya layiesia mɛni, i ti wie, nga kɛlɔ a wue numui yeegbɛ nyɔkɔ lɔ a ngie.

⁴⁸Ngi gbuangɔ a numui na lɔ i yɛ pɛlei loma, i ndoweisia bɔ susungɔ fawa-gɔtii hu, i pɛlei hitɛ, i to na; njɛi i veilɔ, i wa i hɔwɔ pɛlei na ma kɛɛ ii guni a sɛɛjiala, ajifa tongɔ yɛla pandawanda.

⁴⁹Kɛɛ numui gbi lekee a nya layiesia mɛni kɛɛ ɛɛ ti wie, ngi gbuangɔ a numui na lɔ i ngi wɛlei looni kɛɛ ii yeepɛlei hitɛni ndowa susungɔnga hu; kia njavei i yeepɛlei hiyani, i gulailɔ ngama tawao ngi gulawoi wɔlɔngɔ yɛla!”