Read Ngowili Yekpei Numu Kpɛlɛɛ Va LUKI 9 Bible Online

LUKI 9 - Ngowili Yekpei Numu Kpɛlɛɛ Va bible

LUKI 9

¹Yesu i ngi gaalopo puu mahu feleisia lolilɔ hinda yila, i kpaya ve ti wɛ ngafa nyamuisia gbuava nungaa hu kɛɛ heegbɛisia bawova.

²Kɛ i ti longa yɛ ti li ti Ngowili Yekpei le kɔloongɔ Ngewɔ Mahayɛi ma, ti heegbɛisia bawo.

³ I ndeilɔ ti ma yɛ, “Waa li a hani gbi jiɛi ji hu: tikpɔ ɔɔ kpafa ɔɔ mɛhɛɛ ɔɔ navoo ɔɔ ndoma mɔnu bɛɛ.

⁴Hinda gbi lekee ta loko hei na wu bu, a lo yeepɛlei na bu i lohu haaŋ wu gbua na;

⁵mia tii loko hei lɔ na wu bu a gbua yeetei na hu wu fufulei na gbukpulɛ a yɛ wu gɔwɔma kɛva a tie kɛ ndahii mia a na ti gama.”

⁶Kaalopoisia ti liilɔ, ti jia fulei kpelɛ hu, ta Ngowili Yekpei le, ta nungaa bawo tatei gbi hu.

⁷ Kia Galili yeemahɛi, Hɛlɔd, i hindei kpɛlɛɛ malɔwɔi mɛnini Yesu i yɛ pie, ngi wuhu i wuilɔ hulewengɔ ajifa nungaa lɛɛnga ti yɛlɔ a nde tɛɛ Jɔn, Nguamɔi mia i vulunga i hiyenga hee hu.

⁸Pekeisia ti yɛlɔ a nde tɛɛ Ilaija mia i gbuanga; pekeisia gbɔma ti yɛlɔ a nde tɛɛ Ngewɔ lutui woveisia wɔɔ yeengila mia i vulunga i hiyenga hee hu.

⁹Hɛlɔd i ndeilɔ yɛ, “Ngi pieilɔ ti Jɔn wui lewenga; kɛɛ ye lɔ a taamɔi ji ngi ji kpɛlɛɛ mɛnima kɔloongɔ ngi ma?” I yɛlɔ a lapi Yesu lɔva.

¹⁰Yesu gaalopoisia ti yamɛilɔ, ti gona ngi ma a na gbi ti pieni. I ti wumbuilɔ tia tieni lekee ti li ta yilahu ta toli a Bɛtsaida.

¹¹Kia fahii ji humɛnini, ti toilɔ ngi ma. I gahu gbuɛilɔ ti ma, i yɛpɛ ti gama kɔloongɔ Ngewɔ Mahayɛi ma, i nasia bawo ti gbewengɔ mbawo va.

¹²Kia foloi i yɛ tɔtoma a gulala, ngi gaalopo puu mahu feleisia ti wɛilɔ ngi gama tɛɛ, “Pie nungei jisia ti vaya aako ti li mbei gbla vulɛisia hu ti mɛhɛɛ gɔli kɛɛ njiima, ajifa ndɔgbɔ lamba ma lɔ a mbei.”

¹³Kɛɛ Yesu i ndeilɔ ti ma yɛ, “Wua vulii a ti gɔ a mɛhɛɛ.” Kɛ ti ndenga tɛɛ, “Na lekee i mu yeya ta mia a bledii gbuha lɔɔlu kɛɛ nyɛɛ fele. Bi longɔe mu li mu mɛhɛɛ yeya fahii ji gbi va?”

¹⁴Ajifa hingei nasia ti yɛ na ti gungɔ yɛla a tauji lɔɔlu. Kɛ Yesu i ndenga ngi gaalopoisia ma yɛ, “A pie nungeisia ti hei tiwa ma, numu nuu fele gbɔyɔngɔ mahu puu tiwa gbi hu.”

¹⁵Kaalopoisia ti pieilɔ nungaa kpɛlɛɛ ti hei.

¹⁶Kɛ Yesu i bledii gbuha lɔɔli wumbunga kɛɛ nyɛɛ felei, i ngelema gbe, i siɛgbua Ngewɔ ma fa, i ngaingai, i fe kaalopoisia wɛ kɔlɛkɔlɛva nungaa ma.

¹⁷Numu gbi ti mɛhɛɛi na mɛilɔ ti goo i ve, kaalopoisia ti yeemɔnii lɛma kungɔ a samba puu mahu fele.

¹⁸Folo yila, kia Yesu yakpe i yɛ Ngewɔ vɛlima, ngi gaalopoisia ti wailɔ ngi gama. Kɛ i ti mɔlinga yɛ, “Nungaa tɛɛ ye lɔ a nge?”

¹⁹ Ti kpɛmboilɔ tɛɛ, “Nungaa lɛɛnga lɔ ndema tɛɛ Jɔn Nguamɔi lɔ a bie. Pekeisia tɛɛ Ilaija, pekeisia gbɔma tɛɛ Ngewɔ lutui woveisia wɔɔ yeengila mia i vulunga, i hiyenga hee hu.”

²⁰ Kɛ i ti mɔlinga yɛ, “Ɔɔ wua? Wɛɛ ye lɔ a nge?” Pita i kpɛmboilɔ yɛ, “Ngewɔ Maha Heingɔi lɔ a bie.”

²¹Kɛ Yesu i ti lahinga kpɔtukpɔtu yɛ ta ji hugɛ a numu gbi.

²²I gbɔma ndeilɔ ti ma yɛ, “Kpalɛ wa a lalɔ huɛɛŋ numui na ma Nuuvu Hindoloi a ngie, tawao kpakoleisia kɛɛ Saagbuabla Waawaisia kɛɛ Sawei Yeekaamɔisia ta gbelelɔ ngi ma. Ta ngi waalɔ, kɛɛ lɔwɔi yeesawei ma Ngewɔ a ngi vululɔ i hiye hee hu.”

²³ Kɛ i ndenga ti kpɛlɛɛ ma yɛ, “Numu gbi lekee i longaa i to nya ma, mahoungɔ i lema ta yekpe ma, i ngi krɔsii wumbu kpema gbi, i wa mu li.

²⁴ Gbamaile numu gbi lekee ngi longɔ a ngi lɛɛvui, a baalɔ la; kɛɛ numui gbi lekee baani a ngi lɛɛvui nya va, a mabawolɔ.

²⁵Gbamaile gbɛ nafa lɔ sie numu a majɔɔ ina bɛɛ i dunyei gbi lɔ majɔni kɛɛ i ta yekpe jukulu?

²⁶Ajifa numui na a wufe nya hinda ma kɛɛ nya layiesia, ta lɔ numui na Nuuvu Hindoloi le a wufe ngi hinda ma kpemɛi na a wa a ngi wɔlɔyei kɛɛ Ngewɔ gbaya wai tia ngi malikeisia.

²⁷Kɛɛ gbɛɛ ngi hugɛ a wue kɛ nungaa lɛɛnga lɔ looni mbei tɛɛ haa kɛlee ti Ngewɔ Mahayɛi lɔ.”

²⁸ Njii wayakpa lɛnga njɛpɛi jisia lengɔi wooma, Yesu i Pita wumbuilɔ kɛɛ Jɔn kɛɛ Jemisi tia tieni ti lɛ ngiye yila hu Ngewɔ vɛliva.

²⁹Kia i yɛ Ngewɔ vɛlima, kɛ i maluvenga, ngi malomɛi a voo numu yama ɛɛ lo ma.

³⁰Ngama kɛ hindo fele ti yɛnga ngi gbla tia tieni ta yɛpɛ. Mojisi tia Ilaija yɛla,

³¹ti wani aijɛnɛ yeenɔlɔi i ti ma, ta yɛpɛ tia Yesu-ni kɔloongɔ hee na ma i wama piema Jelusalɛm.

³²Njii wa i leweilɔ a Pita tia ngi mbaangɛisia kɛɛ kia ti wuni ti Yesu nɔlɔi lɔilɔ kɛɛ hindo felei nasia tia tieni ti yɛ looni.

³³Kia yeehingeisia tia Yesu-ni ti luahu i yɛ gɔlɛma, Pita ndeilɔ Yesu ma yɛ, “Kaamɔ, nyandengɔ wa le mu mbei! Ma bafa sawa lolɔ, yeengila i bi va, yeengila i Mojisi va, yeena i Ilaija va.” (ii yɛ kɔɔ vulii gbɛ mia i yɛ nde)

³⁴Kia lɛ i yɛ yɛpɛma, lugbu wa i heilɔ, i ti magboli, kɛ ti luwanga.

³⁵ Kɛ ngoo i gbuanga yeelugbui hu yɛ, “Nya liima Hindoloi na ngi mbumbunga ta lɔ; a wolo ngi ma!”

³⁶Kia njɛpɛ woi ji huleweni, Yesu yakpe lɔ i yɛ na. Kaalopoisia ti lagbɔilɔ yeehindei ji gbi ma, tii hugɛni a numu gbi gbɔɔ ti hulɔni.

³⁷Kia ngele wekei i woni, Yesu tia ngi gaalopo saweisia ti ngiyei yeilɔ kɛ faha wa ti ya ngi gama.

³⁸Taamɔ yila i yele gulailɔ fahii hu yɛ, “Kaamɔ! Bi lemungɔe, nya loi gbe nya hindolo yakpei!

³⁹Ngafa nyamu mia a ngi gula watii gbi, a pie a yelei gula, a gula ndɔmɛi a yɛ tijɔtijɔ, kɔkɔɛi a gbua ngi la; ta ngi gulama watii gbi tawao ɛɛ ngi gɔ gbi a lahawulo bɛɛ.

⁴⁰Ngi bi gaalopoisia manɛnɛilɔ ngɛɛ ti yeengafa nyamui gbua ngi hu, kɛɛ tii guni.”

⁴¹Yesu i kpɛmboilɔ yɛ, “Wua wu nungei jisia wuii lani gbi a Ngewɔ tawao wu kpulanga wienga kpa! Nga yee lɛmbi wu lia? Nga yee lɛmbi nya lii houma wu va?” Kɛ i ndenga taamɔi ma yɛ, “Wa a bi loi mbei.”

⁴²Ndopoi i loni wamaa kɛ ngafa nyamui i ngi gulanga ndɔmɛi, a yɛ tijɔtijɔ. Yesu i gbandɛilɔ ngafa nyamui la, i ndopoi bawo, i ngi yama ngi kɛkɛ ma.

⁴³Numui gbi ti wuhu i wuilɔ Ngewɔ gbaya wai magɛyii ji va. Hindei kpɛlɛɛ Yesu i yɛ pie i loni nungaa gbi wuhu wuma Yesu i ndeni ngi gaalopoisia ma yɛ,

⁴⁴“Wa lema ji ma ngi hugɛma a wue, numui na Nuuvu Hindoloi le, ti ngi vemaa nuuvunga ti gbayei wɛ.”

⁴⁵Kɛɛ kaalopoisia tii ji yeetomɛi gɔni. Ndɔwungɔ yɛla ti ma aako ta gu a yeembui gɔla tawao ti luwangɔ yɛla a ngi mɔlila a yeenjɛpɛi.

⁴⁶ Yesu gaalopoisia ti yɛlɔ a ndabla wie kɔlooni numui na ma numu wai le ti lia.

⁴⁷Yesu i yɛ kɔɔlɔ gbɔɔ ti gilima la, famia i ndopo wulo yila wumbuilɔ, i ngi lo gbla,

⁴⁸ i nde ti ma yɛ, “Numu gbi lekee a loko hei ndoi ji bu nya biyei hu, a loko hei nya lɔ bu kɛɛ nya lomɔi bɛɛ. Gbamaile numui na yeekuloi le wu kpɛlɛɛ ma, ta lɔ yeembawai le.”

⁴⁹Jɔn i yɛpɛilɔ yɛ, “Kaamɔ, mu taamɔ yila lɔilɔ a ngafa nyamuisia gbua nungaa hu bi biyei hu, kɛɛ mu ndeilɔ ngi ma muɛɛ i gbe ajifa mua tieni ii le mua yɛ toma bi wooma.”

⁵⁰Yesu i ndeilɔ Jɔn ma kɛɛ kaalopo wekeisia ma yɛ, “Wa ngi mabali ajifa numu gbi lekee ii gɔma a wue i wu va lɔ.”

⁵¹Kia Yesu li-gbelei aijɛnɛ i laalani kpla, i ngi lii huyiliilɔ liva Jelusalɛm.

⁵²I tutunga loilɔ ngi gulɔ gbatɛva Samelia vula yila hu;

⁵³kɛɛ yeefulei hubleisia tii lumani aa foo na ajifa i yɛ lailɔ ke kɛ i lima Jelusalɛm lɔ.

⁵⁴ Kia ngi gaalopoisia, Jemisi kɛɛ Jɔn, ti ji hulɔni kɛ ti ndenga tɛɛ, “Ndemɔi, bi longɔe mu ngɔmbui loli i gbua aijɛnɛ i ti gbi jukulu?”

⁵⁵Yesu i gbandɛilɔ ti la.

⁵⁶Kɛ tia ngi gaalopoisia ti lewenga ti li fuula weka hu.

⁵⁷Kia ti yɛ lima pelei hu, taamɔ yila ndeilɔ Yesu ma yɛ, “Ngi tomaa bi wooma hinda gbi lekee ba li na.”

⁵⁸Yesu ndeilɔ ngi ma yɛ, “Ndoweisia lɔ nyamgbeisia yeya tawao teisia lɔ ŋɔningɛisia yeya, kɛɛ Nuuvu Hindoloi ta hinda gbi ii ngi yeya lava na i lɛɛvu.”

⁵⁹Yesu ndeilɔ taamɔ wekei ma yɛ, “To nya wooma.” Kɛɛ yeetaamɔi na i ndeilɔ yɛ, “Kaamɔ, gbɛɛ ngi yama ngi nya kɛkɛ gbɔwu pɛiŋ.”

⁶⁰Yesu i poteilɔ yɛ, “Hablaa ti ti nda womɛisia gbɔwu. Bia li bi Ngewɔ Mahayɛi hinda hugɛ.”

⁶¹ Taamɔ wekei i ndeilɔ Yesu ma yɛ, “Nga tolɔ bi wooma Kaamɔ, kɛɛ gbɛɛ ngi li ngi vɛli nya bondeisia ma.”

⁶²Yesu ndeilɔ ngi ma yɛ, “Numu gbii tɔtoni a mbei wula, i jɔsɔ ngi wooma gbela ma, ii gbekpeni Ngewɔ Mahayɛi hu va.”