Read Ngowili Yekpei Numu Kpɛlɛɛ Va JƆN 1 Bible Online

JƆN 1 - Ngowili Yekpei Numu Kpɛlɛɛ Va bible

JƆN 1

¹Pɛiŋ wɔɔ Ngewɔ i yaa hani gbi gbatɛ, numui na ti yɛ toli a Njiɛi i yɛ na lɔ. Tia Ngewɔ lɔ ti yɛ heini tawao tia Ngewɔ ti yɛ yakpe.

²Hindei gbi lɔto-gbelei wɔɔ, Njiɛi tia Ngewɔ ti yɛ na lɔ.

³Ngewɔ i hanii gbi gbatɛni a Njiɛi loko lɔ, tawao hanii gbi Ngewɔ i kpatɛni yeengila bɛɛ ii gbatɛni ngi wooma.

⁴Ndɛvui i gbuani yee-Njiɛi hu lɔ i veni fuuhani gbi wɛ tawao yeendɛvui ji lɔ i wani a foofo nuuvu va.

⁵Yeefofoi a voolɔ kpindi hu tawao kpindi ii yaa guni aa ndufe.

⁶ Ngewɔ i ngi lutu yila loilɔ, ngi laa a Jɔn,

⁷yeefofoi hinda hugɛva a nuuvungaa, aako numui gbi ti yeengowili yekpei mɛni, ti la la.

⁸Ta ii le aa yɛ a yeefofoi, kɛɛ i wɛilɔ fofoi hinda hugɛva.

⁹Fofoi yeekpekpei vulii mia, na a wa dunyei hu i voo nuuvu kpɛlɛɛ ma.

¹⁰Njiɛi ji i yɛlɔ dunyei hu, kɛɛ kia bɛɛ Ngewɔ i dunyei gbatɛni a ngi loko lɔ, na hu gbi dunyei ii ngi gɔni.

¹¹I wɛilɔ ngi nda lɔlei vulii hu, kɛɛ ngi nda bondeisia vulii tii loko heini ngi bu.

¹²Kɛɛ nasia gbi ti loko heini ngi bu, i kpaya veilɔ ti wɛ wotevaa a Ngewɔ leengeisia.

¹³Tii woteni a Ngewɔ leengeisia kia nuuvunga ta ti gbɔugbɔu ŋamɛi yeendeengɛisia le la, tawao a nuuvu hugbatɛ ii le ɔɔ aa hindo liima hu we, kɛɛ Ngewɔ vulii lɔ i yɛni a ti Kɛkɛ.

¹⁴Njiɛi i woteilɔ a nuuvu, i hei mu lia, ngi lavengɔ a ngauwanda kɛɛ tɔnya. Mu ngi wɔlɔyei lɔnga, ngɔlɔyɛi na i majɔɔni wɔɔ jifa Kɛkɛi Hindolo yakpei a ngie.

¹⁵(Jɔn i seli wuailɔ ngi va, a hee la yɛ, “Ji lɔ ngi yɛ ngi ma ji ngi ndeni ngɛɛ, ‘Numui na i wama nya wooma i leweni nya ma polouŋ ajifa i yɛ na lɔ pɛiŋ ti yaa nya le.’ ”)

¹⁶ajifa taa wɔɔ gba mu gbi lubama pupungɔ maahu a lubɛi na a gbua ngi Yewɔya lavengɔi hu.

¹⁷Ngewɔ i Saweisia veni a Mojisi loko lɔ kɛɛ i ngauwandei tia tɔnyɛi veni a Yesu, Ngewɔ Maha Heingɔi, loko lɔ.

¹⁸Numu gbi ii yaa Ngewɔ lɔni wɔɔ gba; ngi Hindolo yakpei na tia ta ti yaakpe tawao i kɛkɛi gblanga tamia i ngi yɛyii gɛnga a mue gbalauŋ.

¹⁹Juuisia ti mahublɛi nasia ti yɛ Jelusalɛm ti Saa Gbuablɛisia kɛɛ Livaiblɛisia lɛɛnga loilɔ Jɔn gama ngi mɔliva tɛɛ, “Numu laasii yeegbɛ lɔ a bie?”

²⁰Jɔn ii gangani a ti mɔli gbɛmbolaa; i ndeilɔ leeŋ kpawama yɛ, “Nya ii le nga yɛ a Mahɛi na Ngewɔ i Lahei wumbuni wɔɔ njooyovaa, Juuisia ta toli a Ngewɔ Maha Heingɔi.”

²¹ Kɛ ti ngi mɔlinga tɛɛ, “Ye lɔ hɔɔ a bie? Ilaija lɔ a bie?” Jɔn kpɛmboilɔ yɛ, “Ta yaa a nge.” Ti gbɔma ngi mɔlilɔ tɛɛ, “Ngewɔ lutui lɔ a bie mu yɛ kulɔ gbema?” Kɛ i ndenga yɛ, “Sawo.”

²²Kɛ ti ndenga na ngi ma tɛɛ, “Ye lɔ hɔɔ a bie? Bi hinda hugɛ a mue aako mu gu mu gona nasia ma ti mu loni. Bɛɛ gbɛ kɔloongɔ bia yekpe ma?”

²³I kpɛmboilɔ yɛ, “Ngi yɛni lekee a numu yila woi lɔ a hee la ndɔgbɔ lambɛi ma yɛ, ‘A Ndemɔi jia-welei wɔna,’ ” kia Ngewɔ lutui Aisaya i ndeni la wɔɔ.

²⁴Farisiisia lɔ ti tutui jisia loni.

²⁵Ti Jɔn mɔlilɔ na tɛɛ, “Gbɛe hɔɔ ba nungaa wua, ina bia ii le baa yɛ a Ngewɔ Maha Heingoi, ɔɔ Ilaija ɔɔ Ngewɔ lutui?”

²⁶Jɔn i kpɛmboilɔ yɛ, “Nga nungaa wua a njɛi lɔ; kɛɛ numu lɔ mbei wu lia wuii ngi yɛyii gɔɔ;

²⁷tamia i wama nya wooma, ngi gɔwɛi vulii ngii gbekpeni fulova.”

²⁸Ji i wieni Bɛtani lɔ, Jɔdan wooma a foloi hiye-welei hu wee, mia Jɔn i yɛ nungaa wua na.

²⁹Folo wekei ma Jɔn i Yesu lɔilɔ a wa ngi gama, kɛ i ndenga yɛ, “Ngewɔ Balaloi gbe, na i wama dunyamableisia gbi ti jumbuisia wumbuma!

³⁰Ji lɔ ngi yɛ ngi ma ji ngi ndeni ngɛɛ, ‘Hindo lɔ wama nya wooma ngi lewengɔ nya ma polouŋ, ajifa i yɛ na lɔ pɛiŋ ti yaa nya le.’

³¹Nya vulii ngii yɛ ngi gɔɔ kɛɛ aako Isrɛlbleisia ti ngi gɔɔ, famia ngi wani nga nungaa wua a njɛi.”

³²Jɔn i seli wuailɔ yɛ, “Ngi Ngewɔ Yafei lɔilɔ a gbua ngelegoohu a yei kia mbomukuloi na, i hei ngi wumba.

³³Nya vulii ngii yɛ ngi gɔɔ; kɛɛ Ngewɔ na i nya looni yɛ ngi nungaa wua a njɛi, i ndeilɔ pɛiŋ nya ma yɛ, ‘Numui na ba Ngafei lɔ i yei i hei ngi wumba, ta lɔ a nungaa wua a Ngewɔ Yafei.’

³⁴Ngi hulɔnga, faale ngi selinga kɛ ta lɔ Ngewɔ Hindoloi le.”

³⁵Kia ngele wekei i woni, Jɔn tia ngi gaalopo fele ti yɛlɔ gbɔma looni;

³⁶kia i Yesu lɔni a lewe ti gblanga kɛ i ndenga yɛ, “Ngewɔ Balaloi gbe mia!”

³⁷Ngi gaalopo feleisia ti ji mɛnilɔ kɛ ti tonga Yesu ma.

³⁸Yesu i woteilɔ i ti lɔ ta to ngi ma kɛ i ti mɔlinga yɛ, “Gbɔɔ wu kɔkɔlima?” Kɛ ti ngi mɔlinga tɛɛ, “Rabai (yeembui lɔ a Kaamɔ), bi heini mi lɔ?”

³⁹Kɛ i ndenga ti ma yɛ, “A wa wu tɔ.” Ti liilɔ ti ngi heimi lɔ, tia tieni ti luva na kpɛiŋ, jifa kpɔkɔvolei hitingɔ yɛla na.

⁴⁰Nasia feleisia ti mɛnini Jɔn a yɛpɛ, ti toni Yesu ma, yeengila mia wɔɔ a Andru, Saimɔn Pita ndewei.

⁴¹I ngi ndewei Saimɔn gɔkɔlilɔ ngaama i nde ngi ma yɛ, “Mu numui na lɔnga Ngewɔ Maha Heingɔi a ngie.”

⁴²Kɛ i wanga a ngie Yesu gama. Yesu i Saimɔn gbeilɔ yɛ, “Saimɔn lɔ a bie, Kenɛi Jɔn loi. Bi lɛi mia na a Sifas” (mbiyɛi ji tia Pita ti yakpe, yeembui a Fawa-Gɔtii).

⁴³Kia ngele wekei i woni, Yesu i ngi lii huyiliilɔ liva Galili. Kɛ i Filipi malenga, i nde ngi ma yɛ, “To nya ma!”

⁴⁴(Filipi i gbuani Bɛtsaida lɔ, Andru tia Pita ti yeetaahu.)

⁴⁵Filipi i Nataniɛl maleilɔ, i nde ngi ma yɛ, “Mu numui na lɔnga Mojisi i ngi hinda nyɛini wɔɔ Sawa Gɔlɛi hu, Ngewɔ lutuisia bɛɛ ti nyɛi. Tamia a Yesu Nasalɛtimɔi, Josɛfi hindoloi.”

⁴⁶Nataniɛl ndeilɔ ngi ma yɛ, “Hinda yekpe gbi a gulɔ i gbua Nasalɛti?” Filipi ndeilɔ ngi ma yɛ, “Wa bi tɔ.”

⁴⁷Yesu i Nataniɛl lɔilɔ a wa ngi gama kɛ i yɛpɛnga kɔloongɔ ngi ma yɛ, “Isrɛlmɔi vulii lɔ, kaasoo gbi ii ngi hu!”

⁴⁸Nataniɛl i ngi mɔlilɔ yɛ; “Bi yee pieni bi nya gɔni?” Yesu i kpɛmboilɔ yɛ, “Pɛiŋ Filipi i yaa bi loli, ngi bi lɔilɔ ji bi yɛ figi wulii bu.”

⁴⁹Kɛ Nataniɛl i potenga yɛ, “Kaamɔ, Ngewɔ Hindoloi lɔ a bie! Isrɛlbleisia ti Mahɛi lɔ a bie!”

⁵⁰Yesu i ndeilɔ ngi ma yɛ, “Jifa ngi ndeni ngɛɛ ngi bi lɔilɔ figi wulii bu faa mia bi langa a nge? Ba hinda waawangaa hulɔlɔ tewengɔ ji ma.”

⁵¹ Kɛ i ndenga ti ma yɛ, “Gbɛɛ ngi tɔnyɛi hugɛ a wue: wa tɔlɔ ngelegoohu i lawo, Ngewɔ malikeisia ta lɛ ta yei numui na gama Nuuvu Hindoloi le.”