Read Ngowili Yekpei Numu Kpɛlɛɛ Va JƆN 10 Bible Online

JƆN 10 - Ngowili Yekpei Numu Kpɛlɛɛ Va bible

JƆN 10

¹“Gbɛɛ ngi tɔnyɛi hugɛ a wue, numui na ɛɛ wuaa mbalangɛisia ti kulii hu a yeendamɛi wee, kɛɛ a windɛ kunɛ i wuaa a pele weka yɛni a kapumɔ lɔ kɛɛ humamɔ.

²Kɛɛ numui na a wuaa a yeendamɛi wee, ta lɔ mbala mahugbemɔi le.

³Mbala-kulii mahugbemɔi a ndawolɔ ngi wɛ tawao mbalangɛisia ta ngi woohu gɔɔlɔ. A ngi nda balangɛisia lolilɔ a ti biyɛi, i gbua a tie.

⁴I gbuangaa a ngi nda balangɛisia gbi, a loolɔ ti gulɔ tawao ta toolɔ ngi ma ajifa ti ngi woohu gɔɔlɔ.

⁵Tɛɛ too hota ma, ta wilalɔ ngi ma ajifa ti hotangaa ti woohu gɔɔlɔ.”

⁶Dɔmii ji lɔ Yesu i kpuani ti wɛ kɛɛ tii na bugɔni i yɛ nde ti ma.

⁷Faale, Yesu i gbɔma ndeilɔ ti ma yɛ, “Gbɛɛ ngi tɔnyɛi hugɛ a wue, nya wiengɔe kia kulii lamɛi na mbalangɛisia va.

⁸Nasia gbi ti wani nya gulɔ humablaa mia a tie kɛɛ kapublaa; tawao mbalangɛisia ti woo ii yɛ ti ma.

⁹Nya wiengɔe kia pɛlei lamɛi na; numu gbi i wuaangaa a nya hu wee, a bawolɔ tawao a wuaalɔ a gbua, a mɛlima yekpe majɔɔ.

¹⁰Humamɔi ta a wa lekee humɛi wieva lɔ kɛɛ paa wiela kɛɛ hunyanila; nya ngi waalɔ aako ti ndɛvu majɔɔ tawao ti majɔɔ ndavengɔ kpauŋ.

¹¹“Nya lɔ mbala mahugbemɔ yekpei a nge. Mbala mahugbemɔ yekpei a lumalɔ i ngi lɛɛvui ve ngi balangɛisia va.

¹²Pawa yengemɔi ta mbala mahugbemɔi yaa a ngie tawao mbalangɛisia tii yɛni a ngi woo; a fula huɛi lɔlɔ a wa, i mbalangɛisia lo, i lewe a piimɛ. Fula huɛi a walɔ i mbalɛi yeengila hou, i yeepekeisia huvaya.

¹³Pawa yengemɔi a lewelɔ a piimɛ ajifa pawa yengemɔ gbama a ngie tawao ii gbeweni gbi mbalangɛisia va.

¹⁴Mbala mahugbemɔ yekpei a nya lɔ; ngi nya nda balangɛisia gɔɔlɔ tawao nya ndɛisia ti nya gɔɔlɔ,

¹⁵ kia nya Kɛkɛi i nya gɔngɔ la, nya bɛɛ ngi nya Kɛkɛi gɔɔngɔ; tawao nga nya lɛɛvui velɔ nya balangɛisia va.

¹⁶Tawao mbala wekangaa lɔ nya yeya tii kulii ji hu; mahoungɔ ngi wa a tia bɛɛ, ti golo nya layie bu. Na wiengaa, mbala-gulu yakpe lɔ a yɛ na kɛɛ mbala mahugbemɔ yakpe.

¹⁷“Sabui ji va lɔ nya Kɛkɛi longɔ a nge ajifa nga luma ngi nya lɛɛvui ve, aako ngi mbumbu gbɔma.

¹⁸Numu gbi ɛɛ kpua nya yeya, nya vulii lɔ nga fe a nya nyɛkɛ. Kpaya lɔ nya wɛ ndava tawao kpaya lɔ nya wɛ mbumbuva gbɔma. Ji mia nya Kɛkɛ i ndenga nya ma yɛ ngi pie.”

¹⁹Njɛpɛi jisia ti pieilɔ Juuisia ti bla.

²⁰Numu gboto ti ndeilɔ tɛɛ, “Ngafa nyamu lɔ ngi hu tawao ngi gbowangɔe; gbɛe wa wolo ngi ma?”

²¹Pekeisia ti ndeilɔ tɛɛ, “Numui na ngafa nyamu i ngi hu ɛɛ njɛpɛ bondei jisia le. Ngafa nyamu a gulɔ i pie pumumɔ i hinda lɔ?”

²²Ngewɔ Wɛlei loko wuaala Ngewɔ yeya yeekomɛi i hitiilɔ ma Jelusalɛm;

²³kɔlɛ-kpelei yɛla tawao Yesu i yɛlɔ Ngewɔ Wɛlei bu, a lɛ a yei sɛmɛɛ laalongɔi na bu ta toli a Sɔlɔmɔn Jɛmɛi.

²⁴Faale Juuisia lɛɛnga ti yandɔɛilɔ ti ngi gaala, ti ngi mɔli tɛɛ, “Bi yee mu lɛmbima kiti hu a ji bɛɛ tɔnyɛi le mu ma? Hugɛ a mue leeŋ ina bia lɔ Ngewɔ Maha Heingɔi a bie.”

²⁵Yesu i kpɛmboilɔ yɛ, “Ngi wilanga a ndela wu ma kɛɛ wɛi luma wua la a nge. Kabande hindei jisia ngi piema nya Kɛkɛ biyɛi hu, ta nya jelilɔ;

²⁶kɛɛ wuii lani a nge ajifa wuii yɛni a nya balangaa.

²⁷Nya balangɛisia ti nya woohu gɔɔlɔ tawao ngi ti gɔɔlɔ; ta tolɔ nya ma,

²⁸tawao nga ti gɔlɔ a kunafɔ lɛɛvui. Kunafɔ tɛ jukulu tawao numu gbi ɛɛ ti gbua nya yeya.

²⁹Nya Kɛkɛ na i ti veni nya wɛ i leweni numu gbi ma tawao numu gbi ɛɛ gu aa ti gbua nya Kɛkɛ yeya.

³⁰Mua nya Kɛkɛ mu yakpe.”

³¹Kɛ Juuisia ti gbɔma kɔtiisia wumbunga ngi hɔwɔhɔwɔva la.

³²Yesu i poteilɔ i nde ti ma yɛ, “Nya Kɛkɛ i ngenge yekpe gboto venga nya wɛ ngi pienga wu yaama; yeengengei jisia yeegbɛ va lɔ wu longɔ wu nya hɔwɔhɔwɔ?”

³³ Juuisia ti kpɛmboilɔ tɛɛ, “Muii bi hɔwɔhɔwɔma ngenge yekpeisia yeengila bɛɛ va; mu bi hɔwɔhɔwɔma Ngewɔ bɛlɛ nyaniva lɔ! Ajifa nuuvulɔ a bie kɛɛ biaa bia yekpe wotema a Ngewɔ.”

³⁴Yesu i poteilɔ i nde ti ma yɛ, “Nyɛingɔi wu jawa gɔlɛi hu kɛ Ngewɔ ndeilɔ yɛ, ‘Ngewɔngaa lɔ a wue.’

³⁵Ina nungei nasia Ngewɔ layie i wani ti gama Ngewɔ i ti laheilɔ a Ngewɔngaa (tawao Ngewɔ layie ɛɛ nyani,)

³⁶wa ndelɔ numui na va Ngewɔ Kɛkɛi i vɛlini ngi ma i ngi yoyoo dunyei hu wɛɛ ‘Biaa Ngewɔ bɛlɛ nyanima’ jifa ngi ndeni ngɛɛ ‘Ngewɔ Hindoloi lɔ a nge?’

³⁷Ina ngii nya Kɛkɛ yengeisia wiema kɛ waa la a nge,

³⁸Kɛɛ ina nyaa ti wiema, kia bɛɛ wuii lani a nge, a la a yeengengeisia, aako wu hugɔɔ gbalauŋ kɛ kɛkɛi lɔ nya hu, nya bɛɛ ngi Kɛkɛi hu.”

³⁹Ti lapilɔ gbɔma ngi houva kɛɛ i gbuailɔ ti yeya i li.

⁴⁰ Kɛ Yesu i gbɔma yamanga, i njɛi lewe, i li hindei wɔɔ Jɔn i yɛ nungaa wua na, i hei na.

⁴¹Nungaa gboto ti wɛilɔ ngi gama, tawao ti ndeilɔ tɛɛ, “Jɔn ii kabande hindangaa wieni kɛɛ na kpɛlɛɛ i ndeni kɔlooni taamɔi ji ma tɔnya le.”

⁴²Ti gbotongɔ ti leilɔ a ngie na.